Kũguũrĩrio kwa Johana

10 Ningĩ ngĩona mũraika ũngĩ ũrĩ hinya agĩikũrũka kuuma igũrũ ahumbĩtwo itu na arĩ na mũkũnga-mbura mũtwe-inĩ wake, na ũthiũ wake wahaanaga riũa,+ namo magũrũ make makahaana itugĩ cia mwaki, 2 na guoko-inĩ gwake aanyitĩte gĩkũnjo kĩnini gĩkũnjũre. Na agĩkinyithia kũgũrũ gwake kwa ũrĩo iria-inĩ, no kwa ũmotho thĩ nyũmũ, 3 na akĩanĩrĩra na mũgambo mũnene o ta mũrũthi ũkũrarama.+ Na rĩrĩa aanĩrĩire, mĩgambo ya marurumĩ marĩa mũgwanja+ ĩkĩaria.

4 Rĩrĩa marurumĩ macio mũgwanja maaririe, ndarĩ hakuhĩ kwandĩka, no ngĩigua mũgambo kuuma igũrũ+ woiga: “Hinga na mũhũũri maũndũ marĩa marurumĩ macio mũgwanja moiga, na ndũkamaandĩke.” 5 Mũraika ũrĩa ndonete arũgamĩte iria-inĩ o na thĩ nyũmũ agĩtambũrũkia guoko gwake kwa ũrĩo na igũrũ, 6 na akĩĩhĩta na Ũrĩa ũtũũraga tene na tene,+ o we wombire igũrũ na indo iria irĩ thĩinĩ warĩo na thĩ na indo iria irĩ thĩinĩ wayo na iria na indo iria irĩ thĩinĩ warĩo,+ akiuga: “Gũtirĩ gweterera rĩngĩ. 7 No matukũ-inĩ marĩa mũraika wa mũgwanja+ agaakorũo akuhĩrĩirie kũhuuha karumbeta gake,+ hitho ĩrĩa theru+ aamenyithanirie ĩrĩ ũhoro mwega harĩ ngombo ciake anabii+ nĩ ĩkaahingio.”

8 Na ngĩigua mũgambo kuuma igũrũ+ wanjarĩria o rĩngĩ ũkiuga: “Thiĩ woe gĩkũnjo kĩu gĩkũnjũre kĩrĩa kĩrĩ guoko-inĩ kwa mũraika ũcio ũrũgamĩte iria-inĩ o na thĩ nyũmũ.”+ 9 Ngĩthiĩ kũrĩ mũraika ũcio ngĩmwĩra ahe gĩkũnjo kĩu kĩnini. Nake akĩnjĩra: “Kĩoe na ũkĩrĩe,+ na nĩ gĩgũtũma nda yaku ĩrũre, no kanua-inĩ gaku gĩgũkorũo na cama o ta ũũkĩ.” 10 Ngĩoya gĩkũnjo kĩu kĩnini kuuma guoko-inĩ kwa mũraika ũcio na ngĩkĩrĩa,+ na kanua-inĩ gakwa kĩarĩ na cama o ta ũũkĩ,+ no rĩrĩa ndakĩrĩire, nda yakwa ĩkĩrũra. 11 Nao makĩnjĩra atĩrĩ: “No mũhaka ũrathe o rĩngĩ ũhoro wĩgiĩ ikundi cia andũ na ndũrĩrĩ na thiomi na athamaki aingĩ.”