Na nima ya kutwadisa bantu ya Yehowa bamvula mingi, Yozue fwaka ti bamvula 110. Ntangu yandi vandaka na luzingu, bantu ya Izraele vandaka kusambila Yehowa. Kansi ntangu Yozue fwaka, bo yantikaka kusambila biteki bonso bantu ya Kanana. Sambu bantu ya Izraele fulaka ve kulanda yandi, Yehowa pesaka nzila nde ntotila mosi ya Kanana, zina na yandi Yabini, kukumisa luzingu na bo mpasi. Bantu bondilaka Yehowa sambu yandi sadisa bo. Yo yina Yehowa pesaka bo mfumu ya mpa, Baraki. Yandi zolaka kusadisa bantu na kuvutuka na Yehowa.

Debora, profete ya nkento, tindaka bantu na kubinga Baraki. Yandi vandaka ti nsangu ya Baraki yina katukaka na Yehowa: ‘Baka bantu 10 000, mpi kwenda kukutana ti basoda ya Yabini na masa ya Kishoni. Kuna nge ta bedisa Sisera, mfumu ya basoda ya Yabini.’ Baraki songaka Debora nde: ‘Mono ta kwenda kansi kaka kana nge kwenda ti mono.’ Debora tubaka nde: ‘Mono ta kwenda ti nge. Kansi zaba nde nge ve muntu ta fwa Sisera. Yehowa me tuba nde nkento mosi muntu ta fwa yandi.’

Debora kwendaka ti Baraki mpi basoda na yandi na Ngumba Tabore sambu na kudibongisa na bitumba. Ntangu Sisera waka diambu yina, yandi vukisaka bapusu-pusu na yandi ya bitumba mpi basoda na yandi na muwanda yina vandaka na nsi. Debora songaka Baraki nde: ‘Yai kilumbu ya Yehowa ke sadisa nge na kununga.’ Baraki ti bantu na yandi 10 000 kulumukaka na ngumba sambu na kukutana ti basoda ya ngolo ya Sisera.

Ebuna Yehowa salaka nde masa ya Kishoni kukuma mingi kibeni. Bapusu-pusu ya Sisera ya bitumba kangamaka na poto-poto. Sisera bikisaka pusu-pusu na yandi mpi yantikaka kutina. Baraki ti basoda na yandi bedisaka basoda ya Sisera, kansi Sisera tinaka! Yandi tinaka mpi kwendaka kubumbana na tenta ya nkento mosi, zina na yandi Yaele. Yaele pesaka yandi miliki sambu yandi nwa mpi fikaka yandi bulanketi. Soda yina lembaka lalaka. Ebuna, Yaele kotaka na pima yonso, bakaka pike ya tenta, mpi kotisaka yo na ntu ya Sisera. Yandi fwaka.

Baraki kwisaka sambu na kusosa Sisera. Yaele basikaka na tenta na yandi mpi tubaka nde: ‘Kwisa kukota. Mono ta songa nge muntu yina nge ke sosa.’ Baraki kotaka mpi monaka mvumbi ya Sisera me lala pana. Baraki ti Debora kumisaka Yehowa na nkunga sambu yandi sadisaka bantu ya Izraele na kununga bambeni na bo. Na bamvula 40 yina landaka, Izraele vandaka na ngemba.

Ntangu nzala vandaka na Izraele, muntu mosi ya Izraele, zina na yandi Naomi kwendaka na insi ya Moabi ti bakala na yandi mpi bana na bo zole ya babakala. Na nima, bakala ya Naomi fwaka. Bana na yandi kwelaka Ruti ti Orpa, yina vandaka bantu ya Moabi. Kansi na nima, bana ya Naomi fwaka.

Ntangu Naomi waka nde nzala manaka na Izraele, yandi bakaka lukanu ya kuvutuka kuna. Ruti ti Orpa vandaka kusala nzietelo ti yandi, kansi na nzila, Naomi songaka bo nde: ‘Beno vandaka bankento ya mbote sambu na bana na mono mpi beno vandaka babokilo ya mbote sambu na mono. Mono ke zola nde beno kwela diaka. Beno vutuka na Moabi.’ Bankento yina tubaka nde: ‘Beto ke zolaka nge! Beto ke zola ve kuyambula nge.’ Naomi landaka kusonga bo na kukwenda. Nsuka-nsuka, Orpa vutukaka, kansi Ruti bikalaka. Naomi songaka yandi nde: ‘Orpa ke vutuka na bantu na yandi mpi na banzambi na yandi. Vutuka ti yandi mpi kwenda na nzo ya mama na nge.’ Kansi Ruti tubaka nde: ‘Mono ta bikisa nge ve. Bantu na nge ta vanda bantu na mono, mpi Nzambi na nge ta vanda Nzambi na mono.’ Nge ke yindula nde Naomi kudiwaka nki mutindu ntangu Ruti tubaka mambu yina?

Ruti ti Naomi kumaka na Izraele na luyantiku ya nsungi ya kukatula bambuma ya orze. Kilumbu mosi, Ruti kwendaka kulokuta bambuma ya ke bikalaka na bilanga ya muntu mosi, zina na yandi Boazi; Boazi vandaka mwana ya Rahabi. Boazi waka nde Ruti vandaka muntu ya Moabi yina kangamaka na kwikama yonso ti Naomi. Yandi songaka bantu na yandi ya kisalu na kubikisa bambuma mwa mingi sambu Ruti lokuta yo.

Na nkokila yina, Naomi yulaka Ruti nde: ‘Nge salaka na bilanga ya nani bubu?’ Ruti tubaka nde: ‘Na bilanga ya muntu mosi, zina na yandi Boazi.’ Naomi songaka yandi nde: ‘Boazi kele mpangi ya bakala na mono. Landa kusala na bilanga na yandi ti bana-bankento ya nkaka. Nge ta vanda na lutaninu kuna.’

Ruti landaka kusala na bilanga ya Boazi tii kuna nsungi ya kukatula bambuma manaka. Boazi monaka nde Ruti vandaka kusala ngolo mpi nde yandi vandaka nkento ya mbote. Na bilumbu yina, kana bakala mosi kufwa mpi yandi buta ve bana, mpangi na yandi fwete kwela nkento na yandi. Yo yina Boazi kwelaka Ruti. Bo butaka mwana mosi, zina na yandi Obedi; na nima Obedi kumaka nkaka ya ntotila Davidi. Banduku ya Naomi sepelaka mingi. Bo tubaka nde: ‘Ntete, Yehowa pesaka nge Ruti, yina me sadila nge mambu mbote kibeni, mpi ntangu yai yandi me pesa nge ntekolo. Bika Yehowa kubaka lukumu.’