Nzambi Me Baka Bangidika Sambu na Kugulusa Bantu

Nzambi silaka Abrahami muntu ya kwikama nde “nkuna” ya lusilu ta vanda mosi ya batekolo na yandi. Na nzila ya nkuna yina, bantu ya ‘makanda yonso’ ta baka balusakumunu. (Kuyantika 22:18) Na nima, Yakobo, mutekolo ya Abrahami kwendaka na Ezipte, kuna dibuta na yandi kumaka nene mpi yo kumaka dikanda ya Izraele.

Na nima, na Ezipte, Farao mosi ya nku kumisaka bantu ya Izraele bampika tii ntangu Nzambi tindaka profete Moize, yina basisaka bo na Ezipte na nzila ya kimangu yina yandi salaka na kukabulaka masa ya Nzadi-Mungwa ya Mbwaki. Na nima, Nzambi pesaka dikanda ya Izraele Bansiku Kumi mpi bansiku ya nkaka sambu yo twadisa bo mpi kutanina bo. Bansiku yina tubilaka pwelele makabu yina bo fwete pesa sambu na kubaka ndolula ya masumu. Na ngolo ya mpeve ya Nzambi, Moize zabisaka bantu ya Izraele nde Nzambi ta tindila bo profete ya nkaka. Profete yina ta vanda “nkuna” ya lusilu.

Bamvula kuluta 400 na nima, Nzambi silaka Ntotila Davidi nde, “nkuna” yina yandi tubilaka na Edeni, ta yala na kimfumu yina ta zinga kimakulu. Yandi ta vanda Mesia, Ngulunsi yina Nzambi me ponaka sambu na kugulusa bantu mpi kuvutula paladisu awa na ntoto.

Na nzila ya Davidi mpi ya baprofete ya nkaka, Nzambi monisaka malembe-malembe mambu mingi na yina me tala Mesia. Bo bikulaka nde yandi ta vanda muntu ya kudikulumusa, ya mbote, mpi na luyalu na yandi, nzala, kukonda lunungu mpi mvita ta mana. Bantu yonso ta zinga na ngemba na kati na bo mpi ata nkutu ti bambisi. Maladi, bampasi mpi lufwa, yina vandaka ve ata fioti na lukanu ya Nzambi ya luyantiku, ta mana mpi bantu yina me fwaka ta vutuka na luzingu awa na ntoto.

Na nzila ya profete Mishe Nzambi bikulaka nde, Mesia ta butuka na Betelemi mpi na nzila ya profete Daniele yandi tubaka nde, na nima bo ta fwa Mesia. Kansi, Nzambi ta futumuna Mesia mpi ta tula yandi Ntotila na zulu. Daniele monaka mpi nde Kimfumu ya Mesia ta yinga baluyalu yonso ya bantu kimakulu. Keti Mesia kwisaka kibeni mutindu bo bikulaka yo?

​—Yo me katuka na Kuyantika, bakapu 22-50, mpi na Kubasika, Kulonga, 2 Samuele, Bankunga, Yezaya, Daniele, Mishe, Zakaria 9:9.