Kwenda Penepene na Nzambi

Yandi Kesosaka Mambu ya Mbote na Bantu

1 BANTOTILA 14:13 (NW)

“MFUMU NZAMBI ke talaka ntima ya bantu, yandi ke zabaka mpi bangindu ya bantu.” (1 Bansangu 28:9) Lukanu ya bangogo yai ya kupemama kele ya kufulusa ntima na beto ti ntonda sambu na dikebi ya mudindu yina Yehowa ketudilaka beto. Yehowa kesosaka mambu ya mbote ya kele na ntima na beto ata beto kele mpenza bantu ya kukonda kukuka. Dyambu yai kemonana pwelele na mambu yina yandi tubaka sambu na Abiya, yina kele na 1 Bantotila 14:13.

Abiya kuzingaka na dibuta mosi ya bantu ya mbi. Tata na yandi, Yeroboami, kuvandaka muntu ya ntete na ndonga ya bantotila yina kuvandaka baaposta.a Yehowa kubakaka lukanu ya kukomba dibuta ya Yeroboami, kaka “mutindu bo ke kombaka nzo.” (1 Bantotila 14:10) Kansi Nzambi kupesaka ntuma nde kaka muntu mosi mpamba ya dibuta ya Yeroboami, Abiya​—yina vandaka kubela ngolo—​kuzikama na lukumu.b Sambu na inki? Nzambi kutendulaka nde: “Sambu Yehowa Nzambi ya Izraele memona kima mosi ya mbote na yandi, na nzo ya Yeroboami.” (1 Bantotila 14:1, 12, 13, NW) Mambu yai kesonga beto inki na yina metala Abiya?

Biblia ketuba ve nde Abiya kuvandaka nsambidi ya kwikama ya Nzambi. Kansi, kuvandaka na mwa mambu ya mbote na ntima na yandi. “Yehowa” muntu kumonaka mambu yango ya mbote, ziku yo ketadila mambu ya metala lusambu ya Yehowa. Bansoniki ya ba rabi ketuba nde Abiya kukwendaka na tempelo na Yeruzalemi to nde yandi katulaka basoda yina tata na yandi kutulaka sambu na kubuyisa bantu ya Izraele na kukwenda na Yeruzalemi.

Ata beto mezaba ve mambu ya mbote yina Abiya kusalaka, yo monanaka pwelele. Ya ntete, yo vandaka ya masonga. Mambu yango ya mbote kuvandaka “na yandi”​—disongidila, na ntima na yandi. Ya zole, yo vandaka ya sipesiali. Abiya kumonisaka mambu yai ya mbote ata yandi vandaka “na nzo ya Yeroboami.” Muntu mosi ya mayele ketuba nde: “Yo mefwana mpenza kusikisa bantu kana bo metanina bikalulu na bo ya mbote na ntangu bo kezinga na bisika mpi na mabuta yina bantu kesala mambu ya mbi.” Muntu yankaka ya mayele ketuba nde mambu ya mbote ya Abiya vandaka mambu yina bantu “lendaka kumona kukonda mpasi . . ., kaka mutindu bambwetete kengengaka ntangu zulu kevandaka na mudidi, mpi banti ya sedre kevandaka kitoko mingi ntangu banti yina kele ve ti matiti kezyungaka yo.”

Kima ya kuluta mfunu kele nde, bangogo ya 1 Bantotila 14:13 kelonga beto kima mosi ya kitoko na yina metala Yehowa mpi mambu yina yandi kesosaka na beto. Yibuka nde kuvandaka na dyambu mosi ya mbote yina Nzambi “kumonanaka na” Abiya. Yo ke pwelele nde Yehowa kutalaka ntima ya Abiya tii kuna yandi monaka mwa mambu ya mbote. Kana beto fwanisa yandi ti bantu ya dibuta na yandi, mutindu muntu mosi ya mayele kutubaka yo, Abiya kuvandaka diyaka mosi mpamba “na kati ya kimvuka ya matadi.” Yehowa kusepelaka ti dyambu yina ya mbote mpi yandi futaka yandi, yandi monisaka mawa na muntu mosi yai ya dibuta mosi ya mbi.

Keti yo kepesa ve kikesa na kuzaba nde Yehowa kesosaka mpi kebakaka na valere mambu ya mbote ya kele na kati na beto ata beto kele bantu ya kukonda kukuka? (Nkunga 130:3) Kuzaba mambu yai fwete pusa beto na kukwenda penepene ya Yehowa, Nzambi yina kefimpaka ntima na beto sambu na kusosa ata tumambu ya mbote.

[Banoti na Nsi ya lutiti]