Kumno Ki Nongsharai Jylli Ki Ïarap ïa Ngi?

Ka Jutang bathymmmai ka ju kren bha shaphang u Barnabas bad u apostol Paul. Kine ki briew ki shakri kum ki nongsharai ba wan khmih, kiba leit jngoh ïa ki balang ha ka spah snem banyngkong. Balei? Ki phikir bha na ka bynta ka jingbit jingbiang jong ki para bangeit. U Paul u la ong ba u kwah ban “ïaleit peit biang ïa ki para bangeit” ban tip kumno ki long. U kloi ban leit da ki spah mer khnang ban ïakynduh bad ban pynshlur ïa ki. (Kam 15:36, Baibyl Khasi Katholik) Ha ka por jong ngi ruh ki nongsharai ba wan khmih ki don kajuh ka jingthrang.

Ki wan ban pynshlur ïa ngi. Ki nongsharai jylli ki leit ïakynduh kumba 20 tylli eiei ki balang bad ki pynlut por shitaïew bad kawei kawei ka balang, ar sien shisnem. Ngi lah ban ïoh shibun ki jingmyntoi na ki bad na ki lok jong ki ruh lada ki la shongkurim. Ki pyrshang ban tip ïa baroh, bad rangbah bad khynnah, bad ki thrang ban leit lang bad ngi sha ka jingïalap bad sha ka jinghikai Baibl. Kine ki nongsharai ki leit lang bad ki rangbah balang ban sharai; bad ban pynshlur ïa ngi, ki ai jingkren ruh ha ki jingïalang bad ha ki jingïaseng asembli.​—Kam 15:35.

Ki pyni ba ki phikir ïa baroh. Ki nongsharai jylli ki kit khia bha ïa ka jinglong mynsiem jong ki balang. Ki ïakynduh ïa ki rangbah balang bad ïa ki nongïarap balang ban pyrkhat biang ïa ka jingïaid shaphrang bad ban ai buit ïa ki kumno ban leh ïa la ka kamram. Ki ïarap ïa ki pioneer ba kin lah ban leh bha ha ka kam ïalap jong ki, bad ki sngewkmen ban ithuh ïa kiba dang shu wan thymmai bad ban tip shaphang jong ki. Kine ki para bangeit jong ngi ki ïatreilang da ka mon sngewbha kum ki “para nongtrei na ka bynta jong [ngi].” (2 Korinth 8:23, Baibyl Khasi Katholik) Ngi dei ban pyrthuhbud ïa ka jingngeit bad jingaiti jong ki ha U Blei.​—Hebru 13:7.

• Balei ki nongsharai jylli ki wan ïakynduh ïa ki balang?

• Kumno phin ïoh jingmyntoi na ka jingwan jong ki?