Lynnong 5
Kaei Ka Jingthmu Jong U Blei Ia Ka Pyrthei?
Balei U Jehobah u la thaw ïa ka pyrthei? (1, 2)
Balei ka pyrthei kam long shuh ka paradais kum mynshuwa? (3)
Kan jia aiu ïa ki briew kiba sniew? (4)
Ha ka lawei, u Jisu un leh aiu na ka bynta kiba pang, kiba tymmen bad kiba la ïap? (5, 6)
Ban ïoh ïa ki jingkyrkhu jong ka lawei aiu phi donkam ban leh? (7)
1. U Jehobah u la thaw ïa kane ka pyrthei khnang ba ki briew kin ïoh im suk im saiñ ha ka. U kwah ba ha kane ka pyrthei yn sah da ki briew kiba bha, kiba dap da ka jingkmen. (Salm 115:16; Isaiah 45:18) Ka pyrthei kan ym wai, kan ïaineh junom.—Salm 104:5; Eklesiastis 1:4.
2. Shuwa ba U Blei un thaw ïa u briew u la jied ïa iwei i bynta ibarit jong ka pyrthei bad u la pynlong ïa ka, ka jaka kaba itynnad—ka paradais. U la khot ïa ka, ka kper Eden. Dei hangne ba u la buh ïa u briew bad ka briew banyngkong u Adam bad ka Im. Ka jingthmu jong U Blei ka long ba kin ïoh khun ïoh kti bad kin pyndap ïa ka pyrthei baroh kawei. Suki suki kin pynkylla ïa ka sha ka paradais.—Jenesis 1:28; 2:8, 15.
3. U Adam bad ka Im ki la leh pop da kaba pynkheiñ khnang ïa ka hukum jong U Blei. Te U Jehobah u la beh noh ïa ki na kata ka kper Eden. Ka paradais ka la duh noh. (Jenesis 3:1-6, 23) Hynrei U Jehobah um shym la klet noh ïa la ka jingthmu na ka bynta kane ka pyrthei. U kular ba un sa pynlong biang ïa ka, ka paradais, ha kaba ki briew kin im junom. Te, kumno un leh ïa kane?—Salm 37:29.
4. Shuwa ba kane ka pyrthei kan long ka paradais, ïa ki briew kiba sniew dei ban weng noh. (Salm 37:38) Kane kan sa jia ha Armagedon, kaba dei ka thma jong U Blei ban pynkut ïa ki jingsniew. Hadien kata yn set byndi ïa u Soitan 1,000 snem. Kane ka mut ba yn ym don shuh uwei ruh uba sniew u ban pynjot ïa ka pyrthei. Tang ki briew jong U Blei kin lait im.—Jingpynpaw 16:14, 16; 20:1-3.
5. Hadien kata, u Jisu Khrist un synshar kum U Syiem 1,000 snem ïa kane ka pyrthei. (Jingpynpaw 20:6) Suki suki un sa weng noh ïa ka pop na ki jingmut jingpyrkhat bad na ka met jong ngi. Ngin sa long ki briew kiba janai kum u Adam bad ka Im shuwa ba kin leh pop. Te hangta ka jingpang, ka jinglong tymmen, bad ka jingïap kin ym don shuh. Ki briew kiba pang kin koit noh bad ki tymmen kin sa samla biang.—Job 33:25; Isaiah 33:24; Jingpynpaw 21:3, 4.
6. Ha ka jingsynshar ba Shihajar Snem jong u Jisu, ki briew kiba ïaineh ha ka jingngeit kin sa ïa treilang ban pynkylla ïa kane ka pyrthei baroh kawei sha ka paradais. (Loukas 23:43) Shuh shuh yn sa pynmihpat ïa ki milian ngut ki briew kiba la ïap sha ka jingim ha kane ka pyrthei. (Kam 24:15) Lada ki leh ïa kaei kaba U Blei u kwah, kin ïaisah junom ha kane ka pyrthei. Lada kim leh kumta kin sa shah pynjot noh junom.—Ioannis 5:28, 29; Jingpynpaw 20:11-15.
7. Ha kane ka rukom yn pyndep ïa ka jingthmu banyngkong jong U Blei ïa ka pyrthei. Phi kwah mo ban ïoh bynta lem ha kine ki jingkyrkhu ki ban sa wan? Lada kumta, phi donkam ban ïai pule shaphang U Jehobah bad ban kohnguh ïa ki jingkwah jong u. Ka jingleit jingïaseng ha ka Kingdom Hall Ki Nongsakhi U Jehobah, kan ïarap ïa phi ban leh kumta.—Isaiah 11:9; Hebru 10:24, 25.
[Ka dur ha sla 10]
Ka paradais ba la duh noh
[Ki dur ha sla 11]
Hadien ka Armagedon, yn sa pynlong ïa ka pyrthei ka Paradais