Keti Yo Kele Mbi na Kuyula Nzambi Bangiufula?
BANTU ya nkaka ke tubaka nde yo kele mbi na kuyula Nzambi bangiufula. Bo lenda yindula nde, yo kele kukonda luzitu na kuyula Nzambi kikuma yina yandi ke pesaka nzila nde mambu ya nkaka kusalama to ke buyaka nde yo salama. Keti nge mpi ke yindulaka mpidina?
Kana yo kele mpidina, nge ta yituka na kumona nde bantu mingi ya mbote yulaka Nzambi bangiufula. Tala bangiufula yina bo yulaka Nzambi:
Yobi, muntu ya kwikama yulaka nde: “Sambu na nki Nzambi ke bikaka bantu ya mbi bo zinga mbote, bo kuma ngolo tii kuna bo nuna?”—Yobi 21:7.
Habakuki, profete ya kwikama yulaka nde: “Ebuna nki mutindu nge lenda tala bantu yai ya mbi ke zaba bansiku ve? Sambu na nki nge ke vanda pima ntangu bo ke fwa bantu yina me luta bo na masonga?”—Habakuki 1:13.
Yezu Kristu yulaka nde: “Nzambi na mono, Nzambi na mono, sambu na nki nge me bikisa mono?”—Matayo 27:46.
Kana nge tanga baverse yina kele na ntwala to na nima ya baverse yai, nge ta mona ata kisika mosi ve yina Yehowa Nzambi waka makasi ntangu bo yulaka yandi bangiufula yina na masonga yonso. Ya kieleka, kubika nde bantu kuyula yandi bangiufula lenda yitukisa beto ve. Mu mbandu, Nzambi ke waka ve makasi ntangu beto ke lombaka yandi na kupesa beto bima yina beto kele na yo mfunu sambu beto vanda na mavimpi ya mbote na nitu. Yandi ke pesaka beto yo na kiese yonso. (Matayo 6:11, 33) Mutindu mosi, yandi ke zabisaka beto na luzolo yonso mambu yina lenda tanina mabanza mpi mawi na beto. (Bafilipi 4:6, 7) Nkutu, Yezu siamisaka balongoki na yandi nde: “Beno landa na kulomba, ebuna bo ta pesa beno.” (Matayo 7:7) Diambu yina pusaka Yezu na kutubila lusilu yina ke monisa nde yandi vandaka kutubila kaka ve kubaka bima ya kinsuni kansi mpi bamvutu na bangiufula ya mfunu.
Kana nge vandaka ti dibaku ya kuyula Nzambi bangiufula, inki ngiufula nge zolaka kuyula yandi na kati ya bangiufula yai ke landa?
● Keti luzingu na mono kele ti lukanu?
● Inki ta kumina mono kana mono kufwa?
● Sambu na nki nge ke pesaka nzila nde mono mona mpasi?
Sambu “Masonuku yonso kele ya kupemama na Nzambi,” nge ta mona bamvutu yina Nzambi ke pesa na Ndinga na yandi, Biblia. (2 Timoteo 3:16) Tadila bikuma yina ke pusaka bantu ya nkaka na kuyula bangiufula yina kele na zulu mpi bamvutu yina Biblia ke pesaka.