Bantu mingi me yambulaka kukwenda na banzo-nzambi sambu bo me bakaka ve lusadisu to kikesa na kimpeve. Kana mpidina, sambu na nki nge fwete kwenda na balukutakanu ya Bukristu ya Bambangi ya Yehowa? Inki nge ta mona kuna?

Kiese ya kuvanda na kati ya bantu ya ke zolanaka mpi ya ke tudilanaka dikebi. Na mvu-nkama ya ntete, bo vukisaka Bakristu na mabundu, mpi bo vandaka kusala balukutakanu sambu na kusambila Nzambi, kulonguka Masonuku, mpi kupesana kikesa. (Baebreo 10:24, 25) Sambu bo vandaka kuvukana na zola yonso, bo vandaka kudiwa nde bo kele na kati ya banduku ya kieleka—bampangi na bo ya kimpeve. (2 Batesalonika 1:3; 3 Yoane 14) Beto ke salaka mutindu mosi mpi ke bakaka kiese ya mutindu mosi.

Mambote ya kulonguka mutindu ya kusadila minsiku ya Biblia. Mutindu yo vandaka kusalama na ntangu ya ntama, babakala, bankento, mpi bana ke vukanaka kumosi. Balongi ya Biblia ya me fwana ke sadisaka beto na kubakisa mutindu ya kusadila minsiku ya Biblia na luzingu na beto ya konso kilumbu. (Kulonga 31:12; Nehemia 8:8) Bantu yonso lenda pesa bamvutu na masolo ti bawi mpi lenda vukana na kuyimba; kusala mpidina ke sadisaka beto na kumonisa kivuvu na beto ya Bukristu.—Baebreo 10:23.

Lukwikilu na nge na Nzambi ta kuma ngolo. Ntumwa Polo zabisaka dibundu mosi ya bilumbu na yandi nde: “Mono kele na nzala ya ngolo ya kumona beno, . . . sambu beto pesana kikesa, na nzila ya lukwikilu na beto, lukwikilu na beno mpi ya mono.” (Baroma 1:11, 12) Na balukutakanu, ntangu beto ke kutanaka mbala na mbala ti bampangi Bakristu, beto ke kumisaka ngolo lukwikilu mpi lukanu na beto ya kuzinga na kuwakana ti minsiku ya Biblia.

Sambu na nki ve kundima kukwisa na lukutakanu ya ke landa ya dibundu na beto mpi kumona mambu yai nge mosi? Bo ta yamba nge na kiese yonso. Balukutakanu yonso kele ya ofele—beto ke salaka ve nsisani.

• Balukutakanu na beto ke landaka inki mbandu?

• Inki mutindu beto lenda baka mambote kana beto ke kwenda na balukutakanu ya Bukristu?

Ata yo ke lomba nde beto luta na mfinda ya nene to kubasika na nsi ya mvula to ya madidi ya ngolo, beto ke kwendaka mbala na mbala na balukutakanu na beto ya Bukristu. Ata bo ke kutana ti bampasi na luzingu mpi bo me lemba na nima ya kusala kilumbu ya mvimba, sambu na nki Bambangi ya Yehowa ke salaka bikesa na kuvukana ti bampangi na bo?

Yo kele mfunu sambu na mambote na beto. Ntangu Polo vandaka kutubila bantu yina beto ke vukanaka ti bo na dibundu, yandi sonikaka nde: “Beto tudila bankaka dikebi.” (Baebreo 10:24) Bangogo yai ke tendula “kudibanza sambu na bankaka,” disongidila kusosa kuzaba bantu yonso. Yo yina, bangogo ya Polo ke siamisa beto na kudiyangisa sambu na bankaka. Kana beto ke zaba mabuta ya nkaka ya Bukristu, beto ta bakisa nde bankaka na kati na bo me nungaka bampasi yina me fwanana ti ya beto mpi nde bo lenda sadisa beto mpi na kununga.

Yo ke sadisa na kusala binduku ya ngolo. Na balukutakanu na beto, beto ke vukanaka ve ti bantu yina beto me zaba, kansi ti banduku ya ngolo. Na mabaku ya nkaka, beto ke vukanaka kumosi sambu na kusala bansaka ya mbote ya kulutisila ntangu. Inki mambote beto ke bakaka na balukutakanu yina? Beto ke longukaka na kubaka bankaka na mbalu, mpi kusala mpidina ke kumisaka bangwisana na beto ya zola ngolo. Na nima, ntangu bampangi na beto ke kutanaka ti bampasi, beto ke sadisaka bo sambu beto me salaka kinduku ya ngolo ti bo. (Bingana 17:17) Kana beto ke vukana ti bampangi yonso ya dibundu, beto ke monisa nde beto ke kudibanzaka sambu na bankaka.—1 Bakorinto 12:25, 26.

Beto ke siamisa nge na kupona banduku na nge na kati ya bantu yina ke salaka luzolo ya Nzambi. Nge ta zwa banduku ya mutindu yina na kati ya Bambangi ya Yehowa. Kubika ve nde ata kima mosi kukanga nge nzila ya kuvukana ti beto.

• Sambu na nki yo kele mfunu nde beto vukanaka na balukutakanu?

• Inki ntangu nge ta zola kuzaba bampangi ya dibundu na beto?

Na balukutakanu ya Bakristu ya ntete, bo vandaka kuyimba, kusamba, kutanga mpi kutadila Masonuku—kukonda kusala ata kinkulu mosi buna. (1 Bakorinto 14:26) Nge ta mona mambu ya mutindu mosi na balukutakanu na beto.

Malongi ke katukaka na Biblia mpi yo me fwana na kusadila. Na wikendi, konso dibundu ke vukanaka sambu na kulanda diskure ya me simbama na Biblia ya minuta 30, yina ke monisaka mfunu ya Masonuku na luzingu na beto mpi na bilumbu na beto. Bo ke siamisaka beto yonso na kulanda na Biblia na beto. Na nima ya diskure, beto ke salaka ngunga mosi na Kulonguka ya “Nzozulu ya Nkengi,” yina bo ke lombaka bampangi na kupesa bakomantere na disolo mosi ya me katuka na nimero ya kulonguka ya Nzozulu ya Nkengi. Kulonguka yai ke sadisaka beto na kusadila minsiku ya Biblia na luzingu na beto. Mabundu kuluta 110 000 na ntoto ya mvimba ke longukaka malongi ya mutindu mosi.

Yo ke sadisaka beto na kutomisa mayele na beto ya kulongila. Na nkokila ya kilumbu mosi ya mposo, beto ke vukanaka mpi sambu na manaka mosi ya kele ti bitini tatu, yina kele na ntu-diambu Luzingu mpi Kisalu na Beto ya Bukristu; malongi na yo ke katukaka na Mukanda ya Lukutakanu ya Luzingu mpi Kisalu na Beto ya Bukristu yina ke basikaka konso ngonda. Kitini ya ntete ya lukutakanu yai, Bimvwama ya Ndinga ya Nzambi, ke sadisaka beto na kuzaba mbote-mbote kitini mosi ya Biblia yina dibundu ke tangaka na ntwala. Na nima, kitini Kudipesa na Kisalu ya Bilanga ke vandaka ti bansonga ya ke monisaka mutindu ya kusolula mambu ya Biblia ti bantu ya nkaka. Ndongisi mosi ke pesaka bandongisila sambu na kusadisa beto na kutomisa mayele na beto ya kutanga mpi ya kutuba. (1 Timoteo 4:13) Kitini ya nsuka, Zinga Mutindu Bakristu Fwete Zinga, ke tubilaka mutindu beto lenda sadila minsiku ya Biblia na luzingu ya konso kilumbu. Yo ke vandaka ti disolo ya bangiufula mpi bamvutu yina ke sadisaka beto na kubakisa mbote Biblia.

Kana nge kwenda na balukutakanu na beto, ntembe kele ve nde nge ta yituka mingi na malongi ya mbote ya Biblia yina nge ta baka.​—Yezaya 54:13.

• Inki mambu nge lenda wa na balukutakanu ya Bambangi ya Yehowa?

• Nge ta zola kukwenda na nki lukutakanu na beto ya konso mposo?

Keti na bifwanisu yina kele na kati ya kamukanda yai, nge me mona mutindu Bambangi ya Yehowa me lwata ntangu bo ke kwenda na balukutakanu ya dibundu? Sambu na nki beto ke tulaka dikebi mingi na kulwata na beto mpi kubongisa nitu?

Sambu na kuzitisa Nzambi na beto. Yo ke kieleka nde Nzambi ke tulaka ve dikebi mingi na kimuntu na beto ya nganda. (1 Samuele 16:7) Kansi ntangu beto ke vukanaka sambu na kusambila yandi, mpusa na beto ya masonga ke vandaka ya kuzitisa yandi mpi bampangi na beto Bakristu. Kana beto ke zola kukutana ti mfumu mosi, sambu na kuzitisa kiyeka na yandi, beto ta tula dikebi na mutindu na beto ya kulwata. Kiteso mosi, mutindu beto ke lwataka na balukutakanu ke monisaka luzitu na beto sambu na Yehowa Nzambi “Zuzi ya ntoto ya mvimba,” mpi sambu na kisika yina beto ke sambaka yandi.​—Kuyantika 18:25.

Sambu na kumonisa minsiku yina ke twadisaka beto. Biblia ke siamisaka Bakristu na kulwata ‘kukonda kulutisa ndilu mpi na kuvanda ti mabanza ya mbote.’ (1 Timoteo 2:9, 10) Kulwata bilele “kukonda kulutisa ndilu” ke tendula kubuya kulwata bilele yina lenda benda dikebi ya bantu na beto sambu beto me lwata bilele ya ke monisa bitini ya nkaka ya nitu, ya me kanga beto ngolo, to ya ke tedimisa mpusa ya nitu. Diaka, kuvanda ti “mabanza ya mbote” ke sadisaka beto na kupona bilele ya mbote yina kele ve ya kisaka-saka to ya mbi. Kansi, minsiku yai ke bikilaka beto kimpwanza ya kupona bilele ya beto me zola. Kukonda kutuba ata diambu mosi, kulwata na beto ya kitoko mpi ya me fwana lenda “tomisa malongi ya Ngulusi na beto” mpi ‘kupesa Nzambi nkembo.’ (Tito 2:10; 1 Piere 2:12) Kana beto ke lwata mbote na balukutakanu, beto ta vanda na bupusi ya mbote na mutindu yina bantu ke monaka lusambu ya Yehowa.

Kubika ve nde bilele na nge kukanga nge nzila ya kukwenda na Nzo ya Kimfumu. Sambu bilele na beto kuvanda ya mbote, ya bunkete, mpi ya me fwana, yo fwete vanda ve ya ntalu mingi to ya kitoko mingi.

• Sambu na nki mutindu beto ke lwataka ntangu beto ke sambaka Nzambi kele mfunu?

• Inki minsiku ke sadisaka beto ntangu beto ke ponaka bilele mpi bima ya kuyidikila nitu?

Kana nge ke longukaka Biblia ti Mbangi ya Yehowa mosi, ziku nge ke tadilaka na ntwala konso dilongi yina beno ta longuka. Sambu na kubaka mambote mingi, yo kele mbote na kusala mutindu mosi na ntwala ya kukwenda na balukutakanu ya dibundu. Beto ke bakaka mambote mingi kana beto me yedisa kikalulu ya mbote ya kudibongisa na ntwala.

Pona ntangu mpi kisika ya kulonguka. Inki ntangu nge ke longukaka mbote? Keti na suka-suka na ntwala ya kuyantika kisalu na nge ya kilumbu, to na mpimpa ntangu bana me lala? Ata nge lenda longuka ve ntangu mingi, pona ntangu ikwa nge ta longuka, mpi kubika ve ata kima mosi kukanga nge nzila ya kusala yo. Sosa kisika ya pima, mpi katula bima yina yonso lenda katula nge dikebi; mu mbandu radio, televizio, mpi telefone. Kusamba na ntwala ya kulonguka ta sadisa nge na kutula mabanza na nge kaka na Ndinga ya Nzambi, na kisika ya kuyindula basusi ya kilumbu yina.—Bafilipi 4:6, 7.

Tenda mambu mpi kudibongisa sambu na kupesa bakomantere. Yantika na kubakisa ngindu ya mvimba ya disolo. Tadila ntu-diambu ya disolo to ya kapu, mutindu konso kantu-diambu ke wakana ti ntu-diambu, mpi tadila bifwanisu yonso mpi bangiufula ya mvutukilu yina ke benda dikebi na bangindu ya mfunu. Na nima, tanga konso paragrafe, mpi sosa mvutu ya bangiufula yina bo me yula. Sosa, mpi tanga baverse yina bo me vutukila ve bangogo na yo, mpi yindula mutindu yo ke wakana ti disolo yina. (Bisalu 17:11) Kana nge mona mvutu ya ngiufula mosi, tenda yo to tenda mwa bangogo ya mfunu to bansa yina kele na paragrafe sambu yo ta sadisa nge na kuzaba mvutu ntangu lukutakanu ke salama. Na nima, ntangu nge ta vanda na lukutakanu, nge lenda tombula diboko mpi kupesa mvutu ya nkufi na bangogo na nge mosi.

Kana nge longuka masolo mingi yina bo ke salaka konso mposo na balukutakanu, yo ta sadisa nge na kuyika bangindu ya mpa ‘na kisika yina nge ke bumbaka’ nzayilu ya Biblia.—Matayo 13:51, 52.

• Inki kikalulu nge lenda yedisa na yina me tala kudibongisa sambu na balukutakanu?

• Inki mutindu nge lenda kudibongisa sambu na kupesa mvutu na lukutakanu?

Banda ntangu ya ntama, Yehowa ke zolaka nde mabuta yonso kulutisa ntangu kumosi, sambu na kukumisa ngolo kimpeve na bo mpi bangwisana na bo. (Kulonga 6:6, 7) Yo yina Bambangi ya Yehowa ke ponaka ntangu mosi konso mposo sambu dibuta kusambila kumosi, disongidila kusolula, na kisika mosi ya mbote, mambu ya kimpeve yina ke tadila bampusa na bo. Ata nge ke zingaka nge mosi, yo lenda vanda dibaku ya mbote ya kulutisa ntangu ti Nzambi, ziku ntangu nge ke longuka disolo mosi ya Biblia yina nge ponaka.

Yo kele ntangu ya kukwenda pene-pene na Yehowa. “Beno kwenda pene-pene na Nzambi, ebuna yandi ta kwisa pene-pene na beno.” (Yakobo 4:8) Beto ke zabaka Yehowa mbote-mbote ntangu beto ke longukaka mambu ya me tala kimuntu na yandi mpi bisalu na yandi na Ndinga na yandi ya kusonika. Mutindu mosi ya pete ya kuyantika lusambu na beno ya dibuta kele ya kulutisa mwa ntangu na kutanga Biblia kumosi na ndinga ya ngolo; ziku na kulanda manaka ya Lukutakanu ya Luzingu mpi Kisalu konso mposo. Beno lenda kabula baverse ya kutanga na konso muntu ya dibuta, mpi na nima beno yonso lenda tubila mambu yina bo me longuka na Masonuku.

Yo kele ntangu ya kukumisa bangwisana ya bantu ya dibuta ngolo. Babakala ti bankento, yika mpi bibuti ti bana, ke kumisaka bangwisana na bo ngolo ntangu bo ke longukaka Biblia na dibuta. Yo fwete vanda ntangu ya kiese mpi ya ngemba, yina bantu yonso ke vingila ti kiese. Bibuti lenda pona masolo ya me fwana na kutadila mvula ya bana, ziku bo lenda sadila masolo ya Nzozulu ya Nkengi mpi Réveillez-vous ! to masolo ya kele na site na beto jw.org. Beno lenda tubila diambu mosi yina bana na beno kutanaka ti yo na nzo-nkanda mpi mutindu ya kununga yo. Sambu na nki ve kutala manaka mosi ya bo songaka na JW Télé diffusion (tv.jw.org) mpi kutubila yo kumosi na nima? Beno lenda longuka na kiese bankunga yina beno ta yimba na balukutakanu mpi kudia mwa kima na nima ya lusambu ya dibuta.

Ntangu yai ya sipesiali ya beno ke lutisa konso mposo sambu na kusambila Yehowa kumosi ta sadisa bantu yonso ya dibuta na kuzola na kulonguka Ndinga ya Nzambi, ebuna Nzambi ta sakumuna mingi bikesa na beno.—Nkunga 1:1-3.

• Sambu na nki beto ke bumbaka ntangu sambu na lusambu ya dibuta?

• Inki bibuti lenda sala sambu dibaku yai kuvanda ntangu ya kiese sambu na bantu yonso ya dibuta?

Sambu na nki bantu yai kele na kiese mingi? Sambu bo kele na lukutakanu na beto. Bonso bansadi ya Nzambi ya ntangu ya ntama, yina bo zabisaka na kuvukana mbala tatu na mvula mosi, beto ke vandaka na kiese ya kuvukana kumosi na bimvuka ya nene. (Kulonga 16:16) Konso mvula, beto ke vandaka ti balukutakanu tatu ya nene: balukutakanu zole ya nziunga ya kilumbu mosi mpi lukutakanu ya distrike ya bilumbu tatu. Inki mutindu beto ke bakaka mambote na balukutakanu yai?

Yo ke kumisaka ngolo bangwisana na beto ya Bukristu. Mutindu bantu ya Izraele vandaka kusepela na kukumisa Yehowa “na balukutakanu,” beto ke sepelaka mpi na kusambila yandi kumosi na balukutakanu ya sipesiali. (Nkunga 26:12, noti na nsi ya lutiti; 111:1) Balukutakanu yai ke pesaka beto dibaku ya kukutana mpi kuvukana ti Bambangi ya me katuka na mabundu ya nkaka to na bansi ya nkaka. Na midi, beto ke diaka kumosi na kisika yina lukutakanu ke salama; mpidina bangwisana na beto ke kumaka diaka ngolo na lukutakanu yai ya kimpeve. (Bisalu 2:42) Na balukutakanu yai, beto ke monaka beto mosi zola yina ke vukisaka kimvuka ya mvimba ya “bampangi” na nsi-ntoto.​—1 Piere 2:17.

Yo ke sadisaka beto na kuyela na kimpeve. Bantu ya Izraele mpi bakaka mambote na mutindu bo “bakisaka mbote-mbote mambu” ya Masonuku yina bo vandaka kutendudila bo. (Nehemia 8:8, 12) Beto mpi, beto ke bakaka na mbalu malongi ya Biblia yina bo ke pesaka beto na balukutakanu na beto. Konso manaka ke simbamaka na ntu-diambu mosi ya Masonuku. Na nsadisa ya badiskure ya mbote, badiskure ya bitini mingi, mpi bansonga ya ke vutukilaka mambu yina kusalamaka, beto ke longukaka mutindu ya kusala luzolo ya Nzambi na luzingu na beto. Beto ke bakaka kikesa ntangu beto ke waka baeksperiansi ya bampangi yina ke nungaka bampasi ya bo ke kutanaka ti yo na bantangu yai ya mpasi sambu bo kele Bakristu. Na balukutakanu ya distrike, badrame ya bo ke lwataka bilele ya ntama ke kumisaka masolo ya Biblia kieleka na mabanza na beto mpi ke pesaka beto malongi mingi ya me fwana. Na konso lukutakanu, bantu yina ke zolaka kumonisa kudipesa na bo na Nzambi ke bakaka mbotika.

• Sambu na nki balukutakanu ya nene ke vandaka mabaku ya kiese?

• Inki mutindu kuvukana na lukutakanu mosi lenda natila nge mambote?

Ntangu fioti na ntwala ya kufwa, Yezu tubaka nde: “Bo ta samuna nsangu yai ya mbote ya Kimfumu na ntoto ya mvimba sambu na kuta kimbangi na makanda yonso, ebuna nsuka ta kwisa.” (Matayo 24:14) Kansi nki mutindu kisalu yai ya kusamuna na ntoto ya mvimba zolaka kusalama? Na kulanda mbandu yina Yezu bikaka ntangu yandi vandaka na ntoto.​—Luka 8:1.

Beto ke salaka ngolo na kukutana ti bantu na banzo na bo. Yezu longaka balongoki na yandi mutindu ya kulonga nsangu ya mbote nzo na nzo. (Matayo 10:11-13; Bisalu 5:42; 20:20) Bo tindaka bansamuni yina ya mvu-nkama ya ntete na bateritware ya sikisiki sambu na kusamuna. (Matayo 10:5, 6; 2 Bakorinto 10:13) Mutindu mosi bubu yai, bo me yidikaka mbote kisalu na beto ya kusamuna, mpi bo me pesaka konso dibundu kisika yina bo fwete samuna. Diambu yai ke sadisaka beto na kulungisa nsiku ya Yezu yina ke lomba beto na “kusamuna na bantu mpi na kuta kimbangi mbote-mbote.”​—Bisalu 10:42.

Beto ke salaka ngolo na kukutana ti bantu bisika yonso yina bo kele. Yezu pesaka mpi mbandu mutindu yandi vandaka kusamuna na bisika ya bantu mingi, bonso na lweka ya masa to pene-pene ya dibulu ya masa. (Marko 4:1; Yoane 4:5-15) Beto mpi, beto ke solulaka ti bantu mambu ya Biblia bisika yonso—na babala-bala, na bisika ya mumbongo, na baparke, to na telefone. Beto ke taka mpi kimbangi na bantu ya ke zingaka pene-pene na beto, na banduku ya kisalu, na banduku ya nzo-nkanda, mpi na bampangi na beto ya kinsuni kana dibaku me monana. Bikesa yai yonso me salaka nde bamilio ya bantu na ntoto ya mvimba kuwa “nsangu ya mbote ya luguluku.”​—Nkunga 96:2.

Na nani nge ta zola kuzabisa nsangu ya mbote ya Kimfumu ya Nzambi mpi mambu yina nsangu yango ke tendula sambu na makwisa na yandi? Kubumba ve nsangu yai ya ke pesa kivuvu sambu na nge mosi. Zabisa yo na bantu ya nkaka kukonda kusukinina!

• Inki “nsangu ya mbote” beto fwete longa?

• Inki mutindu Bambangi ya Yehowa ke landaka mbandu ya metode ya Yezu ya kusamuna?

Mbala mingi bangogo “mupasudi-nzila” ke monisaka bantu yina ke kwendaka kutala bateritware ya mpa mpi ke kangulaka nzila sambu bantu ya nkaka kulanda. Yezu vandaka bonso mupasudi-nzila; Nzambi tindaka yandi na ntoto sambu na kuyantika kulonga nsangu ya ke pesaka luzingu mpi sambu na kukangula nzila ya luguluku. (Matayo 20:28) Bubu yai, balongoki ya Yezu ke landaka mbandu na yandi mpi bo ke lutisaka ntangu mingi na ‘kukumisa bantu balongoki.’ (Matayo 28:19, 20) Bankaka ke salaka kisalu ya kimupasudi-nzila.

Mupasudi-nzila kele nsamuni ya ntangu yonso. Bambangi ya Yehowa yonso kele bansamuni ya nsangu ya mbote. Kansi, bankaka me yidikaka luzingu na bo sambu bo sala bonso bapasudi-nzila ya ntangu yonso, mpi bo ke lutisaka bangunga 70 konso ngonda na kisalu ya kusamuna. Sambu na kusala yo, bansamuni mingi me fiotunaka ntangu ya kisalu na bo ya kinsuni. Bo ke ponaka bankaka sambu bo vanda bapasudi-nzila ya nene na bisika yina bo kele na mfunu mingi ya bansamuni ya Kimfumu; bo ke salaka konso ngonda bangunga 130 to kuluta na kisalu ya kusamuna. Bapasudi-nzila ke sepelaka kuzinga luzingu ya kukonda mindondo, bo ke tulaka kivuvu nde Yehowa ta pesa bo bima yina bo kele na yo mfunu na luzingu. (Matayo 6:31-33; 1 Timoteo 6:6-8) Bampangi yina lenda vanda ve bapasudi-nzila ya ntangu yonso lenda sala bonso bapasudi-nzila nsadisi kana mpila kele, pana bo lenda pesa lutisa bangunga 30 to 50 na kisalu ya kusamuna konso ngonda.

Zola sambu na Nzambi mpi sambu na bantu ke pusaka mupasudi-nzila na kusala kisalu yina. Bonso Yezu, bubu yai beto ke monaka nde bantu mingi kele ti mfunu ya kuzaba Nzambi mpi balukanu na yandi. (Marko 6:34) Kansi beto kele na nzayilu yina lenda sadisa bo sesepi yai, mpi kupesa bo kivuvu ya ngolo sambu na makwisa. Zola ya nkweno ke pusaka mupasudi-nzila na kupesa na luzolo yonso ntangu mpi ngolo na yandi sambu na kusadisa bantu ya nkaka na kimpeve. (Matayo 22:39; 1 Batesalonika 2:8) Kusala mutindu yai ke sadisaka mupasudi-nzila na kukumisa lukwikilu na yandi ngolo, na kukwenda pene-pene na Nzambi, mpi na kubaka kiese mingi.—Bisalu 20:35.

• Sambu na nge, mupasudi-nzila kele nani?

• Inki ke pusaka bansamuni ya nkaka na kusala kisalu ya kimupasudi-nzila ya ntangu yonso?

Banda ntama, kulonguka malongi ya teokrasi ke vandaka diambu ya mfunu sambu na Bambangi ya Yehowa. Bampangi yina ke pesaka ntangu na bo yonso na kusamuna Kimfumu ke kotaka banzo-nkanda ya sipesiali sambu yo sadisa bo na ‘kulungisa mbote-mbote kisalu na bo.’—2 Timoteo 4:5.

Nzo-Nkanda ya Kisalu ya Kimupasudi-Nzila. Kana mupasudi-nzila ya ntangu yonso me lungisa mvula mosi na kisalu yina, yandi lenda kota nzo-nkanda ya bapasudi-nzila yina ke salaka bilumbu sambanu; bo ke salaka nzo-nkanda yina na Nzo ya Kimfumu ya pene-pene. Lukanu na yo kele ya kusadisa mupasudi-nzila na kukwenda pene-pene ya Yehowa, na kusala mbote-mbote bitini yonso ya kisalu ya kusamuna, mpi na kulanda kusala kisalu na yandi na kwikama.

Nzo-Nkanda Sambu na Bansamuni ya Kimfumu. Lukanu ya nzo-nkanda yai ya bangonda zole kele ya kupesa formasio na bapasudi-nzila ya kele ti eksperiansi mpi yina kele ti luzolo ya kuyambula babwala na bo sambu na kukwenda kusamuna bisika yina mpusa kele mingi. Bo ke tubaka nde: “Mono yandi yai, tinda mono,” na mbandu ya Yezu Kristu, Nsamuni ya kuluta nene yina me salaka na ntoto. (Yezaya 6:8; Yoane 7:29) Kukwenda kisika yina kele ntama ti bwala na yandi lenda lomba nde yandi kumisa luzingu na yandi kukonda mindondo. Mutindu ya kuzinga, mwini, madidi, mpi madia lenda swaswana kibeni ti yina yandi me yikanaka ti yo. Yo lenda lomba nkutu nde yandi longuka ndinga ya mpa. Nzo-nkanda yai ke sadisaka bampumpa ya babakala ti ya bankento mpi bankwelani, yina kele ti bamvula na kati ya 23 tii 65, na kuyedisa bikalulu ya kimpeve yina bo kele na yo mfunu sambu na kisalu na bo mpi mayele yina ta sadisa bo sambu Yehowa mpi organizasio na yandi kusadila bo mingi.

Gileadi, Nzo-Nkanda ya Biblia ya La Société Watchtower. Na Kiebreo, ngogo “Gileadi” ke tendula “Kimvuka ya Ke Sadisa na Kuta Kimbangi.” Banda bo me salaka Gileadi na mvu 1943, bo me tindaka bana ya nzo-nkanda kuluta 8 000 bonso bamisionere sambu na kuta kimbangi mbote-mbote “tii na nsuka ya ntoto.” (Bisalu 13:47) Ntangu bana ya nzo-nkanda ya ntete kumaka na Pérou, dibundu mosi ve vandaka na insi yina. Bubu yai mabundu kele kuluta 1 000. Ntangu bamisionere yantikaka kusamuna na Japon, Bambangi ya Yehowa vandaka na nsi ya kumi. Bubu yai Bambangi kele kuluta 200 000. Kulonguka Ndinga ya Nzambi na mudindu kele na kati ya malongi yina bo ke longukaka na nsungi ya bangonda tanu na Gileadi. Bo ke bingisaka bapasudi-nzila ya nene, bamisionere yina ke salaka na kisalu ya bilanga, bampangi yina ke salaka na babiro ya filiale, mpi bankengi ya nziunga na nzo-nkanda yai sambu na kubaka formasio ya ngolo; lukanu na yo kele ya kulanda kukumisa ngolo kisalu na beto ya ke salama na ntoto ya mvimba.

• Inki kele lukanu ya Nzo-Nkanda ya Kisalu ya Kimupasudi-Nzila?

• Banani ke kotaka Nzo-Nkanda Sambu na Bansamuni ya Kimfumu?