Ũhoro Mwega Ũrĩa Waandĩkirũo nĩ Mathayo
19 Rĩrĩa Jesu aarĩkirie kũheana ũhoro ũcio, akiuma Galili agĩthiĩ mĩhaka-inĩ ya Judea mũrĩmo wa Jorodani.+ 2 Ningĩ andũ kĩrĩndĩ kĩnene makĩmũrũmĩrĩra, nake akĩmahoneria kuo.
3 Na Afarisai magĩũka harĩ we marĩ na muoroto wa kũmũgeria, makĩmũũria ũũ: “Mũndũ nĩ agĩrĩirũo gũtigana na mũtumia wake nĩ ũndũ wa gĩtũmi o gĩothe?”+ 4 Akĩmacokeria atĩrĩ: “Kaĩ mũtathomete atĩ ũrĩa wombire andũ kuuma o kĩambĩrĩria aamombire marĩ mũndũrũme na mũtumia+ 5 na akiuga ũũ: ‘Nĩ ũndũ ũcio mũndũrũme nĩ agaatiga ithe na nyina manyitane na mũtumia wake, nao eerĩ matuĩke mwĩrĩ ũmwe’?+ 6 Nĩ ũndũ ũcio ti erĩ rĩngĩ, no nĩ mwĩrĩ ũmwe. Kwoguo-rĩ, arĩa Ngai anyitithanĩtie, mũndũ ndakanamatigithanie.”+ 7 Makĩmũũria ũũ: “Na nĩ kĩĩ gĩagĩtũmire Musa athane atĩ mũndũ ahe mũtumia wake marũa ma ndigano na matigane?”+ 8 Nake akĩmeera atĩrĩ: “Musa aamwĩtĩkĩririe mũtiganage na atumia anyu nĩ ũndũ wanyu kũũmia ngoro,+ no ũguo tiguo kwarĩ kuuma o kĩambĩrĩria.+ 9 Ngũmwĩra atĩrĩ, mũndũ o wothe angĩtigana na mũtumia wake nĩ ũndũ wa gĩtũmi kĩngĩ tiga nĩ ũndũ wa ngomanio itagĩrĩire* na ahikie ũngĩ, nĩ atharĩtie.”+
10 Arutwo makĩmwĩra ũũ: “Angĩkorũo ũguo nĩguo kwagĩrĩire harĩ mũthuri na mũtumia wake-rĩ, nĩ kaba kwaga kũhikania.” 11 Jesu akĩmeera: “Ti andũ othe mangĩhota gwĩka ũguo, tiga arĩa marĩ na kĩheo kĩu.+ 12 Tondũ andũ amwe magaga kũingĩra thĩinĩ wa kĩhiko nĩ ũndũ wa gũciarũo matariĩ ta andũ ahakũre, angĩ nao mahakũrĩtwo nĩ andũ, na nĩ kũrĩ angĩ maikaraga ta andũ ahakũre nĩ ũndũ wa Ũthamaki wa igũrũ. Ũrĩa ũngĩhota gũikara atarĩ kĩhiko-inĩ, nĩ aikare ũguo.”+
13 Thutha ũcio akĩreherũo twana nĩguo atũigĩrĩre moko na atũhoere, no arutwo ake magĩkaania arĩa maatũrehete.+ 14 No Jesu akĩmeera ũũ: “Rekei twana tũũke harĩ niĩ, na mũtikagerie gũtũgiria, nĩ gũkorũo Ũthamaki wa igũrũ nĩ wa arĩa matariĩ ta tuo.”+ 15 Agĩtũigĩrĩra moko na akiuma kũu.
16 Na rĩrĩ, mũndũ ũmwe agĩũka harĩ we akĩmũũria ũũ: “Mũrutani, njagĩrĩirũo gwĩka ũndũ ũrĩkũ mwega nĩguo ngoona muoyo wa tene na tene?”+ 17 Nake akĩmũũria atĩrĩ: “Nĩ kĩĩ gĩgũtũma ũnjũrie ũhoro wĩgiĩ ũndũ ũrĩa mwega? Kũrĩ o Ũmwe tu mwega.+ No angĩkorũo nĩ ũkwenda gũgaatonya muoyo-inĩ, athĩkagĩra maathani hingo ciothe.”+ 18 Akĩmũũria atĩrĩ: “Marĩkũ?” Jesu akĩmũcokeria: “Ndũkanoragane,+ ndũkanatharie,+ ndũkanaiye,+ ndũkanarute ũira wa maheeni,+ 19 tĩaga thoguo na nyũkwa,+ na no mũhaka wende mũndũ ũrĩa mũriganĩtie nake o ta ũrĩa wĩyendete wee mwene.”+ 20 Nake mwanake ũcio akĩmwĩra: “Maũndũ macio mothe ndũire nũmĩtie; nĩ ũndũ ũrĩkũ ndigairie?” 21 Jesu akĩmwĩra: “Ũngĩenda gũkinyanĩra,* thiĩ wendie indo ciaku ũhe athĩni, na nĩ ũkũgĩa na mũthithũ kũrĩa igũrũ;+ ũcoke ũũke ũtuĩke mũrũmĩrĩri wakwa.”+ 22 Rĩrĩa mwanake ũcio aaiguire ũguo, agĩthiĩ arĩ na kĩeha, nĩ gũkorũo aarĩ na indo nyingĩ.+ 23 Jesu agĩcoka akĩra arutwo ake ũũ: “Ngũmwĩra atĩrĩ na ma, ũgaakorũo ũrĩ ũndũ mũritũ harĩ mũndũ mũtongu gũtonya Ũthamaki-inĩ wa igũrũ.+ 24 Ningĩ ngũmwĩra atĩrĩ, nĩ ũndũ mũhũthũ harĩ ngamĩra gũtonyera karima ga cindano gũkĩra mũndũ mũtongu gũtonya Ũthamaki-inĩ wa Ngai.”+
25 Rĩrĩa arutwo maaiguire ũguo, makĩgega mũno, makĩũria ũũ: “Nũũ kũna ũngĩkĩhonokio?”+ 26 Jesu akĩmarora akĩmeera atĩrĩ: “Ũndũ ũcio ndũngĩhoteka harĩ andũ, no harĩ Ngai maũndũ mothe no mahoteke.”+
27 Petero agĩcoka akĩmũũria: “Atĩrĩrĩ, ithuĩ nĩ tũtigĩte indo ciothe na tũgakũrũmĩrĩra; tũkaaheo kĩĩ?”+ 28 Nake Jesu akĩmeera ũũ: “Ngũmwĩra atĩrĩ na ma, hĩndĩ ĩrĩa maũndũ makerũhio, rĩrĩa Mũrũ wa mũndũ agaaikarĩra gĩtĩ gĩake kĩa ũnene kĩrĩ na riri, inyuĩ mũnũmĩrĩire nĩ mũgaaikarĩra itĩ 12 cia ũnene, mũtuagĩre mĩhĩrĩga ĩrĩa 12 ya Isiraeli ciira.+ 29 Ningĩ mũndũ o wothe ũtigĩte nyũmba kana ariũ a nyina kana aarĩ a nyina kana ithe kana nyina kana ciana kana mĩgũnda nĩ ũndũ wa rĩĩtwa rĩakwa, nĩ ekwamũkĩra indo icio irĩ maita igana na nĩ akaagaya muoyo wa tene na tene.+
30 “No andũ aingĩ arĩa marĩ mbere magaatuĩka a thutha, nao arĩa marĩ thutha matuĩke a mbere.+