Lynnong 7

Kaba Pynjan Sha U Blei Da Ki Jingduwai

Balei ka long kaba donkam ban duwai ha U Blei barabor? (1)

Hano ngi dei ban duwai, bad kumno? (2, 3)

Kiei ki jingpan ba shongnia ha ki jingduwai? (4)

Ha ka por aiu ngi dei ban duwai? (5, 6)

Hato U Blei u shahskhor ïa ki jingduwai baroh? (7)

1. Ka jingduwai ka long ka jingïakren basngewrit bad U Blei. Phi dei ban duwai ha U Blei barabor. Kumta kein, phin sngewjan sha u kum u paralok baieit. U Jehobah u long uba khraw bad badonbor tam, hynrei u sngap ïa ki jingduwai jong ngi! Hato phi ju duwai ha U Blei barabor?—Salm 65:2; 1 Thesaloni 5:17.

2. Ka jingduwai ka long shibynta na ka jingmane jong ngi. Namarkata, ngi dei ban duwai tang ha U Blei, Jehobah. Haba u Jisu u don ha kane ka pyrthei u ju duwai tang ha u kpa jong u, ym ha kiwei pat. Ngi ruh ngi dei ban leh kumjuh. (Mathaios 4:10; 6:9) Hynrei, ïa ki jingduwai baroh ngi dei ban pan ha ka kyrteng u Jisu. Kane ka pyni ba ngi burom ïa ka kyrdan jong u bad ba ngi ngeit ha ka jingsiewspah jong u.—Ioannis 14:6; 1 Ioannis 2:1, 2.

3. Haba ngi duwai ngi dei ban ïa kren bad U Blei naduh ka dohnud. Ngim dei ban duwai da kaba spel lyndet lane pule na ka kot jingduwai. Ngi lah ban duwai ha kano kano ka rukom ba i donburom, ha kano kano ka por bad ha kano kano ka jaka. U Blei u lah ban ïohsngew wat ïa ki jingduwai ba jar jar hapoh ka dohnud jong ngi. (1 Samuel 1:12, 13) Kan kham bha lada ngi duwai ha ki jaka ba kynjah ha kaba ym don ba pynwit ïa ngi.—Markos 1:35.

4. Kiei ki jingpan ba shongnia ba phi lah ban duwai? Ka lah ban long kaei kaei kaba ktah ïa ka jingïadei paralok jong phi bad u. (Philipi 4:6, 7) Ka jingduwai U Trai ka pyni ka nuksa ba ngi dei ban duwai shaphang ka kyrteng U Jehobah bad ki jingthmu jong u. Ngi lah ban pan ruh ba un pyndap ïa ki jingdonkam jong ngi ba man la ka sngi, ban map ïa ki pop bad ban ïarap ïa ngi ban ïaleh pyrshah ïa ki jingpynshoi. (Mathaios 6:9-13) Ngim dei ban duwai tang na ka bynta ïalade. Ka jingduwai jong ngi ka dei ban ïahap bad ka mon jong U Blei.—1 Ioannis 5:14.

5. Phi lah ban duwai ha kano kano ka por ba phi kwah ban ainguh lane ïaroh ïa U Blei. (1 Khronikl 29:10-13) Phi dei ban duwai haba phi shem jingeh bad haba ka jingngeit jong phi ka shah tynjuh. (Salm 55:22; 120:1) Ka long kaba dei ba ngin duwai shuwa ban bam. (Mathaios 14:19) U Jehobah U Khot sngewbha ïa ngi ban duwai “man la ka por.”—Ephesos 6:18, NW.

6. Ngi dei ban duwai khamtam haba ngi la leh ki pop kiba pynsngewsih ïa U Jehobah kum ka jingïashongkha khlem da ïathoh katkum ka ain, ka jingbuaid bad ka jingdih duma. Ha kum kita ki por ngi dei ban kyrpad ïa ka jingisynei bad ka jingmap jong U Jehobah. Lada ngi phla ïa la ki pop bad ïaleh katba lah ban ym leh shuh ïa kajuh shi kajuh, U Blei u “kloi ban map ïa ngi.”—Salm 86:5; Proberb 28:13.

7. U Jehobah u shahskhor tang ïa ki jingduwai jong kiba hok. Khnang ba U Blei un sngap ïa ki jingduwai jong phi, phi dei ban ïaleh ban im katkum ki hukum jong u. (Proberb 15:29; 28:9) Long kiba sngewrit haba duwai. (Loukas 18:9-14) Phi dei ban im bad leh katkum ka jingduwai jong phi. Da kumta, phin pynshisha ba phi don ka jingngeit bad phi da mut shisha ban leh kumba phi pan. Tang da kumta, U Jehobah un jubab ïa ki jingduwai jong phi.—Hebru 11:6.