LYNNONG 59
Phi Lah ban Ïaishah ïa ki Jingpynshitom
Shen, baroh ki Khristan kin sa mad ïa ka jingshah leh pyrshah, bad wat ïa ka jingshah pynshitom ruh. Hato ngi dei ban tieng ïa kata?
1. Balei ngi khmih lynti ba ngin sa shah pynshitom?
Ka Baibl ka ong: “Baroh kiba mon ban im riewblei ha U Khrist Jisu kin shah lehbeiñ.” (2 Timothi 3:12) U Jisu u la shah pynshitom namarba um don bynta bad kane ka pyrthei u Soitan. Ngi ruh ngim don bynta bad ka pyrthei, kumta ngim sngew lyngngoh haba ki sorkar bad ki niam ki pynshitom ïa ngi.—Ïoannis 15:18, 19.
2. Kumno ngi lah ban pynkhreh na ka bynta ka jingshah pynshitom?
Ngi donkam ban pynkhlaiñ ïa ka jingshaniah jong ngi ha U Jehobah. Pyllait por man la ka sngi ban duwai ïa u bad ban pule ïa ka Ktien jong u. Leit tista sha ki jingïalang. Kine kin ai bor ïa phi ban ïaishah da ka jingshlur ïa kino kino ki jingpynshitom watla ka wan na kiba ha ïing ha sem jong phi. U apostol Paul, uba la ju shah pynshitom bunsien, u la thoh: ‘U Jehobah u long u nongïarap jong nga, ngan ym sheptieng.’—Hebru 13:6.
Ngi lah ruh ban tei ïa la ka jingshlur da kaba ïalap man la ka por. Ka kam ïalap ka hikai ïa ngi ban shaniah ha U Jehobah bad ban ïaleh bad ka jingsheptieng ïa u briew. (Proberb 29:25) Lada phi long kiba shlur ban ïalap mynta, phin sa long kiba la pynkhreh ban ïalap wat haba ka sorkar ka pyrkhing ïa ka kam jong ngi.—1 Thessaloni 2:2.
3. Kumno ngi myntoi haba ngi ïaishah ïa ki jingpynshitom?
Ngim sngewtynnad ban shah pynshitom, hynrei haba ngi ïaishah, ka jingngeit jong ngi kan kham khlaiñ. Ngin kham jan sha U Jehobah namar ngi ïohi ïa ka jingïarap jong u haba ngi sngew kumba ngim donbor shuh. (Pule Jakob 1:2-4.) U sngewsih ban ïohi ba ngi jynjar, hynrei ka pynsngewbha ïa u haba ngi ïaishah. Ka Baibl ka ong: “Lada phi ïaishah ïa ka jingshahshitom wat haba phi la leh ïa kaba dei, U Blei un kyrkhu ïa phi na ka bynta kata.” (1 Petros 2:20, CL Baibl) Ka jingkyrkhu kaba un ai ïa kito kiba la ïaishah kan long ka jingim bymjukut. Baroh kiba im ha kata ka por kin shakri ïa U Jehobah bad yn ym don kiban leh pyrshah ïa ki.—Mathaïos 24:13.
WAD SHUH SHUH
Peit balei ngi lah ban ïaishah bad balei ka long kaba myntoi ban ïaineh ha U Jehobah wat hapdeng ka jingshah pynshitom.
4. Phi lah ban ïaishah ïa ka jingshah leh pyrshah na ïing
U Jisu u la ïathuhlypa ba ka ïing ka sem jong ngi ka lah ban ym kyrshan ïa ka rai jong ngi ban mane ïa U Jehobah. Pule Mathaïos 10:34-36, bad sa ïa peit lang ïa kane ka jingkylli harum:
Kaei kaba lah ban jia ha ïing haba don ba rai ban shakri ïa U Jehobah?
Ban peit ïa kawei ka nuksa, peit ïa ka VIDEO, bad sa ïa peit lang ïa kane ka jingkylli harum:
Kumno phin leh lada ki bahaïing ne ki paralok ki pyrshang ban khanglad ïa phi ban shakri ïa U Jehobah?
Pule Salm 27:10 bad Markos 10:29, 30. Bad sa ïa peit lang ïa kane ka jingkylli harum:
Kumno kane ka jingkular ka lah ban ïarap ïa phi lada phi mad ïa ki jingshah leh pyrshah na la ïing ne na ki paralok?
5. Ïai mane ïa U Jehobah wat hapdeng ka jingshah pynshitom
Ngi donkam jingshlur ban shakri ïa U Jehobah haba kiwei ki pyrshang ban khanglad ïa ngi ban shakri ïa u. Peit ïa ka VIDEO, bad nangta sa ïa peit lang ïa kane ka jingkylli harum:
Na kane ka video, kaei kaba la pynshlur ïa phi?
Pule Kam 5:27-29 bad Hebru 10:24, 25. Bad hadien ba la pule ïa man la ka dkhot, sa ïa peit lang ïa kane ka jingkylli harum:
Balei ka long kaba kongsan bha ban ïai mane ïa U Jehobah wat lada don ka jingpyrkhing ïa ka kam ïalap bad ïa ki jingïalang jong ngi?
6. U Jehobah un ïarap ïa phi ban ïaishah
Ki Nongsakhi U Jehobah kiba na ka jaid bynriew bad ka rta bapher bapher ki la shakri hok ïa U Jehobah wat hapdeng ka jingshah pynshitom. Ban peit kaei kaba la ïarap ïa ki, peit ïa ka VIDEO. Nangta sa ïa peit lang ïa kane ka jingkylli harum:
Ha ka video, kaei kaba la ïarap ïa kine ki Nongsakhi ban ïaishah?
Pule Rom 8:35, 37-39 bad Philippi 4:13. Bad nangta sa ïa peit lang ïa kane ka jingkylli harum:
Kumno kane ka dkhot Baibl ka pynthikna ba phi lah ban ïaishah ïa kano kano ka jingeh?
Pule Mathaïos 5:10-12, bad nangta sa ïa peit lang ïa kane ka jingkylli harum:
Balei phi lah ban long iba kmen wat hapdeng ka jingshah pynshitom?
Da ki spah lak ngut ki nongmane jong U Jehobah ki la lah ban ïaishah ïa ki jingshah leh pyrshah. Phi ruh phi lah ban ïaishah!
DON KIBA ONG: “Ngam lah ban ïaishah ïa ka jingshah pynshitom.”
Ki dkhot Baibl aïu kiba lah ban ai jingshlur ïa ki?
KI MAT BAKONGSAN
U Jehobah u ñiewkor ïa ka jingtrei shitom jong ngi ban shakri ïa u wat ha pdeng ka jingshah pynshitom. Da ka jingïarap jong u, ngin lah ban ïaishah!
Peit Biang
Balei ki Khristan ki dei ban khmih lynti ïa ka jingshah pynshitom?
Kaei kaba phi lah ban leh mynta ban long kiba la pynkhreh na ka bynta ka jingshah pynshitom?
Kaei kaba lah ban ïarap ïa phi ban sngewskhem ba phi lah ban shakri ïa U Jehobah wat ha pdeng kino kino ki jing pynshitom?
PULE SHUH SHUH
Peit kumno U Jehobah u la ïarap ïa iwei i shynrang ban ïaishah ha ka por ba i la shah set byndi namar ka jinglong pdeng jong i.
Ka Jingïaishah Wat Hapdeng ka Jingshah Pynshitom (Phareng) (2:34)
Peit kaei kaba la ïarap ïa ki shi kurim ban shakri hok ïa U Jehobah wat hapdeng ka jing shah leh pyrshah da ki snem.
Ki Ïai Shakri ïa U Jehobah Wat Hapdeng ki Jingkylla (Phareng) (7:11)
Peit kumno ban ïaishah ïa ki jingshah pynshitom da ka jingshlur.
“Pynkhreh Lypa Mynta ban lah ban shah ïa ka Jingshah Pynshitom” (Ka Kutphira, Naitung 2019, Phareng)
Kumno ngi dei ban sngew haba kiba ha ïing ha sem jong ngi ki ïaleh pyrshah ïa ngi? Kaei kaba ngi lah ban leh ban don jingsuk bad ki, bad ha kajuh ka por pat ban ïaineh ha U Jehobah?