LYNNONG 11
Kumno Phi Lah Ban Ïoh Jingmyntoi Bha na ka Jingpule Baibl Jong Phi
Hato phi la ju kwah ban sdang ïa ka kam baheh, hynrei phi sngew pat ba ka long kaba eh bha? Lehse ba kan kham suk, phi sdang shuwa khyndiat khyndiat. Ka long kumjuh ruh haba phi pule ïa ka Baibl. Hynrei phi lah ban pyrkhat, ‘Kumno ngan sdang ban pule?’ Ha kane ka lynnong, ngin ïa peit katto katne kiei kiei kiba lah ban ïarap ïa phi ban sngewtynnad ban pule bad ban sngewthuh ïa ka Baibl.
1. Balei ngi dei ban pule ïa ka Baibl man la ka sngi?
Lada ngi pule ïa ka Baibl ne ‘ïa ka hukum U Jehobah,’ man la ka sngi, ngin sa long kiba kmen bad kiba man bha. (Pule Salm 1:1-3.) Phi lah ban sdang da kaba pule tang 5 ne 10 minit ha ka shi sngi. Da kaba leh kumta phin sa sngewtynnad shuh shuh ban pule ïa ka Baibl.
2. Kumno ngi lah ban ïoh jingmyntoi na ka jingpule ïa ka Baibl?
Ban ïoh jingmyntoi na ka jingpule ïa ka Baibl, ngi dei ban pule bad “ïai pyrkhat” ne puson ïa kaei kaba ngi pule. (Joshua 1:8) Kumno ngi lah ban puson? Da kaba kylli ïalade kum kine ki jingkylli: ‘Kane ka hikai aïu ïa nga shaphang U Blei Jehobah? Kumno nga lah ban pyndonkam ïa kane ka jinghikai ha ka jingim jong nga? Kumno nga lah ban pyndonkam ïa kine ki dkhot Baibl ban ïarap ïa kiwei?’
3. Lano phi lah ban pyllait por ban pule ïa ka Baibl?
Hato phi sngew shem jingeh ban pyllait por ban pule Baibl? Bun na ngi ruh ngi sngew kumjuh. Pyrshang ban “siewspah ïa ka por” ne pyndonkam bha ïa ka. (Ephesos 5:16) Don kiba pule mynstep, kiba pule mynsngi ne janmiet, bad don ruh kiba pule shuwa ban thiah. Phi pat, lano phin pule?
WAD SHUH SHUH
Peit kumno phi lah ban kham sngewtynnad ban pule ïa ka Baibl. Peit ruh kumno ban pynkhreh bha ïa la ka jingïasyllok Baibl khnang ba phin ïoh jingmyntoi bha.
Kumba ngi lah ban bang ïa ki jingbam bapher bapher, ngi lah ruh ban sngewtynnad ban pule ïa ka Baibl
4. Kaei kaba phi lah ban leh khnang ban sngewtynnad ban pule Baibl
Haba phi pyrshang ban bam ïa ki jingbam kiba tei, kiba phim pat ju bam, lehse phin ym bang. Hynrei suki pa suki phi sdang ban bang. Ka long kumjuh ruh haba phi pule ïa ka Baibl. Pule 1 Petros 2:2, bad nangta sa ïa peit lang ïa kane ka jingkylli harum:
Lada phi pule ïa ka Baibl man la ka sngi, hato tharai phin sngewtynnad ban pule shuh shuh ïa ka?
Peit ïa ka VIDEO ban tip kumno kiwei ki la sdang ban sngewtynnad ban pule ïa ka Baibl. Bad nangta sa peit lang ïa kine ki jingkylli harum:
Ha ka video, kiei ki jingeh kiba ki khynnah samla ki la jop?
Kaei kaba la ïarap ïa ki ban pule tista ïa ka Baibl?
Kumno ki la leh ban kham pynsngewtynnad ïa ka jingpule Baibl jong ki?
Ki jingïarap ban sdang pule Baibl:
Pule na ka jingpynkylla ktien kaba suk ban sngewthuh bad kaba lah ban shaniah. Pyrshang ban pule da ka jingpynkyllaktien New World Translation kaba don ha ka ktien phareng.
Pule shuwa na kano kano ka bynta kaba phi tharai kan kham sngewtynnad. Ban ïoh jingmut peit ïa ka jingthoh ““Sdang ban Pule ïa ka Baibl.”
Buh jingthoh ïa kaei kaba phi la pule. Pyndonkam ïa ka chart “Buh Dak ïa ka Jingpule Baibl jong Phi” kaba don ha kane ka kot.
Pyndonkam ïa ka app JW Library® Ha kane ka app phi lah ban pule ne sngap ïa ka Baibl ha ka jait ktien kaba phi sngewthuh. Phi lah ban leh kumta la phi don haei haei ruh da kaba pyndonkam ïa ka phone.
Pyndonkam ïa ki appendix kiba don ha ka New World Translation. Ki don ki map, ki chart, bad ka glossary kiba lah ban kham pynsngewtynnad ïa ka jingpule Baibl jong phi.
5. Pynkhreh na ka bynta ka jingïasyllok Baibl jong phi
Pule Salm 119:34, bad nangta sa ïa peit lang ïa kane ka jingkylli harum:
Balei ka bha ban duwai shuwa ban pule Baibl ne shuwa ban pynkhreh na ka bynta ka jingïasyllok Baibl jong phi?
Kumno phi lah ban ïoh jingmyntoi kham bun na man la ka jingïasyllok Baibl jong phi? Haba phi pynkhreh, pyrshang ïa kine harum:
Pule ïa ka bynta banyngkong jong ka lynnong.
Pule ïa ki dkhot Baibl, bad pyrshang ban sngewthuh kumno ki ïahap ne ki don jingïadei bad kaei kaba phi pule.
Buh dak ne ruid laiñ ïa ki kyntien ba kongsan kiba jubab ïa ka jingkylli; kane kan ïarap ïa phi haba phi ïasyllok Baibl bad i nonghikai jong phi.
Hato phi tip?
Ki Nongsakhi U Jehobah ki la pyndonkam shibun ki jingpynkyllaktien bapher bapher jong ka Baibl. Hynrei ngi kham sngewtynnad ban pyndonkam ïa ka jingpynkyllaktien jong ka New World Translation of the Holy Scriptures namar ka long kaba thikna, kaba suk ban sngewthuh, bad ba ka pyndonkam ïa ka kyrteng jong U Blei.—Peit ïa ka jingthoh ha ka website “Hato ki Nongsakhi U Jehobah ki Don la ka Jong ka Baibl?” (Phareng)
DON KIBA ONG: “Ngam sngew don por ne sngew don bor ban ïasyllok ïa ka Baibl namar ba nga bunkam palat.”
Phi pat phi sngew kumno?
KI MAT BAKONGSAN
Ban kham ïoh jingmyntoi bha na ka jingpule Baibl, buh da ka por ban pule ïa ka, duwai shuwa ban pule khnang ban sngewthuh ïa kaei kaba phi pule, bad pynkhreh na ka bynta ka jingïasyllok Baibl jong phi.
Peit Biang
Kumno phi lah ban ïoh jingmyntoi bha na ka Baibl?
Lano phi lah ban pyllait por ban pule ïa ka Baibl?
Balei kan kham bha lada phi pynkhreh lypa na ka bynta ka jingïasyllok Baibl jong phi?
PULE SHUH SHUH
Peit biang katto katne ki rukom kiba lah ban ïarap ïa phi ban kham ïoh jingmyntoi na ka jingpule Baibl jong phi.
“Kumno ban Ïoh Jingmyntoi Shuh Shuh na ka Jingpule ïa ka Baibl” (Ka Kutphira No. 1 2017, Phareng)
Peit lai tylli ki rukom ban pule ïa ka Baibl.
“Kumno ka Baibl ka Lah ban Ïarap ïa Nga?—Bynta 1: Ïai Wad Bniah na la ka Baibl” (Na jw.org, Phareng)
Peit kumno ban sngewtynnad ban pule ïa ka Baibl.
Pan jingïarap na kito kiba la pule ïa ka Baibl da ki snem.