Yehowa songaka Moize nde: ‘Kwisa kutombuka na mono na ngumba. Mono ta sonika bansiku na mono na matadi mpi mono ta pesa nge yo.’ Moize mataka na ngumba mpi salaka bilumbu mpi bampimpa 40 kuna. Ntangu yandi vandaka kuna, Yehowa sonikaka Bansiku Kumi na matadi mpi pesaka Moize matadi yina.

Na nima ya mwa ntangu, bantu ya Izraele yindulaka nde Moize me tina bo. Bo songaka Aroni nde: ‘Beto ke zola muntu mosi kutwadisa beto. Sadila beto nzambi!’ Aroni tubaka nde: ‘Beno pesa mono wolo na beno.’ Yandi lambaka wolo yina na tiya mpi salaka kiteki ya mwana-ngombe. Bantu tubaka nde: ‘Mwana-ngombe yai kele Nzambi na beto yina basisaka beto na Ezipte!’ Bo yantikaka kusambila mwana-ngombe ya wolo, mpi bo salaka feti. Keti yo vandaka mbi? Ee, sambu bantu silaka nde bo ta sambila kaka Yehowa. Kansi ntangu yai, bo fwaka lusilu yina.

Yehowa monaka mambu yina vandaka kusalama, mpi yandi songaka Moize nde: ‘Kulumuka na bantu yina. Bo ke lemfukila mono ve mpi bo ke sambila nzambi ya luvunu.’ Moize kulumukaka na ngumba, ti matadi zole.

Ntangu yandi kumaka pene-pene ya camp, Moize waka bantu ke yimba. Ebuna yandi monaka bo, bo ke kina mpi ke fukamina mwana-ngombe. Moize waka makasi mingi. Yandi losaka matadi zole yina na ntoto, ebuna yo pasukaka. Yandi fwaka kiteki yina na mbala mosi. Na nima yandi yulaka Aroni nde: ‘Inki mutindu bantu me ndimisa nge na kusala diambu yai ya mbi?’ Aroni tubaka nde: ‘Kuwa ve makasi. Nge me zaba mutindu bantu yai ke vandaka. Bo vandaka ti mfunu ya nzambi, yo yina mono losaka wolo na tiya ebuna mwana-ngombe yai basikaka!’ Yo lombaka ve nde Aroni kusala diambu yina. Moize vutukaka na ngumba mpi bondilaka Yehowa na kulolula bantu.

Yehowa lolulaka bantu yina vandaka ti luzolo ya kulemfukila yandi. Keti nge ke mona mutindu yo vandaka mfunu nde bantu ya Izraele kulanda lutwadisu ya Moize?

Ntangu Moize vandaka na Ngumba ya Sinai, Yehowa songaka yandi na kutunga tenta mosi ya sipesiali, ya bo ke bingaka nzo-tenta, kisika bantu ya Izraele zolaka kusambila yandi. Bo vandaka ti mwaye ya kunata nzo-tenta yina ntangu bo ke kwenda kutambula.

Yehowa tubaka nde: ‘Songa bantu na kupesa bima yina bo lenda pesa sambu na kutunga nzo-tenta.’ Bantu ya Izraele pesaka wolo, arza, kwivre, matadi ya ntalu, mpi bima ya makutu. Bo pesaka mpi lene, lino, mpusu ya bambisi, mpi bima mingi ya nkaka. Bo vandaka kupesa bima mingi kibeni yo yina Moize songaka bo nde: ‘Beto kele na bima mingi! Beno nata diaka ve bima ya nkaka.’

Babakala ti bankento ya mayele sadisaka na kutunga nzo-tenta. Yehowa kumisaka bo mayele sambu na kisalu yina. Bankaka salaka bansinga, tungaka bilele, to salaka badese. Bantu ya nkaka yidikaka matadi, salaka bisalu ya wolo, to zengaka mabaya.

Bantu tungaka nzo-tenta mutindu Yehowa songaka bo. Bo salaka rido ya kitoko sambu na kukabula nzo-tenta na bitini zole, Kisika ya Santu mpi Kisika ya Kuluta Santu. Na Kisika ya Kuluta Santu, bo tulaka sanduku ya kuwakana. Bo salaka yo na mabaya ya akasia mpi wolo. Na Kisika ya Santu bo tulaka kima ya wolo ya kutudila minda, mesa, mpi mesa-kimenga ya kuyoka ndumbu. Dilonga ya kwivre mpi mesa-kimenga ya nene vandaka na kibansala. Sanduku ya kuwakana vandaka kuyibusa bantu ya Izraele lusilu ya bo salaka ya kulemfukila Yehowa. Keti nge me zaba kana kuwakana kele nki? Yo kele lusilu mosi ya mfunu.

Yehowa ponaka Aroni ti bana na yandi sambu bo sala na nzo-tenta bonso banganga-nzambi. Yo vandaka kulomba nde bo keba yo mpi bo pesaka bimenga kuna sambu na Yehowa. Nganga-nzambi ya nene, Aroni, mpamba muntu vandaka ti nswa ya kukota na Kisika ya Kuluta Santu. Yandi vandaka kukota kuna mbala mosi konso mvula sambu na kupesa bimenga sambu na masumu na yandi, masumu ya dibuta na yandi, mpi masumu ya dikanda ya mvimba ya Izraele.

Bantu ya Izraele manisaka nzo-tenta mvula mosi na nima ya kubasika na Ezipte. Ntangu yai, bo vandaka ti kisika ya kusambila Yehowa.

Yehowa fulusaka nzo-tenta na nkembo na yandi mpi yandi salaka na mpila nde dituti kumonana na zulu na yo. Ntangu dituti vandaka na zulu ya nzo-tenta, bantu ya Izraele vandaka kubikala kisika bo vandaka. Kansi ntangu dituti vandaka kukatuka, bo vandaka kuzaba nde yo vandaka ntangu ya kukwenda. Bo vandaka kupanza nzo-tenta mpi kulanda dituti.