Kumno Ngi Lah Ban Pynkhreh Bha na ka Bynta ki Jingïalang?

Lada phi ïa pule Baibl bad ki Nongsakhi U Jehobah, lehse phi ju pule lypa shuwa ban sdang ka jingïasyllok. Ban kham ïoh jingmyntoi, ka long kaba donkam ban leh kumjuh shuwa ban wan sha ki jingïalang. Ka kham biang eh lada ngi buh ïa ka por ba thikna ban pule ïa ka Baibl.

Kut jingmut lano bad hangno phin pule. Ha kano ka por phi lah ban pynleit jingmut bha? Hato, ha ka por mynstep ne ynda la miet haba la thiah ki khun? Wat la phim lah ban pule kham slem, peit hi katno phi lah ban pule, bad wat ailad ïa kaei kaei ruh ban pynthut ïa ka jingpule jong phi. Jied ïa ka jaka ba kynjah, bad pynlip ruh ïa ka radio, ka telebishon bad ka mobile. Khnang ba phin lah ban pynleit jingmut, ka jingduwai shuwa ban pule kan ïarap ïa phi ban klet ïa ki jingkhuslai.​—Philipi 4:6, 7.

Buh dak ïa ki jingthoh bad pynkhreh ban ïa shim bynta. Nyngkong eh, pyrshang ban ïoh ïa ka jingmut ba pura jong ka phang. Pyrkhat ïa ka kyrteng jong ka lynnong, peit ruh kumno iwei pa iwei i phangrit i ïahap bad ka phang pdeng, peit bniah ïa ki dur bad ïa ki jingkylli kiba kren shaphang ki mat bakongsan. Nangta sa pule man la ki paragraph bad sa wad biang ïa ka jubab jong ka jingkylli. Pule ïa ki dkhot ba la buh bad pyrkhat balei la buh ïa ki hangto. (Kam 17:11) Ynda phi la lah ban jubab, buh dak ïa ki kyntien ba donkam, kin ïarap ïa phi ban kynmaw biang ïa ka jubab. Nangta, hapoh ka jingïalang, lada phi kwah, phi lah ban rah ïa la ka kti ban ai jubab khyndiat ïa kaei kaba phi la pynkhreh.

Da kaba pynkhreh bha man la ka taïew ïa ki phang bapher bapher ha ki jingïalang, phin sa ïoh ban kynshew shibun ki jingtip jong ka Baibl.​—Mathaios 13:51, 52.

• Hato phi lah ban buh ïa ka por ba thikna ban pynkhreh na ka bynta ki jingïalang?

• Kumno phi lah ban pynkhreh ïalade ban ai jubab ha ka jingïalang?