Marũa ma Mbere Kũrĩ Akorintho

15 Rĩu ariũ a Ithe witũ, ndĩramũririkania ũhoro ũrĩa mwega ndamũhunjĩirie,+ ũrĩa o na inyuĩ mwetĩkĩrire, na noguo mũtũire mũrũmĩtie. 2 Ningĩ kũgerera harĩ guo nĩ mũrahonokio mũngĩrũmia biũ ũhoro ũcio mwega ndamũhunjĩirie, tiga no gũkorirũo mwatuĩkire etĩkia o tũhũ.

3 Nĩ gũkorũo gatagatĩ-inĩ ka maũndũ ma mbere marĩa ndamũkinyĩirie nĩ marĩa o na niĩ ndamũkĩrire, atĩ Kristo aakuire nĩ ũndũ wa mehia maitũ kũringana na Maandĩko;+ 4 na atĩ nĩ aathikirũo,+ na akĩriũkio+ mũthenya wa gatatũ+ kũringana na Maandĩko;+ 5 na atĩ nĩ ooimĩrĩire Kefa,*+ agĩcoka akiumĩrĩra arĩa Ikũmi na Erĩ.+ 6 Thutha ũcio akiumĩrĩra ariũ a Ithe witũ makĩria ma 500 ihinda-inĩ rĩmwe,+ na aingĩ ao marĩ hamwe na ithuĩ nginyagia rĩu, o na gũtuĩka amwe nĩ makomete gĩkuũ-inĩ. 7 Na thutha ũcio akiumĩrĩra Jakubu,+ agĩcoka akiumĩrĩra atũmwo othe.+ 8 Akĩnyumĩrĩra o na niĩ+ ndĩ wa mũico ndariĩ ta mũndũ waciarĩtwo atarĩ mũkinyu.

9 Nĩ gũkorũo nĩ niĩ mũnini mũno harĩ atũmwo, na ndiagĩrĩire gwĩtwo mũtũmwo, tondũ nĩ ndanyaririre kĩũngano kĩa Ngai.+ 10 No nduĩkĩte ũguo ndariĩ kũgerera ũtugi mũnene wa Ngai. Na ũtugi ũcio wake mũnene ndonirio ndwarĩ wa tũhũ, no nĩ ndarutire wĩra mũingĩ gũkĩra acio angĩ othe; no ti niĩ, nĩ ũtugi mũnene wa Ngai ũrĩa ũrĩ hamwe na niĩ. 11 Nĩ ũndũ ũcio, o na kana nĩ niĩ kana nĩo-rĩ, ũguo nĩguo tũhunjagia, na ũguo nĩguo mwetĩkirie.

12 Rĩu angĩkorũo nĩ kũrahunjio atĩ Kristo nĩ ariũkĩte kuuma kũrĩ arĩa akuũ-rĩ,+ nĩ kĩĩ kĩratũma amwe gatagatĩ-inĩ kanyu moige atĩ gũtirĩ kũriũkio kwa arĩa akuũ? 13 Angĩkorũo kũna gũtirĩ kũriũkio kwa arĩa akuũ, Kristo ndakĩriũkĩtio. 14 Na angĩkorũo Kristo ndariũkĩtio, wĩra witũ wa kũhunjia ũkĩrĩ wa tũhũ, na wĩtĩkio wanyu o naguo nĩ wa tũhũ. 15 Makĩria ma ũguo, o na ithuĩ tũkĩrĩ aira a maheeni a Ngai,+ tondũ nĩ tũrutĩte ũira wĩgiĩ Ngai tũkoiga atĩ nĩ ariũkĩtie Kristo,+ na ndamũriũkĩtie angĩkorũo arĩa akuũ kũna matikaariũkio. 16 Tondũ angĩkorũo arĩa akuũ matikaariũkio, Kristo o nake ndariũkĩtio. 17 Ningĩ angĩkorũo Kristo ndariũkĩtio, wĩtĩkio wanyu nĩ wa tũhũ; mũtũũraga o mehia-inĩ manyu.+ 18 Ningĩ o nao arĩa makomete gĩkuũ-inĩ marĩ na ũiguano na Kristo nĩ mathirĩte.+ 19 Angĩkorũo kĩĩrĩgĩrĩro gitũ harĩ Kristo nĩ kĩa muoyo o ũyũ, ithuĩ tũkĩrĩ a kũiguĩrũo tha gũkĩra mũndũ ũngĩ o wothe.

20 No rĩu Kristo nĩ ariũkĩtio kuuma kũrĩ arĩa akuũ arĩ we maciaro ma mbere harĩ arĩa makomete gĩkuũ-inĩ.+ 21 Na tondũ gĩkuũ gĩokire kũgerera harĩ mũndũ,+ kũriũkio kwa arĩa akuũ o nakuo gũũkaga kũgerera harĩ mũndũ.+ 22 Nĩ gũkorũo o ta ũrĩa othe makuaga nĩ ũndũ wa Adamu,+ noguo othe magaacokio muoyo nĩ ũndũ wa Kristo.+ 23 No o mũndũ ihinda-inĩ rĩake mwene: Kristo arĩ we maciaro ma mbere,+ thutha ũcio, arĩa marĩ a Kristo hĩndĩ ya gũkorũo kuo gwake.+ 24 Thutha ũcio, mũico ũkinye, rĩrĩa akaaneana Ũthamaki kũrĩ Ngai wake, o we Ithe, arĩkĩtie kũniina thirikari yothe na wathani o na hinya wothe.+ 25 Nĩ gũkorũo no mũhaka agaathana arĩ mũthamaki nginya rĩrĩa Ngai akaaiga thũ ciothe rungu rwa makinya make.+ 26 Na thũ ya mũico ĩrĩa ĩkaaniinwo nĩ gĩkuũ.+ 27 Nĩ gũkorũo Ngai nĩ “aaigire indo ciothe rungu rwa makinya make.”+ No hĩndĩ ĩrĩa ekuuga atĩ ‘indo ciothe nĩ ciigĩtwo,’+ hatarĩ nganja icio ti hamwe na Ũrĩa waigire indo ciothe rungu rwake.+ 28 No rĩrĩa indo ciothe igaakorũo ciigĩtwo rungu rwake, hĩndĩ ĩyo Mũriũ we mwene o nake nĩ akeeiga rungu rwa Ũrĩa waigire indo ciothe rungu rwake,+ nĩguo Ngai akorũo arĩ maũndũ mothe harĩ andũ othe.+

29 Angĩkorũo tiguo-rĩ, gũgaathiĩ atĩa harĩ arĩa mabatithagio nĩguo makue?+ Angĩkorũo arĩa akuũ matikaariũkio o na atĩa-rĩ, o nao makĩbatithagio nĩkĩ nĩguo mahaane ũguo? 30 Nĩ kĩĩ gĩtũmaga o na ithuĩ tũkorũo ũgwati-inĩ o ithaa?*+ 31 Niĩ ngʼethagĩra gĩkuũ o mũthenya. Ũndũ ũcio nĩ wa ma o ta gĩkeno gĩakwa nĩ ũndũ wanyu ariũ a Ithe witũ, kĩrĩa ngĩĩte nakĩo thĩinĩ wa Kristo Jesu Mwathani witũ. 32 Angĩkorũo o ta andũ arĩa angĩ* niĩ ndanahũũrana na nyamũ cia gĩthaka Efeso-rĩ,+ ũndũ ũcio ũngĩngʼuna na kĩĩ? Angĩkorũo arĩa akuũ matikaariũkio, “nĩ tũkĩrĩei na tũnyue, tondũ rũciũ nĩ tũgaakua.”+ 33 Mũtikahĩtithio. Thiritũ njũru nĩ ithũkagia mĩtugo mĩega.+ 34 Arahũkai meciria-inĩ manyu na njĩra ya ũthingu na mũtikamenyere kwĩhagia, nĩ gũkorũo amwe matirĩ na ũmenyo wĩgiĩ Ngai. Ndĩraria nĩgetha mũigue mũconokete.

35 O na kũrĩ ũguo, mũndũ no orie atĩrĩ: “Arĩa akuũ makaariũkio atĩa? Magooka marĩ na mwĩrĩ wa mũthemba ũrĩkũ?”+ 36 Wee mũndũ ũyũ ũtarĩ na wĩcirio! Kĩrĩa wahanda gĩtigĩaga muoyo o tiga kĩambire gũkua. 37 Na ha ũhoro wa kĩrĩa wahanda, ndũhandaga mwĩrĩ ũrĩa ũgũkũra, no ũhandaga o mbegũ, ĩrĩ ya ngano kana mbegũ ya mũthemba ũngĩ; 38 no Ngai amĩheaga mwĩrĩ o ta ũrĩa ekwenda, na akahe o mbegũ mwĩrĩ wayo. 39 Mĩĩrĩ yothe ndĩhaanaine, no nĩ kũrĩ mwĩrĩ wa andũ, mwĩrĩ ũngĩ wa mahiũ, mwĩrĩ ũngĩ wa nyoni, na ũngĩ wa thamaki. 40 Na nĩ kũrĩ mĩĩrĩ ya igũrũ+ na mĩĩrĩ ya gũkũ thĩ;+ no mĩĩrĩ ya igũrũ ĩrĩ riri wa mũthemba ũmwe, na mĩĩrĩ ya gũkũ thĩ ĩrĩ riri wa mũthemba ũngĩ. 41 Riri wa riũa nĩ wa mũthemba ũmwe, na riri wa mweri nĩ wa mũthemba ũngĩ,+ naguo riri wa njata no wa mũthemba ũngĩ; na rĩrĩ, riri wa njata ĩmwe nĩ ngũrani na wa njata ĩngĩ.

42 Ũguo noguo kũrĩ harĩ kũriũkio kwa arĩa akuũ. Mwĩrĩ ũhandagwo ũrĩ wa kũbutha; ũkariũkio ũtarĩ wa kũbutha.+ 43 Ũhandagwo ũtekũheo gĩtĩo; ũkariũkio ũrĩ na riri.+ Ũhandagwo ũtarĩ na hinya; ũkariũkio ũrĩ na hinya.+ 44 Ũhandagwo ũrĩ mwĩrĩ wa nyama na thakame; ũkariũkio ũrĩ mwĩrĩ wa kĩĩroho. Angĩkorũo nĩ kũrĩ mwĩrĩ wa nyama na thakame-rĩ, o na wa kĩĩroho nĩ gũkĩrĩ. 45 Nĩ ũndũ ũcio nĩ kwandĩke atĩrĩ: “Mũndũ wa mbere, Adamu, agĩtuĩka mũndũ ũrĩ muoyo.”+ Adamu wa mũico agĩtuĩka roho wa kũheana muoyo.+ 46 O na kũrĩ ũguo, mwĩrĩ wa kĩĩroho tiguo wa mbere. Wa nyama na thakame nĩguo wa mbere, na thutha ũcio wa kĩĩroho. 47 Mũndũ wa mbere oimĩte gũkũ thĩ na ombĩtwo na rũkũngũ;+ mũndũ wa kerĩ oimĩte igũrũ.+ 48 Arĩa mombĩtwo na rũkũngũ matariĩ o ta ũcio wombirũo na rũkũngũ; nao arĩa a igũrũ, matariĩ o ta ũcio wa igũrũ.+ 49 Na o ta ũrĩa tũgĩĩte na mũhianĩre wa ũcio wombirũo na rũkũngũ,+ noguo tũkaagĩa na mũhianĩre wa ũcio wa igũrũ.+

50 No ngũmwĩra atĩrĩ ariũ a Ithe witũ, atĩ nyama na thakame itingĩgaya Ũthamaki wa Ngai, o na kũbutha gũtingĩgaya kwaga kũbutha. 51 Atĩrĩrĩ, nĩ ngũmwĩra hitho theru: Ti ithuothe tũgaakoma gĩkuũ-inĩ, no ithuothe nĩ tũkaagarũrũo+ 52 o rĩmwe ta kũbucia kwa riitho, hĩndĩ ya karumbeta ka mũico. Tondũ karumbeta nĩ gakaahuuhwo,+ nao arĩa akuũ mariũkio na mĩĩrĩ ĩtangĩbutha, na tũgarũrũo. 53 Tondũ mwĩrĩ ũyũ wa kũbutha no mũhaka wĩhumbe kwaga kũbutha,+ na mwĩrĩ ũyũ wa gũkua no mũhaka wĩhumbe kwaga gũkua.+ 54 No rĩrĩa mwĩrĩ wa kũbutha ũkeehumba kwaga kũbutha, na mwĩrĩ wa gũkua wĩhumbe kwaga gũkua, hĩndĩ ĩyo nĩrĩo uuge ũyũ mwandĩke ũkaahinga: “Gĩkuũ nĩ kĩmeretio tene na tene.”+ 55 “Atĩrĩrĩ wee gĩkuũ, ũhootani waku ũrĩ ha? Atĩrĩrĩ wee gĩkuũ, rũboora rwaku rũrĩ ha?”+ 56 Rũboora rũrĩa rũrehaga gĩkuũ nĩ mehia,+ naguo hinya wa mehia nĩ Watho.*+ 57 No nĩ ngatho kũrĩ Ngai, tondũ nĩ atũheaga ũhootani kũgerera Mwathani witũ Jesu Kristo!+

58 Nĩ ũndũ ũcio ariũ a Ithe witũ nyendete-rĩ, ikaragai mũrũmĩte,+ mũtegũthengeka, hĩndĩ ciothe mũrĩ na maũndũ maingĩ ma gwĩka+ wĩra-inĩ wa Mwathani, mũkĩmenyaga atĩ wĩra wanyu ti wa tũhũ+ ũhoro-inĩ ũkoniĩ Mwathani.