LYNNONG 57
Kaei kaba Phi Dei ban Leh Lada Phi la Leh ïa ka Pop ba Khraw?
Watla phi ieid bha ïa U Jehobah bad phi pyrshang katba lah ban ym leh ïa kaei kaei kaban pynsngewsih ïa u, don pat ki por ha kaba phin dang bakla. Ki don ruh ki pop kiba kham khraw. (1 Korinth 6:9, 10) Lada phi leh ïa ka pop kaba khraw, kynmaw ba U Jehobah u dang ieid hi ïa phi; u kloi ban map bad ban ïarap ïa phi.
1. Kaei kaba ngi dei ban leh khnang ba U Jehobah un map ïa ngi?
Kito kiba ieid ïa U Jehobah ki dap da ka jingsngewsih haba ki sngewthuh ba ki la leh ïa ka pop kaba khraw. Hynrei ki ïoh jingtngen na ka jingkular jong U Jehobah ïa ki briew jong u: “La ki pop jong phi ki long kiba saw haiñ haiñ, kin lieh kat ka ïor.” (Isaïah 1:18) Lada ngi kylla-kaba-mut shisha, U Jehobah un map phar ïa ngi. Kumno ngin kylla-kaba-mut? Ngi dei ban sngew babe shisha ïa kaei kaba ngi la leh, ban ym leh shuh ïa kaba sniew, bad kyrpad ïa U Jehobah ban map ïa ngi. Hadien pat ngi dei ban trei shitom ban pynkylla ïa la ka jingpyrkhat ne ki jingmlien ba sniew kiba lam sha ka pop, bad ngi pyrshang ban im katkum ki kyndon jong U Jehobah.—Pule Isaïah 55:6, 7.
2. Kumno U Jehobah u pyndonkam ïa ki rangbah balang ban ïarap ïa ngi haba ngi leh pop?
Lada ngi la leh ïa ka pop bakhraw, U Jehobah u ong ïa ngi ban “khot ïa ki nongsharai balang.” (Pule Jakob 5:14, 15, CL Baibl.) Kine ki rangbah balang ki ieid ïa U Jehobah bad ïa kito kiba shakri ïa u. Ki la ïoh jinghikai kumno ban ïarap ïa ngi ban pynbha pat ïa ka jingïadei jong ngi bad U Jehobah.—Galatia 6:1.
Kumno ki rangbah balang ki ïarap ïa ngi haba ngi leh ïa ka pop bakhraw? Ar ne lai ngut ki rangbah balang kin pynbeit ïa ngi da kaba pyndonkam ïa ka Baibl. Kin pynshlur ïa ngi bad ai jingmut kumno ban kiar na kaba leh pop biang. Khnang ban ïada ïa ka balang, ki rangbah balang ki weng noh na ka balang ïa kino kino kiba leh ïa ki pop bakhraw bad kibym kylla-kaba-mut.
WAD SHUH SHUH
Peit kumno phi lah ban kham sngewnguh bad sngewthuh ba kumno U Jehobah u lah ban ïarap ïa ngi haba ngi leh ïa ka pop bakhraw.
3. Ka jingphla ka ïarap ban pynbha pat ïa ka jingïadei jong ngi bad U Jehobah
Haba ngi leh pop ka pynmong ïa U Jehobah, te kumta ngi dei ban phla ha u. Pule Salm 32:1-5, bad sa ïa peit lang ïa kane ka jingkylli harum:
Ha ka jaka ban buhrieh ïa ki pop jong ngi, balei ka bha ban phla ha U Jehobah?
Hadien ba ngi la phla ïa la ki pop ha U Jehobah bad pan jingïarap na ki rangbah balang, ngi ïoh ïa ka jingsuk mynsiem. Peit ïa ka VIDEO, bad nangta sa ïa peit lang ïa kane ka jingkylli harum:
Ha ka video, kumno ki rangbah balang ki la ïarap ïa i Canon ban wanphai biang sha U Jehobah?
Ki rangbah balang ki kwah shisha ban ïarap ïa ngi, na kata ka daw ngim dei ban buhrieh eiei na ki hynrei ngi dei ban ïathuh ïa ka jingshisha ha ki. Pule Jakob 5:16, bad nangta sa ïa peit lang ïa kane ka jingkylli harum:
Kumno ka jingïathuh hok ha ki rangbah balang ka pynsuk ïa ki ban ïarap ïa ngi?
Phla ïa ka pop jong phi, ïathuh hok ha ki rangbah balang, bad pdiang ïa ka jingïarap jong U Jehobah
4. U Jehobah u pyni jingisynei ïa kiba leh pop
Lada u briew uba la leh ka pop bakhraw u kyntait ban bud ïa ki jinghikai jong U Jehobah, un shah weng na ka balang, bad ngim ïajan ne ïa kren than shuh bad u. Pule 1 Korinth 5:6, 11, bad nangta sa ïa peit lang ïa kane ka jingkylli harum:
Kumba u thiat u pynsiep ïa u kpu, kumno ka jingpynlut por bad u briew ubym kwah ban kylla-kaba-mut ka lah ban ktah ïa ka balang?
Ban pyrthuhbud ïa ka jingisynei jong U Jehobah ïa kiba la leh pop, ki rangbah balang ki pyrshang katba lah ban ïarap ïa kito kiba la shah weng na ka balang. Watla kam long kaba suk ïa ki ban pdiang ïa ka, hynrei ka jingpynbeit kaba ki la ïoh ka la ïarap ïa bun ngut ban wanphai biang sha ka balang.—Salm 141:5.
Kumno ka rukom leh jong U Jehobah ïa kiba la leh pop ka pyni ba u long uba ieid, uba isynei bad uba sngewthuh ïa ngi?
5. U Jehobah u map ïa ngi haba ngi kylla-kaba-mut
U Jisu u la pyndonkam ïa kawei ka nuksa ban ïarap ïa ngi ban sngewthuh ba kumno U Jehobah u sngew haba u briew u kylla-kaba-mut. Pule Loukas 15:1-7, bad nangta sa ïa peit lang ïa kane ka jingkylli harum:
Kane ka hikai aïu ïa phi shaphang U Jehobah?
Pule Esekiel 33:11, bad nangta sa ïa peit lang ïa kane ka jingkylli harum:
Ka mut aïu ban kylla-kaba-mut?
Kum u nongap langbrot, U Jehobah u phikir bha ïa la ki langbrot
DON KIBA ONG: “Ngam kwah ban ïathuh ïa ki rangbah balang shaphang ka pop jong nga, namar nga tieng ïoh nga shah weng noh na ka balang.”
Kumno phin batai ïa kito kiba sngew kumta?
KI MAT BAKONGSAN
Lada ngi la leh ïa ka pop bakhraw, hynrei ngi sngewsih shisha bad kut jingmut ban ym leh shuh ïa ka, U Jehobah un map ïa ngi.
Peit Biang
Balei ngi dei ban phla ïa la ki pop ha U Jehobah?
Kaei kaba ngi dei ban leh ban ïoh jingmap ïa ki pop jong ngi?
Lada ngi la leh ïa ka pop bakhraw, balei ngi dei ban pan jingïarap na ki rangbah balang?
PULE SHUH SHUH
Peit kumno uwei u briew u la mad ïa ka jingisynei jong U Jehobah kumba la thoh ha Isaïah 1:18.
Wat ju Artatien ïa ka Jingisynei jong U Jehobah (Phareng) (5:02)
Kumno ki rangbah balang ki pyrshang ban ïarap ïa kito kiba la leh ïa ka pop bakhraw?
“Pyni Jingieid bad Jingisynei ïa kiba la leh Pop” (Ka Kutphira, Nailar 2024, Phareng)
Peit kumno la pyni jingieid bad jingisynei ïa kito kibym kylla-kaba-mut.
“Ka Jingïarap ïa Kito kiba la Shah Weng na ka Balang” (Ka Kutphira, Nailar 2024, Phareng)
Ha ka jingïathuhkhana “Nga la Donkam ban Phai Biang sha U Jehobah,” peit balei uwei u briew uba la jngai na ka jingshisha u sngew ba U Jehobah u la khring biang ïa u.
“Ka Baibl ka Pynkylla ïa ka Jingim” (Ka Kutphira, Ïaïong 1, 2012, Phareng)