Inki Mutindu Bambangi ya Yehowa Ke Tadilaka Mafwa mpi Kuzika Mvumbi?
Na yina me tala diambu ya kudila bamvumbi to ya kusala mafwa, beto ke tadilaka mambu na kulanda malongi yina kele na Biblia. Biblia ke tubilaka mambu yai:
Kudila mpangi to nduku mosi ya me fwa kele mbi ve. Balongoki ya Yezu dilaka bampangi na bo yina fwaka. (Yoane 11:33-35, 38; Bisalu 8:2; 9:39) Yo yina beto ke monaka nde ntangu ya mafwa kele ve ntangu ya kusala bafeti ya lukasi. (Longi 3:1, 4; 7:1-4) Kansi, beto ke monaka nde yo kele ntangu ya kukabisa mpasi ti bantu yina me bwila mafwa.—Baroma 12:15.
Kana muntu me fwa, yandi ke zabaka diaka ve ata kima. Yo vanda beto ke zingaka na inki insi, yo vanda beto kele bantu ya inki dikanda, beto ke buyaka mambu yonso yina me katuka ve na Biblia yina bantu ke ndimaka nde, bantu yina me fwaka ke zabaka mambu mpi nde, bo lenda sala beto mbi to kusadisa beto. (Longi 9:5, 6, 10) Na mambu yina bantu ke salaka, beto lenda tanga kulala na nganda tii na suka, kudia mpi kunwa na loyenge to kusala bafeti ya lukasi, kusala nkinsi sambu na kuyibuka kilumbu yina muntu yango fwaka, kupesa bantu yina me fwaka bima ya kudia to ya kunwa, kusolula ti bo to kulomba bo na kusadisa beto, kupesa bakala to nkento yina nkwelani na yandi me fwa mpasi to kulwata mpidi. Beto ke buyaka kusala mambu yina yonso sambu na kulemfuka na nsiku yai ya Biblia ya ke tuba nde: “Beno kabwana ti bo, mpi beno yambula kusimba kima ya mvindu.”—2 Bakorinto 6:17.
Bantu yina me fwaka ta futumuka. Biblia ke longaka nde lufutumuku ta vanda mpi nde yo kele ti ntangu yina lufwa ta vanda diaka ve. (Bisalu 24:15; Kusonga 21:4) Kivuvu yai ke sadisaka beto sambu beto lutisa ve ndilu na ntangu beto me bwila mafwa, kaka mutindu yo sadisaka Bakristu ya mvu nkama ya ntete.—1 Batesalonika 4:13.
Biblia ke pesa ndongisila nde beto vanda ti kudikulumusa. (Bingana 11:2) Beto ke ndimaka ve nde ntangu ya kuzika mvumbi kele dibaku yina beto me zwa sambu na kumonisa na bantu nde, beto kele bantu ya nene to nde beto kele ti mbongo mingi. (1 Yoane 2:16) Beto ke bakaka ve bangidika sambu na kusadisa bafeti sambu na kusepedisa bantu to sambu na kusumba baserkeyi ya ntalu mingi sambu na kuzika mvumbi, mpi beto ke lwataka ve sambu na kuyitukisa bantu ya nkaka.
Beto ke pusaka mpi ve bantu na kingolo-ngolo sambu bo ndima mabanza na beto na mutindu ya kudila bamvumbi to ya kuzika yo. Na diambu yai, beto ke landaka mambu yai ya Biblia ke tuba nde: “Konso muntu na kati na beto ta samba na ntwala ya Nzambi sambu na yandi mosi.” (Baroma 14:12) Kansi, kana bo pesa beto nzila ya kusolula ti bo, beto ke tendudilaka bo mambu ya beto ke ndimaka “ti mawete mpi luzitu ya mingi.”—1 Piere 3:15.
Inki Bambangi ya Yehowa ke salaka na yina me tala kuzika mvumbi?
Kisika mvumbi ta vanda: Kana dibuta mosi me baka lukanu ya kudila mvumbi, bo lenda sala yo na kisika yina bo mosi ta pona. Yo lenda vanda na nzo ya Kimfumu, na kisika ya bo ke dilaka bamvumbi, na nzo na bo mosi, na kisika ya bo ke yokaka bamvumbi to na simetiere.
Mambu yina bo ta sala: Bo ta sala diskure mosi sambu na kupesa bantu yina mpangi na bo me fwa kikesa. Na diskure yango, bo ta tendula mambu yina Biblia ke tubaka na yina me tala lufwa mpi kivuvu ya lufutumuku. (Yoane 11:25; Baroma 5:12; 2 Piere 3:13) Diskure yango lenda sadisa beto na kuyindula bikalulu ya mbote yina muntu yina me fwa vandaka ti yo, mpi ntangu ya nkaka, yo lenda benda dikebi na malongi ya beto lenda baka na kwikama ya muntu yango.—2 Samuele 1:17-27.
Na nima, bo ta yimba nkunga mosi ya me simbama na Biblia. (Bakolosai 3:16) Na nsuka, bo ta sala kisambu sambu na kupesa bantu kikesa.—Bafilipi 4:6, 7.
Bo ke salaka diskure ya ofele mpi bo ke kongulaka ve makabu: Beto ke lombaka ve bampangi na beto mbongo sambu na kusala diskure ya kuzika mvumbi, to sambu na mambu ya nkaka na yina me tala kuzika mvumbi to kudila mvumbi. Beto ke salaka mpi ve mpidina yo vanda na balukutakanu na beto.—Matayo 10:8.
Bantu yina ta wa: Kana bo ta dila mvumbi mpi bo ta sala diskure ya kuzika mvumbi na Nzo ya Kimfumu, ata bantu yina kele ve Bambangi ya Yehowa lenda kwisa. Kiteso mosi na balukutakanu na beto, muntu yonso lenda kwisa kuwa diskure yina ta salama kuna, yo vanda yandi kele Mbangi ya Yehowa to ve.
Keti Bambangi ya Yehowa ke kwendaka na bankinsi ya kuzika bamvumbi yina mabundu ya nkaka ke sadisaka?
Konso Mbangi ya Yehowa ke bakaka lukanu yandi mosi na diambu yai na kutadila kansansa na yandi yina me longamaka na Biblia. (1 Timoteo 1:19) Kansi, beto ke kotaka ve na mabundu yina beto ke monaka nde mambu na yo ke wakana ve ti malongi ya Biblia.—2 Bakorinto 6:14-17.