Lynnong 16

Aiu Phi Dei Ban Leh Ban Mane Ia U Blei

Aiu Phi dei ban leh ban long u paralok jong U Blei? (1, 2)

Kumno phi lah ban aiti ïalade sha U Blei? (1)

Lano phi dei ban shah pynbaptis? (2)

Da kumno phin ïoh ïa ka bor ban ïaineh skhem ha U Blei (3)

1. Ban long u paralok jong U Blei, phi dei ban tip bha shaphang ka jingshisha jong ka Baibl (1 Timothi 2:3, 4), ngeit ïa kiei kiei kiba phi la tip (Hebru 11:6), kylla ka bamut na ki pop jong phi (Kam 17:30, 31), bad pynkylla noh ïa la ka rukom im. (Kam 3:19) Te, ka jingieit jong phi ïa U Blei kan pynlong ïa phi ban aiti ïalade ha u. Kane ka mut ban ïathuh ha u ha ka jingduwai ba jar jar marwei, ba phi aiti ïalade ha u ban leh ïa ka mon jong u.—Mathaios 16:24; 22:37.

2. Hadien ba phi la aiti ïalade sha U Blei, phi dei ban shah pynbaptis noh da kaba pynngam hapoh um. (Mathaios 28:19, 20) Ka jingpynbaptis ka pynpaw ha kiwei pat ba phi la aiti ïalade sha U Jehobah. Kumta ka jingpynbaptis kam dei na ka bynta ki khyllung ki bym pat tip eiei, hynrei tang na ka bynta kito kiba la biang ka ’rta ban shim ïa ka rai ban shakri ïa U Blei. Haba pynbaptis ïa u briew, dei ban pynngam ïa ka met baroh kawei hapoh um tang kumba shikhyllipmat.a—Markos 1:9, 10; Kam 8:36.

3. Hadien ba phi la aiti ïalade, U Jehobah un khmih lynti ïa phi ba phin im katkum ka jingkular jong phi. (Salm 50:14; Eklesiastis 5:4, 5) U Ksuid un pyrshang ban khanglad ïa phi ha kaba shakri ïa U Jehobah. (1 Petros 5:8) Hynrei pynjan ïalade sha U Blei da ki jingduwai. (Philipi 4:6, 7) Pule ïa ka ktien jong U man la ka sngi. (Salm 1:1-3) Ia snohlang bad ka balang. (Hebru 13:17) Da kaba leh ïa kine baroh, phin ïoh ïa ka bor ban ïaineh skhem ha U Blei. Phin sa lah ban leh ïa kaei kaba U Blei u kwah na phi shijunom!

[Jingthoh ha kaba kut]