Moize ti Aroni kwendaka kusonga Farao nsangu yai ya Nzambi: ‘Kana nge pesa ve bantu na mono nzila ya kukwenda, mono ta tinda biningi-ningi na insi na nge.’ Bimvuka ya biningi-ningi kotaka na banzo ya bantu ya Ezipte, ya bamvwama ti ya bansukami. Insi ya mvimba fulukaka ti biningi-ningi. Kansi na insi ya Goshene, kisika bantu ya Izraele vandaka kuzinga, ata kiningi-ningi mosi ve vandaka kuna. Yantika na mpasi ya iya, bampasi yina landaka vandaka kusimba kaka bantu ya Ezipte. Farao bondilaka nde: ‘Bondila Yehowa sambu yandi katula bima yai. Ebuna beno lenda kwenda.’ Kansi ntangu Yehowa katulaka biningi-ningi, Farao sobaka mabanza na yandi. Keti Farao ta baka dilongi?

Yehowa tubaka nde: ‘Kana Farao kupesa ve bantu na mono nzila ya kukwenda, bambisi ya bantu ya Ezipte ta bela mpi ta fwa.’ Kilumbu yina landaka, bambisi yantikaka kufwa. Kansi bambisi ya bantu ya Izraele fwaka ve. Farao vandaka kaka ntu-ngolo, mpi yandi pesaka bo ve nzila.

Ebuna Yehowa songaka Moize na kukwenda diaka na Farao mpi na kulosa putulu ya tiya na zulu. Putulu ya tiya kumaka mfututu yina fulukaka na mupepe mpi kotilaka bantu ya Ezipte yonso. Putulu basisaka bivimbu ya kupola na bantu yonso ya Ezipte mpi na bambisi na bo. Ata mpidina, Farao buyaka kupesa bantu ya Izraele nzila ya kukwenda.

Yehowa tindaka diaka Moize na kupesa Farao nsangu yai: ‘Keti nge ke buya kaka na kupesa bantu na mono nzila ya kukwenda? Mbasi, mvula ya matadi ta noka na insi ya Ezipte.’ Kilumbu yina landaka, Yehowa tindaka mvula ya matadi, makelele ya nzasi, mpi tiya. Yo vandaka mvula ya kuluta ngolo yina bantu ya Ezipte me monaka. Banti yonso ti bimenina yonso bebaka, kansi yina vandaka na Goshene bebaka ve. Farao tubaka nde: ‘Bondila Yehowa sambu yandi sukisa yo! Ebuna beno lenda kwenda.’ Kansi ntangu mvula ya matadi mpi mupepe ya ngolo manaka, Farao sobaka mabanza na yandi.

Na nima Moize tubaka nde: ‘Ntangu yai bampasu ta dia bima yina mvula ya matadi bikisaka.’ Bamilio ya bampasu diaka bima yonso yina bikalaka na bilanga mpi na banti. Farao bondilaka nde: ‘Bondila Yehowa sambu yandi katula bampasu yai.’ Kansi ata ntangu Yehowa manisaka bampasu, Farao vandaka kaka ntu-ngolo.

Yehowa songaka Moize nde: ‘Tandula diboko na nge na zulu.’ Na mbala mosi, zulu ya mvimba kumaka ndombe. Bilumbu tatu, bantu ya Ezipte vandaka kumona ve ata kima to muntu mosi. Bantu ya Izraele mpamba vandaka ti nsemo na banzo na bo.

Farao tubilaka Moize nde: ‘Nge ti bantu na nge, beno lenda kwenda. Kansi beno bikisa kaka bambisi na beno awa.’ Moize tubaka nde: ‘Beto fwete nata bambisi na beto sambu beto ta pesa yo bimenga na Nzambi na beto.’ Farao waka makasi mingi. Yandi tubaka na ndinga ya ngolo nde: ‘Katuka na ntwala na mono! Kana mono mona nge diaka, mono ta fwa nge.’

Moize silaka Farao nde yandi ta sosa diaka ve kumona yandi. Kansi na ntwala nde yandi kwenda, yandi songaka Farao nde: ‘Na midi ya mpimpa, mwana yonso ya ntete na Ezipte, banda na mwana ya Farao tii na bana ya bampika, ta fwa.’

Yehowa songaka bantu ya Izraele na kudia madia mosi ya sipesiali. Yandi tubaka nde: ‘Beno fwa mwana-dimeme to ya nkombo ya kele ti mvula mosi, mpi beno tula ndambu ya menga na yo na dibaya ya zulu ya kielo na beno. Beno yoka yo, mpi beno dia kumosi ti dimpa ya kukonda levire. Beno lwata bilele, beno lwata basandale na beno, beno vanda ya kuyilama na kukwenda. Na mpimpa yai, mono ta katula beno na kimpika.’ Keti nge lenda yindula kiese yina bantu ya Izraele vandaka na yo?

Na midi ya mpimpa, wanzio ya Yehowa kwendaka na konso nzo na Ezipte. Na banzo yina vandaka ve ti menga na mabaya ya kielo na yo, mwana ya ntete fwaka. Kansi wanzio lutaka banzo yina vandaka ti menga. Na konso dibuta ya bantu ya Ezipte, ya bamvwama mpi ya bansukami, mwana na bo fwaka. Kansi ata mwana mosi ve ya bantu ya Izraele fwaka.

Ata mwana ya Farao yandi mosi fwaka. Farao kukaka diaka ve. Na mbala mosi yandi songaka Moize ti Aroni nde: ‘Beno telama. Beno katuka awa. Beno kwenda mpi beno sambila Nzambi na beno. Beno baka bambisi na beno mpi beno kwenda!’

Na nsi ya ngonda ya mvimba, bantu ya Izraele basikaka na Ezipte, ya kuyidika na mabuta mpi na makanda. Bantu ya Izraele vandaka babakala 600 000 ti bankento mpi bana mingi. Diaka, bantu mingi ya nkaka kwendaka ti bo sambu bo sambila mpi Yehowa. Nsuka-nsuka, bantu ya Izraele vandaka na kimpwanza!

Sambu na kuyibuka mutindu Yehowa gulusaka bo, bo diaka madia mosi ya sipesiali. Bo ke bingaka yo Paki.