KAPU UVWA
Mabuta ya Kibuti Mosi Lenda Kununga!
1-3. Inki dyambu menataka kuyela ya ntalu ya mabuta yina kele ti kibuti mosi, mpi inki mutindu yau kevandaka ti bupusi na zulu ya bantu yina mambu yango ketadila?
NA ÉTATS-UNIS, mabuta yina kele ti kibuti mosi kebingamaka “mutindu ya dibuta ya keyelaka ntinuntinu mpenza.” Mvwandilu kele kiteso mosi na bansi mingi. Ntalu ya kuluta nene ya mezabanaka ya makwela yina mefwaka, ya bantu yina metinaka banzo, ya kugambana ti ya bana ya kukonda batata menataka malanda mingi kibeni sambu na mafuku ya bibuti ti bana.
2 Mama mosi ya mpumpa kusonikaka nde: “Mono kele fwola ya bamvula 28 mpi ti bana zole. Mono kenyokwamaka mingi na mabanza sambu mono kezolaka ve kusansa bana na mono nkatu tata. Yau kemonanaka bonso nde ata muntu mosi ve kekudibanzaka sambu na mono. Bana na mono kemonaka mono kedila mbala na mbala mpi yau kevandaka ti malanda na zulu na bau.” Katula kunwana ti mawi ya mutindu yina bonso makasi, kunata makambu, mpi kinsyona, bibuti mingi yina mebikalaka bau mosi kekutanaka ti lukakilu ya kusala kisalu na nganda ya nzo mpi kulungisa bisalu ya nzo. Mosi kutubaka nde: “Kuvanda kibuti ya mpumpa kele bonso muntu kelosa bima mingi na zulu sambu na kuyamba yau. Na nima ya bangonda sambanu ya kumeka kusala, na nsukansuka nge takuka na kulosa mpi na kuyamba bankweso iya na mbala mosi. Kansi, kaka na ntangu nge kekuka na kusala yau, muntu mosi kelosila nge nkweso yampa!”
3 Baleke na kati ya mabuta yina kele ti kibuti mosi kevandaka mbala mingi ti bampasi na bau mosi. Mbala yankaka bau fwete kunwana ti mawi ya ngolo sambu na kukwenda to kufwa ya kintulumukina ya kibuti mosi. Sambu na beleke mingi, kukonda kibuti mosi kemonanaka bonso yau kevandaka ti malanda ya mbi kibeni.
4. Inki mutindu beto kezaba nde Yehowa kekudibanzaka sambu na mabuta yina kele ti kibuti mosi?
4 Mabuta ya kibuti mosi kuvandaka na bantangu ya Biblia. Masonuku ketubila mbala na mbala “mwana-ns[y]ona” ti “mufwidi ya nkento.” (Kubasika 22:22; Kulonga 24:19-21; Yobi 31:16-22) Yehowa Nzambi kukondaka ve kutula dikebi na nkadilu na bau. Muyimbi-bankunga kubingaka Nzambi “tata ya bansyona mpi zuzi ya bafwola.” (Nkunga 68:5, NW) Ya kyeleka, Yehowa kekudibanzaka mutindu mosi sambu na mabuta ya kibuti mosi bubu yai! Na ntembe ve, Ndinga na yandi kepesa minsiku yina lenda kusadisa bau na kununga.
KUSALA BISALU YA NZO YA LUMBU NA LUMBU
5. Inki dikambu bibuti bampumpa fwete kunwana na yau ntetentete?
5 Tadila kisalu ya kubongisa nzo. Nkento mosi ya mefwaka makwela kendima nde: “Baokazio kele mingi ntangu ya nge kesosa kuvanda ti bakala na nzyunga na nge, mu mbandu, ntangu vwatire na nge keyantika na kutula makelele ebuna nge kezaba ve na wapi yau kekatuka.” Babakala yina mekatuka kufwa makwela to mekatuka kufwila bankento lenda mpi kukuma kisakasaka sambu na bisalu mingi ya nzo yina bau fwete sala ntangu yai. Sambu na bana, mutungisi ya bisalu ya nzo keyikaka mawi ya kukonda bukatikati ti lutaninu.
6, 7. (a) Inki mbandu ya mbote “nkento ya kulunga” ya Bingana kupesaka? (b) Inki mutindu kuvanda kikesa na mikumba ya nzo kesadisaka na banzo yina kele ti kibuti mosi?
6 Inki lenda kusadisa? Simba mbandu ya kubikaka “nkento ya kulunga” yina metendulama na Bingana 31:10-31. Bunene ya bisalu na yandi yina yandi kelungisa kemonanaka mpenza—kusumba, kuteka, kutunga bilele, kulamba, kusungimina bima ya nzo, kusala kisalu ya bilanga, mpi kusala kinkita. Inki kuvandaka kinsweki na yandi? Yandi vandaka kikesa na kisalu, na kusalaka tii na bantangu ya nsukinina kibeni mpi na kutelamaka na sukasuka sambu na kuyantika bisalu na yandi. Mpi yandi vandaka ya kudibongisa mbotembote, na kusadisaka bisalu yankaka mpi na kusadilaka maboko na yandi mosi sambu na kusungimina bantu yankaka. Mpila ya kuyituka kele ve nde yandi kubaka lukembisu!
7 Kana nge kele kibuti mpumpa, kudibanzaka na yina metala mikumba na nge ya bisalu ya nzo. Sepela na kisalu ya mutindu yina, sambu yau tayika mpenza kyese ya bana na nge. Kansi, kutula bapula ya mbote mpi lubongisu kele mfunu. Biblia ketuba nde: “Bapula ya muntu ya kikesa kenungaka mpenza.” (Bingana 21:5, NW) Tata mpumpa mosi kundimaka nde: “Mono kevandaka na ngindu ya kukonda kuyindula madya tii kuna ya mono tawa nzala.” Kansi madya ya metulamaka na manaka kedisaka nitu kuluta mbote mpi kepesaka mpusa kuluta yina ya ntinu-ntinu ya kukonda kukana. Nge lenda mpi kulonguka na kusadila maboko na nge na mitindu yampa. Na kwendaka kumona banduku yina mezabaka mambu mingi, mutindu ya kukabula mikanda, mpi bantu ya kusadisa yina mezabaka kisalu ya maboko, bamama bampumpa yankaka mekukaka na kupakula mukubu, kuyidika bapompi ya masa, mpi kubongisa bima ya fyoti fyoti.
8. Inki mutindu bana ya bibuti bampumpa lenda kusadisa na nzo?
8 Keti yau kele mbi na kulomba bana na kusadisa? Mama mosi ya mpumpa kuyindulaka mpila yai: “Nge kezola kuyingisa kuzanga ya kibuti yina yankaka na kukumisaka mambu petepete sambu na bana.” Dyambu yina lenda kubakisama kansi mbala yankaka yau kevandaka ve konso mbala sambu na mambote ya kuluta mbote ya mwana. Baleke ya ntangu ya Biblia yina vandaka kubanga Nzambi vandaka kupesama bisalu ya kufwana. (Kuyantika 37:2; Kitoko 1:6) Yau yina, ata yau kelomba kutoma tala sambu na kukonda kutudila bana na nge kizitu ya kuluta mingi, nge tavanda mayele na kupesa bau bisalu bonso ya kusungimina malonga mpi kutula bunkete na basuku na bau. Sambu na inki kusala ve bisalu yankaka ya konso kilumbu kumosi? Yau lenda kunata kyese ya mingi.
LUKAKILU YA KUZWA MBONGO YA KUZINGILA
9. Sambu na inki mbala mingi bamama bampumpa kekutanaka ti bampasi ya mbongo?
9 Bibuti bampumpa mingi kemonaka mpasi na kulungisa bampusa na bau ya mbongo, mpi bamama ya baleke yina mekwelaka ve kemonaka kibeni mpasi mingi.a Na bansi yina lusadisu ya bantu yonso kepesamaka, bau lenda kuvanda mayele na kusadila yau, na kiteso ya kuluta fyoti tii kuna ya bau talenda kuzwa kisalu. Biblia kepesa Bakristu nzila ya kusadila bima ya mutindu yina kana yau kele mfunu. (Roma 13:1, 6) Bafwola ti bankento yina mefwaka makwela kekutanaka ti balukakilu ya mutindu mosi. Bamingi, ya kupusama na ngolo na kuvutuka na kisalu na nima ya bamvula mingi ya kusala na nzo, lenda kuzwa mbala mingi kisalu ya lufutu ya fyoti. Bankaka kesonikisaka na manaka ya ndongolo ya kisalu to malongi ya nzo-nkanda ya nsungi ya nkufi.
10. Inki mutindu mpumpa ya mama lenda kutendudila bana na yandi kikuma ya yandi fwete kusala kisalu na nganda ya nzo?
10 Kuyituka ve kana bana na nge kele na mawa na ntangu ya nge kesosa kisalu, mpi kudiwa ve nde nge menata makambu. Kansi, tendudila bau sambu na inki nge fwete sala, mpi sadisa bau na kubakisa nde Yehowa kelomba nge na kusungimina bau. (1 Timoteo 5:8) Na nima ya ntangu fyoti, bana mingi kesobaka. Kansi, meka na kulutisa ntangu mingi ti bau mutindu manaka na nge ya kufuluka na bisalu kepesa nge nzila. Dikebi ya zola ya mutindu yina lenda kusadisa mpi na kufyotuna malanda ya konso ndilu ya mbongo yina dibuta lenda kukutana na yau.—Bingana 15:16, 17.
NANI KESUNGIMINA NANI?
11, 12. Inki bandilu bibuti bampumpa fwete tanina, mpi inki mutindu bau lenda sala mutindu yina?
11 Yau kele kikalulu sambu na bibuti bampumpa na kukangama kibeni ti bana na bau, kansi yau kelomba kukeba na mpila nde bandilu ya Nzambi mepesaka na kati ya bibuti ti bana kubebisama ve. Mu mbandu, mavwanga ya ngolo lenda kubasika kana mpumpa ya mama ketula ngindu nde mwana na yandi ya bakala kubaka mikumba ya bakala ya nzo to kubaka mwana na yandi ya nkento bonso muntu ya yandi fwete kutudila ntima, na kupesaka mwana ya nkento kizitu ya makambu yina metala yandi mosi. Kusala mpila yina kele mbote ve, yau kenyokulaka mabanza, mpi mbala yankaka kekumisaka mwana kisakasaka.
12 Ndimisa bana na nge nde nge, bonso kibuti, tasungimina bau—kansi ve nde bau mpi kusadila nge mutindu mosi. (Fwanisa ti 2 Korinto 12:14.) Bantangu yankaka, nge lenda kuvanda na mfunu ya mwa ndongisila to lusadisu. Sosa yau na bankuluntu Bakristu to mbala yankaka na bankento Bakristu ya kuyela, na bana na nge ya fyoti ve.—Tito 2:3.
KULUNDA NDONGI
13. Inki dikambu yina metala ndongi mpumpa ya mama lenda kukutana na yau?
13 Bonso ndongisi ya ngolo, bakala lenda kuvanda ti mpasi mingi ve, kansi nkento lenda kuvanda ti bampasi na yina metala dyambu yai. Mpumpa mosi ya mama ketuba nde: “Bana na mono ya babakala kele ti banitu ya babakala mpi bandinga ya babakala. Bantangu yankaka yau kele ve mpasi na kumonana ya kukonda lukanu to na bulembu na kufwanisa.” Dyaka, nge lenda kuvanda kaka na mawa sambu na lufwa ya nkwelani ya zolwa, to mbala yankaka nge lenda kudiwaka nde nge menata makambu to kuwa makasi sambu na kufwa ya makwela. Kana nge ti bakala na nge kekabula mukumba ya kusansa bana, nge lenda kubanga na mpila mwana na nge kezola kuvanda ti nkwelani na nge ya ntama. Bamvwandilu ya mutindu yina lenda kukumisa kupesa ndongi ya bukatikati mpasi.
14. Inki mutindu bibuti bampumpa lenda kutanina mboninu ya bukatikati ya ndongi?
14 Biblia ketuba nde: “Mwana yina ke landaka nzila na yandi mosi ke pesaka mama na yandi nsoni.” (Bingana 29:15) Yibuka nde nge kele ti lusadisu ya Yehowa Nzambi na yina metala kutula mpi na kukotisa bansiku ya dibuta. Yau yina, kulemfuka ve na nkadilu ya kunata makambu, mawa, to kubanga. (Bingana 1:8) Kubebisa ve ata fyoti minsiku ya Biblia. (Bingana 13:24) Meka na kuvanda mayele, kikesa, mpi nsyamu. Na nima ya ntangu fyoti, bana mingi tandima. Kansi, nge tazola kutadila mawi ya bana na nge. Mpumpa mosi ya tata ketuba nde: “Ndongi na mono kulombamaka nde yau kulembikama ti mbakisa sambu na mpasi ya mvidisa ya mama na bau. Mono kesolulaka ti bau na konso dibaku. Beto kevandaka ti ‘bantangu ya masolo ya binsweki’ na ntangu beto kelambaka madya ya midi. Yau kele kibeni ntangu yango yina bau kekudipesaka mpenza na mono.”
15. Inki kibuti yina mefwaka makwela fwete buya ntangu yandi ketubila nkwelani na yandi ya ntama?
15 Kana nge mefwaka makwela, yau kele mbote ve na kuvwenzaka luzitu ya nkwelani na nge ya ntama. Maswana ya bibuti kepesaka kibeni mpasi mingi na ntima ya bana mpi na nsukansuka yau tafyotuna luzitu na bau sambu na beno zole. Yau yina, buya kikalulu ya kutubila bangogo ya kepesaka mpasi na ntima bonso: “Nge kele kibeni bonso tata na nge!” Ata nkwelani na nge ya ntama kusalaka nge mbi ya inki mutindu, yandi (nkento to bakala) kele kaka kibuti ya mwana na nge, yina kele na mfunu ya zola, mpi ya ndongi ya bibuti yonso zole.b
16. Inki bangidika ya kimpeve fwete kukota mbala na mbala na kati ya ndongi na nzo yina kele ti kibuti mosi?
16 Mutindu beto tubilaka yau na mikapu yina meluta, ndongi kelombaka kulonga mpi ndongolo, kaka ndola ve. Makambu mingi lenda kubuyama na kuvandaka ti manaka ya mbote ya ndongolo ya kimpeve. (Filipi 3:16) Kuvanda mbala na mbala na balukutakanu ya Bukristu kele mfunu. (Baebreo 10:24, 25) Yau kele mpi kiteso mosi na kuvanda ti kulonguka ya Biblia ya dibuta konso mposo. Ya kyeleka, yau kele ve petepete na kulanda kulonguka ya mutindu yina. Mama mosi ya kekudibanzaka kibeni ketuba nde: “Na nima ya kilumbu mosi ya kisalu, ya kyeleka, nge kele na mfunu ya kupema. Kansi mono mekudibongisaka na mabanza sambu na kulonguka ti mwana na mono ya nkento, na kuzabaka nde yau kele kima mosi ya fwete kusalama. Yandi keyangalalaka kibeni ti kulonguka na beto ya dibuta!”
17. Inki dilongi beto lenda kubaka na lusansu ya mbote ya Timoteo, nkundi ya Polo?
17 Na ntembe ve, Timoteo, nkundi ya ntumwa Polo, kubakaka ndongolo na yandi na minsiku ya Biblia na nsadisa ya mama na yandi ti nkaka na yandi ya nkento—kansi yau kemonana nde na tata na yandi ve. Ata mpila yina, Mukristu ya ngolo ya inki mutindu Timoteo kukumaka! (Bisalu 16:1, 2; 2 Timoteo 1:5; 3:14, 15) Mutindu mosi, nge lenda kutula kivuvu na bambutu ya mbote mutindu nge kesala ngolo sambu na kusansa bana na nge “na ndongi mpi na ndongolo ya mabanza ya Yehowa.”—Efezo 6:4.
KUNUNGA BITUMBA YA KINSYONA
18, 19. (a) Inki mutindu kinsyona lenda kudimonisa na mpumpa ya kibuti? (b) Inki ndongisila mepesama yina tasadisa sambu na kuyala bampusa ya kinsuni?
18 Kibuti mosi ya kubikalaka yandi mosi ketuba na kupemaka ngolo nde: “Kana mono mekwisa na nzo mpi memona bibaka yina iya, mpi mingimingi na nima ya kulala ya bana, kinsyona kekwisilaka mono kibeni.” Ee, kinsyona kele mbala mingi dikambu ya kuluta nene ya mpumpa ya kibuti kenwanaka na yau. Yau kele mbi ve na kuyindula kinkundi ya tiyatiya mpi kuvukisa nitu na kati ya makwela. Kansi, keti muntu fwete meka na kusosa kuyidika dikambu yai na konso mutindu yina? Na bilumbu ya ntumwa Polo, bafwola yankaka ya baleke vandaka kupesa nzila na “bampusa na bau ya kuvukisa nitu [na] kukwisa na kati na bau ti Kristu.” (1 Timoteo 5:11, 12, NW) Kupesa nzila na bampusa ya kinsuni sambu nde yau baka kisika ya mambote ya kimpeve tavanda kigonsa.—1 Timoteo 5:6.
19 Bakala Mukristu mosi kutubaka nde: “Bansatu ya kuvukisa nitu kevandaka ngolo kibeni, kansi nge lenda kuyala yau. Ntangu ngindu kekwisa na mabanza, nge fwete kukangama na yau ve. Nge fwete kukula yau. Kuyindula mwana na nge kesadisaka mpi.” Ndinga ya Nzambi kepesa ndongisila nde: ‘Beno katula mambu na beno yonso ya kimuntu, mumbandu: pite, bamambu ya nsoni.’ (Kolosai 3:5) Kana nge kesalaka ngolo sambu na kukula nzala na nge ya madya, keti nge tatangaka bazulunalu yina kemonisa madya ya kitoko, to nge tasala kinduku ti bantu yina ketubilaka ntangu yonso mambu yina metala madya? Ata fyoti ve! Yau kele kiteso mosi ti bampusa ya kinsuni.
20. (a) Inki kigonsa kele sambu na bayina kekwelaka bantu ya konda lukwikilu? (b) Inki mutindu bampumpa ya mvunkama ya ntete ti ya bubu yai kunwanaka ti kinsyona?
20 Bakristu yankaka mekudikotisaka na kuvukisa nitu ti bantu ya kukonda lukwikilu. (1 Korinto 7:39) Keti yau sukisaka makambu? Ve. Nkento Mukristu mosi kukebisaka nde: “Kele ti kima mosi ya meluta kimpumpa na mbi. Yau kele kukwela muntu ya mbi!” Na ntembe ve, bafwola ya mvunkama ya ntete kuvandaka ti bandwana ya kinsyona, kansi bayina ya mayele vandaka kudipesa ngolo na ‘kuyamba banzenza . . . na kuyobisa makulu ya basantu, na kusadisa bantu yina vandaka na mpasi.’ (1 Timoteo 5:10) Bubu yai, Bakristu ya kwikama yina mevingilaka bamvula mingi sambu na kuzwa nkwelani ya kebangaka Nzambi mekudipesaka mpi ngolo. Fwola Mukristu mosi ya bamvula 68 kuyantikaka na kwenda kutala bafwola yankaka konso ntangu yina ya yandi vandaka kudiwa na kinsyona. Yandi kutubaka nde: “Mono kemona nde na kwendaka kutala mutindu yai, na kulandaka kusala kisalu na mono ya nzo mpi na kusungiminaka kimpeve na mono, mono kele ve ti ntangu ya kuvanda na kinsyona.” Kulonga bantu yankaka mambu yina metala Kimfumu ya Nzambi kele kibeni kisalu ya mbote ya kenataka mambote.—Matayo 28:19, 20.
21. Na inki mutindu kisambu ti kinduku ya mbote lenda kusadisa na kununga kinsyona?
21 Yau kelomba kundima nde, nkisi ya kimangu sambu na kinsyona kele ve. Kansi yau lenda kuvibidilama ti ngolo ya kekatukaka na Yehowa. Ngolo ya mutindu yina kekwisaka ntangu Mukristu “kekwamina na badodokilu ti na bisambu mpimpa ti mwini.” (1 Timoteo 5:5, NW) Badodokilu kele balombilu ya masonga, ee, kubondila sambu na lusadisu, mbala yankaka ti kuboka ngolo mpi mansanga. (Fwanisa ti Baebreo 5:7.) Kukangula ntima na nge na Yehowa “mpimpa ti mwini” lenda kusadisa kibeni. Dyaka, kinduku ya mbote lenda kusadisa mingi na kufika dibulu ya kinsyona. Na nsadisa ya kinduku ya mbote, muntu lenda kubaka “ndinga ya mbote” ya nsyamisa yina metendulama na Bingana 12:25.
22. Inki mambu tasadisa ntangu mawi ya kinsyona kevutuka mbala na mbala?
22 Kana mawi ya kinsyona kekwisa mbala na mbala—bonso yau tasalamaka—yibuka nde ata muntu mosi ve kele ti luzingu ya kukonda bampasi. Na ntembe ve, “bampangi na beno yina me mwanganaka na bansi yonso” kele na kumona mpasi ya mutindu mosi to yankaka. (1 Piere 5:9) Buya kikalulu ya kukangama na mambu ya ntama. (Longi 7:10) Tadila dyaka mambote yina ya nge kele na kumona. Na zulu ya mambu yonso, baka lukanu ya kulunda kwikama na nge mpi ya kupesa ntima ya Yehowa kyese.—Bingana 27:11.
MUTINDU BANKAKA LENDA KUSADISA
23. Inki mukumba bankundi Bakristu kele na yau sambu na bibuti bampumpa na kati ya dibundu?
23 Lusadisu ya bankundi Bakristu kele na mbalu ya kuluta nene. Yakobo 1:27 ketuba nde: “[“Mutindu ya lusambu ya kugedila mpi ya kukonda mvindu na ntwala ya Nzambi mpi Tata na beto,” NW] yo yai: kusadisa bana-ns[y]ona ti bamifwidi ya bankento na bampasi na bo.” Ee, Bakristu fwete kusadisa mabuta ya kibuti mosi. Na nsadilu, na inki mitindu mambu yai lenda kusalama?
24. Na inki mitindu mabuta yina kele na kibuti mosi mpi na mpasi lenda kupesama lusadisu?
24 Lusadisu ya bima ya kinsuni lenda kupesama. Biblia ketuba nde: “Kana muntu kele mvwama, ebuna yandi me mona nde mpangi na yandi ke na kima ve kansi yandi me buya na kusadisa yandi, nki mutindu yandi lenda tuba nde yandi ke zolaka Nzambi?” (1 Yoane 3:17) Ngogo ya kisina ya Kigreki sambu na “me mona” ketendula, kaka kulosa disu ve, kansi kutala mbotembote. Yau kemonisa nde Mukristu yina kele na bumbote lenda ntete kuyikana ti bamvwandilu mpi bampusa ya dibuta. Mbala yankaka bau kele na mfunu ya mbongo. Bankaka lenda kuvanda na mfunu ya lusadisu sambu na kuyidikila bau bima yina mebeba na nzo. To bau lenda kuyangalala kaka na kubingama sambu na madya to na lukutakanu ya kimvuka.
25. Inki mutindu bankundi Bakristu lenda kumonisa nkenda sambu na bibuti bampumpa?
25 Dyaka, 1 Piere 3:8 ketuba nde: “Beno yonso kuvanda na mabanza ya mutindu mosi ti ntima ya mutindu mosi; beno fweti zolana beno na beno bonso bampangi . . . beno vanda [“ya kufuluka na nkenda,” NW].” Kibuti mpumpa mosi ya bana sambanu kutubaka nde: “Yau vandaka mpasi mpi bantangu yankaka mono vandaka kunyokwama na mabanza. Kansi, kana na nima ya ntangu fyoti mpangi mosi ya bakala to ya nkento kutubila mono nde: ‘Joan nge kesala kisalu mosi ya mbote. Mbutu tavanda ya mbote.’ Kaka na kuzaba nde bantu yankaka kele na kuyindula nge mpi nde bau kekudibanza kesadisaka mpenza.” Bankento Bakristu ya bambuta lenda kununga kibeni na kusadisa bankento ya baleke yina kele bibuti bampumpa, na kuwidikilaka bau na ntangu bau kele ti bampasi yina lenda kuvanda nsoni sambu na bau na kutubila yau ti bakala.
26. Inki mutindu Bakristu ya babakala ya kuyela lenda kusadisa bana ya bansyona?
26 Babakala Bakristu lenda kusadisa na mitindu yankaka. Muntu ya kwikama Yobi kutubaka nde: “Mono vandaka kusadisa mpi bana-ns[y]ona [ti bantu] yina vandaka na muntu ya kusadisa bo ve.” (Yobi 29:12) Mutindu mosi bubu yai, babakala Bakristu yankaka ketulaka dikebi ya mbote na bana-nsyona mpi kemonisaka “kuzola” ya kyeleka “yina ke basikaka na ntima ya mpembe,” ya kukonda bangindu yankaka. (1 Timoteo 1:5) Nkatu kuyambula mabuta na bau mosi, bau lenda kubongisa na kusala bantangu yankaka ti baleke ya mutindu yina na kisalu ya Bukristu ye lenda mpi kubinga bau na kuvukana ti bau na kulonguka ya dibuta to na kulenga. Bumbote ya mutindu yina lenda sadisa mpenza mwana-nsyona na kukatuka na ndyatilu ya mbi.
27. Inki lusadisu lenda kupesama na bibuti bampumpa?
27 Ya kyeleka, na nsukansuka, bibuti bampumpa fwete ‘baka kilo’ ya mukumba ‘na bau mosi.’ (Galatia 6:5) Ata mpila yina, bau lenda kubaka zola ya bampangi Bakristu ya babakala ti ya bankento mpi ya Yehowa Nzambi yandi mosi. Biblia ketuba sambu na yandi nde: “Yandi ke sadisaka bana-ns[y]ona ti bamimfwidi ya bankento.” (Nkunga 146:9) Ti lusadisu na yandi ya zola, mabuta ya kibuti mosi lenda kununga!
a Kana Mukristu ya leke mebaka divumu sambu na ndyatilu ya mansoni, dibundu ya Bukristu kelolulaka ve ata fyoti kima ya yandi mesala. Kansi, kana yandi mebalula ntima, bankuluntu ya dibundu ti bantu yankaka na kati ya dibundu lenda kupesa yandi lusadisu.
b Beto ketubila ve bamvwandilu yina mwana lenda kuvanda na mfunu ya kutaninama sambu na kibuti mosi ya mbi. Dyaka, kana kibuti yina yankaka kemeka na kuvwenza kiyeka na nge, mbala yankaka ti ngindu ya kundimisa bana na kuyambula nge, yau lenda kuvanda mbote na kutubila banduku ya ngikana, bonso bankuluntu na kati ya dibundu ya Bukristu sambu na kupesa ndongisila na yina metala mutindu ya kubongisa dikambu yango.