Nsangu ya Mbote na Bandinga 500

NTANGU mvita kuvandaka na Rwanda, mwa kibuka ya bambaludi kutinaka banzo na bo mpi kuyambulaka bima na bo. Kansi, bo salaka yonso sambu na kunata baordinatere na bo ya maboko tii na bakan ya barefizie. Sambu na nki? Sambu bo landa kubalula mikanda yina ketendulaka Biblia na ndinga ya Kinyarwanda.

Leke mosi ya nkento na Sudi-esti ya Asie vandaka kubula ordinatere na yandi na mpimpa mpenza, ata yandi vandaka ya kulemba, ntangu vandaka mingi, mpi kisalu na yandi ya kubalula vandaka kuzengana sambu kura vandaka kuzengana-zengana. Inki kuvandaka lukanu na yandi? Kumanisa kisalu na yandi na ntwala ya dati yina bo tanyema yo.

Bambaludi yai kele na kati ya kibuka ya nene ya bansadi ya luzolo ya mbote kiteso ya 2 300 yina kesalaka na ntoto ya mvimba na bisika kuluta 190. Bamvula na bo kebanda na 20 tii penepene ya 90, mpi bo kekudipesaka mingi na kisalu na bo na mpila nde bantu lenda baka kikesa na nsangu ya Biblia na bandinga 500.​—Kusonga 7:9.

Kusamuna na Bantu ya Bandinga Mingi

Na bamvula ya mekatuka kuluta, kisalu ya Bambangi ya Yehowa ya kubalula mikanda meyelaka na mutindu yina mesalamaka ntete ve. Mu mbandu, na mvu 1985, Nzozulu ya Nkengi vandaka kubasika na mbala mosi na bandinga 23​—yo vandaka dyambu mosi ya kuyituka na ntangu yina. Bubu yai, Nzozulu ya Nkengi kebasikaka na bandinga 176, mpi bo kebasisaka yonso na mbala mosi na mpila nde batangi ya ntoto ya mvimba kukuka kulonguka malongi kaka mosi na ntangu mosi.

Na bandinga kiteso ya 50, Nzozulu ya Nkengi kele zulunalu mosi kaka ya kebasikaka mbala na mbala. Sambu na nki? Bakompani yina kenyemaka mikanda ya kuteka ketulaka ve dikebi mingi na kubasisa mikanda na bandinga ya bwala na bo. Kansi, Bambangi ya Yehowa na ntoto ya mvimba kepesaka makabu na luzolo yonso sambu bo yonso kuvanda ti bima kiteso mosi na mpila nde Ndinga ya Nzambi mpi mikanda yina ketendulaka Biblia kukuma bisika yonso ya bo kele na mfunu na yo.​—2 Korinto 8:14.

Bantu kebakaka na mbalu mingi nsangu ya Biblia na ndinga na bo. Mu mbandu, bo meyantikaka ntama mingi ve kubasisa mikanda yina ketendulaka Biblia na Miskito, ndinga mosi yina bantu kiteso ya 200 000 ketubaka na Nicaragua. Nkento mosi kulombaka Mukanda ya Bankenda ya Bibliaa na Miskito, mpi pastere mosi ya bwala yina kuvandaka pana ntangu bo pesaka nkento yina mukanda yango. Ntangu yandi monaka mukanda yina ya kitoko, pastere yango kulombaka mpi mukanda yina. Nkento yina kubuyaka na kupesa yandi yo, ata ntangu pastere yina kupesaka yandi bakilo 20 ya kafe sambu nkento yina kupesa yandi mukanda yango!

Na bamvula kumi ya meluta, bo balulaka mikanda ya ketendulaka Biblia na bandinga ya bwala ya Mexico kuluta 12, tanga mpi Maya, Nahuatl, mpi Tzotzil. Bamvula kumi kulungaka ve, ntalu ya mabundu ya Bambangi ya Yehowa ya ndinga ya bwala ya Mexico mpi ya ndinga ya bidimbu kuyelaka, yo vandaka 72 mpi yo kumaka kuluta 1 200. Bambangi ya Yehowa lenda kuna nsangu ya Biblia na ntima ya bantu, kansi bo kebikaka nde Nzambi kuyedisa bankeni ya kyeleka.​—1 Korinto 3:5-7.

Mbalula ya Biblia ya Bilumbu Yai na Bandinga 80

Na bamvula ya mekatuka kuluta, Bambangi ya Yehowa mesalaka ngolo sambu na kubasisa Les Saintes Écritures ​— Traduction du monde nouveau na mvimba to na ndambu na bandinga 80. Inki mbutu yo mebasisaka? Mbangi mosi ya Afrika ya Sudi kutubaka mutindu yai sambu na Biblia na ndinga ya Tswana: “Yo kele kisadilu mosi ya kitoko mpenza. Yo tasadisa munu na kubakisa Ndinga ya Nzambi mpi kusepela na yo mingi mpenza. Bo mesadila kutuba mosi ya kele mpasi ve na kutanga mpi yo kele kitoko.” Bakala mosi ya Mozambique ya ketubaka ndinga ya Tsonga kusonikaka nde: “Ata beto vandaka ti mikanda yankaka ya ketendulaka Biblia, kukonda Biblia vandaka bonso nde beto vandaka na banzasi mpi nsemo kansi mvula kuvandaka ve! Kansi, mvula kunokaka ntangu Traduction du monde nouveau kubasikaka na ndinga ya Tsonga.”

Bantu yina kebalulaka mpi kekabulaka nsangu ya mbote ya kele na Biblia ke na kulungisa mbikudulu mosi ya ntama na mutindu mosi ya keyitukisa. Yezu Kristu yandi mosi muntu kutubaka nde: “Bo ta longaka nsangu yai ya mbote ya Kimfumu na nsi-ntoto ya mvimba, na mpila nde bantu ya makanda yonso kuwa yo. Ebuna na nima, nsuka ya ntoto ta kwisa.”​—Matayo 24:14.

[Noti na nsi ya lutiti]

[Tablo ya kele na lutiti 30]

(Sambu na kumona mambu yonso, tala mukanda)

TRADUCTION DU MONDE NOUVEAU

Na mvimba to na ndambu

1950 1*

1970 7*

1990 13*

2000 36*

2010 80*

MIKANDA YANKAKA

1950 88*

1960 125*

1970 165*

1980 190*

1990 200*

2010 500*

*NTALU YA BANDINGA

[Bifwanisu ya kele na lutiti 29, 30]

Bantu ya luzolo ya mbote kiteso ya 2 300 kebalulaka mikanda yina ketendulaka Biblia na bandinga 500

BÉNIN

SLOVÉNIE

ETIOPIA

GRANDE-BRETAGNE