Ũhoro Mwega Ũrĩa Waandĩkirũo nĩ Mathayo
10 Na rĩrĩ, agĩta arutwo ake arĩa 12 na akĩmahe wathani igũrũ rĩa maroho moru,+ nĩgetha makaingata maroho macio na makahonia andũ mĩrimũ ya mĩthemba yothe na wathe wa mĩthemba yothe.
2 Maya nĩmo marĩĩtwa ma atũmwo acio 12:+ Wa mbere nĩ Simoni, ũrĩa wĩtagwo Petero,+ na Andrea+ mũrũ wa nyina; Jakubu mũrũ wa Zebedi na Johana+ mũrũ wa nyina; 3 Filipu na Batholomayo;+ Toma+ na Mathayo+ ũrĩa mwĩtia wa mbeca cia igooti; Jakubu mũrũ wa Alufayo; na Thadayo; 4 Simoni ũrĩa Mũkananayo;* na Judasi Mũisikariota, ũrĩa wacokire kũmũkunyanĩra.+
5 Jesu agĩtũma acio 12, na akĩmahe motaaro maya:+ “Mũtigathiĩ barabara-inĩ ya andũ a ndũrĩrĩ, na mũtigatonye itũũra-inĩ o rĩothe rĩa Asamaria;+ 6 ithenya rĩa ũguo, thiĩi kũrĩ ngʼondu iria ciũrĩte cia nyũmba ya Isiraeli mũtegũtigithĩria.+ 7 Na mũgĩthiĩ-rĩ, hunjiai mũkiugaga ũũ: ‘Ũthamaki wa igũrũ nĩ ũkuhĩrĩirie.’+ 8 Honagiai arĩa arwaru,+ riũkagiai arĩa akuũ, theragiai arĩa marĩ na mangũ, na mũingatage ndaimono. Mũheetwo tũhũ, heanagai tũhũ. 9 Mũtigakuue thahabu kana betha kana gĩcango mĩcibi-inĩ yanyu ya mbeca,+ 10 kana mondo ya irio nĩ ũndũ wa rũgendo, kana nguo igĩrĩ,* kana iratũ, kana mũtirima,+ nĩ gũkorũo mũruti wĩra nĩ agĩrĩire kũheo irio.+
11 “Na itũũra o rĩothe kana gĩcagi kĩrĩa mũrĩtonyaga, cariai mũndũ ũrĩa ũrĩ kuo wagĩrĩire, na mũikare kuo o nginya rĩrĩa mũkooima kuo.+ 12 Mwaingĩra nyũmba, geithiai ene mũciĩ ũcio. 13 Angĩkorũo nyũmba ĩyo nĩ yagĩrĩire, rekei thayũ ũrĩa mwamĩendera ũũke igũrũ rĩayo,+ no angĩkorũo ndĩagĩrĩire, rekei thayũ wanyu ũmũcokerere. 14 Na rĩrĩa mũndũ o wothe aga kũmwamũkĩra kana gũthikĩrĩria ndũmĩrĩri yanyu, mũkiuma kũu gwake mũciĩ kana itũũra-inĩ rĩu, ringithiai magũrũ manyu thĩ rũkũngũ rũitĩke.+ 15 Ngũmwĩra atĩrĩ na ma, bũrũri wa Sodomu na Gomora+ nĩ ũgeetiiria Mũthenya wa Ciira gũkĩra itũũra rĩu.
16 “Atĩrĩrĩ, ndĩramũtũma mũtariĩ ta ngʼondu gatagatĩ-inĩ ka njũi; kwoguo-rĩ, mwĩhũgagei o ta nyoka na mũkoragwo mũtarĩ na ũũru o ta ndutura.+ 17 Mwĩmenyagĩrĩrei andũ, tondũ nĩ makaamũneana magooti-inĩ+ na mamũhũũre iboko+ thunagogi-inĩ ciao.+ 18 Ningĩ nĩ mũgaatwarũo mbere ya mangavana na athamaki+ nĩ ũndũ wakwa, nĩguo mũrute ũira kũrĩ o, na kũrĩ ndũrĩrĩ.+ 19 No rĩrĩ, rĩrĩa makaamũneana, mũtikanatangĩke mũgĩciria ũndũ ũrĩa mũkuuga kana njĩra ĩrĩa mũkũuga nayo, nĩ gũkorũo nĩ mũkaaheo ũndũ ũrĩa mũkuuga o hĩndĩ ĩyo;+ 20 nĩ gũkorũo ti inyuiki mũgaakorũo mũkĩaria, no nĩ roho wa Ithe wanyu ũgaakorũo ũkĩaria kũgerera kũrĩ inyuĩ.+ 21 Ningĩ mũndũ nĩ akaaneana mũrũ wa nyina oragwo, na ithe wa mwana aneane mwana wake, na ciana nĩ igookĩrĩra aciari a cio na imoragithie.+ 22 Na nĩ mũgaathũũrũo nĩ andũ othe nĩ ũndũ wa rĩĩtwa rĩakwa,+ no ũrĩa ũgaakirĩrĩria* o nginya mũico nĩwe ũkaahonokio.+ 23 Mangĩkaamũnyarira itũũra-inĩ rĩmwe, ũrĩrai itũũra-inĩ rĩngĩ,+ tondũ ngũmwĩra atĩrĩ na ma, Mũrũ wa mũndũ agaakinya mũtarĩkĩtie gũthiũrũrũka matũũra-inĩ mothe ma Isiraeli.
24 “Mũrutwo ndakoragwo arĩ mũnene kũrĩ mũrutani wake, o na ngombo ti nene kũrĩ mwathi wayo.+ 25 Nĩ kũigaine harĩ mũrutwo gũtuĩka ta mũrutani wake, na ngombo gũtuĩka ta mwathi wayo.+ Angĩkorũo andũ nĩ metĩte mwene mũciĩ Beelizebubu-rĩ,*+ githĩ matigũgĩta andũ a mũciĩ wake ũguo o na makĩria? 26 Nĩ ũndũ ũcio-rĩ, mũtikanametigĩre, tondũ gũtirĩ ũndũ o na ũmwe mũhithe ũtakaguũrio na gũtirĩ hitho ĩtakamenyeka.+ 27 Maũndũ marĩa ndĩmwĩragĩra nduma-inĩ, moigei ũtheri-inĩ, na marĩa mũiguaga makiugwo na mĩheehũ, mahunjiei mũrĩ nyũmba igũrũ.+ 28 Na mũtigetigagĩre arĩa moragaga mwĩrĩ no matingĩhota kũũraga muoyo;*+ ithenya rĩa ũguo, mwĩtigagĩrei ũrĩa ũngĩhota kwananga muoyo na mwĩrĩ thĩinĩ wa Jehanamu.*+ 29 Githĩ tũnyoni twĩrĩ tũtiendagio gathendi kamwe ga thogora mũnini?* No gũtirĩ o na kamwe ga tuo kangĩgwa thĩ na Ithe wanyu age kũmenya.+ 30 Ĩndĩ nginya njuĩrĩ cia mĩtwe yanyu ciothe ikoragwo itarĩtwo. 31 Kwoguo-rĩ, mũtigetigĩre; inyuĩ mũrĩ a bata gũkĩra tũnyoni tũingĩ.+
32 “Nĩ ũndũ ũcio-rĩ, mũndũ ũrĩa wothe ũnyumbũraga mbere ya andũ,+ o na niĩ nĩ ngaamumbũra mbere ya Awa ũrĩa ũrĩ igũrũ.+ 33 No mũndũ wothe ũkaangaana mbere ya andũ, o na niĩ nĩ ngaamũkaana mbere ya Awa ũrĩa ũrĩ igũrũ.+ 34 Mũtigecirie atĩ ndokire kũrehe thayũ thĩinĩ wa thĩ; ndokire kũrehe rũhiũ rwa njora, no ti thayũ.+ 35 Tondũ ndokire kũrehe ngayũkano, mũndũ okĩrĩre ithe, na mũirĩtu okĩrĩre nyina, na mũtumia wa mũriũ okĩrĩre nyaciarawe.+ 36 Thũ cia mũndũ igaakorũo irĩ andũ a nyũmba yake mwene. 37 Mũndũ ũrĩa wendete ithe kana nyina kũngĩra ndagĩrĩire gũtuĩka mũrutwo wakwa, na ũrĩa wendete mũriũ kana mwarĩ kũngĩra ndagĩrĩire gũtuĩka mũrutwo wakwa.+ 38 Na mũndũ wothe ũtegwĩtĩkĩra gũkuua mũtĩ wake wa kũnyarirĩrũo* na anũmĩrĩre ndagĩrĩire gũtuĩka mũrutwo wakwa.+ 39 Ũrĩa ũgeragia kũhonokia muoyo wake nĩ akoorũo nĩguo, na mũndũ o wothe ũkũrũo nĩ muoyo wake nĩ ũndũ wakwa nĩ akaawona.+
40 “Ũrĩa wothe ũmwamũkagĩra inyuĩ nĩ anyamũkagĩra o na niĩ, na ũrĩa wothe ũnyamũkagĩra amũkagĩra nginya Ũrĩa wandũmire.+ 41 Ũrĩa wamũkagĩra mũnabii tondũ nĩ mũnabii akaaheo kĩheo kĩa mũnabii,+ na ũrĩa wamũkagĩra mũndũ mũthingu tondũ nĩ mũthingu akaaheo kĩheo kĩa mũndũ mũthingu. 42 Na mũndũ wothe ũheaga ũmwe wa aya anyinyi gĩkombe kĩa maĩ tu anyue tondũ nĩ mũrutwo wakwa, ngũmwĩra atĩrĩ na ma, ndarĩ hĩndĩ akoorũo nĩ kĩheo gĩake.”+