Ezekieli

46 “Jehova Mwathani Ũrĩa Mũnene ekuuga ũũ: ‘Kĩhingo kĩa nja ĩrĩa nini kĩrĩa kĩrorete irathĩro+ kĩagĩrĩire gũikara kĩrĩ kĩhinge+ thikũ ithathatũ iria irutagwo wĩra,+ no mũthenya wa Thabatũ na mũthenya wa karũgamo ka mweri kĩagĩrĩire kũhingũrũo. 2 Mũtongoria arĩtonyagĩra gĩthaku-inĩ gĩa kĩhingo kĩu,+ na akarũgama gĩtugĩ-inĩ gĩakĩo. Athĩnjĩri-Ngai marĩrutaga igongona rĩake igima rĩa njino na magongona make ma ũiguano, nake akainamĩrĩra itonyero-inĩ rĩa kĩhingo kĩu agacoka akoima. No kĩhingo gĩtiagĩrĩire kũhingwo nginya o hwaĩ-inĩ. 3 Andũ a bũrũri ũcio o nao nĩ marĩinamagĩrĩra mbere ya Jehova mũromo-inĩ wa kĩhingo kĩu mĩthenya ya Thabatũ na hĩndĩ ya tũrũgamo twa mweri.+

4 “‘Igongona igima rĩa njino rĩrĩa mũtongoria arĩrutagĩra Jehova mũthenya wa Thabatũ nĩ tũtũrũme tũtandatũ tũtarĩ kaũgũ na ndũrũme ĩmwe ĩtarĩ kaũgũ.+ 5 Igongona rĩa mũtu rĩrĩkoragwo rĩrĩ eba* ĩmwe nĩ ũndũ wa ndũrũme ĩyo na kĩrĩa angĩhota kũruta nĩ ũndũ wa tũtũrũme tũu, o hamwe na hini* ĩmwe ya maguta harĩ o eba.+ 6 Naguo mũthenya wa karũgamo ka mweri arĩrutaga gategwa kamwe kuuma rũũru-inĩ, tũtũrũme tũtandatũ, na ndũrũme ĩmwe; ciothe ciagĩrĩire gũkorũo itarĩ na kaũgũ.+ 7 Agĩrĩirũo kũruta igongona rĩa mũtu rĩa eba ĩmwe nĩ ũndũ wa gategwa kau, eba ĩmwe nĩ ũndũ wa ndũrũme, na kĩrĩa angĩhota kũruta nĩ ũndũ wa tũtũrũme tũu. Ningĩ nĩ agĩrĩirũo kũruta hini ĩmwe ya maguta harĩ o eba.

8 “‘Na rĩrĩa mũtongoria aratonya, agĩrĩirũo gũtonyera gĩthaku-inĩ gĩa kĩhingo kĩu, na noho agĩrĩirũo nĩ kuumĩra.+ 9 Ningĩ rĩrĩa andũ a bũrũri ũcio megũtonya mbere ya Jehova hĩndĩ ya ciathĩ,+ arĩa marĩtonyagĩra kĩhingo kĩa mwena wa rũgongo+ nĩguo mathiĩ magathathaiye magĩrĩirũo kuumĩra kĩhingo kĩa mwena wa mũhuro,+ nao arĩa marĩtonyagĩra kĩhingo kĩa mwena wa mũhuro magĩrĩirũo kuumĩra kĩhingo kĩa mwena wa rũgongo. Gũtirĩ mũndũ wagĩrĩirũo kuumĩra kĩhingo kĩrĩa egũtonyeire, nĩ gũkorũo magĩrĩirũo kuumĩra kĩhingo kĩrĩa kĩroranĩte na kĩrĩa matonyeire. 10 Nake mũtongoria ũrĩa ũrĩ gatagatĩ-inĩ kao, agĩrĩirũo gũtonya rĩrĩa maratonya, na akoima rĩrĩa maroima. 11 Hĩndĩ ya ciathĩ na ya ikũngũĩro, igongona rĩa mũtu rĩrĩkoragwo rĩrĩ eba ĩmwe nĩ ũndũ wa gategwa kau, eba ĩmwe nĩ ũndũ wa ndũrũme, na kĩrĩa angĩhota kũruta nĩ ũndũ wa tũtũrũme tũu, o hamwe na hini ĩmwe ya maguta harĩ o eba.+

12 “‘Mũtongoria angĩrutĩra Jehova igongona igima rĩa njino+ kana magongona ma ũiguano marĩ magongona ma kwĩyendera, agĩrĩire kũhingũrĩrũo kĩhingo kĩrĩa kĩrorete irathĩro, nake arute igongona rĩake igima rĩa njino na magongona ma ũiguano o ta ũrĩa arutaga mũthenya wa Thabatũ.+ Na aarĩkia kuuma, kĩhingo kĩagĩrĩire kũhingwo.+

13 “‘O mũthenya wagĩrĩirũo kũrutĩra Jehova gatũrũme kamwe gatarĩ kaũgũ karĩ mwaka-inĩ wako wa mbere karĩ igongona igima rĩa njino.+ Wagĩrĩirũo gwĩka ũguo rũcinĩ o rũcinĩ. 14 Ningĩ hamwe nako, o rũcinĩ nĩ wagĩrĩirũo kũrutaga gĩcunjĩ kĩmwe harĩ ithathatũ kĩa eba kĩrĩ igongona rĩa mũtu, o hamwe na gĩcunjĩ kĩmwe harĩ ithatũ kĩa hini ya maguta ma kũminjaminjĩria mũtu ũrĩa mũhinyu kĩrĩ igongona rĩa mũtu rĩa kũrutagĩrũo Jehova hingo ciothe. Ũcio nĩ watho wa gũtũũra ũrũmagĩrĩrũo. 15 No mũhaka marutage gatũrũme kau, igongona rĩa mũtu, na maguta o rũcinĩ irĩ igongona igima rĩa njino rĩa kũrutagwo hingo ciothe.’

16 “Jehova Mwathani Ũrĩa Mũnene oigĩte atĩrĩ: ‘Mũtongoria angĩhe ariũ ake othe kĩheo kĩrĩ igai, kĩheo kĩu gĩgaatuĩka kĩa ariũ ake. Nĩ magaĩte gĩgatuĩka kĩao. 17 No angĩhe ndungata ĩmwe yake kĩheo kuuma harĩ igai rĩake, gĩgaatuĩka kĩayo o nginya mwaka wa kũrekererio;+ thutha ũcio gĩgaacokerio mũtongoria ũcio. Igai rĩa ariũ ake norĩo rĩgaatũũra rĩrĩ rĩao. 18 Mũtongoria ndagaatunya andũ igai rĩao na njĩra ya kũmaingata mehere indo-inĩ ciao. Agĩrĩirũo kũhe ariũ ake igai kuuma harĩ indo ciake mwene, nĩguo gũtikanagĩe mũndũ o na ũmwe gatagatĩ-inĩ ka andũ akwa ũkaaingatwo kuuma indo-inĩ ciake.’”

19 Agĩcoka akĩndonyeria njĩra+ ĩrĩa yarĩ hakuhĩ na kĩhingo gĩa gũthiĩ rumu-inĩ iria nyamũre cia kũrĩĩra cia* athĩnjĩri-Ngai, iria ciarorete mwena wa rũgongo,+ na hau ngĩona handũ haarĩ mũico-inĩ wa mwena wa ithũĩro. 20 Akĩnjĩra atĩrĩ: “Haha nĩho athĩnjĩri-Ngai marĩtherũkagĩria igongona rĩa mahĩtia na igongona rĩa mehia, na nĩho marĩrugagĩra igongona rĩa mũtu,+ nĩguo matikoimage na kĩndũ magĩthiĩ nja ĩrĩa nene matigatũme ũtheru ũcio ũthiĩ kũrĩ* andũ.”+

21 Ningĩ akĩnyumia akĩndwara nja ĩrĩa nene na akĩndongoria ngĩhĩtũkĩra kona-inĩ iria inya cia nja ĩyo, na ngĩona atĩ haarĩ na nja ĩngĩ o kona-inĩ ya nja ĩyo nene. 22 Kona-inĩ icio inya cia nja ĩyo haarĩ na nja ingĩ nini, ciarĩ na ũraihu wa mĩkono 40,* na wariĩ wa mĩkono 30. Ciothe inya nĩ ciaiganaine.* 23 Kwarĩ na tũrũthingo gũthiũrũrũkĩria mwena wa thĩinĩ wa nja icio inya, na rungu rwa tũrũthingo tũu nĩ haakĩtwo kũndũ gwa gũtherũkĩria magongona. 24 Agĩcoka akĩnjĩra atĩrĩ: “Ici nĩcio nyũmba iria ndungata cia hekarũ itherũkagĩria magongona marĩa marutĩtwo nĩ andũ.”+