1 Akorintho

13 O na ingĩaria na thiomi cia andũ na cia araika, no ngorũo itarĩ na wendo, ingĩkorũo haana o ta ngengere kana ndarama ĩranegena. 2 Na ingĩkorũo na kĩheo gĩa kũratha mohoro na ndaũkĩrũo nĩ hitho ciothe cia Ngai na ngĩe na ũmenyo wothe, o na ngorũo na wĩtĩkio ũngĩhota gũthamia irĩma, no ngorũo itarĩ na wendo, maũndũ macio mothe mangĩkorũo marĩ ma tũhũ. 3 O na ingĩheana indo ciakwa ciothe gũteithia andũ angĩ, na ndute mwĩrĩ wakwa nĩguo ndĩĩrahe, no ngorũo ndirĩ na wendo, ndingĩgunĩka o na hanini.

4 Wendo nĩ ũkiragĩrĩria na nĩ ũtuganaga. Wendo ndũrĩ ũiru. Wendo ndwĩgaathaga, ndũrĩ mwĩtĩo, 5 ndũrĩ rũtũrĩko, ndũcaragia ũrĩa ũngĩĩguna guo mwene, ndũrakaraga na ihenya. Ndũtaraga maita marĩa ũhĩtĩirio. 6 Ndũkenagĩra maũndũ marĩa matarĩ ma ũthingu, no ũkenagĩra maũndũ marĩa ma ma. 7 Wendo wĩtiiragia maũndũ mothe, wĩtĩkagia maũndũ mothe, wĩrĩgagĩrĩra maũndũ mothe, ũkiragĩrĩria maũndũ mothe.

8 Wendo ndũrĩ hĩndĩ ũthiraga. No iheo cia kũratha mohoro nĩ ikaaninwo; iheo cia kwaria na thiomi nĩ igaathira; iheo cia kũgĩa na ũmenyo nĩ ikaaninwo. 9 Nĩ ũndũ tũkoragwo na ũmenyo ũtarĩ mũkinyanĩru na tũrathaga mohoro matarĩ makinyanĩru, 10 no hĩndĩ ĩrĩa ũndũ ũrĩa mũkinyanĩru ũgooka, ũndũ ũrĩa ũtarĩ mũkinyanĩru nĩ ũkaaniinwo. 11 Hĩndĩ ĩrĩa ndaarĩ mwana, ndaragia o ta mwana, ndeciragia o ta mwana, ndecũranagia o ta mwana; no rĩu tondũ nĩ nduĩkĩte mũndũ mũgima, nĩ ndiganĩte na maũndũ ma wana. 12 Ihinda-inĩ rĩrĩ tũtionaga maũndũ wega, o ta tũrarora na gĩcicio gĩa cuma, no hĩndĩ ĩyo nĩ tũkoonaga wega.* Ihinda-inĩ rĩrĩ, ndiũĩ maũndũ wega, no hĩndĩ ĩyo nĩ ngaamamenya wega, o ta ũrĩa niĩ njũĩkaine wega. 13 No rĩrĩ, maũndũ maya matatũ nĩ magaatigara: wĩtĩkio, kĩĩrĩgĩrĩro, na wendo; no ũndũ ũrĩa mũnene harĩ macio nĩ wendo.