Kũrĩ Aroma
8 Nĩ ũndũ ũcio-rĩ, arĩa marĩ ũiguano hamwe na Kristo Jesu matigaatuĩrũo atĩ nĩ mahĩtĩtie. 2 Tondũ watho wa roho ũrĩa ũheanaga muoyo kũgerera Kristo Jesu nĩ ũmũkũũrĩte+ kuuma watho-inĩ wa mehia na wa gĩkuũ. 3 Ũndũ ũrĩa Watho waremirũo gwĩka+ tondũ ndwarĩ na hinya+ kũgerera mwĩrĩ, Ngai nĩ aawĩkire na njĩra ya gũtũma Mũrũ wake mwene+ arĩ na mũhianĩre wa mwĩrĩ ũrĩa wĩhagia+ na ũhoro-inĩ wĩgiĩ mehia, agĩgĩtuĩra mehia thĩinĩ wa mwĩrĩ, 4 nĩguo maũndũ ma ũthingu marĩa Watho uugĩte mahingio thĩinĩ witũ+ ithuĩ tũthiaga kũringana na roho no ti kũringana na mwĩrĩ.+ 5 Nĩ gũkorũo andũ arĩa matũũraga kũringana na mwĩrĩ maigaga meciria mao maũndũ-inĩ ma mwĩrĩ,+ no arĩa matũũraga kũringana na roho maigaga meciria mao maũndũ-inĩ ma roho.+ 6 Tondũ kũiga meciria maũndũ-inĩ ma mwĩrĩ kũrehaga gĩkuũ,+ no kũiga meciria maũndũ-inĩ ma roho kũrehaga muoyo na thayũ;+ 7 nĩ gũkorũo kũiga meciria maũndũ-inĩ ma mwĩrĩ kũrehaga ũthũ na Ngai,+ tondũ mwĩrĩ ndwathĩkagĩra watho wa Ngai o na ndũngĩwathĩkĩra. 8 Kwoguo arĩa mekaga kũringana na mwĩrĩ matingĩhota gũkenia Ngai.
9 No rĩrĩ, inyuĩ mwĩkaga kũringana na roho+ no ti kũringana na mwĩrĩ, angĩkorũo na ma roho wa Ngai nĩ ũikaraga thĩinĩ wanyu. No mũndũ o wothe angĩkorũo atarĩ na roho wa Kristo, mũndũ ũcio ti wake. 10 No angĩkorũo Kristo arĩ na ũiguano hamwe na inyuĩ,+ mwĩrĩ nĩ mũkuũ nĩ ũndũ wa mehia, no roho nĩ ũrehaga muoyo nĩ ũndũ wa ũthingu. 11 Angĩkorũo roho wa ũrĩa wariũkirie Jesu kuuma kũrĩ arĩa akuũ nĩ ũikaraga thĩinĩ wanyu, ũcio wariũkirie Kristo Jesu kuuma kũrĩ arĩa akuũ+ ningĩ nĩ arĩtũmaga mĩĩrĩ ĩyo yanyu ĩkuaga ĩkorũo muoyo+ kũgerera roho wake ũrĩa ũikaraga thĩinĩ wanyu.
12 Kwoguo-rĩ, ariũ a Ithe witũ tũrĩ na thiirĩ, no ti wa mwĩrĩ atĩ tũtũũrage kũringana na mwĩrĩ;+ 13 nĩ gũkorũo mũngĩtũũra kũringana na mwĩrĩ, no mũhaka mũgaakua; no mũngĩũraga ciĩko cia mwĩrĩ+ kũgerera ũteithio wa roho, nĩ mũgaatũũra muoyo.+ 14 Tondũ arĩa othe matongoragio nĩ roho wa Ngai, nĩ ariũ a Ngai kũna.+ 15 Nĩ gũkorũo mũtiaamũkĩrire roho wa ũkombo wa kũrehe guoya rĩngĩ, no mwaamũkĩrire roho wa kũmũtua ariũ, roho o ũrĩa ũtũmaga twanĩrĩre tũkoiga: “Abba,* Baba!”+ 16 Roho guo mwene nĩ ũrutaga ũira hamwe na roho witũ+ atĩ tũrĩ ciana cia Ngai.+ 17 Angĩkorũo tũkĩrĩ ciana-rĩ, ningĩ tũrĩ agai—agai a Ngai kũna, no tũrĩ agai+ hamwe na Kristo—akorũo nĩ tũkũnyamarĩka hamwe nake,+ nĩguo ningĩ tũgaatũũgĩrio hamwe nake.+
18 Nĩ gũkorũo nyonaga mĩnyamaro ya mahinda maya ĩtarĩ kĩndũ ĩringithanĩtio na riri ũrĩa ũkaaguũrio kũgerera harĩ ithuĩ.+ 19 Tondũ ũũmbi nĩ ũkoragwo wetereire mũno kũguũrio kwa ariũ a Ngai.+ 20 Nĩ gũkorũo ũũmbi nĩ waagithirio kĩene,+ ti ũndũ wa kwenda kwaguo, no nĩ kũgerera ũrĩa wawagithirie kĩene, kũrĩ na kĩĩrĩgĩrĩro 21 atĩ ũũmbi guo mwene o naguo nĩ ũgaakũũrũo+ kuuma ũkombo-inĩ wa kũbutha na ũheo wĩyathi ũrĩ na riri wa ciana cia Ngai. 22 Nĩ gũkorũo nĩ tũĩ atĩ nginya rĩu, ũũmbi wothe ũthiaga na mbere gũcaya hamwe na ũrĩ na ruo hamwe. 23 Na to ũguo tu, ĩndĩ o na ithuĩ ene arĩa tũrĩ na maciaro ma mbere, na nĩmo roho, ithuĩ ene nĩ tũcayaga thĩinĩ witũ+ o tũgĩetagĩrĩra mũno gũtuwo ariũ,+ kũrekererio kuuma mĩĩrĩ-inĩ itũ kũgerera ũkũũri. 24 Nĩ gũkorũo twahonokirio tũrĩ na kĩĩrĩgĩrĩro kĩu; no kĩĩrĩgĩrĩro kĩarĩkia kuoneka, ti kĩĩrĩgĩrĩro rĩngĩ, tondũ mũndũ arĩ kuona kĩndũ-rĩ, hihi no acoke gũkĩĩrĩgĩrĩra? 25 No tũngĩĩrĩgĩrĩra+ kĩndũ tũtarona,+ tũikaraga tũgĩetereire mũno tũrĩ na ũkirĩrĩria.+
26 Na njĩra o ta ĩyo, roho o naguo nĩ ũtũteithagĩrĩria kũrĩa tũtarĩ na hinya;+ tondũ thĩna nĩ atĩ tũtimenyaga maũndũ marĩa twagĩrĩirũo kũhoya ta ũrĩa tũbataire gwĩka, no roho guo mwene nĩ ũtũthaithanagĩrĩra na mũcayo ũtangĩgweteka. 27 No ũrĩa ũthuthuragia ngoro+ nĩ amenyaga ũrĩa roho ũrenda kuuga, tondũ roho ũthaithanagĩrĩra arĩa aamũre kũringana na wendi wa Ngai.
28 Nĩ tũĩ atĩ Ngai atũmaga mawĩra make mothe manyitanĩre hamwe nĩguo arĩa mendete Ngai magunĩke, o arĩa metĩtwo kũringana na muoroto wake;+ 29 tondũ arĩa aambire gwĩciria ũhoro wao nĩo ningĩ aatuire o mbere atĩ magaakorũo na mũhianĩre ta wa Mũrũ wake,+ nĩguo Mũrũ wake akorũo arĩ irigithathi+ gatagatĩ-inĩ ka ariũ aingĩ a Ithe.+ 30 Makĩria ma ũguo, acio aatuire o mbere+ nĩo ningĩ eetire;+ na acio eetire nĩo ningĩ aatuire athingu.+ Na mũthia-inĩ, arĩa aatuire athingu nĩo ningĩ aatũũgĩririe.+
31 Tũgũkiuga atĩa igũrũ rĩgiĩ maũndũ macio? Angĩkorũo Ngai arĩ hamwe na ithuĩ-rĩ, nũũ ũngĩtũũkĩrĩra?+ 32 Tondũ o na ndaagirĩrĩirie Mũrũ wake mwene anyamarĩke, no aamũneanire nĩ ũndũ witũ ithuothe-rĩ,+ na githĩ marĩ hamwe na mũrũ wake matigũgĩtũtuga na indo icio ingĩ ciothe? 33 Nũũ ũngĩthitanga andũ a Ngai arĩa athuure?+ Ngai Nĩwe ũmatuaga athingu.+ 34 Nũũ ũngĩmatuĩra? Kristo Jesu nĩwe wakuire, na makĩria ma ũguo, nĩwe wariũkirio, o we ũrĩ guoko-inĩ kwa ũrĩo kwa Ngai+ na ningĩ nĩwe ũtũthaithanagĩrĩra.+
35 Nũũ ũngĩtũtigithũkania na wendo wa Kristo?+ Hihi nĩ mathĩna kana mĩtangĩko kana kũnyarirũo kana ngʼaragu kana njaga kana ũgwati o na kana rũhiũ rwa njora?+ 36 O ta ũrĩa kwandĩkĩtwo atĩrĩ: “Tũũragagwo mũthenya wothe nĩ ũndũ waku; tũtuĩtwo ta ngʼondu cia gũthĩnjwo.”+ 37 No rĩrĩ, maũndũ-inĩ macio mothe nĩ tũtooragia biũ+ kũgerera ũrĩa watwendire. 38 Nĩ gũkorũo ndĩ na ũũma atĩ o na gĩkuũ kana muoyo kana araika kana thirikari kana maũndũ marĩa marĩ kuo rĩu kana maũndũ marĩa magooka kana mahinya+ 39 kana ũraihu wa na igũrũ kana ũriku kana ũũmbi ũngĩ o wothe, gũtirĩ kĩndũ kĩngĩhota gũtũtigithũkania na wendo wa Ngai ũrĩa ũrĩ thĩinĩ wa Kristo Jesu Mwathani witũ.