Bo Vandaka ti Kidimbu Mosi (triangle violet) na Bilele na Bo

Maud ke vandaka na France mpi yandi ke salaka na nzo-nkanda mosi. Yandi ke sadisaka bana ya kele ti bifu na nitu ntangu bo kele na nzo-nkanda. Kilumbu mosi, bana ya nzo-nkanda mosi vandaka kulonguka mambu ya basoda ya Nazi yina Fwaka Bayuda mingi mpi mutindu bo vandaka kupesa bantu bisalu ya ngolo na ba camp. Bo vandaka kutula kidimbu mosi na bilele ya bantu ya boloko yina vandaka na camp. Kulere mpi mutindu kidimbu yina vandaka, vandaka kumonisa sambu na nki bo tulaka muntu yina na boloko.

Ntangu longi mosi vandaka kutubila kidimbu ya triangle violet yina vandaka na bilele ya bantu ya nkaka ya boloko, yandi tubaka nde: “Mono ke mona nde bo kangaka bo sambu bo vandaka kuvukisa nitu babakala ti babakala mpi bankento ti bankento.” Na nima ya kulonga, Maud tendudilaka yandi nde, bantu ya Nazi vandaka kutula kidimbu ya triangle violet sambu na kumonisa nde bantu yina vandaka Bambangi ya Yehowa.a Yandi songaka longi yina nde yandi ta natila yandi mukanda ya ke tubila yo. Longi yina ndimaka mpi yandi lombaka Maud na kusonga bana ya nzo-nkanda mambu yango.

Na nzo-nkanda ya nkaka, longi ya nkaka ya nkento longaka mpi dilongi yina. Yandi sadilaka tablo mosi ya vandaka ti bidimbu ya mutindu na mutindu yina bantu ya boloko vandaka kulwata. Tablo yina monisaka mbote-mbote nde bo vandaka kutula kidimbu yina ya triangle violet na bilele ya bantu ya boloko sambu na kumonisa nde bo vandaka Bambangi ya Yehowa. Ntangu yandi manisaka kulonga, Maud songaka yandi mambu ya nkaka sambu na dilongi yina. Longi yina ndimaka mpi yandi yidikaka mambu sambu mpangi Maud kusonga yo bana ya nzo-nkanda.

Mpangi Maud yidikaka disolo yina sambu na kutubila yo kaka na minuta 15, kansi ntangu yandi zolaka kuyantika kutubila yo, longi yina songaka yandi nde: “Nge lenda tubila yo na ngunga ya mvimba.” Maud yantikaka ntete na kusonga video mosi ya vandaka kumonisa mutindu bantu ya Nazi vandaka kuniokula Bambangi ya Yehowa. Ntangu video kumaka na kisika yina vandaka kumonisa nde bantu ya Nazi botulaka bana 800 ya Bambangi ya Yehowa, mpangi Maud kangaka yo ntete mpi yandi tangilaka bana ya nzo-nkanda masolo ya bana tatu na kati ya bana yina. Ntangu video yina manaka, mpangi Maud tangilaka bana ya nzo-nkanda mukanda yina Gerhard Steinacher Mbangi mosi ya Yehowa ya Autriche ya bamvula 19 sonikilaka bibuti na yandi na 1940 mwa bangunga na ntwala nde bantu ya Nazi kufwa yandi.b

Maud songaka mpi bana ya nzo-nkanda ya nkaka mambu yina. Kikesa ya mpangi Maud me salaka nde balongi yina zole kuvila ve kutubila Bambangi ya Yehowa ntangu bo ke longa bana ya nzo-nkanda dilongi yina ke tubila bantu yina bantu ya Nazi vandaka kuniokula na ba camp.