“Beto Me Mona Mesia”!

Mbikudulu ya Mishe yina tubaka nde Mesia ta butuka na Betelemi lunganaka bamvu-nkama kiteso ya iya na nima ya kusonama ya mukanda ya nsuka ya Masonuku ya Kiebreo. Bamvula kiteso ya 30 na nima, na mvu 29 T.B., kitini ya ntete ya mbikudulu ya Daniele yina tubilaka kukwisa ya Mesia lunganaka. Yezu bakaka mbotika, mpi Nzambi tulaka yandi mafuta na mpeve santu. Mesia to nkuna, yina bantu vandaka kuvingila tuka ntama, kwisaka na ntangu yina me fwana kibeni!

Mbala mosi Yezu yantikaka kisalu na yandi, “kuzabisa nsangu ya mbote ya Kimfumu ya Nzambi.” (Luka 8:1) Kaka mutindu bo bikulaka, Yezu vandaka muntu ya mbote, ya mawete mpi yina vandaka kudibanza sambu na bankaka. Malongi na yandi vandaka ya mfunu mpi ya zola, mpi yandi belulaka bantu yina vandaka ti “bifu ya mitindu yonso.” (Matayo 4:23) Bantu ya bamvula yonso vandaka kukwisa na Yezu mpi tubaka nde: “Beto me mona Mesia.”​—Yoane 1:41.

Yezu bikulaka nde na ntwala nde Kimfumu na yandi kuyantika kutwadisa mambu yonso, bamvita, kunikana ya ntoto mpi mambu ya nkaka ya mbi ta salama na nsi-ntoto. Yandi longisilaka beto na ‘kulanda na kukengila.’​—Marko 13:37.

Yezu vandaka muntu ya kukuka yina lemfukilaka Nzambi, kansi yandi vandaka ti bambeni yina nsuka-nsuka fwaka yandi. Mpidina, lufwa na yandi vandaka makabu ya kukuka yina yandi pesaka sambu na kusumba diaka kima yina Adami mpi Eva vidisaka​—kivuvu ya luzingu ya mvula na mvula na paladisu.

Mbikudulu mosi lunganaka mutindu Nzambi futumunaka Yezu, na nima bilumbu tatu bonso kigangwa ya mpeve. Na nima, Yezu monanaka na balongoki na yandi kuluta 500. Na ntwala ya kukwenda na zulu, Yezu pesaka balongoki na yandi mukumba ya kusamuna nsangu ya mbote ya me tala yandi mpi Kimfumu na yandi na “bantu ya makanda yonso.” (Matayo 28:19) Inki mutindu bo lungisaka mbote-mbote mukumba yina?

​—Yo me katuka na Matayo, Marko, Luka, Yoane, 1 Bakorinto.