Kũguũrĩrio kwa Johana

14 Na rĩrĩ, ngĩcoka ngĩona Gatũrũme+ arũgamĩte Kĩrĩma-inĩ gĩa Zayuni,+ arĩ hamwe na andũ 144,000+ arĩa mandĩkĩtwo rĩĩtwa rĩake na rĩĩtwa rĩa Ithe+ mathiithi-inĩ mao. 2 Ngĩigua mũgambo ũkiuma igũrũ ũtariĩ ta mũgambo wa maĩ maingĩ na ta mũgambo wa marurumĩ manene; na mũgambo ũcio ndaiguire watariĩ ta wa aini maraina makĩhũũraga inanda ciao cia mũgeeto. 3 Na maainaga rwĩmbo rũtariĩ ta rwĩmbo rwerũ+ marĩ mbere ya gĩtĩ kĩrĩa kĩa ũnene na mbere ya ciũmbe iria inya irĩ muoyo+ na athuri,+ na gũtirĩ mũndũ ũngĩahotire kwĩruta rwĩmbo rũu o tiga acio 144,000,+ arĩa magũrĩtwo kuuma thĩ. 4 Acio nĩ arĩa matethahirie na atumia; nao nĩ thingi.+ Acio nĩ arĩa marũmagĩrĩra Gatũrũme o kũrĩa guothe athiaga.+ Maagũrirũo+ kuuma harĩ andũ matuĩke maciaro ma mbere+ harĩ Ngai na harĩ Gatũrũme, 5 na gũtirĩ maheeni moonekire tũnua-inĩ twao; matirĩ kameni.+

6 Na ngĩona mũraika ũngĩ akĩũmbũkĩra igũrũ gatagatĩ* arĩ na ũhoro mwega wa tene na tene nĩguo ahunjĩrie andũ arĩa maikaraga thĩinĩ wa thĩ, ndũrĩrĩ ciothe na mĩhĩrĩga na thiomi na ikundi cia andũ.+ 7 Na ooigaga na mũgambo mũnene atĩrĩ: “Mwĩtigĩrei Ngai na mũmũgooce, tondũ ithaa rĩake rĩa ituĩro nĩ ikinyu,+ nĩ ũndũ ũcio thathaiyai Ũrĩa wombire igũrũ na thĩ na iria+ o na matherũkĩro ma maĩ.”

8 Na mũraika ũngĩ wa kerĩ, akĩrũmĩrĩra akiuga: “Nĩ agwĩte! Babuloni Ũrĩa Mũnene+ nĩ agwĩte,+ ũcio ũratũmaga ndũrĩrĩ ciothe inyue ndibei ya merirĩria* ma ngomanio ciake itagĩrĩire!”*+

9 Na mũraika ũngĩ, wa gatatũ, akĩmarũmĩrĩra akiuga na mũgambo mũnene atĩrĩ: “Mũndũ o wothe angĩthathaiya nyamũ ĩyo ya gĩthaka+ na mũhianano wayo na ekĩrũo rũũri thiithi-inĩ wake kana guoko-inĩ gwake,+ 10 o nake nĩ akaanyua ndibei ya marakara ma Ngai ĩrĩa ĩgaaitĩrĩrũo gĩkombe-inĩ kĩa mangʼũrĩ Make+ ĩtatukanĩtio na kĩndũ, na nĩ akaaherithio na mwaki na ũbiriti+ arĩ mbere ya araika arĩa atheru na mbere ya Gatũrũme. 11 Nayo ndogo ya iherithia rĩao ĩtũũraga yambataga tene na tene,+ na mũthenya na ũtukũ matikoragwo na ũhurũko, acio mathathayagia nyamũ ĩyo ya gĩthaka na mũhianano wayo na mũndũ o wothe wĩkĩragwo rũũri rwa rĩĩtwa rĩayo.+ 12 Hau nĩho arĩa aamũre mabataraga ũkirĩrĩria,+ o acio mathĩkagĩra maathani ma Ngai na makarũmia biũ wĩtĩkio+ harĩ Jesu.”

13 Na ngĩigua mũgambo woima igũrũ ũkiuga, “Andĩka atĩrĩ: Gũkena nĩ arĩa akuũ, o acio makuaga marĩ na ũiguano na Mwathani+ kuuma rĩu gũthiĩ na mbere. Ũguo nĩguo roho ũkuuga, nĩ mahurũke mawĩra mao maritũ, tondũ maũndũ marĩa meekire mathiaga hamwe nao.”

14 Na rĩrĩ, ngĩcoka ngĩona itu rĩa rangi mwerũ, na haarĩ mũndũ watariĩ ta mũrũ wa mũndũ+ warĩikarĩire, arĩ na thũmbĩ ya thahabu kĩongo-inĩ gĩake na rũhiũ rũũgĩ rwa kũgetha guoko-inĩ gwake.

15 Mũraika ũngĩ akiuma harĩa hatheru ha hekarũ, akĩra ũcio waikarĩire itu rĩu na mũgambo mũnene atĩrĩ: “Ikia rũhiũ rwaku ũgethe, tondũ ithaa rĩa kũgetha nĩ ikinyu, nĩ gũkorũo magetha ma thĩ nĩ makũrũ biũ.”+ 16 Nake ũcio waikarĩire itu agĩikia rũhiũ rwake thĩinĩ wa thĩ, nayo thĩ ĩkĩgethwo.

17 Na mũraika o ũngĩ akiuma hau hatheru ha hekarũ kũu igũrũ, na o nake aarĩ na rũhiũ rũũgĩ rwa kũgetha.

18 Ningĩ mũraika ũngĩ akiuma kĩgongona-inĩ, na aarĩ na wathani igũrũ rĩa mwaki. Na akĩanĩrĩra ũcio warĩ na rũhiũ rũũgĩ rwa kũgetha na mũgambo mũnene akĩmwĩra: “Ikia rũhiũ rwaku rwa kũgetha na ũcokanĩrĩrie imanjĩka cia mũthabibũ wa thĩ, tondũ thabibũ ciaguo nĩ njĩru.”+ 19 Nake mũraika ũcio agĩikia rũhiũ rwake thĩinĩ wa thĩ na agĩcokanĩrĩria mũthabibũ wa thĩ, akĩũikia kĩhihĩro-inĩ kĩrĩa kĩnene kĩa ndibei kĩa marakara ma Ngai.+ 20 Kĩhihĩro kĩu kĩa ndibei gĩkĩrangarangwo nja ya itũũra, na thakame ĩkĩambata kuuma kĩhihĩro-inĩ kĩu kĩa ndibei ĩgĩkinya mĩkwa-inĩ ya kanua ka mbarathi, na ĩgĩtherema itĩna rĩa stadia 1,600.*