Ezekieli

15 Na rĩrĩ, kiugo kĩa Jehova gĩkĩnginyĩra o rĩngĩ ngĩrũo atĩrĩ: 2 “Mũrũ wa mũndũ, nĩ na njĩra ĩrĩkũ mbaũ cia mũthabibũ ikĩrĩte cia mũtĩ ũngĩ o wothe kana rũhonge harĩ mĩtĩ ya gĩthaka? 3 Hihi gĩkĩngĩ kĩrutĩtwo harĩ guo no kĩhũthĩrũo kũruta wĩra? Kana hihi andũ nĩ mathondekaga tũhocio twa gũcuuria indo kuumana naguo? 4 Atĩrĩrĩ, ũikagio riiko ũrĩ rũkũ, naguo mwaki ũkaũcina mĩthia yerĩ na ũgacura gatagatĩ. Hihi no ũcoke kũhũthĩrũo harĩ wĩra o wothe? 5 O na rĩrĩa warĩ mũgima ndũngĩahũthĩrirũo harĩ ũndũ o wothe. Ũngĩkĩhũthĩrũo atĩa rĩrĩa wacinwo na mwaki na wacura?”

6 “Nĩ ũndũ ũcio, Jehova Mwathani Ũrĩa Mũnene oigĩte ũũ: ‘O ta mbaũ cia mũthabibũ gatagatĩ-inĩ ka mĩtĩ ya gĩthaka, iria heanĩte irĩ ngũ cia mwaki, ũguo noguo ngeeka aikari a Jerusalemu.+ 7 Nĩ njerekeirie ũthiũ wakwa harĩ o ndĩmokĩrĩre. Nĩ metharĩte kuuma mwaki-inĩ, ĩndĩ mwaki nĩ ũkaamacina. Na nĩ mũkaamenya atĩ niĩ nĩ niĩ Jehova hĩndĩ ĩrĩa ngeerekeria ũthiũ wakwa harĩ o ndĩmokĩrĩre.’”+

8 “‘Na nĩ ngaatũma bũrũri ũtuĩke kũndũ gũtiganĩrie+ tondũ matikoretwo marĩ ehokeku,’+ ũguo nĩguo Jehova Mwathani Ũrĩa Mũnene oigĩte.”