Bitumba ya Ukraine Me Nata Diaka Nzala ya Ngolo na Ntoto ya Mvimba

Na Kiya 19 mai 2022, kimvuka yina bo ke bingaka Conseil de sécurité des Nations unies waka na munoko ya bamfumu 75 ya nene nde “nzala yina maladi ya coronavirus mpi climat ya me soba me nata na ntoto ya mvimba kele na kukuma diaka ngolo mingi kibeni sambu na bitumba yina ke salama na insi Ukraine. Mambu yai ke sala nde madia kuvanda ve na bisika mingi na ntoto.” Ntangu fioti na nima, zululanu mosi (The Economist) tubaka nde “ntama mingi ve, nsi-ntoto yai ya kele dezia ti bampasi mingi, ta kuma diaka ti bantu mingi yina ta konda mpenza madia sambu na bitumba.” Biblia tubaka na ntwala nde na bilumbu na beto madia ta kuma mpasi, kansi yo ke tubilaka mpi lusadisu yina beto kele ti yo mfunu sambu na kukanga ntima.

Biblia tubilaka na ntwala mpasi ya madia

• Yezu tubaka nde: “Insi mosi ta nwanisa insi ya nkaka mpi kimfumu mosi ta nwanisa kimfumu ya nkaka, mpi nzala ta vanda.”—Matayo 24:7.

• Mukanda ya Kusonga yina kele na Biblia ke tubilaka bantu iya ya kifwani ya ke tambwisa bampunda. Muntu mosi na kati ya bantu yango ke monisaka bitumba. Muntu yina ke kwisa na nima na yandi ke monisaka nzala, disongidila ntangu yina yo ta kuma mpasi na kuzwa madia mpi bantu ta matisa ngolo ntalu ya madia yango. Biblia ke tuba nde: “Mono . . . monaka mpunda mosi ya ndombe; muntu yina vandaka na zulu na yo vandaka ti kilo na maboko na yandi. Mono waka bonso ndinga mosi . . . ke tuba nde: ‘Kilo mosi ya ble sambu na denari mosi, mpi bakilo tatu ya orze sambu na denari mosi.’”—Kusonga 6:5, 6.

Mpasi ya madia yina Biblia tubilaka ke lungana bubu yai na nsungi yai yo ke binga “bilumbu ya nsuka.” (2 Timoteo 3:1) Sambu na kuzaba mambu mingi na yina me tala “bilumbu ya nsuka” mpi bantu iya ya ke tambusa bampunda yina mukanda ya Kusonga ke tubilaka, tala video Mambu ya Nsi-Ntoto Me Sobaka Banda na 1914 mpi tanga disolo “Bantu Iya ya Ke Tambusa Bampunda—Bo Kele Banani?”

Mutindu Biblia lenda sadisa nge

• Biblia kele ti bandongisila ya mfunu yina ke sadisaka beto na kukanga ntima na bampasi, yo vanda na mambu ya me tala mutindu bantu ke matisa ntalu ya bima ya kudia to nkutu nzala. Tala mwa bandongisila yina disolo “Mutindu ya Kuzinga ti Mbongo Fioti” ke tubila.

• Biblia ke pesa beto mpi kivuvu nde mambu ta kuma mbote. Yo ke tuba nde na ntangu mosi buna “mbuma ta vanda mingi kibeni na ntoto” mpi konso muntu ta vanda ti bima mingi ya kudia. (Nkunga 72:16) Sambu na kuzaba mambu mingi na yina me tala kivuvu yina Biblia ke pesa sambu na bilumbu ke kwisa mpi sambu na nki nge lenda ndima nde yo ta salama, tanga disolo “Kivuvu ya Kieleka Sambu na Bilumbu ya Ke Kwisa.”