LYNNONG 30
Kiba Ieid ba Thoiñ Jong Phi ki Lah ban Im Biang!
Ka jingïap ka wanrah shibun ki jingsngewsih. Na kata ka daw ka Baibl ka ong ba ka jingïap ka long ka nongshun jong ngi. (1 Korinth 15:26) Ha ka lynnong ba 27, phi la pule ba U Jehobah un sa weng noh ïa kata ka nongshun. Hynrei kaei kaban jia ïa kito ki briew kiba la ïap? Ha kane ka lynnong, phin sa ïa pule shuh shuh shaphang kawei pat ka jingkular jong U Jehobah ba un sa pynmihpat ïa ki phew lak ngut ki briew khnang ba kin lah ban ïoh ïa ka jingim kaba kmen shi junom. Un sa pynmihpat ïa ki! Hato kata ka lah ban jia shisha? Hato yn pynmihpat ïa ki ha bneng ne ha pyrthei?
1. Kaei kaba U Jehobah u kwah ban leh na ka bynta kiba la ïap?
U Jehobah u thrang ban pynim biang ïa kito kiba la ïap. Uwei u shakri bahok jong U Blei, u Job, u don ka jingsngew skhem ba U Blei un ym klet ïa u hadien ba u ïap. U la ong ïa U Blei: “Me men da khot, bad nga ruh ngan phai ktien ïa me [na ka jingtep].”—Pule Job 14:13-15.
2. Kumno ngi tip ba kiba ïap kin sa mihpat?
Mynba u Jisu u don ha pyrthei, U Blei u la ai ïa u ka bor ban pynmihpat ïa ki briew. U Jisu u la pynim biang ïa kawei ka khynnah kaba 12 snem ka rta bad ïa u khun jong kawei ka ʼriew kynthei. (Markos 5:41, 42; Loukas 7:12-15) Hadien, u paralok jong u Jisu ruh, u Lasaros u la ïap. Watla u la don ha jingtep kumba saw sngi, u Jisu u la pynim biang ïa u. U Jisu u la duwai sha U Blei, bad u la pyrta jam ha khmat ka jingtep: “Ko Lasaros, to mih noh!” Bad “uta uba la ïap u la mih noh” bad u la im biang! (Ïoannis 11:43, 44) Ka ïing ka sem bad ki paralok jong u Lasaros ki la ïa kmen bha.
3. Kaei ka jingkyrmen ïa kiba ieid ba thoiñ jong phi kiba la ïap?
Ka Baibl ka kular: “Kan sa long ka jingmihpat ïa kiba ïap.” (Kam 24:15) Kito kiba u Jisu u la pynmihpat ha ka por mynshuwa ki khlem leit sha bneng. (Ïoannis 3:13) Ki la kmen ban im biang ha kane ka pyrthei. Ha kajuh ka rukom, shen u Jisu un sa pynmihpat ïa ki phew lak ngut ki briew ban im ka jingim kaba kmen shi junom ha ka pyrthei paradise. U la ong ba un sa pynim biang ïa baroh kiba don ha ka jingkynmaw U Blei, watla ym don ba kynmaw shuh ïa ki.—Ïoannis 5:28, 29.
WAD SHUH SHUH
Peit bniah ïa ka jingpynshisha na ka Baibl ba ïa kiba ïap lah ban pynmihpat bad yn sa pynmihpat ïa ki. Peit kumno ka jingmihpat ka lah ban ai jingtngen bad jingkyrmen ïa phi.
4. U Jisu u la pyni ba u lah ban pynmihpat ïa kiba ïap
Pule shuh shuh kumno u Jisu u la leh na ka bynta u paralok jong u, u Lasaros. Pule Ïoannis 11:14, 38-44, bad nangta sa ïa peit lang ïa kine ki jingkylli harum:
Kumno ngi tip ba u Lasaros u la ïap shisha?—Peit ka dkhot 39.
Lada u Lasaros u la don ha bneng, hato u Jisu un dang khot biang ïa u ban im ha pyrthei?
5. Yn pynmihpat ïa kiba bun!
Pule Salm 37:29, bad nangta sa ïa peit lang ïa kane ka jingkylli harum:
Ki spah lak ngut kiban mihpat kin im haei?
U Jisu un sa pynmihpat ym tang ïa kito kiba mane ïa U Jehobah. Pule Kam 24:15, bad nangta sa ïa peit lang ïa kane ka jingkylli harum:
Ïano phi kwah ban ïa kynduh biang ynda ki la mihpat?
Pyrkhat ïa kane: Kumba u kpa u lah ban kyrsiew thiah ïa la u khun, u Jisu ruh u lah ban pynmihpat ïa ki briew da kaba suk
6. Ka jingpynmihpat ka lah ban pyntngen bad ai jingkyrmen ïa phi
Ka jingjia kaba la thoh ha ka Baibl shaphang ka khun u Jairos ka la pyntngen bad ai mynsiem ïa kito kiba sngewsih. Pule shaphang kata ka khana kaba shisha ha Loukas 8:40-42, 49-56.
Shuwa ba u Jisu un pynmihpat ïa ka khun u Jairos, u Jisu u la ong ha u kpa jong ka: “Wat sheptieng, hynrei shu ngeit.” (Peit ka dkhot 50.) Kumno ka jingkyrmen jong ka jingmihpat ka lah ban ïarap ïa phi . . .
haba khlad noh kiba ieid ba thoiñ jong phi?
haba ka jingim jong phi ka don ha ka jingma?
Peit ïa ka VIDEO, bad nangta sa ïa peit lang ïa kane ka jingkylli harum:
Kumno ka jingkyrmen jong ka jingmihpat ka la pyntngen bad ai mynsiem ïa ki kmie ki kpa i Phelicity?
DON KIBA ONG: “Ka jingmihpat kan long ha bneng.”
Phi tharai kumno?
Ka dkhot Baibl aïu phi lah ban pyni ba haei ka jingmihpat kan long?
KI MAT BAKONGSAN
Ka Baibl ka kular ba yn sa pynmihpat ïa ki spah klur ngut kiba la ïap. U Jehobah u kwah ba kin im biang, bad u la ai ka bor ha u Jisu ban pynmihpat ïa ki.
Peit Biang
Kumno U Jehobah bad u Jisu ki sngew shaphang ban pynim biang ïa kiba la ïap?
Haei kiba mihpat kin im—ha bneng ne ha pyrthei? Balei phi ong kumta?
Kaei kaba pynlong ïa phi ban ngeit ba kiba ieid ba thoiñ jong phi ki lah ban im biang?
PULE SHUH SHUH
Peit ki sienjam aïu kiba phi lah ban shim ban ïaleh bad ka jingsngewsih.
“Ka Jingïarap ïa Kito kiba Sngewsih” (To Sharai! No. 3 2018, Phareng)
Hato ka Baibl ka lah shisha ban ïarap ïa kito kiba sngewsih?
Kumno ki khynnah ki lah ban ïaleh bad ka jingïap noh jong kito kiba ki ieid?
Hato yn don kiban mihpat ha bneng? Mano ban ym shah pynmihpat?