Beto kele ve ti bamfumu yina bo ke futaka salere na organizasio na beto. Kansi, mutindu bo vandaka kusala ntangu dibundu ya Bukristu yantikaka, bo ke ponaka bankengi ya me fwana “sambu na kugungula dibundu ya Nzambi.” (Bisalu 20:28) Bankuluntu yai kele babakala ya kuyela na kimpeve yina ke twadisaka dibundu mpi ke gungulaka yo, ‘sambu bo ke pusa bo ve, kansi na luzolo yonso na ntwala ya Nzambi; na zola ya kubaka ve luta na banzila ya luvunu, kansi na kiese yonso.’ (1 Piere 5:1-3) Inki kisalu bo ke salaka sambu na beto?

Bo ke kebaka beto mpi ke taninaka beto. Bankuluntu ke twadisaka mpi ke taninaka dibundu na kimpeve. Sambu bo ke zabaka nde Nzambi me pesaka bo mukumba yai ya mfunu, bankuluntu ke yalaka ve bantu ya Nzambi kansi bo ke sadisaka sambu beto vanda mbote mpi na kiese. (2 Bakorinto 1:24) Kaka mutindu ngungudi ke kebaka konso dimeme na yandi ti kikesa yonso, bankuluntu ke sosaka kuzaba konso muntu ya dibundu.​—Bingana 27:23.

Bo ke longaka beto mutindu ya kusala luzolo ya Nzambi. Konso mposo, bankuluntu ke twadisaka balukutakanu ya dibundu sambu na kukumisa lukwikilu na beto ngolo. (Bisalu 15:32) Bampangi yai ya me kudipesaka ke bakaka kisika ya ntete na kisalu ya kusamuna, bo ke salaka ti beto mpi ke pesaka beto formasio na bitini yonso ya kisalu ya kusamuna.

Bo ke pesaka konso muntu kikesa. Sambu na kusadisa beto na kukumisa ngolo bangwisana na beto ti Yehowa, bankuluntu ya dibundu lenda kwisa kutala beto na nzo to na Nzo ya Kimfumu sambu na kupesa beto lusadisu mpi kikesa ya me katuka na Masonuku.​—Yakobo 5:14, 15.

Katula kisalu ya bo ke salaka na dibundu, bankuluntu mingi ke vandaka mpi ti kisalu ya kinsuni mpi mikumba ya dibuta yina ke lombaka ntangu mpi dikebi na bo. Beto fwete zitisa bampangi yai ya ke salaka ngolo.​—1 Batesalonika 5:12, 13.

• Inki kele mukumba ya bankuluntu?

• Na nki mitindu bankuluntu ke tudilaka konso muntu dikebi?

Biblia ke tubilaka bimvuka zole ya bampangi ya babakala yina ke bakaka mikumba na dibundu: “bankengi ti bansadi ya kisalu.” (Bafilipi 1:1) Mbala mingi, konso dibundu ke vandaka ti bankuluntu mpi bansadi ya kisalu mingi. Inki kisalu bansadi ya kisalu ke salaka sambu na mambote na beto?

Bo ke sadisaka kimvuka ya bankuluntu. Bansadi ya kisalu, bo vanda baleke to bambuta, ke vandaka ti bangwisana ya ngolo ti Yehowa, bo kele bantu yina bo lenda tudila ntima, mpi bo ke salaka bisalu na bo na ntima ya mvimba. Bo ke salaka bisalu ya mfunu yina ke lombaka kusala mbala na mbala ya ke tadila mambu ya kinsuni mpi mutindu mambu fwete salama. Kusala mutindu yai ke sadisaka bankuluntu na kudipesa na kisalu na bo ya kulonga mpi ya kugungula.

Bo ke salaka bisalu ya mfunu. Kisalu ya bansadi ya kisalu ya nkaka kele kuyamba bantu yonso yina ke kwisa na balukutakanu. Bankaka ke talaka mambu ya sonorizasio, kukabula mikanda, konti ya dibundu, mpi kupesa bampangi bateritware sambu na kuta kimbangi. Bo ke sadisaka mpi kisalu ya kutanina Nzo ya Kimfumu. Bankuluntu lenda lomba bo na kusadisa minunu. Ata bo me pesa bo konso kisalu yina, bansadi ya kisalu ke salaka yo na luzolo yonso, yo yina bampangi yonso ke zitisaka bo.​—1 Timoteo 3:13.

Bo ke pesaka mbandu. Bo ke ponaka bansadi ya kisalu sambu na bikalulu na bo ya mbote ya Bukristu. Ntangu bo ke salaka masolo na balukutakanu, bo ke kumisaka lukwikilu na beto ngolo. Ntangu bo ke bakaka kisika ya ntete na kisalu ya kusamuna, bo ke sadisaka beto na kuvanda kikesa mingi. Sambu bo ke salaka kumosi ti kimvuka ya bankuluntu, yo ke nataka kiese mpi bumosi na dibundu. (Baefezo 4:16) Na nima, bo lenda lungisa mpi mambu ya bo ke lombaka sambu na kukuma bankuluntu.

• Bansadi ya kisalu ke vandaka ti nki bikalulu?

• Inki mutindu bansadi ya kisalu ke sadisaka dibundu na kutambula mbote?

Masonuku ya Kigreki ya Bukristu ke tubilaka mingi Barnabasi ti ntumwa Polo. Babakala yai vandaka bankengi-ntambudi mpi bo vandaka kukwenda kutala mabundu ya mvu-nkama ya ntete. Sambu na nki? Bo vandaka kudiyangisa na masonga yonso sambu na mambote ya bampangi na bo Bakristu. Polo tubaka nde yandi vandaka ti mpusa ya ‘kuvutuka sambu na kukwenda kutala bampangi’ sambu na kuzaba kana bo kele nki mutindu. Yandi vandaka ti luzolo ya kusala nzietelo ya bakilometre mingi sambu na kwenda kusiamisa bo. (Bisalu 15:36) Bankengi-ntambudi ya bubu yai ke vandaka ti mpusa ya mutindu mosi.

Bo ke kwisaka sambu na kupesa beto kikesa. Konso nkengi ya nziunga ke talaka kiteso ya mabundu 20 to mingi, mpi mbala zole na mvula yandi ke salaka mposo mosi na konso dibundu. Beto lenda baka mambote mingi na eksperiansi ya bampangi yai mpi kana bo me kwelaka, na eksperiansi ya bankento na bo. Bo ke salaka ngolo na kuzaba bantu yonso, baleke ti bambuta, mpi bo ke vandaka ti mpusa ya ngolo ya kufidisa beto na kisalu ya kusamuna mpi na kulonguka Biblia ti bantu. Bankengi yai ke salaka baviziti ya kingungudi ti bankuluntu, mpi sambu na kusiamisa beto, bo ke salaka badiskure ya ke pesa kikesa na balukutakanu ya dibundu mpi ya nene.​—Bisalu 15:35.

Bo ke tudilaka bantu yonso dikebi. Bankengi ya nziunga ke tulaka dikebi mingi na kimpeve ya mabundu. Bo ke salaka lukutakanu ti bankuluntu mpi bansadi ya kisalu sambu na kutadila mutindu dibundu me kwenda na ntwala mpi bo ke pesaka bo bandongisila ya ke tadila mutindu ya kulungisa mikumba na bo. Bo ke sadisaka bapasudi-nzila sambu bo sala kisalu na bo mbote, mpi bo ke vandaka na kiese ya kuzaba bantu ya mpa yina me yantika kuvukana ti dibundu mpi kuwa bo ntangu bo ke tubila kuyela na bo na kieleka. Konso nkengi-ntambudi ke kudipesaka bonso “nduku ya kisalu sambu na mambote” na beto. (2 Bakorinto 8:23) Beto fwete landa mbandu ya lukwikilu na bo mpi ya kukangama na bo na Nzambi.—Baebreo 13:7.

• Sambu na nki bankengi ya nziunga ke kwendaka kutala mabundu?

• Inki mutindu nge lenda baka mambote na baviziti na bo?

Kana kisumbula me salama, Bambangi ya Yehowa ke yidikaka bima kukonda kusukinina sambu na kupesa lusadisu na bampangi na bo yina me kutana ti diambu yina. Bikesa yina ke monisaka bukieleka ya zola yina ke vandaka na kati na beto. (Yoane 13:34, 35; 1 Yoane 3:17, 18) Na nki mitindu beto ke sadisaka?

Beto ke pesaka mbongo. Na mvu-nkama ya ntete, ntangu nzala ya ngolo kotaka na Yudea, Bakristu ya Antioshe tindaka mbongo na bampangi na bo Bakristu. (Bisalu 11:27-30) Mutindu mosi, ntangu beto ke waka nde bampangi na beto ya bwala mosi buna ke kutana ti bampasi, beto ke tindaka makabu na nzila ya dibundu na beto sambu na kupesa lusadisu ya kinsuni na bantu yina kele na mfunu ya lusadisu.​—2 Bakorinto 8:13-15.

Beto ke pesaka lusadisu. Bankuluntu yina kele na kisika yina kisumbula me salama ke sosaka konso mpangi ya dibundu na bo sambu na kuzikisa nde bo me mona Bambangi yonso mpi bo kele na lutaninu. Komite ya kupesa lusadisu lenda twadisa mambu sambu na kukabula madia, masa ya kunwa ya bunkete, bilele, nzo, mpi kusadisa bantu na kubaka lusansu. Bambangi ya Yehowa mingi ya me zaba mbote kisalu mosi buna ke futaka mbongo na bo mosi mpi ke kwendaka na luzolo na bo mosi sambu na kusadisa bampangi mpi kuyidika banzo ti Banzo ya Kimfumu yina me beba. Bumosi yina beto ke vandaka ti yo na organizasio na beto mpi eksperiansi yina beto me bakaka na kusala kumosi ke sadisaka beto na kupesa lusadisu nswalu kana mambu ya mpasi me basika. Ata beto ke sadisaka “bantu yina kele bampangi na beto na lukwikilu,” beto ke sadisaka mpi bantu ya nkaka kana mpila kele, ata bo kele bantu ya konso dibundu.—Bagalatia 6:10.

Beto ke pesaka kikesa na nzila ya Masonuku mpi ke sadisaka bo na mawi. Bantu yina kisumbula me bwila ke vandaka ti mfunu ya kukatula bo mawa. Na bantangu yina, beto ke bakaka ngolo na Yehowa, “Nzambi yina ke lembikaka bantu yonso.” (2 Bakorinto 1:3, 4) Na kiese yonso, beto ke zabisaka bantu yina kele na mpasi balusilu ya Biblia, beto ke pesaka bo kivuvu nde kubika fioti Kimfumu ya Nzambi ta manisa bampasi yonso yina bantu ke kutana ti yo.—Kusonga 21:4.

• Sambu na nki Bambangi ke pesaka lusadisu kukonda kusukinina kana kisumbula me salama?

• Inki kikesa ya me katuka na Masonuku beto lenda pesa bantu yina me guluka na kisumbula?

Ntangu fioti na ntwala ya kufwa, Yezu solulaka na kingenga ti balongoki na yandi iya—Piere, Yakobo, Yoane, mpi Andre. Ntangu Yezu vandaka kutubila kidimbu ya kukala na yandi na bilumbu ya nsuka, yandi yulaka ngiufula yai ya mfunu: “Nani kele kibeni mpika ya kwikama mpi ya mayele yina mfumu na yandi me tulaka na zulu ya bansadi na yandi, sambu na kupesa bo madia na bo na ntangu ya me fwana?” (Matayo 24:3, 45; Marko 13:3, 4) Yezu vandaka kubwisa balongoki ntima nde sambu yandi kele “mfumu” na bo, yandi ta pona bantu yina ta pesaka balongoki na yandi madia ya kimpeve mingi na bilumbu ya nsuka. Banani kele mpika yina?

Yo kele kimvuka ya fioti ya balongoki ya Yezu ya bo me tulaka mafuta. “Mpika” yina kele Nto-Kimvuka ya Bambangi ya Yehowa. Yandi ke pesaka madia ya kimpeve na bansadi ya nkaka ya Yehowa na ntangu ya me fwana. Beto ke tulaka ntima nde mpika yai ta landa kupesa beto ‘madia ya beto kele na yo mfunu na ntangu ya me fwana.’​—Luka 12:42.

Yo ke twadisaka dibundu ya Nzambi. (1 Timoteo 3:15) Yezu pesaka mpika mukumba ya nene ya kutwadisa kisalu ya kitini ya organizasio ya Yehowa yina kele na ntoto—kukeba bima na yo ya kinsuni, kutwadisa kisalu ya kusamuna, mpi kulonga beto na nzila ya mabundu na beto. Yo yina, sambu na kupesa beto madia ya beto kele na yo mfunu mpi na ntangu yina beto kele na yo mfunu, “mpika ya kwikama mpi ya mayele” ke kabulaka madia ya kimpeve na nzila ya mikanda yina beto ke sadilaka na kisalu ya kusamuna mpi na nzila ya manaka ya balukutakanu ya dibundu mpi ya nene.

Mpika kele ya kwikama na bakieleka ya Biblia mpi na kisalu na yandi ya kusamuna nsangu ya mbote, mpi mpika kele mayele na mutindu yandi ke taninaka na mayele yonso mambote ya Kristu awa na ntoto. (Bisalu 10:42) Yehowa ke sakumuna kikesa ya mpika yina na mutindu yandi ke sala nde bansadi kukuma mingi mpi yandi ke pesa madia mingi ya kimpeve.​—Yezaya 60:22; 65:13.

• Yezu ponaka nani sambu na kudisa balongoki na yandi na kimpeve?

• Na nki mutindu mpika kele ya kwikama mpi ya mayele?

Na mvu-nkama ya ntete, kimvuka mosi ya fioti, ‘bantumwa mpi bankuluntu yina vandaka na Yeruzalemi,’ vandaka nto-kimvuka yina vandaka kubaka badesizio ya mfunu sambu na mambote ya dibundu ya mvimba ya Bakristu ya bo me tulaka mafuta. (Bisalu 15:2) Bo vandaka kubaka badesizio yina bo yonso vandaka kundima. Sambu na kusala mutindu yina, bo vandaka kutadila Masonuku mpi kulanda lutwadisu ya mpeve santu. (Bisalu 15:25) Nto-Kimvuka ke salaka mutindu mosi bubu yai.

Nzambi ke sadilaka bo sambu na kusala luzolo na yandi. Bampangi-babakala ya bo me tulaka mafuta yina ke salaka na Nto-Kimvuka ke tulaka dikebi mingi na Ndinga ya Nzambi mpi bo me yikanaka kubaka badesizio na mambu ya ke tadila lusambu mpi kisalu na beto. Bo ke salaka lukutakanu konso mposo sambu na kutadila bampusa ya bampangi ya ntoto ya mvimba. Bonso na mvu-nkama ya ntete, bo ke pesaka malongi ya me katuka na Biblia na nzila ya mikanda, ya bankengi-ntambudi, to na banzila ya nkaka. Yo ke sadisaka bansadi ya Nzambi na kuvanda na bumosi na mabanza mpi na mutindu ya kusala mambu. (Bisalu 16:4, 5) Nto-Kimvuka ke twadisaka mambu ya me tala kubongisa madia ya kimpeve, ke siamisaka bansamuni yonso na kutula kisalu ya kusamuna Kimfumu na kisika ya ntete, mpi ke twadisaka mambu ya me tala kupesa bampangi mikumba.

Bo ke landaka lutwadisu ya mpeve ya Nzambi. Nto-Kimvuka ke sosaka lutwadisu ya Yehowa, Mfumu ya Luyalanganu, mpi ya Yezu, Mfumu ya dibundu. (1 Bakorinto 11:3; Baefezo 5:23) Bantu yina ke salaka na Nto-Kimvuka ke monaka ve nde bo kele bantwadisi ya bantu ya Nzambi. Kumosi ti Bakristu yonso ya bo me tulaka mafuta, bo ‘ke fula kulanda Mwana-Dimeme konso kisika yina yandi ke kwenda.’ (Kusonga 14:4) Nto-Kimvuka ke sepelaka na bisambu yina beto ke salaka sambu na bo.

• Banani vandaka kusala na Nto-Kimvuka ya mvu-nkama ya ntete?

• Inki mutindu Nto-Kimvuka ke sosaka lutwadisu ya Nzambi bubu yai?

Betele kele zina yina me katuka na Kiebreo; yo ke tendula “Nzo ya Nzambi.” (Kuyantika 28:17, 19, noti na nsi ya lutiti) Zina yina me fwana sambu na bisika yina Bambangi ya Yehowa me tungaka na ntoto ya mvimba; kisika bo ke twadisaka mpi ke yidikaka kisalu ya kusamuna. Nto-Kimvuka ke salaka na babiro ya nene na mbanza New York, na États-Unis, mpi katuka kuna yo ke twadisaka kisalu ya babiro ya filiale ya bansi mingi. Na kimvuka, bo ke bingaka bampangi yina ke salaka na bisika yai dibuta ya Betele. Bonso dibuta, bo ke zingaka mpi ke salaka kumosi, bo ke diaka kumosi, mpi bo ke longukaka Biblia kumosi na bumosi.—Nkunga 133:1.

Kisika ya kuswaswana yina bantu ya dibuta ke monisaka mpeve ya kuditambika. Betele yonso kele ti Bakristu ya babakala mpi ya bankento yina me kudipesaka na kisalu ya ntangu yonso sambu na kusala luzolo ya Nzambi mpi kunata mambote ya Kimfumu na ntwala. (Matayo 6:33) Muntu mosi ve na kati na bo ke bakaka salere to lufutu, kansi bo ke pesaka bo yonso banzo mpi madia mpi mwa mbongo sambu na kulungisa bampusa na bo. Konso muntu na Betele kele ti kisalu, yo vanda na biro, na kikuku, to na nzo ya madia. Bankaka ke salaka na kisika ya kuniema mikanda to ya kukangisa yo, bankaka ke tulaka bunkete na basuku, ke yobisaka bilele, ke bongisaka bima yina me beba, to ke salaka bisalu ya nkaka.

Kisika yina bo ke salaka sambu na kupesa maboko na kisalu ya kusamuna. Lukanu ya ntete-ntete ya konso Betele kele ya kusadisa bantu mingi kibeni na kubaka kieleka ya Biblia. Kamukanda yai kele mbandu mosi. Bo sonikaka yo na lutwadisu ya Nto-Kimvuka, bo tindaka yo na nzila ya Internet na bimvuka mingi ya bambaludi na ntoto ya mvimba, bo niemaka yo na bamasini ya kuniema yina ke niemaka mikanda mingi na mbala mosi (bamashini yango kele na ba Betele mingi), mpi bo tindaka yo na mabundu kuluta 110 000. Na konso kitini ya kisalu yai, mabuta ya Betele ke pesaka lusadisu ya me fwana na kisalu yina fwete salama kukonda kusukinina kuluta bisalu yonso—kisalu ya kusamuna nsangu ya mbote.—Marko 13:10.

• Banani ke salaka na Betele, mpi nki bangidika bo me bakaka sambu na bo?

• Inki kisalu ya fwete salama kukonda kusukinina mabuta yonso ya Betele ke pesaka maboko?

Bampangi ya mabuta ya Betele ke salaka na badepartema mingi; bo ke talaka kisalu ya kusamuna na insi mosi to na bansi mingi. Bo lenda sala na bimvuka ya bambaludi, na kuniema bazulunalu, kukangisa mikanda, na badepot ya mikanda mpi ke tindaka yo na mabundu, kusala mikanda ya kuwidikila to bavideo, to ke salaka bisalu ya nkaka.

Komite ya Filiale ke twadisaka bisalu. Nto-Kimvuka ke pesaka mukumba ya kutwadisa kisalu ya konso biro ya filiale na Komite ya Filiale, yina ke salamaka na bankuluntu tatu to mingi ya me fwana. Komite yina ke zabisaka Nto-Kimvuka mutindu kisalu ya kusamuna ke yela na konso insi yina bo ke tala mpi konso diambu yina lenda basika. Barapore yina ke sadisaka Nto-Kimvuka na kuzaba masolo yina bo ta tubila na mikanda na beto ya ke kwisa, na balukutakanu ya dibundu mpi ya nene. Bo ke tindaka mbala na mbala mimonisi ya Nto-Kimvuka na kwenda kutala bafiliale mpi kupesa Bakomite ya Filiale lutwadisu na mutindu bo fwete lungisa mikumba na bo. (Bingana 11:14) Bo ke yidikaka lukutakanu mosi ya sipesiali; na lukutakanu yina, mumonisi ya babiro ya nene ke salaka diskure sambu na kupesa bampangi ya teritware yina kikesa.

Bo ke sadisaka mabundu. Bampangi-babakala ya nkaka na biro ya filiale kele ti mukumba ya kundima mabundu ya mpa yina me salama. Bo ke talaka mpi kisalu ya bapasudi-nzila, ya bamisionere, mpi ya bankengi ya nziunga yina ke salaka na teritware na bo. Bo ke yidikaka balukutakanu ya nene mpi ya distrike, ke twadisaka kisalu ya kutunga Banzo ya Kimfumu ya mpa, mpi ke zikisaka nde mabundu me baka mikanda sambu na kulungisa bampusa na bo. Mambu yonso ya bo ke salaka na biro ya filiale ke sadisaka sambu na kusala mbote-mbote kisalu ya kusamuna.​—1 Bakorinto 14:33, 40.

• Inki mutindu Bakomite ya Filiale ke sadisaka Nto-Kimvuka?

• Inki ke salamaka na biro ya filiale?

Sambu beto zabisa mbote-mbote “nsangu ya mbote” na “makanda yonso, na mabuta yonso, na bandinga yonso, mpi na bansi yonso,” beto ke basisaka mikanda na bandinga kuluta 750. (Kusonga 14:6) Inki mutindu beto ke salaka kisalu yai ya mpasi? Beto ke salaka yo na lusadisu ya kimvuka ya bansoniki ya kele na ntoto ya mvimba mpi kimvuka ya bambaludi ya ke salaka ngolo—bo yonso kele Bambangi ya Yehowa.

Bo ke sonikaka yo na kisina na Kingelesi. Nto-Kimvuka ke twadisaka kisalu ya Departema ya Bansoniki na babiro na beto ya nene. Departema yai ke twadisaka kisalu ya bansoniki yina ke salaka na biro ya nene mpi na babiro ya nkaka ya filiale. Sambu bansoniki na beto kele na bansi mingi, yo ke sadisaka beto na kutubila masolo ya ke tubilaka binkulu mingi yina ke salaka nde bantu ya nsi-ntoto ya mvimba kusepela ti mikanda na beto.

Na nima bo ke tindaka yo na bambaludi. Na nima ya kuyidika mambu ya bo me sonika mpi kundima yo, bo ke tindaka yo na nzila ya Internet na bimvuka ya bambaludi na ntoto ya mvimba; bambaludi ke balulaka yo, ke zikisaka kana bo me balula yo mbote, mpi ke tangaka yo sambu yo vanda mutindu bantu ke tubaka. Bo ke salaka ngolo na kupona “bangogo ya sikisiki ya kieleka” ya ndinga na bo sambu yo wakana ti dibanza ya Kingelesi.—Longi 12:10.

Baordinatere ke sadisaka sambu mambu kusalama nswalu. Ordinatere lenda yinga ve bansoniki to bambaludi. Kansi, kisalu na bo lenda salama nswalu kana bo ke sadila badiksionere, bima ya kusadila bansosa mpi bisadilu ya nkaka yina kele na ordinatere. Bambangi ya Yehowa me salaka programe mosi ya ordinatere ya bo ke bingaka nde MEPS (système électronique d’édition multilingue); yo ke sadisaka na kukotisa masonama na bandinga mingi, na kuvukisa yo ti bifwanisu, mpi kuyidika yo sambu bo niema yo.

Sambu na nki beto ke salaka bikesa yai yonso, ata sambu na bandinga yina bantu fioti mpamba ke tubaka? Sambu luzolo ya Yehowa kele nde “bantu ya mitindu yonso kuguluka mpi kubaka nzayilu ya sikisiki ya kieleka.”—1 Timoteo 2:3, 4.

• Inki mutindu bo ke sonikaka mikanda na beto?

• Sambu na nki beto ke balulaka mikanda na beto na bandinga mingi?

Konso mvula, organizasio na beto ke basisaka mpi ke kabulaka bamilio ya ba Biblia mpi ya mikanda ya nkaka ya ofele. Beto ke tungaka mpi ke taninaka Banzo ya Kimfumu ti babiro ya filiale. Beto ke sadisaka bampangi mingi ya Betele ti bamisionere, mpi beto ke pesaka bampangi lusadisu ntangu bisumbula ke salamaka. Yo yina, nge lenda kudiyula nde, ‘Mbongo ya beto ke sadilaka mambu yai yonso ke katukaka na wapi?’

Beto ke pesaka ve ba dikumi, ke lombaka ve mbongo, mpi ke salaka ve nsisani. Ata yo ke lombaka mbongo mingi sambu na kusala kisalu na beto ya kusamuna, beto ke lombaka ve mbongo. Kiteso ya mvu-nkama mosi me luta, nimero ya zole ya Nzozulu ya Nkengi tubaka nde beto ke ndimaka nde Yehowa muntu ke sadisaka beto mpi nde beto “ta bondila ve mpi ta lomba ve ata fioti lusadisu ya bantu”—mpi beto ke salaka yo ntete ve!—Matayo 10:8.

Bisalu na beto me simbamaka na makabu ya luzolo ya mbote. Bantu mingi ke sepelaka ti kisalu na beto ya kulonga Biblia mpi bo ke pesaka makabu sambu na yo. Bambangi ya Yehowa bo mosi ke pesaka na luzolo yonso ntangu, ngolo, mpi mbongo, mpi bima ya nkaka sambu na kusala luzolo ya Nzambi na ntoto ya mvimba. (1 Bansangu 29:9) Na Nzo ya Kimfumu mpi na balukutakanu na beto ya nziunga ti ya distrike, beto ke tulaka bakesi ya makabu kisika bantu yina ke zola kupesa makabu lenda tula makabu na bo. To bantu lenda pesa makabu na nzila ya site na beto, jw.org. Mbala mingi, makabu yina ke katukaka na bantu yina kele bansukami, kaka bonso mufwidi ya nsukami yina Yezu tubaka mambu ya mbote sambu na yandi sambu yandi tulaka bibende fioti na kesi ya makabu ya tempelo. (Luka 21:1-4) Yo yina, konso muntu lenda “tula ndambu ya mbongo na lweka” sambu na kupesa “mutindu yandi me kana na ntima na yandi.”—1 Bakorinto 16:2; 2 Bakorinto 9:7.

Beto ke ndima nde Yehowa ta landa kusimba ntima ya bantu yina ke zola ‘kukumisa yandi ti bima na bo ya ntalu’ sambu na kupesa maboko na kisalu ya Kimfumu, sambu luzolo ya Nzambi kulungana.—Bingana 3:9.

• Inki ke salaka nde organizasio na beto kuswaswana ti mabundu ya nkaka?

• Inki mutindu beto ke sadilaka makabu ya luzolo ya mbote?

Mutindu zina yina ke monisa, Banzo ya Kimfumu kele bisika yina bo ke longaka malongi ya Biblia yina ke tubilaka mingi Kimfumu ya Nzambi—ntu-diambu ya kisalu ya Yezu.—Luka 8:1.

Yo kele bisika ya nene ya lusambu ya kieleka. Bo ke yidikaka kisalu ya kusamuna nsangu ya mbote na konso bwala katuka na Banzo ya Kimfumu. (Matayo 24:14) Banzo ya Kimfumu me swaswana na nene mpi na mutindu bo ke tungaka yo; kansi yonso ke vandaka ya kukonda mindondo, mpi mbala mingi mabundu mingi ke sadilaka Nzo ya Kimfumu mosi. Na bamvula ya me luta, sambu ntalu ya mabundu ke landa kukuma mingi, beto me tunga Banzo ya Kimfumu kuluta 10 000 (disongidila, kiteso ya tanu konso kilumbu). Beto ke zwaka mbongo wapi?—Matayo 19:26.

Bo ke tungaka yo na nsadisa ya makabu yina beto ke tulaka kisika mosi. Bo ke tindaka makabu yai na biro ya filiale sambu mabundu yina kele ti mfunu ya kutunga to kuyidika Banzo ya Kimfumu kusadila yo.

Bo ke tungaka yo na bampangi ya luzolo ya mbote ya me katuka na bisika yonso. Na bansi mingi, bo me salaka Bimvuka ya Kutunga Banzo ya Kimfumu. Bimvuka ya bansadi ya kisalu ya kutunga mpi bampangi ya nkaka ya luzolo ya mbote ke kwendaka na mabundu ya insi mosi, ata na bisika ya ntama, sambu na kusadisa mabundu na kutunga Banzo ya Kimfumu na bo. Na bansi ya nkaka, bo me ponaka Bambangi ya kufwana sambu na kutwadisa kisalu ya kutunga mpi ya kuyidika Banzo ya Kimfumu. Ata bampangi mingi ya luzolo ya mbote yina me zaba kisalu ya kutunga ke kudipesaka na konso kisika yina bo ke salaka kisalu ya kutunga, bampangi ya mabundu ya bisika yina bantu ke salaka kisalu ya mingi. Mpeve ya Yehowa mpi bikesa yina bansadi na yandi ke salaka na ntima ya mvimba ke sadisaka sambu bisalu yai yonso kusalama.—Nkunga 127:1; Bakolosai 3:23.

• Sambu na nki beto ke bingaka bisika na beto ya lusambu Banzo ya Kimfumu?

• Inki mutindu beto ke tungaka Banzo ya Kimfumu na nsi-ntoto ya mvimba?

Konso Nzo ya Kimfumu ya Bambangi ya Yehowa ke vandaka ti zina ya santu ya Nzambi. Yo yina, beto ke monaka nde kuvukana sambu nzo yai kuvanda bunkete mpi mbote kele dibaku ya mbote mpi kitini ya mfunu ya lusambu na beto ya santu. Bantu yonso lenda vukana.

Pesa maboko sambu na kutula bunkete na nima ya balukutakanu. Na nima ya konso lukutakanu, bampangi ya babakala mpi ya bankento ke vandaka na kiese ya kutula bunkete ya zulu-zulu na Nzo ya Kimfumu. Mbala mosi konso mposo, bo ke tulaka bunkete ya mudindu. Nkuluntu to nsadi ya kisalu mosi ke twadisaka kisalu yai; mbala mingi yandi ke landaka lisiti ya mambu yina bo fwete sala. Kana yo kele mfunu, bampangi yina me kudipesa na luzolo na bo mosi ke kombaka ntoto, ke yobisaka sima, ke katulaka baban na ndonga, ke katulaka mvindu na bafenetre, ke yobisaka bitala-tala mpi bakabine, ke tulaka bunkete na nganda mpi na kibansala ya Nzo ya Kimfumu. Mbala mosi konso mvula, bo ke ponaka kilumbu mosi sambu na kutula bunkete ya nene. Kana bana na beto mpi ke sala bisalu ya nkaka, beto ke longa bo na kuzitisa kisika na beto ya lusambu.—Longi 5:1.

Pesa maboko kana yo ke lomba kuyidika kima mosi. Konso mvula, bo ke tadilaka bima yonso ya Nzo ya Kimfumu, na kati mpi na nganda. Na nima, bo ke salaka bisalu ya kuyidika bima mbala na mbala sambu na kutanina Nzo ya Kimfumu, mpi kubuya kusala badepanse ya kukonda mfunu. (2 Bansangu 24:13; 34:10) Nzo ya Kimfumu ya bunkete mpi ya kuyidika mbote kele kisika ya me fwana sambu na kusambila Nzambi na beto. Kana beto ke vukana na kisalu yai, beto ta monisa nde beto ke zolaka Yehowa mpi beto ke bakaka kisika na beto ya lusambu na valere. (Nkunga 122:1) Yo ke salaka mpi nde bantu yina ke tala beto kutuba mambu ya mbote sambu na beto.—2 Bakorinto 6:3.

• Sambu na nki beto fwete mona ve mpamba kisika na beto ya lusambu?

• Inki bangidika bo ke bakaka sambu Nzo ya Kimfumu kuvanda bunkete?

Keti nge ta zola kusala mwa bansosa sambu na kuzaba Biblia mbote? Keti nge ke zola kuzaba mbote verse mosi to muntu mosi, kisika mosi, to diambu mosi yina Biblia ke tubilaka? To keti nge me kudiyulaka kana Ndinga ya Nzambi lenda sadisa nge na diambu mosi yina ke yangisaka nge? Kana mpidina, kwenda kutala biblioteke ya Nzo ya Kimfumu.

Yo kele ti bisadilu ya kusadila bansosa. Ntembe kele ve nde, nge kele ve ti mikanda yonso ya ke tendulaka Biblia ya Bambangi ya Yehowa yina kele na ndinga na beno. Kansi biblioteke ya Nzo ya Kimfumu kele ti mikanda mingi ya bo me basisa ntama mingi ve. Yo lenda vanda mpi ti bambalula mingi ya Biblia, diksionere mosi ya mbote, mpi mikanda ya nkaka ya mfunu. Nge lenda sadila biblioteke na ntwala to na nima ya balukutakanu. Kana ordinatere kele kuna, ziku yo kele ti Watchtower Library. Yo kele programe mosi yina kele ti mikanda na beto mingi mpi yo kele ti kima ya pete ya kusadila bansosa yina nge lenda sosa diambu mosi, ngogo mosi, to verse mosi.

Yo ke sadisaka balongoki na Lukutakanu ya Luzingu mpi Kisalu. Nge lenda baka mambote na biblioteke ya Nzo ya Kimfumu ntangu nge ke yidika masolo na nge. Nkengi ya Lukutakanu ya Luzingu mpi Kisalu muntu ke talaka mambu ya biblioteke. Yandi kele ti mukumba ya kuzikisa nde mikanda yina me katuka kubasika kele na kati mpi yo kele ya kuyidika mbote. Yandi to muntu yina ke longaka nge Biblia lenda songa nge mutindu ya kuzwa bansangu yina nge kele na yo mfunu. Kansi, muntu mosi ve lenda baka mikanda na biblioteke ya Nzo ya Kimfumu mpi kukwenda na yo. Ya kieleka, beto fwete sadila yo mbote mpi kusonika ve na kati.

Biblia ke tendula nde sambu na ‘kuzwa nzayilu ya Nzambi,’ beto fwete sosa yo “mutindu bo ke sosaka bimvwama yina me bumbanaka.” (Bingana 2:1-5) Biblioteke ya Nzo ya Kimfumu lenda sadisa nge na kuyantika kusala bansosa.

• Inki bisadilu ya kusadila bansosa ke vandaka na biblioteke ya Nzo ya Kimfumu?

• Nani lenda sadisa nge na kusadila mbote biblioteke?

Yezu Kristu songaka balongoki na yandi nde: “Bika nde nsemo na beno kusema na meso ya bantu, sambu bo mona bisalu na beno ya mbote mpi bo pesa nkembo na Tata na beno yina kele na zulu.” (Matayo 5:16) Yo yina, beto ke sadilaka teknolozi ya bilumbu yai mpi Internet. Site Internet na beto jw.org, kele kisika ya me zabanaka yina bansangu ya me tala balukwikilu mpi bisalu ya Bambangi ya Yehowa kele na Internet. Inki mambu kele kuna?

Bamvutu ya Biblia na bangiufula yina bantu ke yulaka mingi. Nge lenda mona bamvutu na bangiufula mingi ya mfunu yina bantu ke yulaka. Mu mbandu, batrakiti Keti Kilumbu Kele Bampasi Ta Mana? mpi Keti ya Kieleka Bafwa Lenda Zinga Diaka? kele na Internet na bandinga kuluta 600. Nge lenda mona mpi Mbalula ya Nsi-Ntoto ya Mpa na bandinga kuluta 130 mpi mikanda mingi ya ke sadisaka na kulonguka Biblia; mu mbandu Inki Biblia Kelongaka Mpenza? mpi banimero ya mpa ya Nzozulu ya Nkengi ti Réveillez-vous ! Mingi na kati ya mikanda yai, nge lenda tanga to kuwidikila yo na Internet to kubaka yo na ba format yai ya bantu ke sadilaka mingi, MP3, PDF, to EPUB. Nkutu nge lenda niema mwa balutiti na yo sambu na kutadila yo ti muntu mosi yina ke sepela na Biblia na ndinga na yandi! Bavideo kele mpi na bandinga mingi ya bidimbu. Nge lenda baka badrame ya lutangu ya Biblia, badrame ya Biblia, mpi miziki ya kitoko sambu na kuwidikila ntangu nge ke pema.

Mambu ya ke tadila Bambangi ya Yehowa. Nge ta kuta mpi bansangu ti bavideo ya mpa ya ke monisa kisalu na beto ya ke salama na ntoto ya mvimba, mambu ya ke tadila Bambangi ya Yehowa, mpi lusadisu ya beto ke pesaka bantu yina mpasi me bwila. Nge lenda mona bansangu ya ke tadila balukutakanu ya distrike yina ta salama na bilumbu ke kwisa mpi bansangu ya me tala babiro ya filiale na beto.

Bima yai yonso ke sadisa beto na kusala nde nsemo ya kieleka kusema na bisika ya ntama ya nsi-ntoto. Yo ke sadisa bantu ya bansi yonso, ata bayina ke zingaka na bansi ya madidi bonso Antarctique. Beto ke samba nde “ndinga ya Yehowa kulanda kumwangana nswalu” na ntoto ya mvimba, sambu na kupesa Nzambi lukumu.—2 Batesalonika 3:1.

• Inki mutindu site jw.org ke sadisa bantu mingi na kulonguka kieleka ya Biblia?

• Inki nge ta zola kusosa na site Internet na beto?