Kimfumu ya makanda kumi ya Izraele vandaka ti bantotila mingi ya mbi, kansi Ahabi vandaka mbi kuluta bo yonso. Yandi kwelaka nkento mosi ya mbi yina vandaka kusambila Baale. Zina na yandi Yezabele. Ahabi ti Yezabele fulusaka insi ti lusambu ya Baale mpi fwaka baprofete ya Yehowa. Yehowa salaka nki? Yandi tindaka profete Eliya sambu na kupesa Ahabi nsangu mosi.

Eliya songaka ntotila Ahabi nde sambu na mambi na yandi, mvula ta noka ve na Izraele. Na nsungi ya bamvula kuluta tatu, bimenina yelaka ve mpi bantu vandaka na nzala. Ebuna Yehowa tindaka diaka Eliya na Ahabi. Ntotila tubaka: ‘Nge kele muntu ya ke kotisaka mavwanga! Mambu yai yonso kele foti na nge.’ Eliya vutulaka nde: ‘Mono ve muntu me nata nsungi yai ya kuyuma. Nge muntu me nata yo sambu nge sambilaka Baale. Beto ta mekana. Vukisa dikanda mpi baprofete ya Baale na zulu ya Ngumba ya Karmele.’

Bantu vukanaka na ngumba yina. Eliya tubaka nde: ‘Yindula mbote. Kana Yehowa kele Nzambi ya kieleka, landa yandi. Kana yo kele Baale, landa yandi. Mono ke meka beno na diambu yai. Baprofete 450 ya Baale fwete yidika kimenga mpi kubinga nzambi na bo, ebuna mono ta yidika kimenga mpi ta binga Yehowa. Muntu yina ta pesa mvutu na tiya, yandi muntu kele Nzambi ya kieleka.’ Bantu ndimaka diambu yina.

Baprofete ya Baale yidikaka kimenga. Bo bingaka nzambi na bo kilumbu ya mvimba nde: ‘O Baale, pesa beto mvutu!’ Ntangu Baale vandaka kupesa ve mvutu, Eliya vandaka kuseka bo. Yandi tubaka nde: ‘Beno binga ngolo kibeni. Mbala ya nkaka yandi ke lala, mpi yo ke lomba nde muntu kutedimisa yandi.’ Nkokila bwaka, mpi baprofete ya Baale vandaka kaka kubinga. Kansi, mvutu vandaka kaka ve.

Eliya tulaka kimenga na yandi na zulu ya mesa-kimenga mpi yandi losaka masa na zulu na yo. Ebuna yandi sambaka nde: ‘O Yehowa, pardo, bika bantu kuzaba nde nge kele Nzambi ya kieleka.’ Na mbala mosi, Yehowa tindaka tiya katuka na zulu sambu na kuyoka kimenga yina. Bantu tubaka na ndinga ya ngolo nde: ‘Yehowa kele Nzambi ya kieleka!’ Eliya tubaka nde: ‘Beno bika ve nde baprofete ya Baale kutina!’ Kilumbu yina, bo fwaka baprofete ya Baale 450.

Ntangu ka dituti monanaka na zulu ya nzadi-mungwa, Eliya songaka Ahabi nde: ‘Mvula ya ngolo ke kwisa. Yidika pusu-pusu na nge, mpi kwenda na nzo.’ Matuti kumisaka zulu ndombe, mupepe bulaka, mpi mvula ya ngolo yantikaka kunoka. Nsuka-nsuka, nsungi ya kuyuma manaka. Ahabi tambusaka pusu-pusu na yandi ntinu kibeni. Ti lusadisu ya Yehowa, Eliya bakaka ntinu kuluta pusu-pusu yina! Kansi, keti bampasi ya Eliya manaka? Bika beto tala.

Yezabele waka mambu yina kuminaka baprofete ya Baale, mpi yandi waka makasi mingi. Yandi tindilaka Eliya nsangu yai: ‘Mbasi, nge ta vanda mvumbi bonso baprofete ya Baale.’ Eliya waka boma mingi yo yina yandi tinaka na ntoto ya zelo na zelo. Yandi sambaka nde: ‘Yehowa, mono ke kuka diaka ve. Bika mono fwa kaka.’ Eliya lembaka mingi, yandi lalaka na nsi ya nti.

Wanzio mosi tedimisaka yandi mpi tubilaka yandi na mawete nde: ‘Telama mpi dia.’ Eliya monaka dimpa mosi ya kele bonso dimbuma na zulu ya matadi ya tiya mpi dibungu ya masa. Yandi diaka, nwaka masa, mpi lalaka diaka. Wanzio tedimisaka yandi diaka mpi tubaka nde: ‘Dia. Nge kele ti mfunu ya ngolo sambu na nzietelo na nge.’ Yo yina, Eliya diaka diaka. Na nima, yandi salaka nzietelo bilumbu 40 mpi bampimpa 40, tii kuna yandi kumaka na Ngumba ya Orebi. Kuna, Eliya kotaka na dibulu sambu na kulala. Kansi Yehowa solulaka ti yandi. Yandi tubaka nde: ‘Nge ke sala nki awa, Eliya?’ Eliya vutulaka nde: ‘Bantu ya Izraele me fwa lusilu na bo ya bo salaka na nge. Bo me fwa bamesa-kimenga na nge mpi baprofete na nge. Ntangu yai bo ke sosa kufwa mono mpi.’

Yehowa songaka yandi nde: ‘Kwenda mpi telama na zulu ya ngumba.’ Ya ntete, mupepe ya ngolo bulaka na zulu ya dibulu yina. Ya zole, ntoto nikanaka mpi tiya basikaka. Na nsuka, Eliya waka ndinga ya pima mpi ya mawete. Yandi fikaka luse na yandi na kazaka na yandi mpi telamaka na nganda ya dibulu. Ebuna Yehowa yulaka yandi sambu na nki yandi tinaka. Eliya tubaka nde: ‘Mono mpamba muntu me bikala.’ Kansi Yehowa songaka yandi nde: ‘Nge kele ve nge mosi. Kele ti bantu 7 000 na Izraele yina ke landa kusambila mono. Kwenda mpi tula Elisha profete na kisika na nge.’ Na mbala mosi, Eliya kwendaka kusala mambu yina Yehowa songaka yandi. Keti nge ke yindula nde Yehowa ta sadisa nge mpi kana nge ke sala mambu yina yandi ke zola nde nge sala? Ee, yandi ta sadisa nge. Bika beto tadila diambu mosi yina salamaka na nsungi ya kuyuma.