Macakaya
א [Aleph]*
1 Kaĩ itũũra rĩrĩa rĩraiyũrĩte andũ rĩu nĩ rĩtigĩtwo rĩrĩ riki-ĩ!+
O rĩu rĩrakoragwo na andũ aingĩ gatagatĩ-inĩ ka ndũrĩrĩ, kaĩ nĩ rĩhaanĩte o ta mũtumia wa ndigwa-ĩ!+
Kaĩ ũcio ũrarĩ mwarĩ wa mũthamaki gatagatĩ-inĩ ka icigo cia bũrũri nĩ arutithĩtio wĩra wa ũkombo-ĩ!+
ב [Beth]
2 Arĩraga mũno ũtukũ,+ na maithori make makahumbĩra makai make.
Endwa ake othe gũtirĩ o na ũmwe ũrĩ ho amũũmĩrĩrie.+
Arata ake othe nĩ mamũkunyanĩire;+ nĩ matuĩkĩte thũ ciake.
ג [Gimel]
3 Juda nĩ atwarĩtwo ithamĩrio+ rungu rwa mĩnyamaro na ũkombo mũritũ.+
Arĩikaraga gatagatĩ-inĩ ka ndũrĩrĩ;+ ndarĩ na handũ ha kũhurũka.
Arĩa othe mamũnyariraga nĩ mamũkinyĩire arĩ ihinda-inĩ rĩake rĩa mĩtangĩko.
ד [Daleth]
4 Njĩra cia gũthiĩ Zayuni nĩ iracakaya, tondũ gũtirĩ mũndũ ũrathiĩ gĩathĩ-inĩ.+
Ihingo ciake ciothe nĩ ndiganĩrie;+ athĩnjĩri-Ngai ake nĩ gũcaya maracaya.
Airĩtu* ake marĩ na kĩeha, nake arĩ na ruo rũnene.
ה [He]
5 Arĩa mamũũkagĩrĩra rĩu matuĩkĩte mwathi* wake; thũ ciake itirĩ na mĩtangĩko.+
Tondũ Jehova nĩ atũmĩte anyitwo nĩ kĩeha nĩ ũndũ wa mehia make maingĩ.+
Ciana ciake nĩ itahĩtwo nĩ ũrĩa ũmũũkagĩrĩra.+
ו [Waw]
6 Riri wothe nĩ wehereire mwarĩ wa Zayuni.+
Anene ake matariĩ ta thwariga itarĩ na ũrĩithio,
Na marathiĩ manogereire mbere ya ũrĩa ũramathingata.
ז [Zayin]
7 Matukũ-inĩ marĩa Jerusalemu arĩ na mĩnyamaro na atarĩ na kũndũ gwa gũikara, nĩ aririkanaga
Indo ciothe cia goro iria aarĩ nacio matukũ-inĩ ma tene.+
Rĩrĩa andũ ake maagũire guoko-inĩ gwa thũ na ndaarĩ na wa kũmũteithia,+
ח [Heth]
8 Jerusalemu nĩ ehĩtie na njĩra nene.+
Nĩkĩo atuĩkĩte kĩndũ kĩmene.
Arĩa othe maamũheete gĩtĩo rĩu mamuonaga atariĩ ta kĩndũ gĩa kũnyararũo, tondũ nĩ monete njaga yake.+
We mwene akayaga+ na akahũgũka nĩ ũndũ wa thoni.
ט [Teth]
9 Thahu wake ũrĩ nguo-inĩ ciake.
We ndeeciririe ũhoro wĩgiĩ ihinda rĩake rĩa thutha.+
Kũgwa gwake kwarĩ gwa kũmakania; ndarĩ na mũndũ wa kũmũhooreria.
Atĩrĩrĩ Jehova, ona mĩnyamaro yakwa, tondũ thũ nĩ ĩĩtũũgĩrĩtie.+
י [Yod]
10 Thũ nĩ ĩigĩrĩire moko mayo igũrũ rĩa mĩthithũ yake yothe.+
Tondũ nĩ eyoneire ndũrĩrĩ ikĩingĩra handũ hake harĩa hatheru,+
O icio waathanire atĩ itiagĩrĩirũo kũingĩra thĩinĩ wa kĩũngano gĩaku.
כ [Kaph]
11 Andũ ake othe nĩ gũcaya maracaya; nĩ mũgate maracaria.+
Nĩ makũũranĩtie indo ciao cia goro na kĩndũ gĩa kũrĩa, nogetha matũũre muoyo.
Atĩrĩrĩ Jehova, ta rora wone atĩ nduĩkĩte ta mũtumia* ũtarĩ bata.
ל [Lamed]
12 Kaĩ mũrona ta atarĩ ũndũ mũnene inyuĩ arĩa othe mũrahĩtũka njĩra-inĩ?
Rorai muone!
Hihi nĩ harĩ ruo rũngĩ rũtariĩ ta ruo rũrĩa ndaiguire,
Rũrĩa Jehova aatũmire njigue mũthenya wa marakara make mahiũ?+
מ [Mem]
13 Nĩ atũmĩte mwaki thĩinĩ wa mahĩndĩ makwa kuuma igũrũ,+ na akamahoota mothe.
Nĩ ambĩire magũrũ makwa neti; nĩ atũmĩte njoke na thutha kĩa hinya.
Atũmĩte nduĩke mũtumia mũtiganĩrie.
Mũthenya wothe ndindaga ndĩ mũrwaru.
נ [Nun]
14 Mehia makwa mohetwo o ta icoki, makohanio hamwe nĩ guoko gwake.
Maigĩrĩirũo ngingo-inĩ yakwa, na hinya wakwa nĩ ũthirĩte.
Jehova nĩ aneanĩte guoko-inĩ kwa arĩa itangĩhota gwĩtiiria.+
ס [Samekh]
15 Jehova nĩ eheretie andũ othe arĩa marĩ hinya thĩinĩ wakwa.+
Nĩ anjĩtĩire kĩrĩndĩ kĩa andũ nĩguo mahehenje anake akwa.+
Jehova nĩ arangĩrĩirie mũirĩtu gathirange wa Juda kĩhihĩro-inĩ kĩa ndibei.+
ע [Ayin]
16 Ndĩrarĩra nĩ ũndũ wa maũndũ macio;+ maitho makwa maranyũrũrũkia maithori.
Tondũ mũndũ ũrĩa ũngĩnyũmĩrĩria na aahoorerie, arĩ kũraya mũno na niĩ.
Ariũ akwa nĩ matiganĩirio, nĩ gũkorũo thũ nĩ ĩhootanĩte.
פ [Pe]
17 Zayuni nĩ atambũrũkĩtie moko make;+ ndarĩ na mũndũ wa kũmũũmĩrĩria.
Jehova nĩ aheete thũ ciothe iria ithiũrũrũkĩirie Jakubu watho wa kũmũũkĩrĩra.+
Jerusalemu ĩtuĩkĩte kĩndũ kĩmene harĩ o.+
צ [Tsade]
18 Jehova nĩ mũthingu,+ nĩ gũkorũo niĩ nĩ kũremera nemeire mawatho make.*+
Thikĩrĩriai inyuĩ ikundi ciothe cia andũ, na muone ruo rwakwa.
Airĩtu* akwa o na anake akwa nĩ matahĩtwo.+
ק [Qoph]
19 Nĩ ngaĩire endwa akwa, ĩndĩ o nĩ mangunyanĩire.+
Thĩinĩ wa itũũra athĩnjĩri-Ngai akwa na athuri* akwa nĩ mathirĩte,
Magĩcaria irio nĩguo matũũre muoyo.+
ר [Resh]
20 Rora wee Jehova, tondũ ndĩ na mĩtangĩko mĩnene.
Mara makwa marĩ* na ruo.
Ngoro yakwa ĩrĩ na mĩtangĩko, tondũ ngoretwo ndĩ mũremi biũ.+
Kũu nja rũhiũ rwa njora nĩ rũũragĩte ciana ciakwa;+ thĩinĩ wa nyũmba gũtariĩ ta gĩkuũ.
ש [Shin]
21 Andũ nĩ maiguĩte gũcaya gwakwa; ndirĩ na mũndũ wa kũnyũmĩrĩria.
Thũ ciakwa ciothe nĩ ciiguĩte ũhoro wa thĩna wakwa.
Nĩ ikenete tondũ wee nĩ waũrehire.+
Ĩndĩ nĩ ũkaarehe mũthenya ũrĩa wamenyithanirie,+ rĩrĩa o nao makaahaana o ta niĩ.+
ת [Taw]
22 Ũũru wao wothe nĩ ũũke mbere yaku, na ũromaherithia na njĩra nene,+
O ta ũrĩa ũũherithĩtie na njĩra nene nĩ ũndũ wa mehia makwa mothe.
Tondũ mĩcayo yakwa nĩ mĩingĩ, na ngoro yakwa nĩ ndwaru.