Bantu ya Izraele bikisaka Ngumba ya Sinai mpi bo salaka nzietelo na ntoto ya zelo na zelo ya Parani ebuna bo kumaka na kisika ya bo ke bingaka Kadeshi. Kuna, Yehowa songaka Moize nde: ‘Tinda bantu 12, muntu mosi sambu na konso dikanda, sambu bo kwenda kutala na mayele Kanana, insi yina mono ta pesa bantu ya Izraele.’ Yo yina, Moize ponaka bantu 12 mpi tubilaka bo nde: ‘Beno kwenda na Kanana, mpi beno tala kana yo ke butaka bima mingi. Beno tala kana bantu na yo kele ngolo to ve mpi kana bo ke zingaka na batenta to na bambanza.’ Mineki 12, tanga mpi Yozue ti Kalebi, kwendaka na Kanana.

Na nima ya bilumbu 40, mineki vutukaka; bo kwisaka ti bafige, bagrenade, mpi bambuma ya vinu. Bo tubaka nde: ‘Yo kele insi ya mbote, kansi bantu na yo kele ngolo mpi bambanza na yo kele ti bibaka ya nda.’ Ebuna Kalebi tubaka nde: ‘Beto lenda nunga bo. Beto kwenda kaka sesepi yai!’ Keti nge me zaba sambu na nki Kalebi tubaka mutindu yina? Sambu yandi ti Yozue, bo vandaka kutula ntima na Yehowa. Kansi mineki kumi yina ya nkaka tubaka nde: ‘Ve! Bantu na yo kele nene; bo kele bantu ya ngolo kibeni! Beto vandaka kumonana bonso bampasu na ntwala na bo.’

Bantu ya Izraele lembaka nitu. Bo yantikaka kubokuta mpi kutuba bo na bo nde: ‘Beto pona mfumu ya nkaka mpi beto vutuka na Ezipte. Sambu na nki beto fwete kwenda kisika yina mpi bo fwa beto?’ Yozue ti Kalebi tubaka nde: ‘Beno kolama ve na Yehowa, mpi beno wa ve boma. Yehowa ta tanina beto.’ Kansi bantu ya Izraele wilaka bo ve. Bo zolaka nkutu kufwa Yozue ti Kalebi!

Yehowa salaka nki? Yandi songaka Moize nde: ‘Na nima ya mambu yonso ya mono me sala sambu na bantu ya Izraele, bo ke lemfukila mono kaka ve. Yo yina, bo ta bikala na ntoto ya zelo na zelo bamvula 40, mpi bo ta fwa awa. Kaka bana na bo ti Yozue mpi Kalebi bantu ta zinga na insi yina mono silaka na kupesa bo.’

Ntangu fioti na nima, ntangu bantu ya Izraele vandaka na ntoto ya zelo na zelo, Kora, Datani, Abirami, mpi bantu 250 ya nkaka kolaminaka Moize. Bo songaka yandi nde: ‘Beto me lemba beno! Sambu na nki nge fwete vanda mfumu na beto mpi Aroni nganga-nzambi ya nene? Yehowa kele ti beto yonso, kansi kaka ve ti nge mpi Aroni.’ Yehowa sepelaka ve. Yandi monaka nde bantu yina me kolamina yandi!

Moize songaka Kora ti bantu yina vandaka kukotila yandi nde: ‘Beno kwisa mbasi na nzo-tenta, mpi beno nata bima ya kutudila tiya ya kufuluka ti ndumbu. Yehowa ta songa beto banani yandi me ponaka.’

Kilumbu yina landaka, Kora ti bantu 250 yina kwendaka kukutana ti Moize na nzo-tenta. Kuna, bo yokaka ndumbu bonso nde bo vandaka banganga-nzambi. Yehowa songaka Moize ti Aroni nde: ‘Beno kabwana ti Kora mpi bantu na yandi.’

Kora kwendaka kukutana ti Moize na nzo-tenta, kansi Datani, Abirami, mpi mabuta na bo buyaka kukwenda. Yehowa songaka bantu ya Izraele na kuvanda ntama ti batenta ya Kora, ya Datani, mpi ya Abirami. Na mbala mosi, bantu ya Izraele katukaka. Datani, Abirami, mpi mabuta na bo telamaka na nganda ya batenta na bo. Na mbala mosi, ntoto pasukaka ebuna yo minaka bo! Na nzo-tenta, tiya basikaka mpi yokaka Kora ti bantu na yandi 250.

Na nima, Yehowa songaka Moize nde: ‘Baka nti na konso mfumu ya dikanda, mpi sonika zina na yandi na zulu na yo. Kansi na nti ya dikanda ya Levi, sonika zina ya Aroni. Tula yo na kati ya nzo-tenta, ebuna nti ya muntu yina mono me pona ta basisa bintuntu.’

Kilumbu yina landaka, Moize basisaka banti yonso mpi songaka yo na bamfumu. Nti ya Aroni basisaka bintuntu mpi bambuma ya amande ya kuyela vandaka na zulu na yo. Na mutindu yina, Yehowa ndimisaka nde yandi muntu ponaka Aroni na kuvanda nganga-nzambi ya nene.