-
Kimfumu ya Nzambi Kele Nki?Zinga Mvula na Mvula!—Kulonguka ya Biblia Yina Ta Natila Nge Mambote
-
-
DILONGI 31
Kimfumu ya Nzambi Kele Nki?
Kimfumu ya Nzambi kele nsangu ya kuluta mfunu yina Biblia ke tubilaka. Yehowa ta sadila Kimfumu yai sambu na kusala mambu yina yandi kanaka ntete sambu na ntoto. Kimfumu ya Nzambi kele nki? Inki mutindu beto me zaba nde yo ke yala bubu yai? Inki mambu yo me salaka dezia? Mpi nki yo ta sala na bilumbu ke kwisa? Dilongi yai mpi malongi zole ya ke landa ta pesa mvutu na bangiufula yai.
1. Kimfumu ya Nzambi kele nki mpi nani kele Ntotila na yo?
Kimfumu ya Nzambi kele guvernema yina Yehowa Nzambi me tulaka. Yezu Kristu kele Ntotila na yo mpi yandi ke yala na zulu. (Matayo 4:17; Yoane 18:36) Biblia ke tuba nde Yezu ‘ta yala bonso Ntotila . . . mvula na mvula.’ (Luka 1:32, 33) Yezu, Ntotila ya Kimfumu ya Nzambi, ta yala bantu yonso awa na ntoto.
2. Banani fwete yala ti Yezu?
Yezu ke yala ve yandi mosi. Bantu ya “mabuta yonso, ya bandinga yonso, ya bansi yonso, mpi ya makanda yonso” fwete kuma bantotila sambu na kuyala ntoto. (Kusonga 5:9, 10) Bantu ikwa ta yala ti Kristu? Banda ntangu Yezu vandaka awa na ntoto, bantu mingi kibeni me kumaka balongoki na yandi. Kansi bantu 144 000 mpamba fwete kwenda na zulu sambu na kuyala ti Yezu. (Tanga Kusonga 14:1-4.) Bakristu yonso ya nkaka ta zinga awa na ntoto mpi bo ta kuma bantu ya Kimfumu ya Nzambi.—Nkunga 37:29.
3. Sambu na nki Kimfumu ya Nzambi me luta bimfumu ya bantu?
Bamfumu ya politiki lenda kuka ve kusala mambu yonso ya mbote ya bo ke zola kusala ata bo kele ti luzolo ya mbote ya kusala yo. Sambu nsuka-nsuka bamfumu ya nkaka ke yingaka bo mpi bo ke sosaka kaka mambote na bo mosi kansi ve ya bantu yina bo ke yala. Kansi ata muntu mosi ve ta yinga Yezu, Ntotila ya Kimfumu ya Nzambi, sambu Biblia ke tuba nde Nzambi me “tula kimfumu mosi yina ta fwa ve ata fioti.” (Daniele 2:44) Diaka, Yezu ta yala ntoto ya mvimba mpi yandi ta vanda ve ti kikalulu ya kupona-pona. Yandi ke zolaka bantu, ke vandaka ntima-mbote mpi ke salaka kaka mambu ya mbote. Yandi ta longa bantu na kusadilana mambu bonso yandi, disongidila ti zola, ntima-mbote mpi lunungu.—Tanga Yezaya 11:9.
LONGUKA MAMBU MINGI
Beto tala sambu na nki Kimfumu ya Nzambi kele mbote mingi kuluta bimfumu yonso ya bantu.
4. Kimfumu ya Nzambi ta yala ntoto ya mvimba
Yezu kele ngolo mingi kuluta bamfumu yonso ya me yalaka banda na ntangu ya ntama tii bubu yai. Beno tanga Matayo 28:18 mpi na nima beno pesa mvutu na ngiufula yai:
Sambu na nki kiyeka ya Yezu me luta biyeka ya bamfumu yonso ya bantu?
Bimfumu ya bantu ke sobaka mbala mingi mpi konso mfumu ke yalaka na kitini mosi ya ntoto. Ebuna nki beto lenda tuba sambu na Kimfumu ya Nzambi? Beno tanga Daniele 7:14 mpi na nima beno pesa mvutu na bangiufula yai:
Sambu na nki yo kele mbote mutindu Kimfumu ya Nzambi “ta fwa ve”?
Sambu na nki yo kele mbote mutindu yo ta yala ntoto ya mvimba?
5. Kimfumu ya Nzambi fwete yinga bimfumu ya bantu
Sambu na nki Kimfumu ya Nzambi fwete yinga bimfumu ya bantu? Beno tala VIDEO mpi na nima beno pesa mvutu na ngiufula ya ke landa.
Inki bampasi bimfumu ya bantu ke nataka?
Beno tanga Longi 8:9 mpi na nima beno pesa mvutu na bangiufula yai:
Nge ke yindula nde yo kele mbote nde Kimfumu ya Nzambi kuyinga bimfumu ya bantu? Sambu na nki?
6. Kimfumu ya Nzambi kele ti bamfumu yina ke bakisaka bampasi na beto
Yezu Ntotila na beto zingaka awa na ntoto, yo yina yandi ke ‘wilaka beto mawa sambu na bifu na beto.’ (Baebreo 4:15) Yehowa ke ponaka babakala mpi bankento 144 000 ya ke lemfukilaka yandi mpi ya me katuka ‘na mabuta yonso, na bandinga yonso, na bansi yonso, mpi na makanda yonso’ sambu bo yala ti Yezu.—Kusonga 5:9.
Keti yo ke pesa nge kikesa mutindu nge me zaba nde Yezu mpi bantu yina ta yala ti yandi me zaba mbote bampasi ya bantu? Sambu na nki?
Yehowa ke ponaka babakala mpi bankento ya bansi yonso sambu na kuyala ti Yezu
7. Kimfumu ya Nzambi kele ti bansiku ya kuluta mbote
Bimfumu ya bantu ke tulaka bansiku sambu yo tanina mpi yo natila bantu na yo mambote. Kimfumu ya Nzambi mpi kele ti bansiku yina bantu na yo fwete landa. Beno tanga 1 Bakorinto 6:9-11 mpi na nima beno pesa mvutu na bangiufula yai:
Nge ke yindula nde nsi-ntoto ta vanda nki mutindu ntangu bantu yonso ta kuma kulemfuka na bansiku ya Nzambi?a
Nge ke yindula nde yo kele mbote mutindu Yehowa ke lombaka bantu ya Kimfumu na yandi na kuzitisa bansiku yai? Sambu na nki?
Inki ke monisa nde bantu yina ke zitisaka ve bansiku yai lenda kuma kuzitisa yo?—Tala verse 11.
Bimfumu ya bantu ke tulaka bansiku sambu yo tanina mpi yo natila bantu na yo mambote. Kimfumu ya Nzambi kele ti bansiku ya kuluta mbote yina ke taninaka mpi ke natilaka bantu na yo mambote mingi
MUNTU YA NKAKA LENDA YULA NGE NDE: “Kimfumu ya Nzambi kele nki?”
Inki mvutu nge ta pesa?
NA BUNKUFI
Kimfumu ya Nzambi kele guvernema mosi ya kieleka na zulu yina ta yala ntoto ya mvimba.
Inki Nge Me Simba?
Banani kele bamfumu ya Kimfumu ya Nzambi?
Sambu na nki Kimfumu ya Nzambi me luta bimfumu yonso ya bantu?
Tanga mwa mambu yina Yehowa ke lombaka bantu ya Kimfumu na yandi na kusala.
TALA MPI
Keti Yezu longaka nde Kimfumu ya Nzambi kele na bantima na beto?
“Keti Kimfumu ya Nzambi Kele na Kati ya Bantima na Beto?” (Disolo ya kele na jw.org)
Sambu na nki Bambangi ya Yehowa ke kangamaka kaka na Kimfumu ya Nzambi kansi ve na bimfumu ya bantu?
Tala mambu yina Biblia ke tubaka sambu na bantu 144 000 yina Yehowa ke ponaka sambu na kuyala ti Yezu.
Tala mambu ya sadisaka nkento mosi yina vandaka na boloko na kundima nde Nzambi mpamba muntu lenda yidika mambu na ntoto.
“Mono Bakisaka nde Nzambi Mpamba Muntu Ta Manisa Mambu ya Mbi na Ntoto” (Disolo ya kele na Telama!)
-
-
Kimfumu ya Nzambi Ke Yala Bubu Yai!Zinga Mvula na Mvula!—Kulonguka ya Biblia Yina Ta Natila Nge Mambote
-
-
DILONGI 32
Kimfumu ya Nzambi Ke Yala Bubu Yai!
Kimfumu ya Nzambi yantikaka kuyala na zulu na mvula 1914. Banda pana, bilumbu ya nsuka ya bimfumu ya bantu yantikaka. Inki mutindu beto me zaba yo? Beto tala mambu yina Biblia tubaka, mambu ya ke salama na nsi-ntoto mpi bikalulu yina bantu me kumaka ti yo banda na 1914.
1. Mambu yina Biblia tubaka monisaka nki?
Mukanda ya Daniele monisaka nde Kimfumu ya Nzambi ta yantika kuyala na nsuka ya “bantangu nsambwadi.” (Daniele 4:16, 17) Bamvula mingi na nima, Yezu bingaka ntangu yai nde “bantangu ya bo me tulaka ya makanda” mpi yandi tubaka nde yo sukaka ntete ve. (Luka 21:24) Mutindu beto ta mona yo, bantangu nsambwadi sukaka na 1914.
2. Inki mambu ke salamaka na nsi-ntoto mpi nki bikalulu bantu me kumaka ti yo banda na 1914?
Balongoki ya Yezu yulaka yandi nde: ‘Inki ntangu mambu yai ta salama mpi inki ta vanda kidimbu ya kumonana na nge mpi ya nsuka ya nsi-ntoto yai?’ (Matayo 24:3) Yezu songaka bo nde mambu mingi ta salama ntangu yandi ta kuma Ntotila ya Kimfumu ya Nzambi. Mu mbandu, bitumba, nzala mpi kunikana ya ntoto. (Tanga Matayo 24:7.) Biblia tubaka mpi nde bikalulu ya mbi yina bantu ta kuma ti yo na “bilumbu ya nsuka” ta sala nde luzingu kukuma “mpasi” mingi. (2 Timoteo 3:1-5) Mambu yai yonso yantikaka mpenza kusalama banda na 1914.
3. Sambu na nki mambu ke landa kubeba na nsi-ntoto banda ntangu Kimfumu ya Nzambi me yantikaka kuyala?
Ntangu Yezu kumaka Ntotila ya Kimfumu ya Nzambi, ntangu fioti na nima yandi nwanisaka Satana ti bademo na yandi na zulu. Satana belaka bitumba yina. Biblia ke tuba nde: “Bo losaka yandi na ntoto, mpi bo losaka yandi na nsi ti bawanzio na yandi.” (Kusonga 12:9, 10, 12) Satana kele na makasi ya ngolo sambu yandi me zaba nde yandi ta fwa. Yo yina, yandi ke niokulaka bantu mpi ke nataka bampasi na ntoto ya mvimba. Yai kikuma ya ke salaka nde mambu kubeba mpenza na ntoto! Kansi Kimfumu ya Nzambi ta katula bampasi yai yonso.
LONGUKA MAMBU MINGI
Beto tala mambu ya ke sadisaka beto na kuzaba nde Kimfumu ya Nzambi yantikaka kuyala na 1914 mpi mambu ya beto fwete sala mutindu beto me zaba nde Kimfumu yango ke yala.
4. Bakalkile ya badati ya Biblia ke monisa nde Kimfumu ya Nzambi bandaka kuyala na 1914
Nzambi salaka nde ntotila Nebukadenezare ya Babilone ya ntama kulala ndosi yina vandaka kumonisa mambu yina ta salama na bilumbu ke kwisa. Ndosi yango mpi ntendula yina Daniele pesaka ke tubila kimfumu ya Nebukadenezare mpi Kimfumu ya Nzambi.—Beno tanga Daniele 4:17.a
Beno tanga Daniele 4:20-26 mpi na nima beno tala mambu ya kele na tablo sambu na kupesa mvutu na bangiufula yai:
(A) Inki mambu Nebukadenezare monaka na ndosi?—Tala verse 20 mpi 21.
(B) Ndosi yango monisaka nde nki ta kumina nti?—Tala verse 23.
(C) Yo monisaka nde nki ta salama na nsuka ya “bantangu nsambwadi”?—Tala verse 26.
Kuwakana ya Kele na Kati ya Nti Yina Ndosi Ke Tubila mpi Kimfumu ya Nzambi
MAMBU YA BIBLIA TUBAKA (Daniele 4:20-36)
Kimfumu
(A) Nti mosi ya nda mingi kibeni
Kimfumu me suka
(B) “Beno zenga nti yina” tii kuna “bantangu nsambwadi ta luta”
Bo me vutula diaka kimfumu
(C) “Kimfumu ta vanda diaka ya nge”
Na kulungana ya ntete . . .
(D) Nti yina vandaka kumonisa nani?—Tala verse 22.
(E) Inki ntangu yandi bikaka kuyala?—Beno tanga Daniele 4:29-33.
(F) Inki kuminaka Nebukadenezare na nsuka ya “bantangu nsambwadi”?—Beno tanga Daniele 4:34-36.
KULUNGANA YA NTETE
Kimfumu
(D) Nebukadenezare, ntotila ya Babilone
Kimfumu me suka
(E) Na nima ya mvula 606 na ntwala ya ntangu na beto, Nebukadenezare me bela kilawu mpi yandi me bika kuyala sambu na bamvula nsambwadi
Bo me vutula diaka kimfumu
(F) Nebukadenezare me beluka mpi me yantika diaka kuyala
Na kulungana ya zole . . .
(G) Nti yina vandaka kumonisa banani?—Beno tanga 1 Bansangu 29:23.
(H) Inki ntangu kimfumu na bo sukaka? Inki mutindu beto me zaba nde yo vandaka kaka ve kuyala ata ntangu Yezu vandaka awa na ntoto?—Beno tanga Luka 21:24.
(I) Inki ntangu mpi na wapi kimfumu yai bandaka diaka kuyala?
KULUNGANA YA ZOLE
Kimfumu
(G) Bantotila ya Izraele yina ke monisa Kimfumu ya Nzambi
Kimfumu me suka
(H) Bo me fwa Yeruzalemi mpi bo me tula nsuka na ndonga ya bantotila ya Izraele sambu na bamvula 2 520
Bo me vutula diaka kimfumu
(I) Yezu, Ntotila ya Kimfumu ya Nzambi me yantika kuyala na zulu
Bantangu nsambwadi kele bamvula ikwa?
Mikanda ya nkaka ya Biblia ke sadisaka beto na kubakisa mambu ya kele na mikanda ya nkaka ya Biblia. Mu mbandu, mukanda ya Kusonga ke monisa nde bantangu tatu ti ndambu kele bilumbu 1 260. (Kusonga 12:6, 14) Kana nge fokula bantangu tatu ti ndambu mbala zole (1260 x 2), yo ke pesa bantangu nsambwadi to bilumbu 2 520. Bantangu ya nkaka ngogo kilumbu ke tendulaka mvula mosi na Biblia. (Ezekiele 4:6) Yo ke sadisa beto na kubakisa nde bantangu nsambwadi ya mukanda ya Daniele kele bamvula 2 520.
5. Mambu ya nsi-ntoto me sobaka banda na 1914
Yezu tubilaka mambu yina ta salama na ntoto ntangu yandi ta kuma Ntotila. Beno tanga Luka 21:9-11 mpi na nima beno pesa mvutu na ngiufula yai:
Inki mambu na kati ya mambu yai nge ke monaka to ke waka?
Ntumwa Polo tubilaka bikalulu ya mbi yina bantu ta kuma ti yo na bilumbu ya nsuka ya bimfumu ya bantu. Beno tanga 2 Timoteo 3:1-5 mpi na nima beno pesa mvutu na ngiufula yai:
Inki bikalulu na kati ya bikalulu yai ya mbi nge ke monaka na bantu bubu yai?
6. Inki beto fwete sala mutindu beto me zaba nde Kimfumu ya Nzambi ke yala?
Beno tanga Matayo 24:3, 14 mpi na nima beno pesa mvutu na bangiufula yai:
Inki kisalu ya mfunu ke monisa nde Kimfumu ya Nzambi ke yala bubu yai?
Inki mutindu nge lenda pesa maboko na kisalu yango?
Kimfumu ya Nzambi ke yala bubu yai mpi kubika fioti yo ta yala ntoto ya mvimba. Beno tanga Baebreo 10:24, 25 mpi na nima beno pesa mvutu na ngiufula yai:
Inki konso muntu na kati na beto fwete sala mutindu beto “ke mona kilumbu ke finama”?
Inki nge ta sala kana nge me longuka kima mosi ya lenda sadisa mpi kugulusa bantu ya nkaka?
MUNTU YA NKAKA LENDA YULA NGE NDE: “Sambu na nki Bambangi ya Yehowa ke tubilaka mingi mvula 1914?”
Inki nge ta tuba?
NA BUNKUFI
Mambu yina Biblia tubaka, badati ya Biblia mpi mambu ya ke salama na ntoto ke monisa nde Kimfumu ya Nzambi ke yala. Beto ke longaka yo na bantu ya nkaka mpi ke kwendaka na balukutakanu sambu beto me zaba nde yo ke yala.
Inki Nge Me Simba?
Inki salamaka na nsuka ya bantangu nsambwadi yina mukanda ya Daniele ke tubila?
Inki ke ndimisa nge nde Kimfumu ya Nzambi bandaka kuyala na 1914?
Inki nge fwete sala mutindu nge me zaba nde Kimfumu ya Nzambi ke yala?
TALA MPI
Tala mambu yina bantu ya istware mpi bantu ya nkaka ke tubaka na mutindu mambu me sobaka na ntoto banda na 1914.
“Banda Nki Ntangu Mambu Bebaka na Mbala Mosi Mutindu Yai?” (Disolo ya kele na Telama!)
Tala mutindu mambu yina Biblia ke tubaka na Matayo 24:14 sobaka luzingu ya muntu mosi yina vandaka kuzola nsaka mosi ya bo ke bingaka baseball.
“Mu Vandaka Kuzola Baseball Mingi Kibeni!” (Nzozulu ya Nkengi No. 3 2017)
Inki mutindu beto me zaba nde mambu ya Biblia tubaka na mukanda ya Daniele kapu 4 ke tadila Kimfumu ya Nzambi?
“Nki Ntangu Kimfumu ya Nzambi Yantikaka Kuyala? (Kitini 1)” (Nzozulu ya Nkengi Oktobri 1, 2014)
Inki ke monisa nde “bantangu nsambwadi” yina mukanda ya Daniele kapu 4 ke tubila sukaka na 1914?
“Nki Ntangu Kimfumu ya Nzambi Yantikaka Kuyala? (Kitini 2)” (Nzozulu ya Nkengi Novembri 1, 2014)
a Tala masolo zole ya nsuka na kitini Tala Mpi ya dilongi yai.
-
-
Mambu Yina Kimfumu ya Nzambi Ta SalaZinga Mvula na Mvula!—Kulonguka ya Biblia Yina Ta Natila Nge Mambote
-
-
DILONGI 33
Mambu Yina Kimfumu ya Nzambi Ta Sala
Kimfumu ya Nzambi me bandaka dezia kuyala. Kubika fioti, yo ta yidika mpenza mambu mingi na ntoto. Beto tala mwa mambu ya mbote yina Kimfumu ya Nzambi ta sala.
1. Inki Kimfumu ya Nzambi ta sala sambu bantu kuzinga diaka na ngemba mpi bo sala kaka mambu ya mbote?
Yezu, Ntotila ya Kimfumu ya Nzambi, ta fwa bantu ya mbi mpi bimfumu ya bantu na bitumba ya Armagedoni. (Kusonga 16:14, 16) Na ntangu yina, mambu yai ya Biblia tubaka ta lungana mpenza: “Kubika kaka fioti, mpi bantu ya mbi ta vanda diaka ve.” (Nkunga 37:10) Na nzila ya Kimfumu ya Nzambi, Yezu ta sala nde ngemba mpi mambu ya mbote kuvanda na ntoto.—Tanga Yezaya 11:4.
2. Luzingu ta vanda nki mutindu ntangu luzolo ya Nzambi ta salama awa na ntoto?
Ntangu Kimfumu ya Nzambi ta yala ntoto, ‘bantu ya mbote ta baka ntoto mpi bo ta zinga mvula na mvula na zulu na yo.’ (Nkunga 37:29) Yindula mutindu luzingu ta vanda na ntoto ntangu bantu yonso ta kuma bantu ya mbote, ta zolaka Yehowa mpi ta zolanaka! Ata muntu mosi ve ta belaka diaka mpi bantu yonso ta zingaka mvula na mvula.
3. Inki mambu Kimfumu ya Nzambi ta sala ntangu bantu ya mbi ta fwa?
Na nima ya lufwa ya bantu ya mbi, Yezu ta yala bamvula 1 000. Na ntangu yina, yandi mpi bantu 144 000 yina ta yala ti yandi ta sadisa bantu na kukuma bantu ya kukonda masumu. Na nsuka ya bamvula 1 000, ntoto ta kuma paladisu mosi ya kitoko mpi bantu yonso ta zingaka na kiese sambu bo ta lemfukaka na bansiku ya Yehowa. Na nima, Yezu ta vutula Kimfumu na Yehowa, Tata na yandi. “Zina [ya Yehowa ta kuma diaka] ya santu” na mutindu yina me salamaka ntete ve. (Matayo 6:9, 10) Yo ta monana pwelele nde Yehowa kele Mfumu ya mbote yina ke zolaka bantu na yandi. Na nima, Yehowa ta fwa Satana ti bademo na yandi mpi bantu yonso ya nkaka yina ta kolama na luyalu na yandi. (Kusonga 20:7-10) Kimfumu ya Nzambi ta nata luzingu ya mbote ya kukonda nsuka.
LONGUKA MAMBU MINGI
Beto tala sambu na nki beto fwete tula ntima nde Nzambi ta sadila Kimfumu na yandi sambu na kulungisa mambu yina Biblia ke tubaka sambu na bilumbu ke kwisa.
4. Kimfumu ya Nzambi ta fwa bimfumu ya bantu
“Muntu me yalaka muntu sambu na kupesa yandi mpasi.” (Longi 8:9) Yehowa ta sadila Kimfumu na yandi sambu na kumanisa mambu yai ya mbi.
Beno tanga Daniele 2:44 mpi 2 Batesalonika 1:6-8. Na nima, beno pesa mvutu na bangiufula yai:
Inki Yehowa ti Mwana na yandi Yezu ta sala bimfumu ya bantu mpi bantu yina ke pesaka yo maboko?
Inki mutindu mambu ya nge me longuka sambu na Yehowa mpi Yezu ke ndimisa nge nde mambu ya bo ta sala ta vanda ya mbote?
5. Yezu kele Ntotila ya kuluta mbote
Yezu, Ntotila ya Kimfumu ya Nzambi, ta sala mambu mingi sambu na mambote ya bantu na ntoto. Beno tala VIDEO sambu na kumona mutindu Yezu monisaka nde yandi ke zolaka kusadisa bantu mpi nde Nzambi muntu me pesaka yandi ngolo ya kusala yo.
Ntangu Yezu vandaka awa na ntoto, yandi salaka mwa mambu yina Kimfumu ya Nzambi ta sala. Na kati ya mambu yai ya ke landa, nki yo nge ke vingila kumona ti nzala ya ngolo? Beno tanga baverse ya kele na lweka ya mambu yango sambu na kubakisa yo mbote.
NTANGU YEZU VANDAKA NA NTOTO, YANDI . . .
NA ZULU, YEZU . . .
lembikaka nzadi-mungwa mpi mupepe ya ngolo.—Marko 4:36-41.
ta yidika bisika yonso yina ntoto me bebaka.—Yezaya 35:1, 2.
disaka bantu mingi na mutindu ya kuyituka.—Matayo 14:17-21.
ta manisa nzala na ntoto.—Nkunga 72:16.
belulaka bantu mingi.—Luka 18:35-43.
ta sala nde bantu yonso kuvanda ti sante ya mbote kibeni.—Yezaya 33:24.
vutulaka bantu na luzingu.—Luka 8:49-55.
ta futumuna bantu ya kufwa mpi ta manisa bampasi yina lufwa ke nataka.—Kusonga 21:3, 4.
6. Kimfumu ya Nzambi ta sala nde bantu kuvanda ti luzingu ya mbote na bilumbu ke kwisa
Kimfumu ya Nzambi ta lungisa mbote-mbote mambu yina Yehowa kanaka ntete sambu na bantu. Bantu ta zinga mvula na mvula na paladisu na ntoto. Beno tala VIDEO sambu na kumona mutindu Yehowa ke sadila Mwana na yandi Yezu sambu na kulungisa mambu yina yandi ke kana kusala sambu na bantu.
Beno tanga Nkunga 145:16 mpi na nima beno pesa mvutu na ngiufula yai:
Inki mpila nge ke kudiwa mutindu nge me zaba nde Yehowa ta “lungisa nzala ya konso kima ya kele na luzingu”?
BANTU YA NKAKA KE TUBAKA NDE: “Bampasi lenda mana kana bantu ya mbote kukota na guvernema.”
Inki bampasi Kimfumu ya Nzambi ta manisa yina bimfumu ya bantu lenda kuka ve?
NA BUNKUFI
Kimfumu ya Nzambi ta lungisa mambu yina Nzambi ke kana kusala. Yo ta kumisa ntoto ya mvimba paladisu mpi bantu yonso ya mbote ta zinga kuna mpi ta sambilaka Yehowa mvula na mvula.
Inki Nge Me Simba?
Inki mutindu Kimfumu ya Nzambi ta santisa zina ya Yehowa?
Inki ke ndimisa nge nde Kimfumu ya Nzambi ta sala mambu ya Biblia ke tubaka?
Na kati ya mambu yina Kimfumu ya Nzambi ta sala, nki yo nge ke vingila kumona ti nzala ya ngolo?
TALA MPI
Tala kana Armagedoni kele nki.
“Bitumba ya Armagedoni Kele Nki?” (Disolo ya kele na jw.org)
Tala mambu yina ta salama na nsungi yina Yezu bingaka nde “mpasi ya nene.”
Tala mutindu mabuta lenda yindula mambote yina Kimfumu ya Nzambi ta natila beto na Paladisu.
Na disolo “Bangiufula Mingi ya Mono Vandaka Kudiyula Vandaka Kuyangisa Mono,” tala mutindu muntu mosi ya mubulu zwaka bamvutu na bangiufula yina yandi vandaka kudiyula.
“Biblia Ke Sobaka Luzingu ya Bantu” (Disolo ya kele na Nzozulu ya Nkengi)
-