Ntangu mineki ya Izraele kwendaka na mbanza Yeriko, bo vandaka na nzo ya nkento mosi, zina na yandi Rahabi. Ntotila ya Yeriko zabaka diambu yina mpi yandi tindaka basoda na nzo ya Rahabi. Rahabi bumbaka mineki zole yina na ludi mpi yandi tindaka basoda na ndambu ya nkaka. Yandi songaka mineki nde: ‘Mono ta sadisa beno sambu mono me zaba nde Yehowa kele ti beno mpi nde beno ta botula bwala yai. Pardo beno sila mono nde beno ta gulusa dibuta na mono.’

Mineki songaka Rahabi nde: ‘Beto ke sila nge nde beto ta sala ve mbi ata na muntu mosi yina ta vanda na kati ya nzo na nge.’ Bo tubaka nde: ‘Kanga nsinga ya mbwaki na fenetre na nge, ebuna beto ta fwa ve dibuta na nge.’

Rahabi kulumusaka mineki na nsinga na fenetre. Bo kwendaka na bangumba mpi bo bumbanaka kuna bilumbu tatu na ntwala ya kuvutuka kisika Yozue vandaka. Na nima, bantu ya Izraele sabukaka Nzadi ya Yordani mpi bo yilamaka na kubaka insi yina. Yeriko vandaka mbanza ya ntete yina bo botulaka. Yehowa songaka bo na kutambula na nziunga ya mbanza yina mbala mosi konso kilumbu na nsungi ya bilumbu sambanu. Na kilumbu ya nsambwadi, bo tambulaka na nziunga ya mbanza mbala nsambwadi. Ebuna banganga-nzambi bulaka bampungi, mpi basoda tubaka na ndinga ya ngolo kibeni. Bibaka ya mbanza bwaka! Kansi nzo ya Rahabi, yina vandaka ya kukangama na kibaka ya mbanza, bwaka ve. Rahabi ti dibuta na yandi gulukaka sambu bo tulaka ntima na Yehowa.

Nsangu ya Yeriko panzanaka na makanda yonso ya Kanana. Bantotila na bo bakaka lukanu ya kuvukana sambu na kunwanisa bantu ya Izraele. Kansi bantu ya Gibeoni salaka mambu mutindu ya nkaka. Bo kwendaka na Yozue, bo lwataka bilele ya kupasuka-pasuka, mpi bo tubaka nde: ‘Beto me katuka na insi mosi ya ntama. Beto me wa nsangu ya Yehowa mpi ya mambu yonso yina yandi me sala na Ezipte mpi na Moabi. Sila beto nde beno ta nwanisa beto ve, mpi beto ta kuma bansadi na beno.’

Yozue ndimaka bo mpi ndimaka nde bo ta nwanisa ve bantu yina. Bilumbu tatu na nima, yandi monaka nde bo vandaka ve na insi ya ntama. Bo vandaka na ntoto ya Kanana. Yozue yulaka bantu ya Gibeoni nde: ‘Sambu na nki beno kusaka beto?’ Bo vutulaka nde: ‘Beto vandaka na boma! Beto zabaka nde Yehowa Nzambi na beno ke nwana sambu na beno. Pardo beno fwa beto ve.’ Yozue lungisaka lusilu na yandi mpi bikaka bo na luzingu.

Ntangu fioti na nima, bantotila tanu ya Kanana mpi basoda na bo kaninaka bantu ya Gibeoni. Yozue ti basoda na yandi tambulaka mpimpa ya mvimba sambu na kugulusa bo. Bitumba yantikaka na suka-suka ya kilumbu yina landaka. Bantu ya Kanana yantikaka kutina na bandambu yonso. Konso kisika ya bo vandaka kutina Yehowa vandaka kubwisila bo matadi ya nene. Ebuna Yozue lombaka Yehowa na kusala nde ntangu kutelama kisika mosi. Sambu na nki yandi lombaka Yehowa na kusala yo ata ntangu me telamaka ntete ve ata mbala mosi? Yina mutindu Yozue vandaka kutula ntima mingi na Yehowa. Ntangu lalaka ve kilumbu ya mvimba tii kuna bantu ya Izraele nungaka bantotila ya Kanana mpi basoda na bo.