Yehowa songaka Samuele nde: ‘Kwenda na nzo ya Yese. Mwana na yandi mosi ta vanda ntotila ya zole ya Izraele.’ Yo yina Samuele kwendaka na nzo ya Yese. Ntangu yandi monaka yaya na bo, yandi yindulaka nde: ‘Leke yai ya bakala kele muntu yina.’ Kansi Yehowa songaka Samuele nde yo kele ve yandi. Yehowa tubaka nde: ‘Mono ke talaka mambu yina kele na ntima ya muntu, kansi kaka ve mutindu yandi ke monana na nganda.’

Yese basisilaka Samuele bana na yandi sambanu. Kansi Samuele tubaka nde: ‘Yehowa me pona bo ve. Keti nge kele ti bana ya nkaka?’ Yese tubaka nde: ‘Mono kele ti mwana ya nkaka, leke na bo, Davidi. Yandi me kwenda kukeba mameme na mono.’ Ntangu Davidi kotaka, Yehowa songaka Samuele nde: ‘Yandi yai!’ Samuele tulaka mafuta na ntu ya Davidi sambu yandi kuma ntotila ya Izraele na bilumbu ke kwisa.

Ntangu fioti na nima, bantu ya Izraele vandaka kunwana ti bantu ya Filistia, yina vandaka ti soda mosi ya ngolo, zina na yandi Goliati, yina vandaka kunwana sambu na bo. Konso kilumbu, Goliati vandaka kuseka bantu ya Izraele. Yandi vandaka kutuba na ndinga ya ngolo nde: ‘Beno tindila mono muntu yina ta nwana ti mono. Kana yandi nunga, beto ta vanda bampika na beno. Kansi kana mono nunga, beno ta vanda bampika na beto.’

Davidi kumaka na camp ya basoda ya Izraele ti madia sambu na bampangi na yandi yina vandaka basoda. Yandi waka Goliati mpi tubaka nde: ‘Mono ta nwana ti yandi!’ Ntotila Saule tubaka nde: ‘Kansi nge ke kaka mwana ya fioti.’ Davidi vutulaka nde: ‘Yehowa ta sadisa mono.’

Saule mekaka kupesa Davidi binwaninu na yandi sambu yandi sadila yo, kansi Davidi tubaka nde: ‘Mono lenda nwana ve ti kinwaninu yai.’ Davidi bakaka lanse na yandi mpi kwendaka na masa mosi. Yandi ponaka matadi tanu ya butesi mpi tulaka yo na poshi na yandi. Ebuna Davidi kwendaka na ndambu ya Goliati. Muntu yina ya ngolo tubaka nde: ‘Kwisa awa, mwana-fioti. Mono ta pesa nge bonso madia sambu na bandeke ya zulu mpi na bambisi ya mfinda.’ Davidi vandaka ve na boma. Yandi vutulaka na ndinga ya ngolo nde: ‘Nge ke kwisa ti mbele ya kunwanisa mpi dikonga, kansi mono ke kwisa na zina ya Yehowa. Nge ke nwana ve ti beto; nge ke nwana ti Nzambi. Bantu yonso ya kele awa ta mona nde Yehowa me luta mbele ya bitumba ti dikonga na ngolo. Yandi ta pesa beno yonso na maboko na beto.’

Davidi tulaka ditadi na lanse na yandi mpi bulaka yo ngolo kibeni. Ti lusadisu ya Yehowa, ditadi yina kwendaka kukota na mbunzu ya Goliati. Muntu yina ya ngolo bwaka na ntoto ya kufwa. Ebuna bantu ya Filistia tinaka sambu na luzingu na bo. Keti nge ke tulaka ntima na Yehowa, bonso Davidi?

Ntangu Davidi fwaka Goliati, ntotila Saule tulaka yandi mfumu ya basoda na yandi. Davidi nungaka bamvita mingi, ebuna yandi zabanaka mingi kibeni. Konso ntangu ya Davidi vandaka kuvutuka na bitumba, bankento vandaka kubasika ti makinu mpi kuyimba nde: ‘Saule me fwa mafunda ya bambeni, mpi Davidi me fwa makumi ya mafunda ya bambeni!’ Saule wilaka Davidi kimpala mpi sosaka kufwa yandi.

Davidi vandaka kubula kidare mbote kibeni. Kilumbu mosi ntangu Davidi vandaka kubudila Saule kidare, ntotila losilaka Davidi dikonga. Davidi tinaka, ebuna dikonga bulaka na kibaka. Na nima, Saule mekaka mbala mingi na kufwa Davidi. Nsuka-nsuka, Davidi tinaka mpi kwendaka kubumbana na ntoto ya zelo na zelo.

Saule bakaka basoda 3 000 mpi kwendaka kuzomba Davidi. Yandi kotaka na dibulu mosi kisika Davidi ti bantu na yandi vandaka kubumbana. Bantu ya Davidi tubaka na ndinga ya nsi nde: ‘Yai dibaku na nge ya mbote ya kufwa Saule.’ Davidi pusanaka pene-pene ya Saule mpi zengaka kitini ya kazaka ya ntotila. Saule zabaka ve. Na nima, Davidi waka mbi sambu yandi kondaka luzitu na muntu yina Yehowa me tulaka mafuta. Yandi pesaka ve bantu na yandi nzila ya kunwanisa Saule. Yandi bingaka nkutu Saule na ndinga ya ngolo, mpi tubaka nde yandi zolaka kufwa Saule ntangu yandi vandaka ti okazio ya kusala yo. Keti Saule zolaka kusoba mutindu na yandi ya kutadila Davidi?

Ve. Saule landaka kuzomba Davidi. Kilumbu mosi na mpimpa, Davidi ti mwana-mpangi na yandi Abishai kotaka na mayele na camp ya Saule. Ata Abnere, mfumu ya basoda ya ke taninaka Saule, vandaka kulala. Abishai tubaka nde: ‘Yai shanse na beto! Beto fwa yandi.’ Davidi vutulaka nde: ‘Yehowa yandi mosi ta pesa Saule ndola. Beto baka kaka dikonga na yandi ti dibungu na yandi ya masa, mpi beto kwenda.’

Davidi mataka na ngumba ya pene-pene yina vandaka kukuma tii na camp ya Saule. Yandi tubaka na ndinga ya ngolo nde: ‘Abnere, sambu na nki nge taninaka ve ntotila na nge? Wapi dibungu ti dikonga ya Saule?’ Saule zabaka ndinga ya Davidi mpi tubaka nde: ‘Nge zolaka kufwa mono, kansi nge me sala yo ve. Mono me zaba nde nge ta vanda ntotila ya zole ya Izraele.’ Saule vutukaka na nzo na yandi. Kansi bantu ya nkaka ya dibuta ya Saule vandaka kuzola Davidi.