Moize zingaka bamvula 40 na Madiani. Yandi kwelaka mpi butaka bana. Kilumbu mosi, ntangu yandi vandaka kukeba mameme na yandi pene-pene ya Ngumba ya Sinai, yandi monaka diambu mosi ya kuyituka. Nti ya bansende vandaka kupela tiya, kansi yo vandaka kuzika ve! Ntangu Moize kwendaka pene-pene sambu na kubakisa mambu mbote, yandi waka ndinga mosi na kati ya nti ke tuba nde: ‘Moize! Kupusana ve pene-pene. Katula basandale na nge sambu nge me telama na ntoto ya santu.’ Yehowa muntu vandaka kutubila yandi na nzila ya wanzio.

Moize waka boma, yo yina yandi fikaka luse. Ndinga tubaka nde: ‘Mono me mona bampasi ya bantu ya Izraele. Mono ta gulusa bo na maboko ya bantu ya Ezipte mpi mono ta nata bo na ntoto ya mbote. Nge muntu ta twadisa bantu na mono ntangu bo ta basika na Ezipte.’ Keti nge ke yindula ve nde diambu yai yitukisaka Moize?

Moize yulaka nde: ‘Mono ta tuba nki kana bantu ku yula mono nani me tinda mono?’ Nzambi vutulaka nde: ‘Songa bo nde Yehowa, Nzambi ya Abrahami, Nzambi ya Izaki, mpi Nzambi ya Yakobi muntu me tinda nge.’ Na nima Moize tubaka nde: ‘Ebuna kana bo buya kuwa mono?’ Yehowa pesaka Moize nzikisa ya ke monisa nde yandi ta sadisa yandi. Yandi songaka Moize na kulosa nti na yandi na ntoto. Na nima nti yina kumaka nioka! Ntangu Moize simbaka nioka yina na mukila, yo kumaka diaka nti. Yehowa tubaka nde: ‘Ntangu nge ta sala kidimbu yai, yo ta ndimisa nde mono me tinda nge.’

Moize tubaka nde: ‘Mono me zaba ve kutuba mbote.’ Yehowa silaka yandi nde: ‘Mono ta songa nge mambu ya nge ta tuba, mpi mono ta tinda mpangi na nge Aroni sambu na kusadisa nge.’ Sambu Moize zabaka nde Yehowa kele ti yandi, yandi bakaka nkento na yandi ti bana na yandi mpi bo vutukaka na Ezipte.

Bo pusaka bantu ya Izraele na kusala ngolo bonso bampika. Yehowa tindaka Moize ti Aroni na Farao sambu na kupesa yandi nsangu yai: ‘Pesa bantu na mono nzila ya kukwenda, sambu bo sambila mono na ntoto ya zelo na zelo.’ Farao vutulaka na lulendo nde: ‘Mono ke tula ve dikebi na mambu yina Yehowa ke tuba, mpi mono ta pesa ve bantu ya Izraele nzila ya kukwenda.’ Na nima Farao pusaka bo na kusala diaka ngolo kuluta. Yehowa zolaka kupesa Farao dilongi mosi. Keti nge me zaba nki mutindu yandi salaka yo? Yandi pesaka bantu ya Ezipte bampasi kumi. Yehowa songaka Moize nde: ‘Farao ke wa mono ve. Na suka, yandi ta vanda na Nzila ya Nile. Kwenda kukutana ti yandi mpi songaka yandi nde sambu yandi me pesaka ve bantu na mono nzila ya kukwenda, masa yonso ya Nile ta kuma menga.’ Moize lemfukaka mpi kwendaka kukutana ti Farao. Farao vandaka kutala ntangu Aroni bulaka nti na yandi na Nile, ebuna masa na yo kumaka menga. Nzadi yantikaka kubasisa nsudi, bambisi ya masa fwaka, mpi masa ya mbote sambu na kunwa vandaka diaka ve na Nile. Kansi Farao buyaka na kupesa bantu ya Izraele nzila ya kukwenda.

Bilumbu nsambwadi na nima, Yehowa tindaka diaka Moize na kupesa Farao nsangu yai: ‘Kana nge pesa ve bantu na mono nzila ya kukwenda, Ezipte ta fuluka ti makototo.’ Aroni tombulaka nti na yandi, ebuna makototo yantikaka kufika insi ya Ezipte. Bantu monaka makototo na banzo na bo, na bambeto na bo, mpi na babolo na bo. Makototo vandaka bisika yonso! Farao lombaka Moize na kubondila Yehowa sambu yandi sukisa mpasi yina. Farao silaka nde yandi ta pesa bantu ya Izraele nzila ya kukwenda. Yo yina Yehowa sukisaka mpasi yango, mpi bantu ya Ezipte vukisaka makototo ya kufwa, mpi bo salaka bita mingi. Insi na bo yantikaka kubasisa nsudi ya mbi. Kansi, mbala yai diaka, Farao pesaka ve bantu nzila ya kukwenda.

Na nima, Yehowa songaka Moize nde: ‘Aroni fwete bula nti na yandi na ntoto, ebuna putulu ta kuma bambembele.’ Na mbala mosi bambembele kumaka bisika yonso. Bantu ya Farao ya nkaka songaka yandi nde: ‘Mpasi yai me katuka na Nzambi.’ Kansi Farao pesaka ve bantu ya Izraele nzila ya kukwenda.