Inki Mutindu Beto Kumaka na Ntoto?

Na bunkufi mpi na bangogo ya pete, Kuyantika, mukanda ya ntete ya Biblia ke tendula kisina ya luyalanganu mpi yo ke tuba nde: ‘Na luyantiku Nzambi gangaka zulu ti ntoto.’ (Kuyantika 1:1) Na nima ya kuganga banti mpi bambisi, Nzambi gangaka Adami mpi Eva, bantu ya ntete. Bo vandaka ya kuswaswana ti bambisi sambu bantu ke vandaka ti bikalulu ya nkaka ya Nzambi mpi ti kimpwanza ya kupona. Yo yina, yo lombaka nde bo vutula munoko na mambu na bo. Kana bo lemfukilaka ntuma ya Nzambi, bo zolaka kulungisa lukanu ya Nzambi ya kuvanda bibuti ya ntete ya bantu yonso na ntoto ya mvimba, yina zolaka kuvanda na luzingu ya ngemba mpi ya kukuka kimakulu.

Kansi, wanzio to kigangwa mosi ya mpeve, sadilaka dibaku yina sambu na kukusa bantu na kusosa mambote na bo mosi. Na mutindu yina yandi kumaka Satana, yina ke tendula “Mutelamini.” Na nzila ya nioka, Satana kusaka Eva nde yandi ta vanda ti luzingu ya mbote kibeni kukonda lutwadisu ya Nzambi. Adami mpi Eva landaka Satana mpi bebisaka bangwisana na bo ti Ngangi na bo. Sambu bo solaka nzila ya mbi, bibuti na beto ya ntete vidisaka luzingu ya mvula na mvula mpi bikilaka beto yonso masumu, nkadilu ya kukonda kukuka mpi lufwa.

Kukonda kusukinina, Nzambi monisaka mpusa na yandi ya kuyidika diambu yina ya mpasi mpi kupesa bana ya Adami dibaku ya kubaka luzingu ya mvula na mvula. Nzambi bikulaka nde “nkuna,” to muntu mosi ya mfunu mingi, ta fwa Satana mpi ta katula bampasi yonso yina Satana, Adami mpi Eva me nataka. (Kuyantika 3:15, NW) Nani zolaka kuvanda “nkuna” yina? Yo zolaka kuzabana na makwisa.

Na ntwala nde nkuna yina kukwisa, Satana salaka yonso sambu na kubebisa lukanu ya Nzambi. Kukonda kusukinina, disumu mpi mambi yalumukaka na ntoto. Nzambi bakaka lukanu ya kufwa bantu ya mbi na Mvula ya Ngolo. Yandi zabisaka Noa, muntu ya lunungu na kutunga maswa​—sanduku mosi ya nene yina lendaka kuleluka na masa—​sambu na kudigulusa mpi kugulusa dibuta na yandi, ti bambisi yina Nzambi zabisaka yandi na kukotisa na maswa.

Mvula mosi na nima ya Mvula ya Ngolo, Noa ti dibuta na yandi basikaka na maswa sambu na kuzinga na ntoto mosi ya bunkete. Kansi “nkuna” monanaka ntete ve.

​—Yo me katuka na Kuyantika, bakapu 1-11; Yude 6, 14, 15; Kusonga 12:9.