LYNNONG 48

Jied Bha ïa ki Paralok Jong Phi

Printed Edition

Ki paralok kiba ngi sngew jan ki pynkmen ïa ngi ha ki por ba sngewbha, bad ki kyrshan ïa ngi ha ki por ba jynjar. Hynrei ka Baibl ka maham ïa ngi ba ym baroh ki paralok ki long kiba bha. Te kumno phi lah ban jied ïa ki paralok kiba bha? Pyrkhat shaphang kine ki jingkylli harum.

1. Kumno ki paralok kiba phi jied kin ktah ïa phi?

Bunsien ngi ju long kum kito ki briew kiba ngi kham ïa pynlut por lang. Kane ka lah ban dei ha kaba bha ne ha kaba sniew—bad kane ka dei shisha la ngi pynlut por bad ki markhmat ne lyngba ka internet. Kumba ka Baibl ka ong, “to ïaid bad ki briew kiba stad, to men long uba stad, hynrei, u lok jong kiba bieit, un jynjar.” (Proberb 13:20) Ki paralok kiba ieid bad mane ïa U Jehobah ki lah ban ïarap ïa phi ban ïai jan sha u bad ban shim ïa ki rai kiba biang. Hynrei ka jingïadei paralok kaba jan bad kito kibym ieid ïa U Jehobah ka lah ban pynlong ïa ngi ban jngai na U Jehobah. Na kata ka daw, ka Baibl ka pynshlur ïa ngi ban jied bha ïa la ki paralok! Haba ki paralok jong ngi ki dei ki briew kiba ieid ïa U Blei, ngi pynmyntoi ïalade bad ïa ki ruh kumjuh. Da kaba leh kumne ngi lah ban “ïapyntngen paralok, bad . . . ïatei paralok.”—1 Thessaloni 5:11.

2. Kumno ka jingjied paralok jong phi kan ktah ïa U Jehobah?

U Jehobah u jied bha ïa ki paralok jong u. “U Trai u long u paralok jong kito kiba kohnguh ïa u.” (Salm 25:14, CL Baibl) Kumno U Jehobah un sngew lada ngi jied ïa ki paralok kibym ieid ïa u? Un sngewsih bha! (Pule Jakob 4:4.) Ha kawei pat ka liang, U Jehobah un kmen bha bad un jied ïa ngi kum ki paralok jong u lada ngi kyntait ïa ki paralok kiba sniew bad ngi jan sha u bad sha kito kiba ieid ïa u.—Salm 15:1-4.

WAD SHUH SHUH

Peit balei phi dei ban jied bha ïa la ki paralok, bad peit ruh kumno phi lah ban don ki paralok kiba bha.

3. Husiar ban ym ïajan bad ki paralok kibym bha

Ki briew kibym ieid ïa U Blei bad ïa ki jinghikai jong u kim long ki paralok kiba bha na ka bynta jong ngi. Peit ïa ka VIDEO, bad nangta sa ïa peit lang ïa kane ka jingkylli harum:

VIDEO: Kyntait ïa ki Paralok kibym Bha (6:17) (Phareng)

Kumno ngi lah ban sdang pynlut por bad ki briew kibym bha khlem da poi pyrkhat?

Pule 1 Korinth 15:33, bad nangta sa ïa peit lang ïa kane ka jingkylli harum:

Ki briew kiba kumno ki lah ban long ki paralok kibym bha na ka bynta jong phi? Balei?

Pule Salm 119:63, bad nangta sa ïa peit lang ïa kane ka jingkylli harum:

Phi dei ban jied ïa ki paralok kiba kumno?

Shi dabor rit u soh apul. Uwei u soh apul ba pyut ba la boi skaiñ u sdang ban pynpyut sa ïa kiwei de ki soh. — Uwei u soh uba pyut u lah ban pynpyut ïa kiwei ruh ki soh. Kumno ka jingdon jong uwei u paralok uba sniew ka lah ban ktah ïa phi?

4. Ki briew kiba pher na ngi ki lah ban long ki paralok babha jong ngi

Ka Baibl ka kren shaphang ar ngut ki nong Israel ha ka por mynshuwa. Kita ki dei u Dabid bad u Jonathan. Ki ïa pher bha ha ka rta, bad u Jonathan u dei u khun jong u Syiem; hynrei ki don ka jingïadei paralok kaba jan bha. Pule 1 Samuel 18:1, bad nangta sa ïa peit lang ïa kane ka jingkylli harum:

Balei ym da donkam ba ki paralok jong ngi kin dei tang na kajuh ka rta ne ka kyrdan?

Pule Rom 1:11, 12, bad nangta sa ïa peit lang ïa kane ka jingkylli harum:

Kumno ki paralok kiba ieid ïa U Jehobah ki lah ban pynshlur iwei ïa iwei?

Ha kane ka video, peit kumno iwei i parabangeit ba dang samla i la kynduh ïa ki paralok ha ka jaka kaba im poi pyrkhat. Peit ïa ka VIDEO, bad nangta sa ïa peit lang ïa kine ki jingkylli harum:

VIDEO: Wad ïa ki Paralok ha ki Jaka kiba Phim Poi Pyrkhat (5:06) (Phareng)

Ha ka video, balei ki kmie ki kpa jong u Akil ki khuslai shaphang ka jingïadei paralok jong u ha skul?
Ha kaba sdang, kaei kaba la pynlong ïa u Akil ban kwah ïa lang paralok bad ki?
Kumno u la lah ban ïaleh bad ka jingsngew kynjah?

5. Kumno ban tei ïa ka jingïadei paralok kaba bha

Peit kumno ngi lah ban ïoh ïa ki paralok bashisha—bad kumno ngi lah ban long ki paralok kiba bha. Peit ïa ka VIDEO.

VIDEO: U Paralok Bashisha u Dei Uei? (4:14) (Phareng)

Ka dur na ka video ‘U Paralok Bashisha u dei Uei?’ La ker sawdong ïa iwei i khynnah samla da ki paralok jong i kiba pher ba pher ha ka rta, ka jaidbynriew, bad ki sap.

Pule Proberb 18:24 bad 27:17, bad nangta sa ïa peit lang ïa kine ki jingkylli harum:

Kumno ki paralok bashisha ki ïarap iwei ïa iwei?
Hato phi don kum kita ki paralok? Lada em, kumno phi lah ban ïoh ïa kum kita ki paralok?

Pule Philippi 2:4, bad nangta sa ïa peit lang ïa kane ka jingkylli harum:

Ban don ki paralok kiba bha, phi dei ban long u paralok uba bha. Kumno phi lah ban leh ïa kata?

Ki dur: Iwei i samla kynthei i ïa shongkai bad lai ngut ki paralok kiba ïajan. 1. I kren bad iwei na ki paralok ha ka phone. 2. I kren bad iwei i paralok ba la rangbah hapoh ka Ïing Hima. 3. I leit kynduh ïa iwei na ki iba sngewsih. — Ban don ki paralok kiba bha, phi dei ban *long* u paralok uba bha

DON KIBA ONG: “Ka bha ban ïa lang paralok bad baroh.”

Kumno phin jubab?

KI MAT BAKONGSAN

Haba ngi jied bha ïa ki paralok, ngi pynsngewbha ïa U Jehobah bad ngi myntoi ruh ïalade.

Peit Biang

Kumno ka jingjied paralok jong ngi ka ktah ïa U Jehobah?
Ki paralok kiba kumno ngi dei ban kiar?
Kumno phi lah ban tei ïa ka jingïadei paralok kaba khlaiñ bad kito kiba ieid ïa U Jehobah?

Ka tarik ba la pyndep:

Ka Thong

Pyrshang ban ithuh kham bha ïa kiwei de ki parabangeit ha ka balang.

Kiwei de ki thong:

Your other goal

PULE SHUH SHUH

Peit kumno ki paralok kiba bha ki lah ban ïarap ïa ngi ha ki por ba jynjar.

“Tei ïa ka Jingïadei Paralok kaba Khlaiñ Shuwa ban Wan kaba Kut” (Ka Kutphira, Naiwieng 2019, Phareng)

Peit kaei kaba phi lah ban leh ban don ki paralok kiba bha.

“Kumno Nga Lah ban Don ki Paralok kiba Bha?” (Questions Young People Ask—Answers That Work, Volume 1, lynnong 8, Phareng)

Kaei kaba phi dei ban tip shaphang ka jingïadei paralok ha ka internet?

Long kiba Husiar haba Pyndonkam ïa ka Social Media (Phareng) (4:12)

Ha ka jingïathuhkhana “Nga Kwah ban Don i Pa,” peit kaei kaba la pynlong ïa uwei u briew ban pyrkhat biang ïa ka jingjied paralok jong u.

“Ka Baibl ka Pynkylla ïa ka Jingim” (Ka Kutphira, Ïaïong 1, 2012, Phareng)