Dilongi ya Luvunu 6: Nzambi Kendimaka nde Bantu Kusadila Biteki mpi Bifwanisu na Lusambu
Inki kele kisina ya dilongi ya luvunu? “Bakristu ya ntete vandaka ve kusadila bifwanisu na lusambu na bo . . . Ntangu bo yantikaka kusadila bifwanisu na dibundu ya mvu-nkama ya 4 mpi ya 5, bo tubaka nde bo salaka yo sambu bantu yina mezaba ata kima ve lendaka kulonguka mbote bakyeleka ya Bukristu na nzila na yo kuluta na nsadisa ya badiskure to ya mikanda.”—Cyclopedia of Biblical, Theological, and Ecclesiastical Literature, ya McClintock ti Strong, Volime 4, balutiti 503 mpi 504.
Biblia ketuba inki? “Kusala ve biteki to bifwanisu ya bima yina kele kuna na zulu to awa na nsi-ntoto to na masa yina kele kuna na nsi ya ntoto. Kufukama ve na ntwala ya biteki sambu na kusambila yo.” (Kubasika 20:4, 5) Ntumwa Yoane kusonikilaka Bakristu ya mvu-nkama ya ntete nde: “Bana na mono, beno tina banzambi ya biteki.”—1 Yoane 5:21.
Keti bifwanisu, mutindu mabundu ketubaka, kele kaka nzila ya kufinama na bantu yina yo kemonisa mpi kupesa bo lukumu? Mukanda mosi (The Encyclopedia of Religion) ketuba nde: “Na luyantiku, mbala yankaka bo vandaka kusadila bifwanisu ntetentete bonso bisadilu ya [kulongila] mpi bima yina ketomisaka nzo; na kiteso mosi buna, bo vandaka kusadila dibanza yai sambu na kunungisa mutindu bo vandaka kusadila biteki. Kansi beto fwete tuba nde ntangu fyoti na nima bo yantikaka kusambila yo. Yo vandaka mingimingi kyeleka sambu na biteki yina kukumaka bima ya mfunu ya Dibundu ya Ortodoksi.” Kansi, profete Yezaya kuyulaka mbote mpenza nde: “Na nani beno lenda fwanikisa Nzambi? Nki kifwanisu lenda fwanana na yandi?”—Yezaya 40:18.
Fwanisa baverse yai ya Biblia: Yezaya 44:13-19; Bisalu 10:25, 26; 17:29; 2 Korinto 5:7
DYAMBU YA KYELEKA:
Nzambi kendimaka ve nde bantu kusadila biteki mpi bifwanisu
BUYA MALONGI YA LUVUNU, KANGAMA NA KYELEKA
Sambu na kusukisa, inki beto lenda tuba na nima ya kutadila na bunkufi malongi ya luvunu yina mabundu mingi kelanda na kulonga? Beto lenda tesa ve ata fyoti “bansangu yina ya mpamba-mpamba [myʹthos, na Kigreki] ya bantu ke yindulaka na ntu” ti bakyeleka ya Biblia ya pete mpi yina kepesaka kikesa.—2 Piere 1:16.
Yo yina, ti mabanza ya mbote, kuvanda ve ti ketiketi na kufwanisa na Ndinga ya Nzambi—nto ya kyeleka—mambu yina bo melongaka nge. (Yoane 17:17) Ebuna, dilaka yai tavanda ya kyeleka sambu na nge: “[Nge] ta zaba mambu yina kele ya kieleka, ebuna mambu yina ta katula [nge] na kimpika.”—Yoane 8:32.
[Kifwanisu ya kele na lutiti 9]
[Bangogo ya kemonisa kisina ya foto ya kele na lutiti 9]
Pictorial Archive (Near Eastern History) Est.