Keti Nzambi Kendimaka Mitindu Yonso ya Lusambu?

Bamvutu yina bantu mingi kepesaka:

▪ “Mabundu yonso kenataka na Nzambi.”

▪ “Mambu ya beto kekwikilaka kele mfunu ve kana beto kele bantu ya masonga.”

Inki Yezu kutubaka?

▪ “Beno kota na kielo yina kele ya fioti. Sambu kele ti kielo ya nene ti nzila ya nene yina ke nataka bantu na bilungi, bantu mingi ke kwendaka na nzila yina. Kansi kielo ti nzila yina ke nataka bantu na moyo yo kele nkaka mpenza, bantu fioti mpamba ke monaka yo.” (Matayo 7:13, 14) Yezu vandaka kukwikila ve nde mabundu yonso kenataka na Nzambi.

▪ “Na kilumbu yina, bantu mingi ta yula mono nde: ‘Mfumu, Mfumu! Beto ve bantu vandaka kuzabisa nsangu ya Nzambi na zina na nge? Beto ve bantu vandaka kubasisa bampeve ya mbi na zina na nge? Beto ve bantu vandaka kusala bidimbu mingi na zina na nge?’ Na ntangu yina mono ta tubila bo nde: ‘Mono me zabaka beno ntete ve. Beno bantu ke salaka mambu ya mbi, beno katuka awa na meso na mono!’” (Matayo 7:22, 23) Yezu kendimaka ve bantu yonso yina ketubaka nde bo kele balongoki na yandi.

BANTU mingi ya kesambilaka kekangamaka na balukwikilu mpi na binkulu na bo. Kansi nki lenda salama kana malongi yina kewakana ve ti mambu yina kele na Ndinga ya Nzambi, Biblia? Yezu kumonisaka kigonsa ya kulanda bansiku ya bantu ntangu yandi zabisaka bamfumu ya mabundu ya ntangu na yandi nde: “Beno ke fwaka mambu yina ya Nzambi ke tubaka; yo yina beno ke landaka bansiku na beno mosi.” Na nima yandi vutukilaka bangogo yai ya Nzambi: “Bantu yai ke zitisaka mono kaka na munoko, kansi na ntima ve. Bisambu yina ya bo ke sambaka mono kele ya mpamba, sambu bo ke longaka bansiku ya bantu bonso nde yo kele malongi ya Nzambi!”​—Matayo 15:1-9; Yezaya 29:13.

Bikalulu kele mpi mfunu, balukwikilu kaka ve. Biblia ketuba sambu na bantu yankaka yina ketubaka nde bo kesambilaka Nzambi nde: “Bo ke tubaka nde bo ke ndimaka Nzambi, kansi mambu yina ya bo ke salaka yo ke songaka nde bo ke buyaka yandi.” (Tito 1:16) Nkutu, Biblia ketuba sambu na bantu mingi yina kezinga na ntangu na beto nde: “Bo ta zolaka kiese ya nsi-ntoto, kansi Nzambi ve; bo ta songaka na meso ya bantu nde bo kele na kinzambi, kisi na ntima na bo, bo ke buyaka ngolo ya kieleka ya kinzambi. Kuvanda kimvuka mosi ve ti bantu ya mutindu yina!”​—2 Timoteo 3:4, 5.

Masonga kele mfunu, kansi yo kelomba mpi mambu yankaka. Sambu na nki? Sambu muntu lenda vanda muntu ya masonga, kansi yandi kekwikila na mambu ya luvunu. Yo yina, yo kele mfunu na kuvanda ti nzayilu ya sikisiki ya metala Nzambi. (Roma 10:2, 3) Kubaka nzayilu yai mpi kusala na kuwakana ti mambu yina Biblia ketuba tasadisa beto na kusepedisa Nzambi. (Matayo 7:21) Yo yina, yo kele kyeleka nde dibundu ya kyeleka kelombaka kuvanda ti bikuma ya mbote, balukwikilu ya mbote, mpi bisalu ya mbote. Mpi bisalu ya mbote ketendula kusala luzolo ya Nzambi konso kilumbu!​—1 Yoane 2:17.

Kana nge tazola kuzaba mambu mingi na yina metala mambu yina Biblia kelonga beto sambu na Nzambi, sosa Bambangi ya Yehowa sambu na kulonguka ti bo Biblia ya ofele na nzo na nge.

[Bangogo sambu na kubenda dikebi ya kele na lutiti 9]

Dibundu ya kyeleka kelombaka kuvanda ti bikuma ya mbote, balukwikilu ya mbote, mpi bisalu ya mbote