Ngangi na Beto ya Zola Ke Tudilaka Beto Dikebi

1. NGANGI NA BETO MUNTU KE BASISAKA NTANGU

Bantu zolaka ve kuzinga kukonda ntangu. Ntangu ke pesaka banti ngolo sambu yo basisa matiti, bintuntu, bambuma mpi bankeni. Yo ke salaka mpi nde banti kubenda masa na ntoto na nzila ya misisa mpi yo lutisa yo na matiti na nima yo basika na mupepe.

Kifwanisu ya ke monisa kilanga ya ti na lweka ya ngumba.

2. NGANGI NA BETO KE NOKISAKA MVULA

Mvula kele dikabu ya valere yina me katuka na Nzambi mpi yo ke salaka nde ntoto kubuta madia. Nzambi ke pesaka beto mvula mpi bansungi yina bambuma ke basikaka mingi, yandi ke pesaka beto madia yina ke fulusaka bantima na beto na kiese.

Ndeke na zulu ya lutangu, yo ke sosa kudia dimbuma yina ke zola kubwa.

3. NGANGI NA BETO KE PESAKA BETO MADIA MPI BILELE

Batata mingi ke kudiyangisaka sambu na kuzwa madia ya me fwana mpi bilele sambu na mabuta na bo. Biblia ke tuba nde: “Beno tala mbote-mbote bandeke ya zulu; yo ke kunaka ve nkeni, yo ke katulaka ve bambuma, mpi yo ke bumbaka ve bima na nzo. Kansi, Tata na beno yina kele na zulu ke pesaka yo madia. Keti beno kele ve mfunu mingi kuluta yo?”—Matayo 6:25, 26.

“Beno baka dilongi na bintuntu ya bilanga, mutindu yo ke yelaka . . . ; kansi mono ke tubila beno nde ata [ntotila] Salomo, na nkembo na yandi yonso, yandi lwataka ve bonso kintuntu mosi na kati ya bintuntu yai. Ebuna, kana yai mutindu Nzambi ke lwatisaka matiti ya bilanga . . . , keti yandi ta lwatisa beno ve mingi kuluta?”—Matayo 6:28-30.

Mutindu Nzambi ke pesaka beto madia mpi bilele, ntembe kele ve nde yandi ta sadisa beto mpi na kuzwa bima ya nkaka yina beto kele ti yo mfunu. Kana beto ke sala luzolo ya Nzambi, yandi ta sadisa beto na kuzwa madia mpi kisalu yina lenda sadisa beto na kusumba bima yina beto kele na yo mfunu.—Matayo 6:32, 33.

Ya kieleka, beto kele ti bikuma ya mbote ya kuzola Nzambi ntangu beto ke talaka ntangu, mvula, bandeke mpi bintuntu. Disolo ya ke landa ta tubila mutindu Ngangi na beto solulaka ti bantu.