Na nima, bantu ya Izraele yambulaka diaka Yehowa mpi bo yantikaka kusambila banzambi ya luvunu. Na nsungi ya bamvula nsambwadi, bantu ya Madiani vandaka kuyiba bambisi ya bantu ya Izraele mpi kubebisa bima na bo na bilanga. Sambu na kutina bantu ya Madiani, bantu ya Izraele vandaka kubumbana na mabulu mpi na bangumba. Bo bondilaka Yehowa sambu yandi sadisa bo. Yo yina Yehowa tindaka wanzio mosi na leke mosi ya bakala, zina na yandi Gideoni. Wanzio tubaka nde: ‘Yehowa me pona nge sambu nge vanda soda ya ngolo.’ Gideoni yulaka nde: ‘Inki mutindu mono lenda gulusa Izraele? Mono kele muntu ya kukonda mfunu.’

Inki mutindu Gideoni zolaka kuzaba nde Yehowa muntu me pona yandi? Yandi tulaka lele mosi ya lene na ntoto mpi songaka Yehowa nde: ‘Na suka, kana malulu kele kaka na lene kansi ntoto kele ya kuyuma, mono ta zaba nde nge ke zola nde mono gulusa Izraele.’ Na suka ya kilumbu yina landaka, lene vandaka ya kufuluka ti masa mpi ntoto vandaka ya kuyuma! Kansi na nima, Gideoni lombaka nde na suka ya kilumbu yina ke landa, lene kuvanda ya kuyuma kansi ntoto kuvanda ti masa. Ntangu diambu yina salamaka, nsuka-nsuka Gideoni ndimaka nde Yehowa me pona yandi. Yandi vukisaka basoda na yandi sambu na kunwana ti bantu ya Madiani.

Yehowa songaka Gideoni nde: ‘Mono ta nungisa bantu ya Izraele. Kansi sambu beno kele ti basoda mingi, beno lenda yindula nde beno me nunga mvita yina beno mosi. Songa konso muntu yina ke wa boma nde yandi vutuka na nzo.’ Yo yina, basoda 22 000 vutukaka na nzo, mpi 10 000 bikalaka. Na nima, Yehowa tubaka nde: ‘Basoda kele kaka mingi. Nata bo na nto ya masa mpi songa bo na kunwa masa. Baka kaka bayina ke tala mbeni ntangu bo ke nwa masa.’ Basoda 300 mpamba vandaka kukeba ntangu bo vandaka kunwa masa. Yehowa silaka nde bantu fioti yina ta nunga basoda ya Madiani 135 000.

Na mpimpa yina, Yehowa songaka Gideoni nde: ‘Yai ntangu ya kunwanisa bantu ya Madiani!’ Gideoni pesaka bantu na yandi bibongo mpi mabungu ya nene ti ba torshe yina vandaka ya kubumba na kati na yo. Yandi songaka bo nde: ‘Beno tala mono, mpi beno sala mutindu mono ke sala.’ Gideoni bulaka mpungi na yandi, pasulaka dibungu na yandi, nikisaka torshe na yandi, mpi tubaka na ndinga ya ngolo nde: “Mbele ya bitumba ya Yehowa mpi ya Gideoni!” Bantu na yandi yonso 300 salaka mutindu mosi. Bantu ya Madiani waka boma mingi mpi bo tinaka na bandambu yonso. Na matekita yina, bo yantikaka kufwisana. Mbala yai mpi, Yehowa sadisaka bantu ya Izraele na kununga bambeni na bo.

Muntu mosi ya Izraele, zina na yandi Elkana, vandaka ti bankento zole, Ana ti Penina, kansi yandi vandaka kuzola Ana mingi. Penina vandaka kuseka Ana ntangu yonso sambu Ana vandaka ve ti bana kansi Penina vandaka ti bana mingi. Konso mvula, Elkana vandaka kunata dibuta na yandi na nzo-tenta na Shilo sambu na kusambila. Kilumbu mosi ntangu bo vandaka kuna, yandi monaka nde Ana kele na mawa mingi. Yandi tubaka nde: ‘Pardo, Ana kudila ve. Mono kele. Mono ke zolaka nge.’

Na nima, Ana basikaka mpi kwendaka kusamba. Yandi vandaka kudila ntangu yandi ke bondila Yehowa na kusadisa yandi. Yandi silaka nde: ‘Yehowa, kana nge pesa mono mwana-bakala, mono ta pesa nge yandi, mpi yandi ta sadila nge luzingu na yandi ya mvimba.’

Nganga-Nzambi ya Nene, Eli, monaka Ana ke dila, mpi yandi yindulaka nde Ana me lawuka. Ana vutulaka nde: ‘Ve, mfumu na mono, mono me lawuka ve. Mono kele ti diambu mosi ya nene, mpi mono ke solula ti Yehowa sambu na yo.’ Eli bakisaka nde yandi salaka kifu mpi yandi songaka Ana nde: ‘Bika Nzambi kupesa nge kima ya nge ke zola.’ Ana kudiwaka mbote mpi kwendaka. Mvula mosi lungaka ve, Ana butaka mwana-bakala mpi pesaka yandi zina Samuele. Keti nge lenda yindula kiese yina Ana vandaka na yo?

Ana vilaka ve lusilu yina yandi pesaka Yehowa. Ntangu yandi katulaka Samuele na mabele, yandi nataka Samuele na nzo-tenta sambu yandi sala kuna. Yandi songaka Eli nde: ‘Yai mwana yina mono vandaka kusamba Nzambi. Sambu na luzingu na yandi ya mvimba, mono me defisa yandi na Yehowa.’ Elkana ti Ana vandaka kukwenda kutala Samuele konso mvula mpi kunatila yandi kazaka ya kukonda maboko ya mpa. Yehowa pesaka Ana bana-babakala tatu mpi bana-bankento zole.