Maũndũ Marĩa Meekirũo nĩ Atũmwo
6 Na rĩrĩ, matukũ-inĩ macio rĩrĩa arutwo moongererekaga, Ayahudi arĩa maaragia Kĩngiriki makĩambĩrĩria kũnugunĩra Ayahudi arĩa maaragia Kĩhibirania, tondũ atumia ao a ndigwa matiagayagĩrũo irio iria maagĩrĩirũo kũgaĩrũo o mũthenya.+ 2 Nĩ ũndũ ũcio, arĩa Ikũmi na Erĩ magĩta arutwo othe hamwe makĩmeera: “Gũtiagĩrĩire* ithuĩ tũtige kiugo kĩa Ngai nĩguo tũgayage irio metha-inĩ.+ 3 Kwoguo-rĩ, ariũ a Ithe witũ, mwĩthuurĩrei arũme mũgwanja kuuma gatagatĩ-inĩ kanyu marĩ na mũrũgamo mwega,*+ maiyũrĩtwo nĩ roho na ũũgĩ,+ nĩguo tũmaamũre marũgamĩrĩre ũndũ ũyũ wa bata;+ 4 no ithuĩ tũgũthingata ũhoro wĩgiĩ mahoya na ũtungata wĩgiĩ kiugo.” 5 Ũndũ ũcio ũgĩkenia andũ acio othe, nao magĩthuura Stefano, mũndũ waiyũirũo nĩ wĩtĩkio na roho mũtheru, o hamwe na Filipu,+ Porokoro, Nikanora, Timoni, Paramena na Nikolai wa kuuma Antiokia ũrĩa wagarũrũkĩte agatuĩka Mũyahudi. 6 Makĩmatwara kũrĩ atũmwo, na thutha wa atũmwo kũhoya, makĩmaigĩrĩra moko.+
7 Naguo ũhoro wa Ngai ũgĩgĩthiĩ na mbere kũhunja,+ nao arutwo makĩongerereka mũno+ kũu Jerusalemu; na kĩrĩndĩ kĩnene kĩa athĩnjĩri-Ngai gĩkĩambĩrĩria gwathĩkĩra ũhoro wa wĩtĩkio.+
8 Nake Stefano, aiyũirũo nĩ hinya wa Ngai na agetĩkĩrĩka nĩwe, nĩ eekagĩra andũ maũndũ manene ma magegania* na akamaringĩra ciama nene. 9 No arũme amwe a gĩkundi kĩrĩa gĩetagwo Thunagogi ya Arĩa Ohore, hamwe na andũ amwe a kuuma Kurene, Aleksandiria, Kilikia, na Asia magĩũka gũkararania na Stefano. 10 No matingĩahotire kũmwĩtiiria nĩ ũndũ wa ũũgĩ na roho ũrĩa aaragia naguo.+ 11 Magĩcoka makĩiguithia andũ na hitho moige atĩrĩ: “Nĩ tũiguĩte akĩaria maũndũ ma kũruma Musa o na Ngai.” 12 Na magĩcogera andũ, athuri, na andĩki-watho, na o rĩmwe magĩthiĩ harĩ we makĩmũnyita na hinya makĩmũtwara kũrĩ Sanhedrini. 13 Na makĩrehe aira a maheeni, arĩa mooigire: “Mũndũ ũyũ ndaratiga kwaria maũndũ moru megiĩ handũ haha hatheru na megiĩ Watho. 14 Ta rĩu-rĩ, nĩ tũmũiguĩte akiuga atĩ Jesu ũrĩa Mũnazarethi nĩ akaagũithia handũ haha na agarũre mĩtugo ĩrĩa Musa aatũtigĩire.”
15 Na rĩrĩa arĩa othe maarĩ thĩinĩ wa Sanhedrini maaikarĩte mamũrorete, makĩona ũthiũ wake ũtariĩ ta wa mũraika.