Maũndũ Marĩa Meekirũo nĩ Atũmwo
10 Na rĩrĩ, kũu Kaisarea nĩ kwarĩ mũndũ wetagwo Korinelio, na aarĩ mũnene wa mbũtũ* ĩrĩa yetagwo gĩkundi* kĩa Italia. 2 Mũndũ ũcio hamwe na andũ othe a nyũmba yake nĩ meetigĩrĩte Ngai, na nĩ aaheaga andũ iheo nyingĩ cia tha na agathaitha Ngai ategũtigithĩria. 3 Kũrĩ ta thaa kenda+ cia mũthenya, akĩona wega kũgerera kĩoneki mũraika wa Ngai agĩũka harĩ we akĩmwĩra atĩrĩ: “Korinelio!” 4 Nake Korinelio akĩmũrora amakĩte akĩmũũria: “Nĩ kĩĩ Mwathani?” Akĩmũcokeria atĩrĩ: “Mahoya maku na iheo ciaku cia tha nĩ ciambatĩte mbere ya Ngai ihaana ta kĩndũ gĩa kĩririkano.+ 5 Nĩ ũndũ ũcio-rĩ, tũma andũ mathiĩ Jopa mageete Simoni ũrĩa wĩtagwo Petero. 6 Mũndũ ũcio anyitĩtwo ũgeni kwa mũtanduki njũũa wĩtagwo Simoni, ũkoragwo na nyũmba hakuhĩ na iria.” 7 Na o hĩndĩ ĩyo mũraika ehera, agĩta ndungata ciake igĩrĩ hamwe na mũthigari ũmwe wetigĩrĩte Ngai kuuma harĩ ndungata ciake, 8 akĩmataarĩria maũndũ mothe na akĩmatũma mathiĩ Jopa.
9 Na marĩ rũgendo-inĩ rwao mũthenya ũrĩa warũmĩrĩire makuhĩrĩirie itũũra rĩu, Petero akĩambata nyũmba igũrũ ta thaa thita cia mũthenya kũhoya. 10 No akĩigua ahũtiĩ mũno na nĩ eendaga kũrĩa. Na rĩrĩa irio ciahaaragĩrio, akĩona kĩoneki,+ 11 akĩona igũrũ rĩkĩhingũka na kĩndũ gĩatariĩ ta gĩtambaya kĩnene gĩa gatani gĩgĩikũrũkio nginya thĩ kĩnyitĩtwo mĩthia yakĩo ĩna; 12 na thĩinĩ wakĩo kwarĩ na nyamũ cia gũkũ thĩ cia magũrũ mana cia mĩthemba yothe, na iria itambaga thĩ, na nyoni cia rĩera-inĩ.* 13 Hĩndĩ ĩyo akĩigua mũgambo wamwĩra atĩrĩ: “Petero, ũkĩra ũthĩnje na ũrĩe!” 14 No Petero akiuga: “Aca Mwathani, tondũ ndirĩ ndarĩa kĩndũ o na kĩ kĩrĩ thahu na gĩtarĩ gĩtheru.”+ 15 Mũgambo ũcio ũkĩmwĩra o rĩngĩ riita rĩa kerĩ: “Tiga kuuga atĩ indo iria Ngai atheretie irĩ na thahu.” 16 Gũgĩkĩka ũguo riita rĩa gatatũ, na o rĩo gĩtambaya kĩu gĩkĩambatio igũrũ.
17 O hĩndĩ ĩyo Petero arigĩtwo nĩ ũrĩa kĩoneki kĩu oonete kĩoigĩte-rĩ, andũ arĩa maatũmĩtwo nĩ Korinelio makĩũrĩrĩria harĩa nyũmba ya Simoni yarĩ na makĩrũgama hau kĩhingo-inĩ.+ 18 Magĩtana na makĩũria kana Simoni ũrĩa wetagwo Petero aanyitĩtwo ũgeni kũu. 19 Nake Petero o agĩĩcũrania ũhoro wa kĩoneki kĩu, roho+ ũkĩmwĩra: “Atĩrĩrĩ, nĩ harĩ arũme atatũ marakũũria. 20 Kwoguo ũkĩra, ũikũrũke ũthiĩ hamwe nao ũtegũthangania o na hanini, nĩ gũkorũo nĩ niĩ ndĩmatũmĩte.” 21 Nake Petero agĩikũrũka harĩ arũme acio akĩmeera atĩrĩ: “Nĩ niĩ mũndũ ũrĩa mũracaria. Mũkĩte gwĩka atĩa hihi?” 22 Makĩmwĩra atĩrĩ: “Mũnene wa mbũtũ wĩtagwo Korinelio,+ mũndũ mũthingu, wĩtigĩrĩte Ngai na ũgaathagĩrĩrio nĩ rũrĩrĩ ruothe rwa Ayahudi, araathirũo nĩ mũraika mũtheru agũtũmanĩre ũthiĩ gwake nĩguo athikĩrĩrie ciugo ciaku.” 23 Agĩkĩmeera matonye maikare kũu marĩ ageni ake.
Mũthenya ũyũ ũngĩ agĩũkĩra agĩthiĩ nao, na ariũ a Ithe witũ amwe a Jopa magĩthiĩ hamwe nake. 24 Mũthenya ũrĩa warũmĩrĩire akĩingĩra Kaisarea. Korinelio nake nĩ aamatanyaga na nĩ eetĩte andũ a mbarĩ ciao na arata a hakuhĩ makongana hamwe. 25 Rĩrĩa Petero aatonyaga, Korinelio akĩmũtũnga, akĩĩgũithia thĩ magũrũ-inĩ make, na akĩmũinamĩrĩra. 26 No Petero akĩmũrũgamia akĩmwĩra: “Ũkĩra; o na niĩ ndĩ o mũndũ.”+ 27 Na o akĩaragia nake, akĩingĩra thĩinĩ agĩkora andũ aingĩ monganĩte hamwe. 28 Akĩmeera atĩrĩ: “Nĩ mũĩ wega atĩ Mũyahudi ndagĩrĩirũo kũnyitanĩra kana gũkuhĩrĩria mũndũ wa rũrĩrĩ rũngĩ,+ o na kũrĩ ũguo Ngai nĩ anyonetie atĩ ndiagĩrĩirũo kuuga atĩ mũndũ o na ũmwe arĩ na thahu kana atĩ ti mũtheru.+ 29 Na nĩkĩo hĩndĩ ĩrĩa ndĩratũmanĩirũo, ndoka itegũkararia. Rĩu-rĩ, mũrandũmanĩire nĩkĩ?”
30 Hĩndĩ ĩyo Korinelio akiuga: “Thikũ inya hĩtũku ihinda o ta rĩrĩ, ndahoyaga ndĩ gwakwa nyũmba thaa kenda cia mũthenya; na o rĩo, mũndũ wehumbĩte nguo ciahenagia akĩrũgama mbere yakwa 31 akĩnjĩra: ‘Korinelio, mahoya maku nĩ maiguĩtwo na magetĩkĩrĩka, na iheo ciaku cia tha nĩ iririkanĩtwo nĩ Ngai. 32 Nĩ ũndũ ũcio-rĩ, tũma andũ mathiĩ Jopa mageete Simoni ũrĩa wĩtagwo Petero. Mũndũ ũcio anyitĩtwo ũgeni mũciĩ kwa mũtanduki njũũa wĩtagwo Simoni, ũrĩa ũikaraga hakuhĩ na iria.’+ 33 O hĩndĩ ĩyo ngĩgũtũmanĩra, na nĩ weka wega nĩ gũka. Ithuothe rĩu tũrĩ haha mbere ya Ngai nĩguo tũigue maũndũ mothe marĩa wathĩtwo nĩ Jehova* ũtwĩre.”
34 Nĩ ũndũ ũcio Petero akĩambĩrĩria kwaria, akiuga atĩrĩ: “Rĩu nĩ ndaũkĩirũo wega atĩ Ngai ndarĩ mũthutũkanio,+ 35 no thĩinĩ wa ndũrĩrĩ ciothe, mũndũ ũrĩa ũmwĩtigĩrĩte na wĩkaga ũrĩa kwagĩrĩire nĩ etĩkĩrĩkaga nĩ we.+ 36 Aatũmire ndũmĩrĩri kũrĩ ariũ a Isiraeli akĩmamenyithia ũhoro ũrĩa mwega wa thayũ+ kũgerera harĩ Jesu Kristo—ũcio nĩwe Mwathani wa andũ othe.+ 37 Nĩ mũĩ maũndũ marĩa maaririo Judea guothe, kwambĩrĩria Galili+ thutha wa ũbatithio ũrĩa Johana aahunjirie ũhoro waguo: 38 ũhoro wĩgiĩ Jesu wa kuuma Nazarethi, ũrĩa Ngai aaitĩrĩirie maguta kũgerera roho mũtheru+ na hinya, na agĩthiũrũrũka bũrũri agĩkaga maũndũ mega na akĩhonagia arĩa othe maahinyĩrĩirio nĩ Mũcukani,+ tondũ Ngai aarĩ hamwe nake.+ 39 Na ithuĩ tũrĩ aira a maũndũ mothe marĩa eekire bũrũri-inĩ wa Ayahudi na Jerusalemu, ĩndĩ nĩ maamũũragire na njĩra ya kũmũcuuria mũtĩ-inĩ. 40 Na mũthenya wa gatatũ+ Ngai akĩmũriũkia na agĩtũma onekane, 41 no ti kũrĩ andũ othe, ĩndĩ nĩ kũrĩ ithuĩ, aira arĩa maathuurĩtwo nĩ Ngai o mbere, arĩa maarĩire na makĩnyua hamwe nake thutha wake kũriũkio kuuma kũrĩ arĩa akuũ.+ 42 Ningĩ nĩ aatwathire atĩ tũhunjĩrie andũ na tũrute ũira kĩhinyio+ atĩ ũcio nĩwe Ngai aamũrire atuĩke mũtuanĩri ciira wa arĩa marĩ muoyo na arĩa akuũ.+ 43 Anabii othe nĩ maarutire ũira ũmwĩgiĩ+ atĩ mũndũ o wothe ũmwĩtĩkĩtie nĩ ohagĩrũo mehia kũgerera rĩĩtwa rĩake.”+
44 Hĩndĩ o ĩyo Petero aathiaga na mbere kũheana ũhoro ũcio, arĩa othe maathikagĩrĩria kiugo makĩamũkĩra roho mũtheru.+ 45 Nao etĩkia arĩa maarĩ aruu* arĩa mookĩte hamwe na Petero makĩgega tondũ andũ a ndũrĩrĩ o nao nĩ maaitagĩrĩrio kĩheo kĩa roho mũtheru kĩrĩa kĩheanagwo o ũguo tũhũ. 46 Nĩ gũkorũo nĩ maamaiguire makĩaria na thiomi* ngʼeni na makĩgooca Ngai.+ Nake Petero akĩmeera atĩrĩ: 47 “Hihi harĩ mũndũ ũngĩgiria aya maamũkĩra roho mũtheru o ta ithuĩ mabatithio na maĩ?”+ 48 Nĩ ũndũ ũcio agĩathana atĩ mabatithio thĩinĩ wa rĩĩtwa rĩa Jesu Kristo.+ Magĩcoka makĩmũũria aikare hamwe nao matukũ maigana ũna.