Mambu yina nge longukaka na Biblia ti Bambangi ya Yehowa me sadisaka nge na kuzaba kieleka. Ntembe kele ve nde, mambu yina nge me longukaka me sadisaka nge na kusala kinduku ya mbote ti Nzambi. Diaka, yo me pesaka nge kivuvu ya kubaka luzingu mpi balusakumunu na bilumbu ke kwisa na paladisu awa na ntoto na nsi ya Kimfumu ya Nzambi. Lukwikilu na nge na Ndinga ya Nzambi me kumaka ngolo mpi nge me bakaka dezia balusakumunu mingi mutindu nge ke vukanaka ti dibundu ya Bukristu. Nge me bakisaka mutindu Yehowa ke sadilaka bansadi na yandi mambu bubu yai.—Zek. 8:23.

Mutindu nge ke kudibongisa ntangu yai sambu na mbotika, nge ta baka mambote ntangu nge ta tadila ti bankuluntu malongi ya ntete yina Bakristu ke kwikilaka na yo. (Baeb. 6:1-3) Bika Yehowa kulanda kusakumuna bikesa yonso ya nge ke sala sambu na kuzaba yandi mpi bika yandi pesa nge mambote yina yandi me silaka.—Yoa. 17:3.

1. Sambu na nki nge ke zola kubaka mbotika?

2. Yehowa kele nani?

•“Yehowa kele Nzambi ya kieleka na zulu mpi na ntoto. Nzambi ya nkaka kele ve.”—Kul. 4:39.

• “Nge, yina zina na nge kele Yehowa, nge mpamba kele Muntu ya Kuluta Zulu na ntoto ya mvimba.”—Nk. 83:18.

3. Sambu na nki yo kele mfunu nde nge sadila zina ya Nzambi?

• “Ebuna, beno fwete samba mutindu yai: ‘Tata na beto yina kele na zulu, zina na nge kuvanda ya santu.’”—Mat. 6:9.

• “Konso muntu yina ke binga zina ya Yehowa ta guluka.”—Bar. 10:13.

4. Inki kele mwa bangogo yina Biblia ke sadilaka sambu na kutubila Yehowa?

• “Yehowa, Ngangi ya nsuka ya ntoto, kele Nzambi mvula na mvula.”—Yez. 40:28.

• “Tata na beto yina kele na zulu.”—Mat. 6:9.

• “Nzambi kele zola.”—1 Yoa. 4:8.

5. Inki nge lenda pesa Yehowa Nzambi?

• “Nge fwete zola Yehowa Nzambi na nge na ntima na nge ya mvimba, na moyo na nge ya mvimba, na mabanza na nge yonso, mpi na ngolo na nge yonso.”—Mar. 12:30.

• “Nge fwete sambila Yehowa Nzambi na nge, mpi yandi mpamba nge fwete sadila kisalu ya santu.”—Luka 4:8.

6. Sambu na nki nge fwete vanda ya kwikama na Yehowa?

• “Mwana na mono, vanda mayele mpi pesa ntima na mono kiese, sambu mono pesa mvutu na muntu yina ke sosila mono.”—Bing. 27:11.

7. Nani nge fwete samba, mpi na zina ya nani nge fwete samba?

• “Ya kieleka kibeni, mono [Yezu] ke tubila beno nde, kana beno lomba kima mosi na Tata, yandi ta pesa beno yo na zina na mono.”—Yoa. 16:23.

8. Inki kele mwa mambu yina nge lenda lomba na kisambu?

• “Beno fwete samba mutindu yai: ‘Tata na beto yina kele na zulu, zina na nge kuvanda ya santu. Kimfumu na nge kukwisa. Luzolo na nge kusalama na ntoto, bonso na zulu. Pesa beto bubu yai madia na beto sambu na kilumbu yai, mpi lolula masumu na beto, mutindu beto mpi me lolulaka bantu yina me salaka beto mbi. Kubika ve nde beto bwa na mpukumuna, kansi gulusa beto na maboko ya muntu ya mbi.’”—Mat. 6:9-13.

• “Beto ke tulaka ntima sambu na yandi nde, konso kima yina beto ke lomba na kuwakana ti luzolo na yandi, yandi ke waka beto.”—1 Yoa. 5:14.

9. Inki lenda sala nde Yehowa kubuya kisambu ya muntu mosi?

• “Bo ta binga Yehowa sambu na kulomba lusadisu, kansi yandi ta pesa bo ve mvutu . . . sambu na bisalu na bo ya mbi.”—Mika 3:4.

• “Meso ya Yehowa ke talaka bantu ya lunungu, mpi makutu na yandi ke waka ntangu bo ke bondilaka, kansi Yehowa ke buyaka bantu yina ke salaka mambu ya mbi.”—1 Pie. 3:12.

10. Yezu Kristu kele nani?

•“Simoni Piere vutulaka nde: ‘Nge kele Kristu, Mwana ya Nzambi ya moyo.’”—Mat. 16:16.

11. Sambu na nki Yezu kwisaka na ntoto?

• “Mwana ya muntu kwisaka ve sambu bantu kusadila yandi, kansi sambu na kusadila mpi kupesa luzingu na yandi bonso nkudulu sambu na bantu mingi.”—Mat. 20:28.

• “Mono [Yezu] fwete zabisa mpi nsangu ya mbote ya Kimfumu ya Nzambi na bambanza ya nkaka, sambu bo tindaka mono sambu na yo.”—Luka 4:43.

12. Inki mutindu nge lenda monisa ntonda sambu na kimenga ya Yezu?

• “Yandi fwaka sambu na bantu yonso sambu bantu yina ke zinga kuzinga diaka ve sambu na bo mosi, kansi sambu na muntu yina fwaka sambu na bo mpi yina Nzambi futumunaka.”—2 Bak. 5:15.

13. Inki kiyeka Yezu kele na yo?

• “Nzambi me pesaka mono kiyeka yonso na zulu mpi na ntoto.”—Mat. 28:18.

• “Nzambi tombulaka yandi na kisika mosi ya kunanguka mpi pesaka yandi na luzolo yonso zina yina me luta bazina yonso ya nkaka.”—Bafil. 2:9.

14. Keti nge ke ndimaka nde Nto-Kimvuka ya Bambangi ya Yehowa kele “mpika ya kwikama mpi ya mayele” yina Yezu me tulaka?

• “Nani kele kibeni mpika ya kwikama mpi ya mayele yina mfumu na yandi me tulaka na zulu ya bansadi na yandi, sambu na kupesa bo madia na bo na ntangu ya me fwana?”—Mat. 24:45.

15. Keti mpeve santu kele muntu?

• “Wanzio vutudilaka yandi nde: ‘Mpeve santu ta kwisa na zulu na nge, mpi ngolo ya Muntu ya Kuluta Zulu ta fika nge. Yo yina mwana yina ta butuka bo ta binga yandi muntu ya santu, Mwana ya Nzambi.’”—Luka 1:35.

• “Yo yina, kana beno, ata beno kele bantu ya mbi, beno me zaba kupesa bana na beno makabu ya mbote, beno fwete zaba kibeni nde Tata yina kele na zulu ta pesa mpeve santu na bantu yina ke lombaka yandi yo!”—Luka 11:13.

16. Inki mutindu Yehowa ke sadilaka mpeve santu?

• “Zulu salamaka na nzila ya ndinga ya Yehowa, bima yonso yina kele na kati na yo salamaka na nzila ya mpeve ya munoko na yandi.”—Nk. 33:6.

• “Beno ta baka ngolo ntangu mpeve santu ta kwisa na zulu na beno, mpi beno ta vanda bambangi na mono . . . tii na kisika ya kuluta ntama ya ntoto.”—Bis. 1:8.

• “Ata mbikudulu mosi ve ya Masonama ya Santu ke katukaka na ntendula ya muntu. Sambu mbikudulu me kwisaka ve ata mbala mosi na luzolo ya muntu, kansi bantu tubaka mambu yina me katuka na Nzambi mutindu mpeve santu vandaka kutwadisa bo.”—2 Pie. 1:20, 21.

17. Kimfumu ya Nzambi kele nki?

• “Nzambi ya zulu ta tula kimfumu mosi yina ta fwa ve ata fioti. Kimfumu yina ta kwenda ve na bantu ya nkaka. Yo ta bedisa mpi ta sukisa bimfumu yina yonso, mpi yo mpamba ta bikala kimakulu.”—Dan. 2:44.

18. Inki mambote Kimfumu ya Nzambi ta natila nge?

• “Yandi ta kusula mansanga yonso na meso na bo, lufwa ta vandaka diaka ve; mawa, bidilu, mpi mpasi ta vandaka diaka ve. Mambu ya ntama me vila.”—Kus. 21:4.

19. Inki mutindu nge me zaba nde ntama ve Kimfumu ya Nzambi ta nata balusakumunu awa na ntoto?

• “Balongoki kwisaka pene-pene na yandi na kingenga mpi bo tubaka nde: “Songa beto, inki ntangu mambu yai ta salama, mpi inki ta vanda kidimbu ya kukala na nge mpi ya nsukilu ya ngidika ya bima?’ Yezu vutudilaka bo nde: ‘. . . Insi mosi ta nwanisa insi ya nkaka mpi kimfumu mosi ta nwanisa kimfumu ya nkaka, mpi nzala ta vanda mpi ntoto ta nikana na bisika ya mutindu na mutindu. Mpi bo ta samuna nsangu yai ya mbote ya Kimfumu na ntoto ya mvimba sambu na kuta kimbangi na makanda yonso, ebuna nsuka ta kwisa.’”—Mat. 24:3, 4, 7, 14.

• “Na bilumbu ya nsuka bantangu ya mpasi mpi ya nku ta vanda. Sambu bantu ta vanda bantu ya ke kudizolaka, bantu ya ke zolaka mbongo, bantu ya ke kudikumisaka, bantu ya lulendo, bantu ya ke vwezaka, bantu ya ke lemfukaka ve na bibuti, bantu ya ke pesaka ve matondo, bantu ya me konda kwikama, bantu ya ke zolaka ve bantu ya nkaka, bantu ya ke zolaka ve kuwakana, bantu ya ke kusilaka bankaka makambu, bantu ya me konda kudiyala, bantu ya nku, bantu ya ke zolaka ve mambu ya mbote, bantu ya ke tekaka bankaka, bantu ya ntu-ngolo, bantu ya me fuluka ti lulendo, bantu ya ke zolaka biese na kisika ya kuzola Nzambi, bantu ya ke monanaka nde bo ke zolaka mambu ya Nzambi, kansi bo ke buyaka ngolo ya mambu yina.”—2 Tim. 3:1-5.

20. Inki mutindu nge lenda monisa nde Kimfumu ya Nzambi kele mfunu sambu na nge?

• “Yo yina, beno landa kusosa ntete Kimfumu ti lunungu na yandi, ebuna yandi ta yika beno bima yina yonso ya nkaka.”—Mat. 6:33.

• “Yezu tubilaka balongoki na yandi nde: “Kana muntu ke zola kulanda mono, bika yandi kudibuya, yandi baka nti na yandi ya mpasi, mpi yandi fula kulanda mono.’”—Mat. 16:24.

21. Satana mpi bademo kele banani?

• “Beno me katukaka na tata na beno Diabulu . . . Yandi vandaka muntu ya ke fwaka bantu ntangu yandi yantikaka.”—Yoa. 8:44.

• “Bo losaka dragoni ya nene na nsi, nioka ya ntama, yina bo ke bingaka Diabulu mpi Satana, yina ke kusaka ntoto ya mvimba; bo losaka yandi na ntoto, mpi bo losaka yandi na nsi ti bawanzio na yandi.”—Kus. 12:9.

22. Na nki mambu Satana ke kusilaka Nzambi mpi bansadi na yandi makambu?

• “Nkento tubilaka nioka nde: ‘Beto lenda dia bambuma ya banti yina kele na kilanga. Kansi sambu na mbuma ya nti yina kele na kati-kati ya kilanga, Nzambi tubaka nde: “Beno fwete dia yo ve, ve, beno fwete simba yo ve; kana ve beno ta fwa.”’ Ebuna nioka tubilaka nkento nde: ‘Beno ta fwa ve ata fioti. Sambu Nzambi me zaba nde kaka kilumbu yina beno ta dia yo meso na beno ta kanguka mpi beno ta kuma bonso Nzambi, beno ta zaba mambu ya mbote ti ya mbi.’”—Kuy. 3:2-5.

• “Satana tubilaka Yehowa nde: ‘Mpusu sambu na mpusu. Muntu ta pesa konso kima yina yandi kele na yo sambu na luzingu na yandi.’”—Yobi 2:4.

23. Inki mutindu nge lenda monisa nde Satana kele muntu ya luvunu?

• “Sadila [Nzambi] na ntima ya mvimba.”—1 Bans. 28:9.

• “Tii kuna mono ta fwa, mono ta yambula ve kwikama na mono!”—Yobi 27:5.

24. Sambu na nki bantu ke fwaka?

• “Disumu kotaka na nsi-ntoto na nzila ya muntu mosi mpi lufwa na nzila ya disumu, mutindu mosi mpi lufwa me mwanganaka na bantu yonso sambu bo yonso salaka disumu.”—Bar. 5:12.

25. Inki ke kuminaka bantu kana bo me fwa?

• “Bantu yina kele na luzingu ke zabaka nde bo ta fwa, kansi bafwa ke zabaka kima ve.”—Lon. 9:5.

26. Inki kele kivuvu sambu na bantu yina me fwaka?

• “Bantu ya lunungu ti bantu ya kukonda lunungu ta futumuka.”—Bis. 24:15.

27. Bantu ikwa ta kwenda na zulu sambu na kuyala ti Yezu?

• “Mono . . . monaka Mwana-Dimeme me telama na zulu ya Ngumba ya Sioni, mpi yandi vandaka ti bantu 144 000 yina kele ti zina na yandi mpi zina ya Tata na yandi ya kusonika na bambunzu na bo.”—Kus. 14:1.

Na kulonguka na nge ya Biblia, nge me zaba mambu yina Yehowa ke zolaka nde nge sala mpi mutindu ya kuzitisa bansiku na yandi ya lunungu. Mambu yina nge me longukaka me pusaka nge na kusala bansoba mingi na bikalulu na nge mosi mpi na mutindu na nge ya kutadila luzingu. Ntangu yai ya nge me baka lukanu ya kuzinga na kuwakana ti bansiku ya lunungu ya Yehowa, yandi lenda ndima kisalu ya nge ke sadila yandi bonso nsamuni ya nsangu ya mbote.

Kana nge tadila diaka bangiufula yai ya ke landa, yo ta sadisa nge na kuvila ve ata fioti minsiku ya lunungu ya Yehowa mpi yo ta yibusaka nge mambu ya nkaka ya nge lenda sala sambu nge kuma nsadi yina yandi ke ndimaka. Bansangu yai ta sadisa nge na kubakisa mfunu ya kusala mambu yonso ti kansansa ya mbote mpi sambu na kupesa Yehowa lukumu.—2 Bak. 1:12; 1 Tim. 1:19; 1 Pie. 3:16, 21.

Na kutadila mambu ya nge me longuka, ntembe kele ve nde nge kele na kiese ya kulemfuka na bansiku ya Yehowa mpi ya kukota na organizasio na yandi. Bangiufula mpi baverse ya bo me tula, ta sadisa nge na kuzaba mutindu nge ke tadilaka kulemfuka na mambu yina Yehowa me yidikaka, yo vanda na dibundu, na dibuta to na yina me tala kulemfukila bamfumu ya luyalu ya nsi-ntoto yai. Ntembe kele ve nde nge ta kuma kumonisa ntonda ya mingi sambu na mambu yina Yehowa me yidikaka sambu na kulonga mpi kukumisa ngolo lukwikilu ya bansadi na yandi. Mambu yango kele balukutakanu ya dibundu yina nge ta kwendaka mpi yina nge ta pesaka bamvutu na kutadila makuki na nge.

Diaka, kitini yai ta monisa mfunu ya kupesa maboko mbala na mbala na kisalu ya kusamuna nsangu ya Kimfumu sambu na kusadisa bantu ya nkaka na kuzaba Yehowa mpi mambu yina yandi ke sala sambu na bantu. (Mat. 24:14; 28:19, 20) Mpidina, yo ta sadisa nge na kubaka ve na nsaka lusilu na nge ya kudipesa na Yehowa Nzambi mpi ya kubaka mbotika. Nge fwete tula ntima nde Yehowa ke sepelaka ntangu yandi ke monaka mutindu nge ke ndimaka ntima ya mbote ya nene yina yandi ke monisilaka nge.

1. Inki kele nsiku yina Bakristu ke zitisaka sambu na makwela? Inki kele kikuma mosi kaka yina Biblia ke pesa nswa sambu na kufwa makwela?

• “Keti beno me tangaka ve nde muntu yina gangaka bo katuka na luyantiku salaka bo bakala mpi nkento mpi yandi tubaka nde: ‘Yo yina bakala ta bikisa tata na yandi ti mama na yandi mpi yandi ta kangama ti nkento na yandi, ebuna bo zole ta vanda nsuni mosi’? Na mpila nde bo kele diaka ve zole, kansi nsuni mosi. Yo yina, bika nde muntu kukabula ve yina ya Nzambi me vukisaka. . . . Konso muntu yina me fwa makwela ti nkento na yandi, katula kaka sambu na pite, mpi me kwela nkento ya nkaka, yandi me sala bizumba.”—Mat. 19:4-6, 9.

2. Sambu na nki bakala ti nkento yina ke zingaka nzo mosi mpi ke vukisaka nitu fwete kwelana na kulanda nsiku ya leta? Kana nge me kwelaka, keti makwela na beno ke wakana ti nsiku ya leta mpi luyalu ke ndimaka yo?

• “Landa kuyibusa bo na kuwila mpi na kulemfukila baluyalu mpi bamfumu.”—Tito 3:1.

• “Bika makwela kuvanda ya lukumu na meso ya bantu yonso, mpi mbeto ya makwela kuvanda kukonda mvindu, sambu Nzambi ta sambisa bantu ya ke salaka pite mpi bantu ya ke salaka bizumba.”—Baeb. 13:4.

3. Inki kele mukumba na nge na dibuta?

• “Mwana na mono, wa malongi ya tata na nge, mpi kuyambula ve malongi ya mama na nge.”—Bing. 1:8.

• “Bakala kele mfumu ya nkento na yandi mutindu Kristu kele mfumu ya dibundu . . . Babakala, beno landa kuzola bankento na beno, mutindu Kristu mpi zolaka dibundu.”—Baef. 5:23, 25.

• “Batata, beno pesa ve bana na beno makasi, kansi beno landa kusansa bo na malongi mpi na balukebisu ya Yehowa.”—Baef. 6:4.

• “Beno bana, beno lemfuka na bibuti na beno na mambu yonso, sambu yo kele mbote na Mfumu.”—Bakol. 3:20.

• “Beno bankento, beno lemfukila babakala na beno.”—1 Pie. 3:1.

4. Sambu na nki beto fwete zitisa luzingu?

• “[Nzambi] ke pesaka bantu yonso luzingu, mpema, mpi bima yonso. . . . Na nzila na yandi beto kele na luzingu, beto ke tambulaka, mpi beto ke zingaka.”—Bis. 17:25, 28.

5. Sambu na nki beto fwete fwa ve ata muntu mosi, yo vanda bebe yina me butuka ntete ve?

• “Kana babakala ke nwana ebuna bo tutana ti nkento ya kele ti divumu mpi . . . kana kisumbula ya ke nata lufwa kusalama, nge fwete pesa luzingu sambu na luzingu.”—Kub. 21:22, 23.

• “Meso na nge monaka mono nkutu ntangu mono vandaka na kati ya divumu; bitini na yo yonso vandaka ya kusonika na mukanda na nge na yina me tala bilumbu yina yo salamaka, na ntwala nde ata kitini na yo mosi kuvanda.”—Nk. 139:16.

• “Yehowa ke mengaka . . . maboko yina ke tiamunaka menga ya muntu yina me sala kima ve.”—Bing. 6:16, 17.

6. Inki nsiku Nzambi me pesaka sambu na menga?

• “Beno landa kubuya . . . menga [mpi] bima yina bo me fwa na kukanga mungungu.”—Bis. 15:29.

7. Sambu na nki beto fwete zola bampangi na beto Bakristu?

• “Mono ke pesa beno nsiku mosi ya mpa, nde beno zolana beno na beno; mutindu mono zolaka beno, beno mpi beno zolana beno na beno. Na diambu yai, bantu yonso ta zaba nde beno kele balongoki na mono—kana beno ke zolana beno na beno.”—Yoa. 13:34, 35.

8. Sambu na kubuya kupesa bantu ya nkaka maladi ya nsambukila to maladi yina lenda nata na lufwa: (a) Sambu na nki muntu yina kele ti maladi yango fwete sala ve mambu yina ke monisa zola, mu mbandu kuyamba bantu to kupesa bo beze? (b) Sambu na nki yandi fwete wa ve makasi kana bampangi ya nkaka ke binga yandi ve na banzo na bo? (c) Sambu na nki muntu yina vandaka kuzinga na kisika yina yandi lendaka kubaka maladi ya nsambukila fwete sala na luzolo yonso ekzame ya menga na ntwala ya kuyantika kinduku sambu na makwela? (d) Sambu na nki muntu yina kele ti maladi ya nsambukila fwete zabisa yo na mutambusi ya kimvuka ya bankuluntu na ntwala ya kubaka mbotika?

• “Beno vanda ve ti mfuka ata ya muntu mosi, katula kaka mfuka ya kuzolana beno na beno. . . . ‘Nge fwete zola nkweno na nge bonso nge mosi.’ Zola ke salaka nkweno mbi ve.”—Bar. 13:8-10.

• “Beno sosa kaka ve mambote na beno mosi, kansi mpi mambote ya bantu ya nkaka.”—Bafil. 2:4.

9. Sambu na nki Yehowa ke zolaka nde beto lolula bantu ya nkaka?

• “Beno landa kukanga-ntima na mambu ya bantu ya nkaka mpi beno landa kulolulana na ntima ya mvimba ata muntu mosi kele na makambu ti muntu ya nkaka. Mutindu Yehowa lolulaka beno na ntima ya mvimba, beno fwete sala mpi mutindu mosi.”—Bakol. 3:13.

10. Inki nge ta sala kana mpangi mosi me kusila nge makambu to me yiba nge?

• “Kana mpangi na nge me sala disumu, kwenda mpi songa yandi kifu na yandi, kaka nge ti yandi. Kana yandi wila nge, nge me vutula mpangi na nge na nzila ya mbote. Kansi, kana yandi wila nge ve, baka muntu mosi to bantu zole, sambu mambu yonso lenda ndimama kana bambangi zole to tatu me ta kimbangi. Kana yandi wila bo ve, tuba na dibundu. Kana yandi wila mpi ve dibundu, bika nde yandi vanda sambu na nge bonso muntu ya makanda mpi bonso kalaki ya mpaku.”—Mat. 18:15-17.

11. Inki mutindu Yehowa ke tadilaka masumu yai?

▪ Pite

▪ Kusadila biteki na lusambu

▪ Kuvukisa nitu bakala ti bakala to nkento ti nkento

▪ Muyibi

▪ Bansaka ya mbongo

▪ Kulawuka malafu

• “Beno kudikusa ve. Bantu ya ke salaka pite, bantu ya ke sambilaka biteki, bantu ya ke salaka bizumba, babakala yina ke pesaka nzila nde bo vukisa nitu ti bo na mutindu yina me fwana ve, babakala yina ke ladisaka babakala ya nkaka, miyibi, bantu ya lukasi, bantu ya ke lawukaka malafu, bantu ya ke fingaka, to bantu ya ke botulaka bima ya bantu ya nkaka ta baka ve Kimfumu ya Nzambi.”—1 Bak. 6:9, 10.

12. Inki lukanu nge me baka na yina me tala pite, disongidila mitindu yonso ya kuvukisa nitu na nganda ya makwela?

• “Beno tina pite!”—1 Bak. 6:18.

13. Sambu na nki kukonda nswa ya munganga, beto fwete buya kusadila bima yonso ya ke kumisaka muntu mpika to ya ke bebisaka mabanza?

• ‘Beno pesa nitu na beno bonso kimenga ya moyo, ya santu, ya Nzambi ke ndimaka, na mutindu yina beno ta sala kisalu ya santu ti mayele na beno ya kuyindula. Mpi beno yambula kulanda ngidika yai ya bima, kansi beno soba kimuntu na beno mpi beno kumisa mabanza na beno ya mpa, sambu beno kudindimisa luzolo ya Nzambi yina kele ya mbote, yina yandi lenda ndima, mpi yina kele ya kukuka.’—Bar. 12:1, 2.

14. Inki kele mwa bisalu ya bampeve ya mbi ya Nzambi ke buyaka?

• “Bo fwete mona ve na kati na beno . . . muntu yina ke zabisaka na ntwala mambu yina ta bwa, muntu yina ke salaka mazi, muntu yina ke sosaka bidimbu ya mambu yina ke kwisa, nganga-nkisi, muntu yina ke kangaka bankaka na bankisi, muntu yina ke kwendaka kutala muntu ya ke solulaka ti bampeve ya bafwa, muntu yina ke zabisaka bantu mambu yina ta kumina bo, to muntu yina ke yulaka mambu na bafwa.”—Kul. 18:10, 11.

15. Kana muntu me sala disumu mosi ya nene mpi yandi ke zola nde Nzambi kundima yandi diaka, nki yandi fwete sala na nswalu yonso?

• “Mono fungunaka disumu na mono na nge; mono fikaka ve kifu na mono. Mono tubaka nde: ‘Mono ta funguna mambi na mono na Yehowa.’”—Nk. 32:5.

• “Keti muntu mosi na kati na beno ke bela? Yandi binga bankuluntu ya dibundu, mpi bo samba sambu na yandi, mpi bo tula yandi mafuta na zina ya Yehowa. Ebuna kisambu ya lukwikilu ta belula muntu yina ke bela, mpi Yehowa ta tedimisa yandi. Diaka, kana yandi salaka masumu, Nzambi ta lolula yandi.”—Yak. 5:14, 15.

16. Inki nge fwete sala, kana nge me zaba nde mpangi mosi me sala disumu ya nene?

• “Kana muntu mosi me sala disumu, sambu yandi me wa bo ke binga na ndinga ya ngolo na meso ya bantu yonso na kukwisa kuta kimbangi mpi yandi kele mbangi ya diambu yina to yandi me mona yo to me zaba yo, kansi yandi me zabisa yo ve, yandi ta vutula munoko sambu na kifu na yandi.”—Levi 5:1.

17. Kana bo me pesa luzayisu nde mpangi mosi kele diaka ve Mbangi ya Yehowa, nki mutindu beto fwete sadila yandi mambu?

• ‘Beno yambula kuvukana ti muntu yina ke tubaka nde yandi kele mpangi, kansi yandi ke salaka pite, yandi kele muntu ya lukasi, yandi ke sambilaka biteki, yandi ke fingaka, yandi ke lawukaka malafu, to yandi ke botulaka bima ya bantu ya nkaka, mpi na kudia nkutu ve ti muntu ya mutindu yina.’—1 Bak. 5:11.

• “Kana muntu me kwisa na beno mpi yandi me nata ve malongi yai, beno yamba yandi ve na banzo na beno mpi beno pesa yandi ve mbote.”—2 Yoa. 10.

18. Sambu na nki banduku na nge fwete vanda kaka bantu yina ke zolaka Yehowa?

• “Muntu yina ke tambulaka ti bantu ya mayele ta kuma mayele, kansi muntu yina kele na bangwisana ti bazoba ta suka mbi.”—Bing. 13:20.

• “Beno kudikusa ve. Banduku ya mbi ke bebisaka bikalulu ya mbote.”—1 Bak. 15:33.

19. Sambu na nki Bambangi ya Yehowa ke kotaka ve na mambu ya politiki?

• “Bo kele ve bantu ya nsi-ntoto, mutindu mono [Yezu] kele ve muntu ya nsi-ntoto.”—Yoa. 17:16.

20. Sambu na nki nge fwete lemfukila bamfumu ya leta?

• “Bika konso muntu kulemfuka na bamfumu ya nene, sambu kiyeka lenda vanda ve kana Nzambi me pesa nzila ve; bamfumu yina ke yala kele ti ndambu ya kiyeka na kisika yina bo ke yalaka na nswa ya Nzambi.”—Bar. 13:1.

21. Inki nge fwete sala kana bansiku ya bantu ke wakana ve ti bansiku ya Nzambi?

• “Beto fwete lemfukila Nzambi bonso mfumu na kisika ya kulemfukila bantu.”—Bis. 5:29.

22. Inki baverse lenda sadisa nge na kubuya kukota na mambu ya nsi-ntoto ntangu nge ke pona kisalu?

• “Dikanda mosi ta nangula ve mbele ya bitumba sambu na kunwanisa dikanda ya nkaka, bo ta longuka mpi diaka ve bitumba.”—Mika 4:3.

• “Bantu na mono, beno basika na kati na yandi [Babilone ya Nene] kana beno ke zola ve kuvukana na masumu na yandi, mpi kana beno ke zola ve kubaka ndambu ya bampasi na yandi.”—Kus. 18:4.

23. Inki bansaka mpi bansaka ya kulutisila ntangu nge fwete pona to kubuya?

• “Yehowa . . . ke mengaka konso muntu yina ke zolaka mubulu.”—Nk. 11:5.

• “Beno menga mambu ya mbi; beno kangama na mambu ya mbote.”—Bar. 12:9.

• “Mambu yonso yina kele ya kieleka, mambu yonso yina bo lenda zitisa, mambu yonso yina kele ya lunungu, mambu yonso yina kele ya bunkete, mambu yonso yina ke pusaka na kuzola, mambu yonso yina kele ya lukumu, mambu yonso yina kele ya mbote, mpi mambu yonso yina me fwana na kubaka lukumu, beno landa kuyindula mambu yai.”—Bafil. 4:8.

24. Sambu na nki Bambangi ya Yehowa ke vukanaka ve ti mabundu ya nkaka na mambu ya lusambu?

• “Beno lenda dia ve na ‘mesa ya Yehowa’ mpi na mesa ya bademo.”—1 Bak. 10:21.

• “Yehowa ke tuba nde: ‘Beno kabwana ti bo, mpi beno yambula kusimba kima ya mvindu’; ‘ebuna mono ta yamba beno.’”—2 Bak. 6:17.

25. Inki minsiku ta sadisa nge na kutala kana nge lenda kwenda na feti mosi to ve?

• “Bo vukanaka ti makanda mpi bo ndimaka banzila ya makanda yina. Bo landaka kusadila biteki na bo, mpi yo kumaka mutambu sambu na bo.”—Nk. 106:35, 36.

• “Bafwa ke zabaka kima ve.”—Lon. 9:5.

• “Bo kele ve bantu ya nsi-ntoto, mutindu mono kele ve muntu ya nsi-ntoto.”—Yoa. 17:16.

• “Na ntangu ya ntama beno lutisaka ntangu mingi na kulungisa luzolo ya makanda ntangu beno vandaka kusala mambu ya mbi kukonda nsoni, beno vandaka ti banzala ya mbi, beno vandaka kulutisa ndilu na kunwa malafu, kusala bankinsi yina bantu ke salaka mambu ya kisaka-saka, kusala bankinsi yina bantu ke nwaka malafu mingi, mpi kusala lusambu ya nzanzi ya biteki.”—1 Pie. 4:3.

26. Inki mutindu masolo ya kele na Biblia lenda sadisa nge na kuzaba kana nge lenda sala nkinsi ya lubutuku to ve?

• “Kilumbu ya tatu vandaka kilumbu ya kubutuka ya Farao, mpi yandi salaka nkinsi sambu na bansadi na yandi yonso, ebuna yandi basisaka kapita ya bantu ya ke pesaka malafu mpi kapita ya bantu ya ke salaka mampa na ntwala ya bansadi na yandi. Mpi yandi vutulaka kapita ya bantu ya ke pesaka malafu na kisalu na yandi ya kupesa malafu . . . Kansi yandi tulaka kapita ya bantu ya ke salaka mampa na zulu ya nti.”—Kuy. 40:20-22.

• “Ntangu bo vandaka kusala nkinsi ya kilumbu ya kubutuka ya Erode, mwana-nkento ya Erodiade kinaka kilumbu yina mpi yandi pesaka Erode kiese mingi, yo yina Erode silaka mpi diaka ndefi na kupesa yandi konso kima yina yandi ta lomba. Ebuna na ndongisila ya mama na yandi, mwana yina ya nkento tubaka nde: ‘Pesa mono awa ntu ya Yoane Mbotiki na dilonga.’ Yo yina, yandi tindaka bantu sambu bo zenga ntu ya Yoane na boloko.”—Mat. 14:6-8, 10.

27. Sambu na nki nge fwete lemfuka na lutwadisu ya bankuluntu?

• “Beno lemfukila bantu yina ke twadisaka beno mpi beno wila bo, sambu bo ke langidilaka beno ntangu yonso bonso bantu yina ta vutula munoko, sambu bo sala yo na kiese kansi ve ti kubokuta, sambu yo ta vanda mbi sambu na beno.”—Baeb. 13:17.

28. Sambu na nki yo kele mfunu nde nge ti dibuta na beno, beno bumba ntangu sambu na kutanga mpi kulonguka Biblia mbala na mbala?

• “Yandi ke vandaka na kiese na nsiku ya Yehowa, mpi yandi ke tangaka nsiku na yandi na ndinga ya nsi mpimpa ti mwini. Yandi ta vanda bonso nti yina bo me kuna pene-pene ya bamasa, nti yina ke butaka mbuma na nsungi na yo, matiti na yo ke yumaka ve. Mpi konso kima yina yandi ke sala ta nunga.”—Nk. 1:2, 3.

29. Sambu na nki nge ke zolaka kukwenda na balukutakanu mpi kupesa bamvutu?

• “Mono ta zabisa zina na nge na bampangi na mono; mono ta kumisa nge na kati ya dibundu.”—Nk. 22:22.

• “Beto tudila bankaka dikebi sambu na kupusa bo na kumonisa zola mpi na kusala bisalu ya mbote, beto yambula ve kuvukana kumosi, mutindu yo kele kikalulu ya bankaka, kansi beto pesana kikesa, mpi beno sala yo diaka mingi kuluta sambu beno ke mona kilumbu ke finama.”—Baeb. 10:24, 25.

30. Inki kele kisalu ya kuluta mfunu yina Yezu me pesaka beto?

• “Yo yina, beno kwenda mpi beno kumisa bantu ya makanda yonso balongoki, beno botika bo . . . , beno longa bo na kuzitisa mambu yonso ya mono songaka beno.”—Mat. 28:19, 20.

31. Inki bikalulu ya ke sepedisaka Yehowa beto fwete vanda ti yo ntangu beto ke pesaka makabu sambu na kisalu ya Kimfumu to sambu na kusadisa bampangi?

• “Kumisa Yehowa ti bima na nge ya ntalu.”—Bing. 3:9.

• “Konso muntu kusala mutindu yandi me kana na ntima na yandi, ti kubokuta ve to sambu bo ke pusa yandi, sambu Nzambi ke zolaka muntu yina ke pesaka na kiese.”—2 Bak. 9:7.

32. Inki bampasi Bakristu ta kutana ti yo?

• “Kiese na bantu yina bo me monisaka mpasi sambu na lunungu, sambu Kimfumu ya zulu kele ya bo. Kiese na beno kana bantu ke finga beno, ke monisa beno mpasi, mpi ke kusila beno makambu ya mutindu na mutindu sambu na mono. Beno yangalala mpi beno vanda na kiese mingi, sambu matabisi na beno kele nene na zulu, sambu bo monisaka mpi bambikudi yina vandaka na ntwala na beno mpasi mutindu yina.”—Mat. 5:10-12.

33. Sambu na nki kubaka mbotika mpi kukuma Mbangi ya Yehowa kele dibaku mosi ya nene?

• “Ndinga na nge kumaka kiese na mono mpi kuyangalala ya ntima na mono, sambu bo ke binga mono na zina na nge, O Yehowa Nzambi.”—Yer. 15:16.

Mbala mingi bo ke pesaka mbotika na balukutakanu ya nziunga mpi ya distrike ya Bambangi ya Yehowa. Na nsuka ya diskure ya mbotika, mutubi ta lomba bantu yina ke zola kubaka mbotika na kutelama mpi kupesa na ndinga ya ngolo bamvutu na bangiufula yai zole:

1. Keti nge me balula ntima na masumu na nge, nge me kudipesa na Yehowa mpi nge ke ndima nde yandi ta gulusa beto na nzila ya Yezu Kristu?

2. Keti nge ke bakisa nde mbotika yai ya nge ke baka ke kumisa nge Mbangi ya Yehowa mpi nde nge ke vukana ti organizasio yina Yehowa ke twadisaka?

Bamvutu ya pwelele na bangiufula yai kele mutindu bantu yina ke zola kubaka mbotika ke monisaka “na meso ya bantu yonso” lukwikilu na bo na kimenga ya Yezu mpi nde bo me kudipesaka ya mvimba na Yehowa. (Bar. 10:9, 10) Yo yina bantu yina ke zola kubaka mbotika fwete yindula na ntwala bangiufula yai mpi bo fwete samba sambu bo pesa bamvutu ya ke wakana ti mambu yina bo mosi ke kwikilaka.

Keti nge me kudipesaka na Yehowa na kisambu, nge me silaka nde nge ta sadilaka kaka yandi mpi nde nge ta tulaka luzolo na yandi na kisika ya ntete na luzingu na nge?

Ntangu yai, keti nge ke ndima kibeni nde nge fwete baka mbotika kana dibaku me monana?

Inki bilele me fwana sambu na mbotika? (1 Tim. 2:9, 10; Yoa. 15:19; Bafil. 1:10)

Beto fwete lwata “kukonda kulutisa ndilu mpi [beto fwete] vanda ti mabanza ya mbote” sambu na kumonisa nde beto ke “kangamaka na Nzambi.” Yo yina, bantu yina ke zola kubaka mbotika fwete lwata ve bilele ya kuyobidila ya ke monisa kibeni nitu to bilele yina bo me sonika-sonika. Bo fwete lwata bilele ya bunkete, ya mbote mpi ya me fwana sambu na dibaku yai.

Inki bikalulu muntu fwete monisa ntangu yandi ke baka mbotika? (Luka 3:21, 22)

Bubu yai Bakristu ke bakaka mbotika na kulanda mbandu ya Yezu. Yezu bakisaka nde mbotika kele diambu mosi ya mfunu mpenza mpi yandi monisaka yo na bikalulu mpi na bisalu na yandi. Yo yina, kisika ya mbotika fwete vanda ve kisika ya kusakana, ya kukasa, to ya kusala mambu ya nkaka yina lenda manisa valere ya dibaku yai. Diaka, Mukristu ya mpa lenda sala ve mambu bonso nde yandi me katuka kununga bitumba ya nene. Ata mbotika kele dibaku mosi ya kiese, beto fwete monisa kiese yango na luzitu yonso.

Inki mutindu kukwenda mbala na mbala na balukutakanu mpi kusala kinduku ti bampangi ta sadisa nge na kulungisa lusilu yina nge salaka ya kudipesa na Yehowa?

Ata na nima ya kubaka mbotika, sambu na nki yo ta vanda mfunu nde nge vanda ti manaka ya mbote ya kulonguka nge mosi mpi ya kusamuna mbala na mbala?