Marũa ma Mbere Kũrĩ Akorintho

4 Mũndũ agĩrĩirũo gũtuona tũrĩ ndungata cia* Kristo na aramati a hitho iria theru cia Ngai.+ 2 Ũhoro-inĩ ũcio-rĩ, aramati merĩgagĩrĩrũo gũkorũo marĩ ehokeku. 3 Niĩ ndionaga arĩ ũndũ wa bata mũno gũthuthurio nĩ inyuĩ kana nĩ igooti rĩa andũ. Ti itherũ, o na niĩ ndiĩthuthuragia. 4 Nĩ gũkorũo gũtirĩ ũndũ o na ũmwe njũĩ ingĩĩcukĩra. No ũguo ti kuuga atĩ ndĩ mũthingu; ũrĩa ũũthuthuragia nĩ Jehova.*+ 5 Nĩ ũndũ ũcio-rĩ, mũtigatuĩre+ kĩndũ o na kĩrĩkũ mbere ya ihinda rĩrĩa rĩagĩrĩire, o nginya Mwathani oke. Maũndũ ma hitho marĩa makoragwo nduma-inĩ nĩ akaamarehe ũtheri-inĩ, na amenyithanie methugunda ma ngoro, na hĩndĩ ĩyo o mũndũ nĩ akaamũkĩra kũgaathĩrĩrio gwake kuuma kũrĩ Ngai.+

6 Rĩu ariũ a Ithe witũ-rĩ, ndahũthĩra maũndũ macio harĩ niĩ na harĩ Apolo+ nĩguo inyuĩ mũgunĩke, nĩgetha kũgerera harĩ ithuĩ mwĩrute ũtaaro ũyũ: “Mũtikanagarare maũndũ marĩa maandĩke,” nĩguo mũtikanagĩe na mwĩtĩo,+ mũkonaga mũndũ ũmwe ta arĩ wa bata gũkĩra ũrĩa ũngĩ. 7 Tondũ rĩrĩ, nũũ ũtũmaga ũkorũo ũrĩ ngũrani na arĩa angĩ? Nĩ kĩĩ ũrĩ nakĩo ũtaamũkĩrire?+ Angĩkorũo nĩ kwamũkĩra waamũkĩrire-rĩ, nĩ kĩĩ kĩratũma wĩtĩe ta atarĩ kwamũkĩra waamũkĩrire?

8 Hihi nĩ kũigania mũiganĩtie? Hihi nĩ gũtonga mũtongete? Hihi nĩ gwathana mwambĩrĩirie gwathana mũrĩ athamaki+ ithuĩ tũtarĩ ho? Na arĩ korũo nĩ gwathana mwambĩrĩirie gwathana mũrĩ athamaki, nĩguo o na ithuĩ twathane hamwe na inyuĩ tũrĩ athamaki.+ 9 Nĩ gũkorũo ndĩrona ta Ngai atũigĩte ithuĩ atũmwo tũrĩ a mũico kuonanio kĩhaaro-inĩ ta andũ matuĩrĩirũo kũũragwo,+ tondũ tũtuĩkĩte kĩndũ gĩa kwĩrorerũo ta mũthaako harĩ thĩ,+ na harĩ araika o na harĩ andũ. 10 Ithuĩ tũrĩ irimũ+ tondũ wa Kristo, ĩndĩ inyuĩ mũrĩ ogĩ thĩinĩ wa Kristo; ithuĩ tũtirĩ hinya, no inyuĩ mũrĩ na hinya; nĩ mũheetwo gĩtĩo, no ithuĩ nĩ twagĩirũo gĩtĩo. 11 O nginya ithaa rĩrĩ, tũthiaga na mbere kũhũta,+ kũnyota,+ kwaga nguo cia kwĩhumba,* kũhũũrũo,+ kwaga ũikaro, 12 kũruta wĩra mũritũ na moko maitũ.+ Hĩndĩ ĩrĩa twarumwo, tũkarathima;+ twanyarirũo, tũgakirĩrĩria tũrĩ na wetereri;+ 13 rĩrĩa twacambio, tũgacokia tũhooreire;*+ tũtuĩkĩte o ta gĩko gĩa gũkũ thĩ, makũrũro ma indo ciothe, o nginya ũmũthĩ ũyũ.

14 Ndirandĩka maũndũ maya nĩguo ndĩmũconorithie, no nĩgetha ndĩmũtaare mũrĩ ciana ciakwa nyendete. 15 Tondũ o na mũngĩkorũo na areri* 10,000 thĩinĩ wa Kristo, hatarĩ nganja mũtirĩ na maithe maingĩ; nĩ gũkorũo thĩinĩ wa Kristo Jesu, niĩ nduĩkĩte ithe wanyu kũgerera ũhoro ũrĩa mwega.+ 16 Nĩ ũndũ ũcio-rĩ, ndĩramũthaitha mwĩgerekanagie na niĩ.+ 17 Nĩkĩo ndĩratũma Timotheo kũrĩ inyuĩ, tondũ nĩ mwana wakwa nyendete na mwĩhokeku thĩinĩ wa Mwathani. Ũcio nĩ ekũmũririkania mĩĩkĩre yakwa ya maũndũ* ũhoro-inĩ wĩgiĩ Kristo Jesu,+ o ta ũrĩa ndĩrarutana kũndũ guothe ciũngano-inĩ ciothe.

18 Andũ amwe nĩ magĩĩte na mwĩtĩo, magĩĩciria atĩ ndigooka kũrĩ inyuĩ. 19 No nĩ ngũka kũrĩ inyuĩ kahinda gatarĩ haraihu angĩkorũo ũcio nĩ wendi wa Jehova,* ti nĩgetha menye ũrĩa andũ acio etĩi moigaga, no nĩguo menye hinya wao. 20 Nĩ gũkorũo Ũthamaki wa Ngai ti ũhoro wa kwaria no nĩ ũhoro wa hinya. 21 Mũkwenda ũndũ ũrĩkũ? Mũkwenda njũke kũrĩ inyuĩ na rũthanju-ĩ,+ kana njũke na wendo na roho wa ũhooreri?