LYNNONG 12
Kaei kaban Ïarap ïa Phi ban Bteng ïa ka Jingïasyllok Baibl?
Phi lah ban sngewtynnad ban ïoh jinghikai na ka Baibl, hynrei lehse phi shem jingeh ban bteng ïa kane ka jingïasyllok Baibl. Ki lah ban don ki por ha kaba phi pyrkhat la phin lah ne em ban ïai bteng ïa kane ka jingïasyllok Baibl. Balei ka long kaba myntoi ban bteng ïa ka jingïasyllok Baibl? Bad kaei kaban ïarap ïa phi ban bteng wat lada phi shem jingeh?
1. Kaei ka jingmyntoi kaba phin ïoh lada phi ïai bteng ban ïasyllok Baibl?
“Ka ktien U Blei ka long kaba im bad kaba don bor.” (Hebru 4:12) Ka Baibl ka long kaba kordor namarba ka ïathuh shaphang ki jingthmu bad ki jingsngew jong U Blei ïa phi. Ka ïarap ïa phi ym tang ba phin ïoh ïa ka jingtip, hynrei kane ka jingïasyllok Baibl ka ai jingmut ruh kumno ba phin shim ïa ki rai kiba dei bad kumno ban ïaleh ïa ki jingeh. Bad dei tang ka Baibl kaba lah ban ïarap ïa phi ban don ka jingïadei kaba jan bha bad U Jehobah. Ka Baibl ka long kaba don bor, bad ka lah ban pynbha ïa ka jingim jong phi. Phi lah ban sngewthuh ïa kane tang lada phi ïai pule ïa ka Baibl.
2. Balei ka long kaba kongsan ban sngewthuh bad ñiewkor ïa ki jingshisha jong ka Baibl?
Ki jingshisha kiba don ha ka Baibl ki long kum ki mawkordor. Na kata ka daw ka Baibl ka pynshlur ïa ngi ban “thied ïa ka jingshisha bad wat die ïa ka.” (Proberb 23:23) Lada ngi sngewthuh ïa ka jingkordor jong ka jingshisha, ngi dei ban minot ban ïai syllok wat la ngi mad ki jingeh.—Pule Proberb 2:4, 5
3. Kumno U Jehobah u lah ban ïarap ïa phi ban ïai bteng ïa ka jingïasyllok?
Kum u Nongthaw uba don bor tam bad u Paralok jong phi, U Jehobah u kwah ban ïarap ïa phi ban tip shaphang jong u. Ka Baibl ka ong, “dei U Blei uba trei hapoh jong phi ïa kaban mon ruh bad ïa kaban trei.” (Pule Philipi 2:13) Kane ka mut ba u lah ban ai ïa phi ïa ka mon bad ïa ka bor ban ïai syllok. Te, lada phi donkam shuh shuh ïa ka jingpynshlur ban bteng bad ban leh ïa kaei kaba phi la tip, ne ban ïaleh ïa ki jingeh, u lah ban ïarap ïa phi. Duwai ha U Jehobah barobor bad pan jingïarap na u khnang ba phin lah ban ïai bteng ïa ka jingïasyllok Baibl.—1 Thessaloni 5:17.
WAD SHUH SHUH
Peit kumno phi lah ban ïai bteng ïa ka jingïasyllok Baibl wat la phi bunkam ne haba kiwei kim sngewtynnad ba phi ïasyllok Baibl. Nangta peit ruh kumno U Jehobah u lah ban ïarap ïa phi ban ïai bteng ïa ka jingïasyllok Baibl.
4. Ka jingïasyllok Baibl jong phi ka dei ban long kaba kongsan bha ïa phi.
Teng teng ngi lah ban bunkam palat haduh ba ngim sngew don por shuh ban ïasyllok Baibl. Kaei kaba lah ban ïarap ïa phi? Pule Ephesos 5:16, bad nangta sa ïa peit lang ïa kine ki jingkylli harum:
Kum na ka bynta kiei tharai ngi dei ban “siewspah ïa ka por”?
Kumno phi lah ban pynlong ïa ka jingïasyllok Baibl jong phi kaba kongsan bha?
Lada phi thep shuwa da u shyiap ha ka borti, bad hadien pat da ki maw, ki maw kin ym ngiam
Lada phi thep shuwa da ki maw, bad hadien pat da ki shyiap, jan baroh ki shyiap kin ngiam. Kumjuh ruh, lada phi leh shuwa ïa kiei kiei kiba kham kongsan ha ka jingim jong phi, phin lah ban pyndep ïa ki bad phin dang ïoh por ruh ban leh ïa kiwei de ki kam
Ka jingpule bniah ïa ka Baibl ka pyndap ïa ka jingdonkam ba kynja mynsiem jong ngi—kaba mut, ka jingdonkam ban tip ïa U Blei bad ban mane ïa u. Pule Mathaïos 5:3, bad nangta sa ïa peit lang ïa kane ka jingkylli harum:
Kumno ngin myntoi haba ngi pynlong ïa ka jingïasyllok Baibl jong ngi kaba kongsan bha?
5. Ïai bteng ban pule wat la ki paralok ne kiba ha ïing kim sngewtynnad
Don ki por ha kaba kiwei ki lah ban pynduh mynsiem ïa phi na kaban ïasyllok ïa ka Baibl. Peit ïa ka nuksa jong i Francisco. Peit ïa ka VIDEO bad nangta sa ïa peit lang ïa kine ki jingkylli harum:
Ha ka video, kumno ki paralok bad ki bahaïing jong i Francisco ki leh haba i la ïathuh ïa ki shaphang kaei kaba i la pule?
Kiei ki jingkyrkhu kiba i la ïoh namarba i la ïaineh?
Pule 2 Timothi 2:24, 25 bad nangta sa ïa peit lang ïa kine ki jingkylli harum:
Kumno ki paralok bad ki bahaïing jong phi ki sngew shaphang kaei kaba phi pule?
Katkum kine ki dkhot, kumno phin leh lada don kibym sngewtynnad ba phi ïasyllok Baibl? Balei?
6. U Jehobah un ïarap ïa phi
Katba ngi nang jan sha U Jehobah katta ngin nang kwah ban pynsngewbha ïa u. Hynrei barobor kam long kaba suk ban pynkylla ïa la ka jingim. Lada phi sngew kumta wat ju duh jingkyrmen. U Jehobah un ïarap ïa phi. Peit ïa ka VIDEO bad nangta sa ïa peit lang ïa kine ki jingkylli harum:
Ha ka video, i Jim i la leh aïu ban pynsngewbha ïa U Jehobah?
Kaei kaba phi itynnad shaphang ka jingkylla jong i?
Pule Hebru 11:6, bad nangta sa ïa peit lang ïa kine ki jingkylli harum:
U Jehobah un leh aïu na ka bynta kito “kiba wad ïa u”—kaba mut, kito kiba pyrshang shisha ban tip shaphang jong u bad ban pynsngewbha ïa u.
Ha kaba ïadei bad kane ka dkhot, hato U Jehobah u kmen haba u ïohi ba phi trei shitom ban ïoh jinghikai na ka Baibl? Balei phi sngew kumta?
DON KIBA LAH BAN KYLLI: “Balei phi ïa pule ne ïasyllok Baibl bad kiwei?”
Kumno phin jubab?
KI MAT BAKONGSAN
Haba phi ïasyllok ïa ka Baibl phi lah ban kynduh ki jingeh. Hynrei ka jingïasyllok ïa ka Baibl ka lah ban ïarap ïa phi ban ïoh ïa ka jingim kaba kmen shi junom.
Peit Biang
Balei ki jinghikai bashisha jong ka Baibl ki long kiba kordor ïa phi?
Ha kano ka rukom phi lah ban “siewspah ïa ka por”?
Balei phi dei ban pan jingïarap na U Jehobah ban ïai bteng ïa ka jingïasyllok Baibl?
PULE SHUH SHUH
Peit ïa ki saw tylli ki rukom kiba la ïarap ïa bun ngut ki briew ban pyndonkam bha ïa la ka por.
“Kumno ban Pyndonkam Bha ïa la ka Por” (To Sharai!, Rymphang 2014, Phareng)
Peit kumno U Jehobah u la ïarap ïa iwei i kynthei namar u kurim jong i um sngewtynnad ba in pule ïa ka Baibl.
U Jehobah u Ai Bor ïa Ngi ban Bah ïa la ki Jingkit (Phareng) (5:05)
Peit kumno uwei u briew u la myntoi namar ka jingïaishah jong ka kurim jong u.
Teng teng ki Nongsakhi U Jehobah ki shah kynnoh ba ki pynpait pynpra ïa ka ïing ka sem jong kiwei. Hynrei hato kata ka dei shisha?
“Ki Nongsakhi U Jehobah ki Tei ne ki Pynpra ïa ka Jingïadei ha Ïing ha Sem?” (Na jw.org, Phareng)